Mueshi wa 5

Kipupa kikata kia nsala kibatuelele “mu nsenga ishima.” Kino kipupa kia nsala kibaadi kikuate mpaa na bena Kidishitu ba mu siekele a kumpala. Banda kunangushena bibaabadi abakiengie muanda wa kino kipupa kikata kia nsala. Kushi mpaka, ba mfumu ba bifuko babaadi abekalakasha pabitale mushindo wabadi balombene kupa ba mu nshibo muabo bidibua. Na bibaadi naminyi bua ba nsongua babaadi na mpango ya kutamisha mudimo wabo wa bulungudi? Babaadi balombene kuiyipusha’shi abitungu tutengiele mpaa na apakapuila kino kipupa kia nsala bua kukita uno mudimo wa bulungudi su? Bena Kidishitu babaadi beubidishene na uno nshalelo abaabadi naye. Babaadi batungunukie na kulungula mukandu wi buwa muyile mushindo ubaabadi nao, na babaadi na muloo wa kuiabishena bintu biabo na balanguidi nabo ba mu Yuda. (Bik. 11:29, 30) Booso babapetele buabua bukuashi bua biabia bintu, babamuene’shi, Yehowa be bakuasha. (Mat. 6:31-33) Babaadi bepushe peepi na bakuabo balume na bakashi, babaadi bafikie bua kuibakuasha. Bano babaadi batushe bia buntu sunga bano babaadi bakite uno mudimo, babaadi bamone bi muloo aufikaa mu kupaana.​—Bik. 20:35. w23.04 16 ¶12-13

Ingi nsaa, Yehowa aluulaa ku nteko ya bafubi baaye pa kutakula bantu bashi balanguidi baaye buabadia kuibakuasha. Bu kileshesho, baadi mutakule Nfumu Artakesese buadia kulekiela Neemiya alukiile ku Yelusaleme, na kumukuasha na bintu biadi mulombene nkebakuula kibundi. (Ne. 2:3-6) Lelo uno namu, Yehowa mmulombene kutakula baaba bash’abamulanguila buabadia kufika mu kuitukuasha nsaa yatudi mu lukalo. Nteko yetu t’ayipetaa ngaluulo mu kipaso kia bu kilengieleshi nya. Anka ngaluulo yetu atuiyipetaa nka penda bua kiakia kiatudi nakio lukalo bua kushaala na lulamato kui Nshetu e muiyilu. Biabia ikala mupasukie bua kumona mushindo awaluulaa Yehowa ku nteko yobe. Ku nsaa na nsaa, tuikale atuimana bua kunangushena ku mushindo witualuule Yehowa ku nteko yetu. (Mis. 66:19, 20) Atulesha lukumiino kushi penda pa kuela nteko yetu kui Yehowa, kadi atulesha dingi pa kukumiina ngaluulo ya ku nteko yetu mu mushindo ooso w’aluula ku yaya nteko.​—Eb. 11:6. w23.05 11 ¶13; 12 ¶15-16

Pabatudi belambule atue banabene kui Yehowa, tubaadi bakite mutshipo wa kumulanguila na kukita kikiebe ki’eshimba diaye. Abitungu tutungunukie na kulombasha mutshipo wetu. Kuikala na nshalelo muipushene na kuilambula kuetu mbushito bui na muulo. Mu kuakula kua kalolo, Yehowa baadi muitupangie bua kukita kikiebe ki’eshimba diaye. (Kbf. 4:11) Mmuitupangie ku kifuanyi kiaye na lukalo lua kumuiwuka na kumulanguila. Bu kipeta, tui na mushindo wa kuifubuila peepi naye na atupete muloo patukitshi kikiebe ki’eshimba diaye. Na dingi p’atukitshi kikiebe ki’eshimba di’Efile Mukulu na kulonda Muana aaye, “atunyingishiibwa” atue banabene. (Mat. 11:28-30) Biabia, nyingisha kifulo kiobe bua Yehowa pa kunangushena ku bintu bioso bi buwa biadi mukukitshine na miabi yadi mukutudile. Apanyiisha kutama kifulo kiobe bu’Efile Mukulu, abikala bikubofuile bodia kumukookiela. (1 Yo. 5:3) Yesu baadi mobeshe kukita bino p’aye kukita kikiebe ki’eshimba di’Efile Mukulu muanda baadi atekie bukuashi kui Yehowa na kutungunuka na kutuula binangu biaye kuifuto. (Eb. 5:7; 12:2) Nka bu Yesu, teka Yehowa akupe bukome bua’shi otungunukie na kulama lukulupilo lua muwa wa ikalaika mu binangu biobe. w23.08 27-28 ¶4-5

Atue booso tui bafule bantu be na luishinko. Atunemekaa baaba booso abatengiela kintu kampanda kushi kufiita munda. Tui bafule bangi bantu p’abekala na luishinko kuatudi nsaa y’atuibakistshina bilubilo. Na dingi, tui na lutumbu lukata bu bibaadi balongieshi betu ba Bible na luishinko kuatudi, nsaa ibaatudi atuikitshisha bua kulonga, bua kukumiina sunga bua kutumikila malongiesha a mu Bible. Kukatusha biabia, atutumbula Yehowa Efile Mukulu bua luishinko luadi nalo kuatudi! Sunga mbiabia, atuataa luishinko lua bangi na muulo, anka atue banabene t’abikambaa kuitubofuila nsaa yooso buatudia kuikala na luishinko. Bu kileshesho, tui kuikitshisha bua kushaala baumiine nsaa yatudi mu mulongo bua kutengiela kintu kampanda, bikishekishe su nsaa ibaapu kukila. Ingi nsaa tui kukutua luishinko nsaa y’abetuluishiisha kui bangi bantu. Na dingi ingi nsaa bi kuituelela bukopo bua kutengiela mulayilo wa Yehowa wa nsenga ipia. Biabia, mu ino mianda yooso, tui na lukalo na luishinko lui bungi. w23.08 20 ¶1-2

