Yeshaya
43 Binobino, bino nyi bibakula Yehowa,
Mupangi oobe, Ô Yakobo, Yawa mukukite, Ô Isalele:
“Totshinanga, muanda ne mukukuule.
Nemukuitanyine muishina diobe.
We ande.
2 P’okidila mu mema, nakekala nobe,
Na p’okidila mu miela, tayikakuinyi.
P’otambukila mu kaalo, takakakutatshisha,
Sunga ndimi ya kaalo tayikakutatshisha.
3 Muanda ne Yehowa Efile Mukulu oobe,
Eselele a Isalele, Mupaashi oobe.
Ne mutuushe Ejipitu bu nkuulo bobe,
Ne mutuushe Etshopi na Seba pa mbalo yobe.
4 Muanda we muikale na muulo ku meso kuande,
We mupebue kinemo, na ne mukufule.
Biabia nakatuusha bantu pa mbalo yobe
Na miilo pa mbalo ya muwa* oobe.
5 Totshinanga, muanda ne nobe.
Nakafiki na lutandua* lobe kukatukila dia kutunduka nguba
Na nakenubungu kukatukila dia kupona nguba.
6 Nakalungula kunundu’shi: ‘Ebalekieele!’
Na kushi’shi: ‘Tuebalamanga.
Fika na bana bande balume kukatukila kula, na bana bande bakashi kukatukila ku nfudiilo kua nsenga,
7 Muntu oso ayitaminyibua muishina diande
Andi mupangie bua ntumbo yande,
Andi mubumbe na andi mukite.’
8 Tuusha bantu bekale ba mpofu, sunga biabadi na meso,
Na bekale ba nshikue, sunga biabadi na matui.
9 Miilo yoso ibungie mu mbalo imune,
Bantu bebungie pamune.
Nnanyi munkatshi muabo mulombene kuakula ino mianda?
Sunga’shi mbalombene kukita bia’shi tupushe mianda ya kumpala su?*
Batuushe tumonyi tuabo bua’shi bashinkamishe’shi mbabingie,
Sunga bapushe na bakule’shi’: ‘Mbia binyibinyi!’
10 “Nui tumonyi tuande,” Nyi abiakula Yehowa,
“Oolo, mufubi ande andi musangule,
Bua’shi nnunguukie na nuikale na lukumiino muandi*
Na nushinguule’shi ne mumune.
Kumpala kuande ta kubaadi kukitshibue mungi Efile Mukulu,
Na kunyima kuande takui su ngumune.
11 Ami ne Yehowa, takui mungi mupaashi nkukatusha ami.”
12 “Ami ne Yawa baadi muakule, mupaashe na muukishe
Pa kushi baadi efile muenyi munkatshi muenu.
Biabia nui tumonyi tuande,” Nyi abiakula Yehowa, “na ami ne Efile Mukulu.
13 Dingi, ami nekalaa nka mumune;
Na takui muntu mulombene kunyenga kintu su kimune mu eyasa diande.
Pankitshi muanda, nanyi mulombene kuiukutshishua?”
14 Yehowa, mukuudi eenu, Eselele a Isalele bakula bino’shi:
“Pa muanda wenu, nakatumu kiluilo ku Babilone na nakaponesha bibao bioso bia biibi,
Na Bena Kaldeya be mu mashuwa aabo, abakele misaase pa muanda wa dikienga.
15 Nnami Yehowa, Eselele eenu, Mupangi a Isalele, Nfumu eenu.”
16 Bino nyi bibakula Yehowa,
Yawa akitaa eshinda mu kalunga ka mema
Na eshinda mu mema aatunkatunka,
17 Yawa atuushaa etempu dia ngoshi na nfualasa,
Kiluilo kia basalayi pamune na bilobo bia ngoshi:
“Abakalala paashi na tabakabuuku.
Abakebashimi nka bu bi’abashimaa mushinga wa kimunyi autembe kaalo.”
18 “Tanutentekieshanga mianda ya kala,
Na tanutuulanga binangu ku mianda ya kala.
19 Talayi! Nkuete kukita muanda upia;
Ukuete kumena mpa na binobino.
Tanui beutundule su?
Nakakitshi eshinda mu kabaaka
Na miela mu kabaaka.
20 Nyema ya kisuku,
Miseu na bionyi bia otrishe, ayikantumbisha,
Muanda natuusha mema mu kabaaka,
Na miela mu kabaaka,
Bua’shi bantu bande, baba bandi musangule, batome,
21 Bantu banaadi mukite bua’mi nabene
Bua’shi baukishe ntumbo yande.
22 Anka tuemungitanyine, Ô Yakobo,
Muanda nemukutonde, Ô Isalele.
23 Tuemuntuadile mikooko bua milambu yobe yoso ya kushiika kaalo
Sunga kuntumbisha na milambu yobe.
Tshimukukitshishe pa bukopo bua’shi ontuadile kia buntu,
Sunga kukukokiesha na kukuteka oliba.
24 Tuemungudile elengie di na eshiko dibuwa na makuta oobe,
Na tuemungikutshishe na muimu wa milambu yobe.
Anka we mmunemeshe bushito na miluisho yobe
Na we munkokieshe na bilubilo biobe.
25 Ami nyi ashimaa bilubilo* biobe pa muanda wande,
Na ta nkatentekiesha miluisho yobe.
26 Ntentekieshe, muntu na muntu afikie na kilumbu bua’shi tusambe;
Akula biouku pabikutale bua kushinkamisha’shi we mubingie.
27 Nshobe kulu a kumpala baadi mukite miluisho,
Na bantu bobe abakuakuilaa* mbantombokiele.
28 Biabia nakekasha bakunkushi ba mbalo ya kishila bu be butete,
Na nakatuusha Yakobo bua’shi abutudibue
Na Isalele bua’shi akayibue.