Yeshaya
38 Mu aa mafuku Ezekiya nkukumba na baadi pepi na kufua. Mutemuki Yeshaya muana a Amoze nkufika na nkumulungula’shi: “Yehowa bakula bino’shi: ‘Lungula ba mu nshibo mobe mianda yabadia kukita, muanda ofu; t’opanda nya.’” 2 Biabia Ezekiya nkutadiisha mpala yaye ku mudimba na nkubanga kuteka Yehowa’shi: 3 “Nakusendeela, Ô Yehowa tentekiesha namu biandi mutambukie kumpala kobe na lulamato, n’eshimba dioso na biandi mukite mianda ibuwa ku meso oobe.” Na Ezekiya nkubanga kudila ngofu.
4 Akupu eyi dia Yehowa dibafikile kui Yeshaya diamba’shi: 5 “Alukiila na olungule Ezekiya’shi: ‘Yehowa Efile Mukulu a nshobe kulu Davide bakula bino’shi: “Napusha luteko lobe. Namono mpolo yobe. Nalombasha bipua 15 ku muwa* oobe, 6 na nakupaasha obe na kino kibundi ku maasa a nfumu a Asiri na naluila kino kibundi ngoshi. 7 Kitunduilo akifiki kui Yehowa bua kukulesha’shi Yehowa alombasha eyi diadi muakule nyi nkino: 8 Nakitshi biashi muesheshe wa nguba awiki pa kikaamino* kia Akaze walukiile kunyima matabula ekumi.”’” Biabia muesheshe wa nguba nkualukila kunyima matabula ekumi abaudi upue kuika pa kikaamino.
9 Mianda ibaadi Nfumu Ezekiya a Yunda mufunde pabaadi na mukumbo na pabapandile ku mukumbo waye.
10 Nambile’shi: “Munkatshi mua mafuku a muwa wande
Ne na kiakutuela ku biibi bia mashama.*
Abankutshishua bipua biande bibashala.”
11 Nambile’shi: “Ntankamono Yah,* Yah mu nsenga ya bantu be na muwa.
Ntankatala dingi bantu
Pandi na bantu bashale mu mbalo ayimanaa mianda yoso.
12 Babakatusha na kushimuna kishalelo kiande
Nka bu kashibo k’epema ka mulami a mikooko.
Nafungu muwa wande nka bu muntu alukaa bilamba;
Bantshibi nka bu biabatshibaa kilamba kibabapudisha kuluka.
Kubanga kanya mpa na pabuidi botungunuka na kunfikisha ku nfudiilo.
13 Nashala muumine mpa na kunamashika.
Nka bu ntambue, atungunuka na kutshokola mifufua yande yoso;
Kubanga kanya mpa na pabuidi botungunuka na kunfikisha ku nfudiilo.
14 Nka bu kandalandala sunga kimusodia, nkuete kutungunuka na kudila;
Natungunuka na kukumba nka bu ekutshi.
Meso ande abakooko kutala muiyilu:
‘Ô Yehowa, ne mu dikienga dikata;
Nkuashe namu!’*
15 Ne kuakula kinyi?
Besamba nami na bakitshi.
Munda mua bipua biande bioso na katambuka na kuiyisha
Pa muanda wa dikienga diande di buulo.*
16 Ô Yehowa muntu oso e na muwa ku bukuashi bua bino bintu,*
Na kukiila kuabidi kikudi kiande ki na muwa.
Okakitshi bia’shi mpande na okandama na muwa.
17 Tala! Pa mutue pa kuikala mu butaale, nekeele na buulo bui bukopo;
Anka pa muanda we munfule,
We mundame buashi ntshituelanga mu buina bua kabutu.
We musumbule miluisho yande yoso kumongo kobe.*
18 Muanda Mashama* ta ngalombene kukutumbisha,
Lufu ta ndulombene kukusamuna.
Baba abayiki mu buina ta mbalombene kukulupila lulamato lobe.
19 Muntu e na muwa, muntu e na muwa mulombene kukutumbisha,
Nka bu bianebikitshi lelo.
She bana mulombene kulungula bana baye pabitale lulamato lobe.
20 Ô Yehowa mpaashe,
Na atukayimbi ngono yande na biombuanga bia mioshi
Mafuku oso a muwa wetu ku nshibo ya Yehowa.’”
21 Akupu Yeshaya nkuakula’shi: “Fikayi na mukate wa tukuba tua nfigiye tuume na nuiutuule pa kiuluanga buashi apande.” 22 Ezekiya nkuipusha’shi: “Nkitunduilo kinyi akilesha’shi nakaamina ku nshibo ya Yehowa?”