Yehowa balunguile Gideone buadia kualusha basalayi be bungi ku mashibo kuabo. Gideone baadi anangushena namu’shi: ‘Kuno kushintuluka kui na muulo? Sunga kuamba’shi uno mudimo wi bukopo?’ Nya, Gideone bakookiele. Lelo uno bakulu abitungu bambule Gideone pa kuiwubidishena na kushintuluka kooso na buludiki bua mu ndumbuluilo a Yehowa. (Eb. 13:17) Gideone baadi mukookiele Yehowa sunga mbibaadi atshiinyi na bibaadi mudimo waye wi masaku. (Bans. 9:17) Kunyima kua kupeta kishinkamiisho akifiki kui Yehowa, Gideone baadi muukie’shi Efile Mukulu amukuatshishena bu biakuete kukaluila muilo w’Efile Mukulu. Bakulu bashaale mu ma mbalo abadi bakandikie mudimo wetu, ambulayi Gideone. Bakulu bakuete kuimeena bisangilo na mudimo wa bulungudi sunga mbia bakuete kuibakitshiina mianda ibubi, kuibakuata, kuibasambisha, kushimisha midimo yabo mpaa na kuibakupila. Mu mpombo ikata, bakulu abakekala na lukalo n’eshimba dinyingie buabadia kukookiela ku buludiki buabakapete. Sunga kulonda buno buludiki kuebafuishiisha masaku. w23.06 5-6 ¶12-13

Yehowa baadi mufundishe bikitshino bioso bi buwa bia Tshite-muakuidi Yekoyada mu Bible bua’shi bitulongieshe. (Lom. 15:4) Na dingi nsaa ibafuile Yekoyada, babaadi bamupe kineemo ki pabuakio, “abamushîkile pa mashâma âbáshîkanga banfumu e mu kipindji kya Yelusalema akîtâminwa bu kibalo kya Ndafidi, muanda bakitshinyîne bena Isalêle bi buwa na kutumbisha Efile Mukulu na Nshibo yê.” (2 Mya. 24:15, 16, EEM) Muanda wa Yekoyada ngulombene kukuasha ooso a kuatudi buadia kuikala atshiinyi Efile Mukulu. Abitungu bakulu mu tukongie bambule Yekoyada p’abo kushaala bapasukie na kulama mikooko y’Efile Mukulu na lulamato looso. (Bik. 20:28) Bantu banunu mbalombene kulongiela kui Yekoyada nsaa y’abatshiinyi Yehowa na kushaala na lulamato. Muanda Yehowa mmulombene kuibafubisha bua kulombasha kikiebe ki’eshimba diaye. Ba nsongua nui balombene kulamiina mushindo ubaadi Yehowa mukitshiine Yekoyada mianda, na kumuambula pa kukitshiina bantu banunu mianda na lulamato na kuibapa kineemo na kuibaneemeka, bikishekishe baaba babapu kufubila Yehowa na lulamato munda mua mafuku e bungi. (Nki. 16:31) Biabia tukuatshisheneyi “bakunkushi betu” na lulamato looso pa kui bakookiela.​—Eb. 13:17. w23.06 17 ¶14-15

Su we mu bisangilo, fubisha lushinguluilo nsaa yuata kitshibilo kia kutuusha ngaluulo yobe. Su tuekadika atuibuesha mboko muiyilu misuusa i bungi, yawa akunkusha e kumona nka bu atue abamukitshisha bua’shi, ekadikie etusangula nka atue misuusa i bungi, aku namu bangi tabapetele mushindo wa kualuula. Bino mbilombene kutshobolosha bangi bakutua kuela maboko aabo muiyilu. (Mul. 3:7) Su balungudi be bungi bebuesha maboko aabo muiyilu patukuete kulonga, ta tui balombene kutuusha ngaluulo i bungi bu bi’atukumiinanga nya. Ingi nsaa, mukunkushi mmulombene kukutua mushindo wadia kuitusangula atue booso. Biobino abinyongoshaa, anka tatukumanga kuibiata bu muanda wa pa bupenka nsaa yabashi betusangule bua kutuusha ngaluulo. (Mul. 7:9) Su tue mupete mushindo wa kutuusha ngaluulo i bungi bu bi’okumiinanga, buakinyi tue kuteemesha kalolo bangi p’abaluula bua’shi kunyima kua bisangilo webatumbula bua ngaluulo yabo? Bakuenu balume na bakashi, pangi be kuata lualua lutumbu lobe bu kunyingishibua kukata, nka bu bibadia kuibanyingisha ngaluulo yobe ibodia kutuusha. w23.04 23-24 ¶14-16

