Mukanda wa kumpala wa Kuilondena kua Mianda
17 Anka Davide kiashala mu nshibo yaye, balunguile mutemuki Natane’shi: “Talanga, ami ngiu ne mushale mu nshibo ikitshibue na mabaya a sedre, aku namu mushete wa kilombeno wa Yehowa ngushale mu bilamba bia mapema.” 2 Paapa Natane nkulungula Davide’shi: “Enda okakite kioso ki muishimba diobe, muanda Efile Mukulu a binyibinyi e nobe.”
3 Mu buabua bufuku, eyi dia Efile Mukulu dibafikile kui Natane diamulungula’shi: 4 “Enda okalungule mufubi ande Davide’shi: ‘Yehowa amba’shi: “Nta nobe angibakila nshibo yandia kushala nya. 5 Muanda ntambandile kushala mu nshibo kubanga efuku dinatuushile Isalele mu Ejipitu mpa na lelo uno, anka naadi mutungunukie na kushala mu tushibo tua mapema, nakatuka mu uno tabernakele nakashala mu ungi. 6 Munda mua mafuku oso anaadi nende na bena Isalele boso, tanalunguile umune a ku ba nsushi ba Isalele banaadi mutuule bua kulama muilo wande’shi: ‘Buakinyi tue mungibakile nshibo ya mabaya a sedre?’”’
7 Biabia olungule mufubi ande Davide’shi: ‘Yehowa a biluilo amba bino: “Naadi mukuate mu mapia muboodi olama mikooko, bua kufika mukunkushi a muilo wande wa Isalele. 8 Nekala nobe koso kuende, na nakakatusha beshikuanyi bobe boso kumpala kobe, nakakitshi bia’shi eshina diobe diende nkumo nka bu mashina a bantu bakata ba pa nsenga. 9 Nakasangula mbalo bua muilo wande wa Isalele na nebatuule muanka, abakemushala kushi muntu a kuibakalakasha dingi, na bantu bebubi tabakebakiengiesha’nyi dingi bu mu mafuku a kala, 10 kubanga mu mafuku anaadi mutuule ba nsushi bua kukunkusha muilo wande wa Isalele. Na nakatuulu beshikuanyi bobe boso ku matalua oobe. Dingi, nakuukisha’shi: ‘Yehowa akakuibakila nshibo.’*
11 “‘“Apakafiki mafuku oobe ku nfudiilo na p’okalala bua kuikisha na ba nkambua bobe, paapa nakebuesha lutandua lobe kunyima kobe, umune a ku bana bobe, na nakanyingisha bufumu buaye. 12 Aye nyi akangibakila nshibo na nakanyingisha nkuasa aaye a bufumu bua loso. 13 Nakekala nshaye, aye namu akekala muana ande. Ntankakatusha kifulo kiande kia lulamato kuadi bu binaadi muikikaashe kui muntu baadi kumpala kobe. 14 Nakakitshi bia’shi ashale mu nshibo muande na mu bufumu buande bua loso, na nkuasa aaye a bufumu ashala bua loso.””’
15 Natane nkulungula Davide ano mayi oso na kino kimonua kioso kibamuene.
16 Paapa Nfumu Davide bafikile, aye nkushala mu nsenga kumpala kua Yehowa, nkuakula’shi: “Ô Yehowa Efile Mukulu, ami ne’nyi? Na kifuko kiande ki kinyi bodia kuntuala kula kui biabia? 17 Kukatusha biabia, obe Efile Mukulu we mundungule dingi’shi, kifuko kia mufubi oobe akikayisha ngofu mu mafuku e kumpala, na bongata bu muntu mukumbene kinemo kikile bukata, Ô Yehowa Efile Mukulu. 18 Ami mufubi oobe Davide ne kukulungula dingi kinyi bua kinemo kibompa, bu bionguku kalolo ami mufubi oobe? 19 Ô Yehowa, we mukitshine mufubi oobe ino mianda yoso ikata mu kuipushena na abikuminanga eshimba diobe, pa kuleesha bukata bobe. 20 Ô Yehowa takui muntu su ngumune e biodi, na takui ungi Efile Mukulu, kukatusha nka penda obe. Mianda yoso yatudi bapushe ayibishinkamisha. 21 Na ngungi muilo kinyi wa pa nsenga wi bu muilo oobe wa Isalele? Efile Mukulu a binyibinyi bayile aye nkuibakuula bu muilo waye. We muukishe eshina diobe p’obe kukita mianda ikata na ya kukaanya, bobingile bisamba kumpala kua muilo oobe ubodi mukuule mu Ejipitu. 22 Bodi muikashe muilo wa Isalele bu muilo oobe’be nabene bua loso, na obe nkufika bu Efile Mukulu aabo, Ô Yehowa! 23 Binobino Ô Yehowa, olombashe namu mulayilo oobe oodi mulee mufubi oobe na kifuko kiaye bua loso, na okite namu mianda nka bu biodi mulee. 24 Eshina diobe dikale dia kukulupilua na ditumbishibue bua loso, bua’shi bantu bakule’shi: ‘Yehowa a biluilo, Efile Mukulu a Isalele nyi Efile Mukulu kui Isalele binyibinyi,’ na kifuko kia mufubi oobe Davide kinyingishibue namu kumpala kobe. 25 Muanda obe Efile Mukulu ande we mufumbuile mufubi oobe kepatshila kobe ka kumuibakila nshibo. Nyi buakinyi mufubi oobe banyingi eshimba bua kukita luno luteko kodi. 26 Binobino, Ô Yehowa, we Efile Mukulu a binyibinyi, na we mulee mufubi oobe ino mianda i buwa. 27 Bikulongamine namu bua kuelela kifuko kia mufubi oobe miabi, na kitungunukie na kuikala kumpala kobe bua loso. Muanda obe, Ô Yehowa we muikielele miabi, na nkiedibue miabi bua loso.”