Mukanda wa kumpala wa Kuilondena kua Mianda
24 Bino nyi bisaka bia bana ba Alona: Bana ba Alona babaadi Nadabe, Abihu, Eleazare na Itamare. 2 Anka, Nadabe na Abihu babafuile kumpala kua nshabo kufua, na tababaadi batande bana, kadi Eleazare na Itamare babatungunukile na kufuba bu ba tshite muakuidi. 3 Davide na Zadoke a mu bana ba Eleazare na Akimeleke a mu bana ba Itamare babaadi batshibuule bana ba Alona mu bisaka bua kuibapa mudimo ubaabadi na kia kukita. 4 Bu bibaadi bana ba Eleazare na ba nfumu bebungi kukila bana ba Itamare, babaadi bebatshibuule bino: Bana ba Eleazare babaadi na ba nfumu 16 ba mu bifuko bia bamashabo, na bana ba Itamare babaadi na ba nfumu 8 ba mu bifuko bia bamashabo.
5 Dingi, babelele bubale bua kuibatshibuula mu bisaka, kisaka kimune na kingi kisaka, muanda kubaadi bakunkushi ba mu mbalo ya kishila na bakunkushi ba mudimo w’Efile Mukulu a binyibinyi mu bana ba Eleazare na mu bana ba Itamare. 6 Akupu, Shemaya muana a Netanele mufundi a bena Levi bafundile mashina aabo kumpala kua nfumu, kua tshite muakuidi Zadoke, Akimeleke muana a Abiatare na kua ba nfumu ba bifuko bia ba tshite muakuidi na bia bena Levi, babasanguile kifuko kimune bua Eleazare na kifuko kimune bua Itamare.
7 Bubale bua kumpala bubaponene pe Yehoyaribe, bua kabidi pe Yedaya, 8 bua kasatu pe Arime, bua kananka pe Seodime, 9 bua katano pe Malikiya, bua kasamombo pe Miyamine, 10 bua musambobidi pe Akose, bua muanda pe Abiya, 11 bua kitema pe Yeshua, bua ekumi pe Shekania, 12 bua 11 bubaponene pe Eliashibe, bua 12 pe Yakime, 13 bua 13 pe Upa, bua 14 pe Yeshebeabe, 14 bua 15 pe Bilga, bua 16 pe Imere, 15 bua 17 pe Ezire, bua 18 pe Apisese, 16 bua 19 pe Petaya, bua 20 pe Yezikele, 17 bua 21 pe Yakine, bua 22 pe Gamule, 18 bua 23 pe Delaya, bua 24 pe Maziya.
19 Babaadi na kia kufuba mudimo wabo pabaabadi abatuele mu nshibo ya Yehowa muyile kuno kuilondena, babaadi abakitshi bino muyile bibaadi bibaleshe nkambua aabo Alona, nka bu bibaadi Yehowa Efile Mukulu a Isalele mumutumine eyi.
20 Na bena Levi babashadile mbano: Mu bana ba Amalame mubaadi Shubaele, mu bana ba Shubaele mubaadi Yedeya, 21 mu bana ba Rehabiya, Ishia nyi baadi nfumu, 22 mu bena Isala mubaadi Shelomote, na mu bana ba Shelomote mubaadi Yahate, 23 mu bana ba Ebrone Yeria nyi baadi nfumu, Amariya nyi baadi mumulondele, Yahaziyele a kasatu, Yekameame a kananka, 24 mu bana ba Uziele mubaadi Mika, mu bana ba Mika mubaadi Shamire. 25 Ishia baadi mukuabo na Mika, na mu bana ba Ishia mubaadi Zekariya.
26 Bana ba Merari babaadi: Maheli na Mushi, mu bana ba Yaziya, mubaadi Beno. 27 Mu bana ba Merari, Yaziya batandile Beno, Shohame, Zakure na Ibri, 28 mu bana ba Maheli, Eleazare nyi shibaadi mutande bana, 29 mu bana ba Kishe mubaadi Yeramele, 30 na bana ba Mushi babaadi: Maheli, Edere na Yerimote.
Bano nyi babaadi bana ba Levi muyile bifuko bia bamashabo. 31 Babaadi bele dingi bubale nka bu bibakitshine bakuabo bana ba Alona, babebuelele mu meso mua nfumu Davide, Zadoke, Akimeleke, na mua ba nfumu ba bifuko bia ba tshite muakuidi na bia bena Levi. Pabitale bifuko bia bamashabo, babaadi abakitshina mukulu mianda anka bu bibaabadi abakitshina mukinga.