Elongiele Eyi di’Efile Mukulu na kunangushena ku biolongo muanka. Nka bia kunyinga mutshi su wanyiisha kuela mishi yawo muushi mua nsenga ngofu, tui kushaala banyingie su lukumiino luetu luamena mishi Muiyi di’Efile Mukulu. Apanyiisha kukula mutshi, na mishi yawo namu ayinyiisha kutuela mu nsenga ngofu na ayinyiisha kuenda kui bula. P’atuilongiela Eyi di’Efile Mukulu na kunangushena, atunyingisha lukumiino luetu na atutamisha kishinkamiisho kietu kia’shi mashinda a Efile Mukulu e buwa. (Kol. 2:6, 7) Nangushena mushindo awitulongieshaa Yehowa, w’etukunkushaa, na kukaluila kuaye bibaakudi kukuashe bafubi baye ba kala. Bu kileshesho, Ezekiele baadi mutuule binangu biaye kui muikeyilu baadi apimi ntempelo kalolo abamuene mu kimonua. Kino kimonua kibaadi kinyingishe Ezekiele, na akitupa malongiesha atookane pabitale mushindo watudia kukookiela mayi a kulonda a Yehowa bua lulanguilo lui selele. (Es. 40:1-4; 43:10-12) Abitukuasha dingi p’atuata nsaa ya kulonga na kunangushena pabitale mianda ikata i Muiyi di’Efile Mukulu. Tui kuikala n’eshimba dinyingie, p’atukulupila nka mui Yehowa.​—Mis. 112:7. w23.07 18 ¶15-16

Mu Bible mui bileshesho bia bana balume bi bungi bi buwa bia kuambula. Bano bana balume boso ba kala babaadi bafule Efile Mukulu na babaadi na mashito elekeenelekeene pababaadi abakunkusha muilo waye. We kupeta dingi bileshesho bi buwa bia bana balume banyingie mu kikudi munkatshi mua kifuko kiobe na mu kakongie keenu. (Eb. 13:7) Na dingi we na kileshesho kipuidikie kia Yesu Nkidishtu. (1 Mp. 2:21) P’anulongo bino bileshesho kalolo, talayi ngikashi i buwa ya bano bana balume. (Eb. 12:1, 2) Dingi atayi kitshibilo kia mushindo wanudi balombene kuambula bano bana balume. Muntu e na ngobesha ya kunangushena, t’akitaa mianda lubilo lubilo. Kadi anangushenaa kalolo kumpala kuadia kuata kitshibilo kia kiadia kukita. Biabia, ekitshisheyi ngofu buanudia kupeta ino ngobesha na kuiyilama. Bangayi kulonga mayi a kulonda a mu Bible na kunangushena pabitale mushindo waadi alombene kuinukuasha. Dingi kufubisha ano mayi a kulonda kui kuinukuasha buanudia kuata bitshibilo abisankisha Yehowa. (Mis. 119:9) Dino ngi etabula di na muulo buanudia kufika bu balume bena Nkidishitu banyingie mu kikudi.​—Nki. 2:11, 12; Eb. 5:14. w23.12 24-25 ¶4-5

Baledi mbalombene kulongiesha bana baabo buabadia kualuula na kupopeela nsaa y’abapete nkalakashi ya mianda yabadi bakumiine. (Yak. 3:13) Bangi baledi abakitaa maasha a kileshesho nsaa yabadi mu lulanguilo lua mu kifuko. Abataluulaa mianda ilombene kutuuka ku kalaasa, abeyisambila na kumona bia kutuusha ngaluulo. Na abalongieshaa bana baabo bia kuakula na kupopeela, mu mushindo wibuwa. Kukita maasha a bileshesho nkulombene kukuasha bena Nkidishitu buabadia kupatuluila bangi na kushinkamisha kooso, na kuikala bashinkamishe abo banabene’shi be na tubingilo tua kukumiina yaya mianda. Mu jw.org mui miisambo pa mbalo ifunde’shi: “Nkonko ya ba nsongwa,” mu yaya miisambo mui mpaa na Masaki a kulonga nao bwa bana be mu bipwa Ekumi na bungi. Bino bioso mbikitshibue bua kukuasha ba nsongua bua’shi banyingishe lukumiino luabo, na buabadia kualuula mu bishima biabo abo banabene. P’atulongo ino misambo yooso mu kifuko, atuuku bia kukaluila lukumiino luetu na kupopeela mu mushindo wibuwa. w23.09 17 ¶10; 18 ¶15-16

Toopuile kuata kepatshila ka mu kikudi na we kitshisha bua kuikalombasha su? Su mbiabia, tue bupenka’be. Bu kileshesho, Philip baadi akumiina kulumbuula nteko yaye na bungi bua misuusa yadia kuteka, anka baadi ekitshisha buadia kupeta nsaa ya kuikala atekie. Kepatshila ka Erika kabaadi ka kuikala afiki ku bisangilo bia mudimo wa bulungudi pa nsaa, anka baadi mutungunukie na kufikanga nka peepi na ku nfudiilo kua bisangilo. Su kano kabidi we muate kepatshila koshi mulombashe totshobolokanga. Muntu akiebe kulombasha kepatshila akamueneka bu kapeela akatekie nka nsaa, na kuikitshisha kui bungi. Bu bi’okumiina nka kulombasha kepatshila koobe abilesha’shi okumiina kuata kipuano kiobe na Yehowa na muulo ukata, na’shi okumiina kumupa muyile ngobesha yoobe. Yehowa ataa kuikitshisha koobe na muulo. Ngi buakinyi te nkuteka bintu bibungi bikile ngobesha yoobe nya. (Mis. 103:14; Mik. 6:8) Biabia abitungu kepatshila koobe kekale na nkatshinkashi, okite muyile nshalelo oodi naaye. w23.05 26 ¶1-2

Bantu be bungi be kuikala na moo, anka tabalekielaa uno moo webakutshishua kukita mianda i buwa nya. Ndaniele baadi nsongualume e na eshimba dinyingie. Ndaniele baadi mulongie matemuki a Efile Mukulu abaadi afundibue, mu aa matemuki mubaadi mpaa na matemuki a Yelemiya. Ku bukuashi bua kuilongiela, Ndaniele baadi mutundule kunyima’shi, buno bupika bua bena Yunda butabudi mafuku mu Babilone, abupu binobino. (Nda. 9:2) Kumona kulombana kua matemuki a mu Bible, kushi mpaka kubaadi kunyingishe lukulupilo lua Ndaniele mui Yehowa. Na baaba booso be na lukulupilo lui bukopo mui Efile Mukulu, abamuenekaa kuishimba dinyingie. (Puandikisha na Bena Loma 8:32, 37-39.) Kintu ki na muulo ukata, Ndaniele baadi eele nteko kui Nshaye e muiyilu nsaa yooso. (Nda. 6:10) Baadi asokola miluisho yaaye kui Yehowa na kumulungula biapusha muishimba diaye. Akupu Ndaniele baadi atekie bukuashi. (Nda. 9:4, 5, 19) Baadi muntu nka bu’tue, na ta mmutandikue n’eshimba dinyingie nya. Mu kuilekeena na biabia, baadi mudime dino eyikashi kukiila mu kuilongiela Eyi di’Efile Mukulu, mu kuela nteko, na mu kukulupila mui Yehowa. w23.08 3 ¶4; 4 ¶7

Su tubakookiela basha matalua be kunundu abitukuasha atue banabene na kukuasha bangi. Mu mushindo kinyi? Mu muanda umune, muanda t’abetunyoko bu biabanyokaa baaba booso bash’abakookiela muiya. (Lom. 13:1, 4) Su tubakookiela bakata ba mbulamatadi abakamono’shi, Tumonyi tua Yehowa, mbantu abakookielaa. Bu kileshesho, bipua bi bungi kumpala mu Nigeria basalayi babatuelele mu Nshibo ya Bufumu pabaadi bisangilo bia kakongie abikitshika, na abo nkubanga kukimba muntu sh’akumiina kufuta bitadi. Komanda a basalayi bebalunguile’shi: “Tukatukieyi, muanda Tumonyi tua Yehowa atuwulaa bitadi misuusa yooso.” Nsaa y’okookiela miiya olesha’shi Tumonyi tua Yehowa tui na nkumo i buwa, na ino nkumo i buwa, dingi efuku ayikakaluila bakuetu balume na bakashi. w23.10 9 ¶13

Bangi bafubi ba Yehowa, babaadi batengiele nfudiilo a uno ndumbuluilo e bubi munda a bipua bi bungi. Muyile mmueneno a bantu, kulombana kua mulayilo w’Efile Mukulu akumuekaa bu akuyisha. Anka, Yehowa awukaa abipushaa bafubi baaye, ngi buakinyi baadi mushinkamiishe mutemuki Abakuke’shi: ‘Mwanda kimonwa, ki na kipindji kyâkyo kya kukitshika, akikalombana kushî mpaka apakakumbana mafuku atshibibwe, sunga kwakwa kulombana kwamweka bu akwisha, otengiele. Mwanda bînyibînyi byabya byankufumbwila, abikalombana kushî kutentûlwa!’ (Aba. 2:3, EEM) Efile Mukulu baadi mutuushe kino kishinkamiisho bua kukuasha nka penda Abakuke su? Su ano mayi aaye e na namu bukuashi kuatudi lelo uno? Mpoolo mutumibua baadi muyokielue, baadi mualushuule ano mayi kui bena Kidishitu babaadi abatengiela kufika kua nsenga ipia. (Eb. 10:37) Oolo, tui balombene kushinkamisha’shi, sunga mulayilo wetu wa kupososhibua wamueneka bu awuyisha, “awukalombana kushî kutentûlwa!” w23.04 30 ¶16

Bena Isalele bebungi babaadi bapele kishinkamisho akilesha potoka’shi, Yehowa badi afubisha Moyise bu muntu alesha mpala Yaye. (Mba. 14:10, 11) Misango i bungi, babaadi abapele’shi Yehowa baadi afubisha Moyise bua kuibakunkusha. Pa muanda wa biabia, kiakia kipungo kia bena Isalele takibatuelele mu Nsenga ya Mulailo nya. (Mba. 14:30) Anka, bangi bena Isalele babalondele bukunkushi bua Yehowa. Bu kileshesho, Yehowa bambile’shi: ‘Kalebe . . . mmundonde n’eshimba diaye dioso.’ (Mba. 14:24) Efile Mukulu baadi mufute Kalebe, amupa mpaa na matalua a kuisanguila mbalo yooso y’akumiina nkashaala mu Nsenga ya Mulayilo. (Yos. 14:12-14) Bena Isalele babatuelele mu Nsenga ya Mulayilo babalekiele kileshesho ki buwa bukile kia kulonda bukunkushi bua Yehowa. Nsaa ibaadi Yoshua abaabadi batuule bua kukunkusha bena Isalele mupiane Moyise, babaadi “abamunêmeka mafuku oso a mûwa wê.” (Yos. 4:14) P’abo kukita bino, Yehowa baadi muibelele muabi pa kuibatuala ku Nsenga ya Mulayilo ibaadi muibalee.​—Yos. 21:43, 44. w24.02 21 ¶6-7

Anka bilombene munganga kuikala na mushindo wa kuuka mianda i bungi pabitale bukome bu’eshimba dietu nsaa y’etupimi mishila ya mu binyingua, n’atue namu tui kuuka mianda i bungi pabitale bukome bua kifulo kietu bu’Efile Mukulu na pa kutaluula bi kifulo kietu kui bangi. Su tuamona’shi kifulo kiatudi nakio bua bakuetu balume na bakashi kikuete kuenda na kubofula pe pabakidi kumpala, bino mbilombene kuitulesha’shi kifulo kietu bu’Efile Mukulu kikuete kunyiisha kubofula. Ngi buakinyi, p’atufulu bakuetu balume na bakashi nsaa yooso, bino, mbitunduilo abilesha’shi kifulo kietu bu’Efile Mukulu namu ki bukopo. Su tuamona’shi kifulo kietu bua bakuetu balume na bakashi kikuete kuenda na kubofula, paapa tuukie’shi pe muanda ukata. Buakinyi? Muanda bino abilesha’shi tui mu masaku a kushimisha kipuano kietu na Yehowa. Yowano mutumibua atookiesha uno muanda kalolo pa kuitutentekiesha’shi: “Yawa shafulu mukuabo akuete kumona, ta mmulombene kufula Efile Mukulu ashamono.” (1 Yo. 4:20) Ndilongiesha kinyi di’atupete pano? Atusankisha Yehowa nka su “tubefulena ku muntu na muntu.”​—1 Yo. 4:7-9, 11. w23.11 8 ¶3; 9 ¶5-6

Pabaadi ki nsongua Nfumu Yoase baadi muate bitshibilo bi buwa. Sunga mbibaadi te na nshaye, baadi alondo buludiki bua Tshite-Muakuidi mukata baadi na lulamato, Yekoyada. Yawa tshite-muakuidi baadi alongiesha Yoase nka bu muana aaye a kutanda. Pa muanda wa kileshesho kia Yekoyada, Yoase batshile kitshibilo kia kufubila Yehowa na kukuasha muilo buawudia kufubila namu n’awo Yehowa. Yoase baadi muate mpango ya’shi alumbuule ntempelo a Yehowa. (2 Mya. 24:1, 2, 4, 13, 14) Su baledi boobe sunga ungi muntu akulongiesha bia kufula Yehowa na bia kuikala na nshalelo muipushene na mayi aaye a kulonda, bakupa kia buntu ki na muulo ukata. (Nki. 2:1, 10-12) Baledi boobe be nkulongiesha mu mishindo i bungi. Su botumikila malango a mu Bible abakupa, oyikasha baledi boobe na muloo. Kintu ki na muulo ukata, osankisha Efile Mukulu na onyingisha kipuano kiobe naye. (Nki. 22:6; 23:15, 24, 25) Tuno ntubingilo tui buwa atukukuasha biodia kuambula kileshesho kia Yoase pabaadi ki nsongua. w23.09 8-9 ¶3-5

Yehowa etulaa’shi ateemesha nteko yetu. Efile Mukulu eetu mmufule balanguidi baye baasha lulamato, ta mulombene kupela kuteemesha nteko yabo nya. (Mis. 10:17; 37:28) Anka bino t’abipushisha’shi aketupa bintu bioso bi’atumutekie nya. Tui balombene kutengiela mpaa na p’atukatuele mu nsenga ipia kumpala kua’shi tupete bingi bintu biatukuete kuteka lelo uno. Yehowa e na mpango yadi nayo mu binangu muaye nsaa y’ateemesha nteko yetu. (Yesh. 55:8, 9) Imune ya ku ino mpango yaaye ngia’shi akumiina kuusha nsenga i na bantu be na muloo na abakookiela bukunkushi buaye. Anka Satana amba’shi bantu mbalombene kuikala na muloo nka nsaa y’abekunkusha abo banabene. (Kib. 3:1-5) Bua kulesha’shi biabia abiakula Satana mbia madimi, Yehowa mmulekiele bantu bua’shi b’ekunkushe abo banabene. Ngi buakinyi bukunkushi bua bantu mbufuishe nkalakashi i bungi yatukuete kufumankana nayo lelo uno. (Mul. 8:9) Atuuku’shi Yehowa t’akatusha ino nkalakashi yooso lelo uno nya. w23.11 21 ¶4-5

Yehowa balayile’shi, kukiila kui Abalahama, “mîlo i bungi” ayikedibua muabi. Biabia nsaa ibalombeshe Abalahama bipua 100, Sara namu na bipua 90, mulayilo wa kutanda muana taubaadi ubande kulombana nya. Muyile mueneno a bantu bibaadi abimueneka bu bi bukopo bua Abalahama na Sara kutanda muana. Kino kibaadi kitompuanga kikata bua Abalahama. “Ku bukuashi bua lukulupilo bapetele lukumiino’shi, akekala nshaye na miilo ibungi.” (Lom. 4:18, 19) Na dingi mianda ibaabadi bakulupile kui Abalahama ibalombene. Baadi mufikie nshaye na Isake, muana abaadi mutengiele munda a bipua bi bungi. (Lom. 4:20-22) Tui kukuminyibua n’Efile Mukulu na kubadikibua bu bantu balulame, na bu ba kuuku baye nka bibaadi Abalahama. Biabia Mpoolo bakuile uno muanda pa bafundile’shi: “Anka, mayi a shi ‘baadi mubadikibue’ ta abaadi afundibue penda buaye nya, [Abalahama] abaadi afundibue dingi buetu, atue abakabadibua bu balulame, muanda tui na lukumiino mui yawa baadi mubuushe Yesu Nfumuetu ku lufu.” (Lom. 4:23, 24) Nka bu Abalahama, abitungu tuikale na lukumiino mui Yehowa na bikitshino bi buwa, na tukulupile’shi mianda yabadi balee kui Yehowa ayikalombana. w23.12 7 ¶16-17

Nsaa y’opete lukalakashi alukukuatshisha moo, tentekiesha’shi Yehowa auku luanka na auku mushindo okuete opusha bua lukalakashi. Bu kileshesho, Yehowa tabaadi amono nka penda mushindo ubaadi bena Isalele abakiengie mu Ejipitu nya, anka baadi auku “kufwambuka kwabo [na kukienga kuabo].” (Efi. 3:7) Nsaa y’opete lukalakashi alukukuatshisha moo, pangi tue mulombene kumona mushindo aukukuashaa Yehowa nya. Biabia, mutekie akukuashe bodia kumona bukuashi buaye. (2 Bf. 6:15-17) Banda kutaluula ino nkonko: Muisambo sunga ngaluulo ya mu bisangilo bia kakongie abikunyingishaa su? Mikanda yetu ayipatuula Bible, ma video, sunga ingi ngono yeetu abikunyingishaa su? Kui muntu kampanda tabakupeele namu binangu bi buwa sunga nkubadikila kifundue akikunyingisha su? Pangi tui kuluba bi bukata bua kifulo kia bakuetu balume na bakashi, na kukankamishibua kuatupetaa Muiyi di’Efile Mukulu. Mu binyibinyi, bino bioso mbia buntu bikile bukata abituukila kui Yehowa. (Yesh. 65:13; Mak. 10:29, 30) Biabia bioso abikulesha’shi mmulombene nkupasukila. (Yesh. 49:14-16) Na abikulesha dingi’shi Yehowa ataa kumukulupila koobe na muulo. w24.01 4-5 ¶9-10

Kapindi kapeela kumpala kuaye kuenda muiyilu, Yesu batentekieshe balongi baaye mudimo ubaadi muibape wa kulungula mukandu wi buwa pa bimutale, “mu Yeelusaleme, mu Yuudeya mushima na mu Samariya, mpaa na kufudiile nsenga.” (Bik. 1:8; Luk. 24:46-48) Kunyima kua kapindi kapeela, bakata ba bena Yuda babakuatshile Mpiele mutumibua na Yowano benda naabo kumpala kua Sanedrine, balungula bano bantu baasha lulamato’shi, balekie kulungula mukandu wi buwa, mpaa na kuibakiengiesha. (Bik. 4:18, 21) Mpiele na Yowano babambile’shi: “Sangulayi su mbikumbane ku meeso kw’Efile Mukulu kwinupushiisha’nwe, pe kupushiisha Efile Mukulu. Mwanda bw’atwe, tatwibalombeene kukutwa kwakula bwa bintu biatudi bamone na biatudi bapushe.” (Bik. 4:19, 20, Kilombeeno Kipya 2014) Nsaa ibabafunguile Mpiele na Yowano balongi babatekiele Yehowa bua kukita kikiebe ki’eshimba diaye. Yehowa baluluile luteko luabo lubabamutekiele na mashimba aabo ooso.​—Bik. 4:31. w23.05 5 ¶11-12

Yehowa na Muana aaye a kifulo, babaadi befulene kumpala kua kupanga bintu bioso. Munda a bino bipua bioso, kipuano kiabo na kifulo kiabo mbinyiishe kutama. Yehowa baadi muleshe kifulo bua Yesu pa butooka nka bu bi’atuibibadika mu kifundue kietu kia lelo. Yehowa baadi mulombene kuakula nka penda’shi: ‘Uno nyi muntu andi mufule.’ Anka baadi mukumiine’shi tuukie bi bukata bua kifulo kiaye kui Yesu, ngi aye nkumuitanyina’shi: “Uno nyi Muana ande, andi mufule.” Yehowa baadi na nfiedi bua bibaadi Yesu, bikishekishe bua bibaadi mukumiine bua’shi atushe muwa waye. (Ef. 1:7) Yesu namu tabaadi na mpaka bua bibaadi abipusha Nshaye pabimutale. Yehowa baadi mushinkamiishe Yesu binyibinyi bua’shi anyiishe kuipusha’shi mu mufule ngofu. Yehowa baadi alesha Yesu kishinkamiisho misuusa na misuusa bua kumulesha’shi mu mufule.​—Yo. 3:35; 10:17; 17:24. w24.01 28 ¶8

Banda kupuandikisha bino: Muntu kampanda odi mufule bakula muanda wi bubi ngofu pa bikutale. Ouku’shi wawa muanda ubakula ngua madimi, anka bantu bebungi babeukumiina. Na muanda wi bubi bukilekile babanga kupalakasha aa madimi aaye, na bantu bebungi’nyi babakumiina. Wekupusha namu naminyi? Kadi nsaa yabakudimbiila muanda we kupusha bi bubi ngofu, nta mbiabia su? Uno muanda wi kuitukuasha bua kuuka mushindo ubaadi upushe Yehowa pababaluishishe nkumo yaaye. Umune a ku bana baye ba mu kikudi baadi mumudimbile kui muana mukashi a kumpala Eva. Na Eva namu nkukumina aa madimi. Ano madimi abaadi atakule baledi betu ba kumpala mu kutombokiela Yehowa. Bu kipeta, miluisho na lufu mbikuate bantu. (Kib. 3:1-6; Lom. 5:12) Ino nkalakashi yoso yatudi nayo lelo uno mu nsenga ishima​—bu lufu, ngoshi, na makienga—​mbifikie pa muanda wa madimi a Satana abaadi mupalakashe. Yehowa bapushishe bubi pa muanda wa ano madimi na bino bipeta bi bubi su? Oolo. Anka, Yehowa nta Efile Mukulu a nsungu sunga alamaa ngo nya. Kadi mmutungunukie na kuikala bu “Efile Mukulu a muloo.”​—1 Ti. 1:11. w24.02 8 ¶1-2

We kuambula Yosefe na kusuuka kitompuanga nsaa y’otompibua naminyi? We kuata kitshibilo kubanga binobino kia kiodi mulombene kukita nsaa y’otompibua. Uuka bia kuamba’shi nya musuusa umune ku mianda yabadi bashikue kui Yehowa, na kuleka kunangushena ku yanka. (Mis. 97:10; 119:165) Biabia, nsaa y’abakutompo, t’okakitshi muluisho. Pangi we mupue kupeta bia binyibinyi na okumiina kufubila Yehowa n’eshimba diobe dioso, anka kui kintu kampanda kiki’akikutakula mu kuikoka bua kuilambula na kubatshishibua. We kukita nka bu bibakitshine Nfumu Davide. We mulombene kuisendeela Yehowa’shi: “Efile Mukulu ntaluule, oshinguule bii eshimba dyande, ntompe owukye bii nkalakasho yandi nayo. Otale su naalondo eshinda dii masaku, onkunkushe mwishinda dyaa-ikalaika.” (Mis. 139:23, 24) Yehowa elelaa baaba booso “abamukimbi n’eshimba dimune miabi.” Kuikitshisha koobe bua kulombasha kepatshila ka kuilambula na kubatshishibua, akumulesha’shi okuete kuibikita.​—Eb. 11:6. w24.03 6 ¶13-15

Tshite muakuidi mukata baadi na matalua a kulesha mpala ya muilo kumpala ku’Efile Mukulu. Aarone tshite muakuidi mukata a kumpala a mu Isaleele baadi mutudibue na Yehowa nsaa ibaabadi balambule tarbenakele kui Efile Mukulu. Anka bu biabadi bebileshe kui Mpoolo mutumibua’shi “bantu be bungi babaadi na kia kufika ba tshite muakuidi abende na kuishintushena, muanda lufu lubaadi aluibakutshishua bua kutungunuka na kuikala bu ba tshite muakuidi.” (Eb. 7:23-26) Na bu bibaabadi bakutue kupuidika, baaba ba tshite muakuidi babaadi abatuusha milambu ya miluisho yabo’bo banabene. Bino abituusha mpatuluilo ibidi ilekeene pankatshi pa ba tshite muakuidi bakata ba bena Isaleele na Tshite muakuidi Mukile bukata Yesu Nkidishitu bu biadi Tshite muakuidi eetu Mukile bukata, Yesu Nkidishitu nyi “mufubi . . . a nshibo y’epema ya binyibinyi yabadi bayibakie kui Yehowa, kushi kui muntu.” (Eb. 8:1, 2) Mpoolo apatuula’shi: “Bu bikale’shi aye [Yesu] atungunuka na kuikala na muwa bua losoo, bu tshite muakuidi buaye ta bui na muntu ebupiana.” Mpoolo baadi mukumbashe’shi, Yesu “te na kato, mmuilamune kui bankitshishi ba miluisho” na’shi mmuilekene na ba tshite muakuidi bakata ba bena Isaleele, muanda “aye te na lukalo lua kutusha milambu efuku dioso” bua miluisho yaye’ye nabene. w23.10 26 ¶8-9

“Eyilu dia kala,” adileesha bakata ba mbulamatadi na bena politike, abakunkushiibua na Satana na ba demo baaye. (Mat. 4:8, 9; 1 Yo. 5:19) Nka bu biabadi bebileshe mu Bible, “nsenga” ngilombene kulesha nsenga ishadiibue. (Kib. 11:1; Mis. 96:1) Anka, “nsenga ya kala” ayilesha ndumbuluilo a bantu be bubi lelo uno. Yehowa t’akalumbuula penda “eyilu” na “nsenga” bi kuanka lelo uno nya, kadi akebibutula bioso na kuibipianyikisha na bingi. Akapianyikisha eyilu di kuanka binobino na nsenga i kuanka binobino, “n’eyilu dipia na nsenga ipia”, kuamba’shi mbulamatadi mupia akakunkusha bantu balulame. Kadi, abanga’shi: “Nkuete kukita bintu bioso bipia.” Biabia, Yehowa akakitshi nsenga ipia na bantu booso bapia pa kuibekasha bapuidikie. Nka bu bibatemukile Yeshaya, akekasha nsenga mbalo i buwa bukile nka bu bibaadi efuba dia Edene. Aketuikasha bapia pa kupaasha ooso akuatudi bua losoo. Bantu balemane, ba mpofu, na tumaama, abakapashiibua. Na dingi, bantu bafue abakabushiibua bua kupeta dingi muwa.​—Yesh. 25:8; 35:1-7. w23.11 4 ¶9-10

“Mpombo ikata” ayikabanga mu kabasamushi. (Mat. 24:21) Mpombo ikata ngilekeene na angi masaku e bungi, muanda atuuku’shi ayikafiki. Takupuile kukila bipua 2 000, na Yesu kudimusha balongi baaye buabadia kuilumbuula bua diadia efuku. Su tubekala belumbule abiketubofuila buatudia kunyingiila kino kipungo ki bukopo, na kukuasha bangi buabadia kunyingiila bu atue. (Luk. 21:36) Abikatungu tunyingiile bua kukookiela Yehowa, na kumukulupila’shi aketukaluila. Atukakitshi naminyi su bangi bakuetu bashimisha bingi bintu biabo sunga bintu biabo bioso bia ku mbidi? (Aba. 3:17, 18) Abikatungu tuikale na lusa bua’shi luitutakule buatudia kuibapa bingi bintu bia ku mbidi. Atukakitshi naminyi su miilo isangie yaketutuuka ngoshi, atukekala mu kipuano ki buwa na bakuetu balume na bakashi mu kiakia kipungo su? (Es. 38:10-12) Abikatungu tuikale bebafule ngofu bua’shi bitukuashe buatudia kunyingiila kiakia kipungo ki bukopo. w23.07 2 ¶2-3

Beyibakishene mbalombene kulongiela ku kileshesho kia Akila na Prisile, mulume na mukashi babaabadi bafule kui bena Kidishitu ba kala. (Lom. 16:3, 4) Anka babaadi abafubu, kulungula mukandu wi buwa, na kuenda mu kukuasha bangi pamune. (Bik. 18:2, 3, 24-26) Ngi buakinyi nsaa ayakula Bible bua Akila na Prisile misuusa i bungi ebateemunaa nka pamune. Beyibakishene be kuibambula naminyi? Nangushenayi pabitale mianda i bungi ayitungu’shi obe sunga muina koobe akite. Nui kukita ingi midimo pamune mu kifuko pamutue pa kuikala anuiyikitshi bupenka su? Bu kileshesho, Akila na Prisile babaadi abalungula mukandu wi buwa pamune. Nui baate mpango ya kuikala anukitshi bino nsaa yooso su? Akila na Prisile babaadi abafubu pamune. Obe na mukashi oobe, pangi t’anukitaa mudimo umune nya, biabia ta nui balombene namu kukita midimo ya mu nshibo pamune su? (Mul. 4:9) Su nuekuashena bua kukita ingi midimo mu kifuko anunyiisha kuikala bu ba kuuku, na kupeta mushindo wa kuisamba pamune. w23.05 22-23 ¶10-12

Ingi nsaa, muntu ooso apushaa moo. Bu kileshesho, pabaadi Nfumu Saule abingabinga Davide bua kumuipaa, Davide baadi musuukile dia ku Gate kibundi kia bena Filistine. Nfumu a mu Gate, Akishe baukile musuusa umune’shi Davide ngi muinyi abaabadi abasaamuna bu kilobo kia ngoshi, na kumuyimbila’shi, ‘batshokola binunu na binunu’ bia bena Filistine. Davide ‘baapushiishe moo ukile.’ (1 Sam. 21:10-12) Davide baadi mupangayikie bua kibaadi kilombene kumukita Akishe. Davide baadi mukambile moo waye naminyi? Mu mukanda wa Misambo 56, Davide alesha bibaadi muipushe pabaadi ku Gate. Mu uno mukanda wa Misambo Davide baadi mupatuule kalolo buakinyi baadi atshinyi, anka baadi mupatuule dingi kibaadi kimukuashe buadia kuleka kutshina. Davide pabapushiishe moo, baadi mukulupile mui Yehowa. (Mis. 56:1-3, 11) Davide baadi na tubingilo tui buwa tua kukulupila mui Yehowa. Ku bukuashi bua Yehowa, Davide bapetele mayele alombene kumupaasha, baadi muidimbe bu kitesha! Akishe baadi akimbi bia kuipaa Davide, pabamumuene baadi mumutadiile bua’shi ende, ngi Davide nkupeta mushindo wa kupanda.​—1 Sam. 21:13–22:1. w24.01 2 ¶1-3

Bano boso babadi batemune mu Kifundue kia lelo mbanyi? Nyi mbaaba bedibue muimu abakasanguka! Biabia nsaa y’abakaata bedibue muimu ba nfudiilo bua kuenda muiyilu, peepi na nfudiilo a mpombo ikata, mudimo wa kumpala wabakebapa ngua kulua ngoshi. Mmudimo wi buwa bui moo! Kunyima kuabo kuenda muiyilu abakafubu pamune na Nkidishitu na ba mikeyilu beselele, buabadia kulua ngoshi ya nfudiilo na beshikuanyi b’Efile Mukulu. Banda kunangushena abikekala ino ngoshi. Bangi bena Nkidishitu bedibue muimu baki pa nsenga tabadi banunu. Bangi tabaki bukome’nyi, anka p’abakasanguka bua kuenda muiyilu abakekala bipangua bia mu kikudi bish’abifu na bi na bukome bui bungi, abikakuatshishena Nfumu muikale kilobo kia ngoshi Yesu Nkidishitu. Kunyima kua kulua ngoshi ya Armagedone, abakafubu pamune na Yesu bua kukuasha bantu bua’shi bekale bapuidikie. w24.02 6-7 ¶15-16

Bangi mbapue kuilumbuula bua kuilambula na kubatshishibua, kadi baki’abekoko. Pangi mbalombene kuiyipusha’shi: ‘Bi kuikala naminyi su nakita muluisho ukata na bantusha mu kakongie?’ Su we na moo wi biabia, ikala mushinkamishe’shi Yehowa akakupa kioso kiodi nakio lukalo bua’shi omone bia “kutambuka mu mushindo w’akumiina na kumusankisha mu mianda yoso.” (Kol. 1:10) Akakupa dingi bukome bua kukita mianda i buwa. Mmupue kulesha’shi ebikitshi mu mushindo wadi mupue kukitshina be bungi buabadia kukita mianda i buwa. (1 Ko. 10:13) Kano ngi kabingilo ka buakinyi bantu bapeela abatushibuaa mu kakongie ka bena Nkidishitu. Yehowa apeyaa muilo waye kioso kiaudi nakio lukalo buaudia kushaala na lulamato. Muntu ooso shi mupuidikie atompibuaa bua kukita mianda i bubi. (Yak. 1:14) Biabia, we kusangula kiodia kukita nsaa y’otompibua. Kadi muanda wi’shi, obe nabene ngi e na matalua a kuisanguila bi’okumiina’shi nshalelo oobe ekale. Sunga bikale’shi bantu be na binangu bilekeene, obe nabene ngi mulombene kuludika nshalelo oobe. w24.03 5 ¶11-12