Mueshi wa 8

Tala mianda ibidi i na muulo i mu misambo: (1) Bantu balulame abapetaa malua e bungi. (2) Yehowa etupashaa ku malua eetu. Yehowa etupashaa mushindo kinyi? Mushindo umune w’etukuashaa, mpa kuitupa mmueneno e buwa a nshalelo mu uno ndumbuluilo e bubi. Sunga Yehowa mmuitulee’shi atukekala na muloo mu kumufubilanga, ta mmuituikashe na nshalelo a bulungantu binobino bia kukutua kupeta nkalakashi nya. (Yesh. 66:14) Yehowa etutekie’shi tutuule binangu bietu nka ku mafuku aafiki, kipungo ki’atukekadika na nshalelo aakumiina’shi tuikadikie na muloo wa losoo. (2 Kod. 4:16-18) Bu biatuki’atutengiela, kuete etukuasha buatudia kumufubila efuku dioso. (Kwi. 3:22-24) Nkinyi kiatudi balombene kulongiela ku bileshesho bia bafubi ba Yehowa baasha lulamato ba kala, na ba ano mafuku eetu? Tui kupeta mianda ya mu kimpulunkamba yatush’abatengielanga. Biabia su tubakulupila mui Yehowa, t’akutua nketukuatshishena.​—Mis. 55:22. w23.04 14-15 ¶3-4

Tui kulongiela ku kileshesho kia Yosefe na Mariya babaadi abakookiela basha matalua, sunga nsaa ibaadi ingi miiya ya bano basha matalua ishi buwa. (Luk. 2:1-6) Pabaadi Mariya n’eyimi di mieshi kitema, mbulamatadi baadi muibatekie bua kukita kintu kampanda ki bukopo. Kezare Ogiste baadi muelele bantu booso babaadi mu Kibundi kia Loma muiya wa’shi bakefundishe mu kibundi kiabo kia butandua. Mariya na Yosefe babaadi bakite luendo lua 150 kilometre bua kuenda ku Beteleme kibundi ki na miengie i bungi. Luno luendo talubaadi buwa bikishekishe bua Mariya. Babaadi balombene kuikalakasha pabitale mbidi bukome ya Mariya na ya muana atandikua. Bibadia kuikala naminyi? Babaadi balombene kuikalakasha pabitale mushindo wa kulama muana, muanda baadi nyi Mesiya mulayibue na Yehowa. Babadia kukutua kukookiela muiya wa mbulamatadi su? Yosefe na Mariya ta mbatadiile lukalakashi su ndumune lua ku ino nkalakashi yooso yebakutshishua bua kukookiela uno muiya. Yehowa baadi musankie na kukookiela kuabo na aye nkuibapasukila. Mariya bafikile nka biya ku Beteleme, na aye nkutanda muana e na mbidi bukome, bino bibakuashiishe ku kulombana kua butemuki bua mu Bible!​—Mik. 5:2. w23.10 8 ¶9; 9 ¶11-12.

We mulombene kukita kinyi su abikukalakasha bua kutuusha ngaluulo mu bisangilo? We mulombene kupeta bungi bukuashi, kuilumbuula kua kalolo. (Nki. 21:5) P’onyiisha kuiwubidishena na mianda y’obadika, abinyiisha nkubofuila biodia kupusha muloo wa kutuusha ngaluulo. Dingi, tuusha ngaluulo yipi. (Nki. 15:23; 17:27) P’otuusha ngaluulo yipi mu bishima biobe’be nabene, olesha’shi we muilumbuule kalolo na’shi we na mianda ayipushika kalolo. Bi kuikala naminyi su otompa bino bioso binangu kadi, okiepusha nka mukalakashue bua kutuusha ngaluulo ikile pa lumune sunga ibidi? Ikala mushinkamishe’shi Yehowa asangalaa na kuikitshisha koobe kua binyibinyi, bua kiakia kiodi mulombene kukita muyile ngobesha yobe. (Luk. 21:1-4) Yehowa, t’etutekaa’shi tukite bi bungi bikile ngobesha yetu nya. (Fid. 4:5) Ata kitshibilo kia kiodi mulombene kukita, wate kepatshila ka kuikikita, na wele nteko bua kupeta eshimba ditaale. Kano kepatshila, nkalombene kuikadika ka kutuusha lualuulo lumune luipi. w23.04 21 ¶6-8

Mpoolo mutumibua etupuandikisha na basalayi babadi badimushe na batudibue ku mulongo wa ngoshi. Bantu abakumiinaa’shi musalayi ekale muilumbuule bua kulua ngoshi nsaa yooso y’ayimueneka. Bi mumune n’atue. Atushaala belumbuule bu’efuku dia Yehowa pa kufuala ngabo ya pa kiadi ya lukumiino na kifulo, na kufuala lukulupilo lua kipandilo bu kifulu. Ngabo ayikaluilaa eshimba dia musalayi. Lukumiino na kifulo namu abikaluilaa eshimba dietu dia mu kinfuanyi. Abitukuasha buatudia kutungunuka na kufubila Efile Mukulu na kulonda Yesu. Lukumiino aluitushinkamiisha’shi Yehowa aketupa efuto bua bi’atumukimbi n’eshimba dietu dioso. (Eb. 11:6) Abitutakula buatudia kushaala na lulamato kui Mukunkushi eetu Yesu, sunga mbiatukuete kunyingiila nkalakashi i bukopo. Tui kunyingisha lukumiino luetu nsaa y’atunyingiila nkalakashi, pa kulongiela ku bileshesho bia bantu ba ano eetu mafuku balame lulamato luabo sunga mbiabakuete kubinguabingua na kupeta nkalakashi ya kukutua makuta. Dingi abitungu tudimukile muteo wa kukumiina bintu bia ku mbidi pa kuambula baaba bapeelepeshe nshalelo aabo bua kukumiina kutuula Bufumu pa mbalo ya kumpala. w23.06 10 ¶8-9

Butontshi bua mbidi nyi ngobesha ayitukuashaa bua kutaluula bi’atunangushena na bikitshino bietu. Butontshi bua mbidi, abuitutakulaa mu kukita mianda i buwa bikishekishe patudi na mudimo wi bukopo, sunga p’atupusha’shi ta tui na lukalo lua kulombasha kepatshila keetu. Uuka’shi butontshi bua mbidi nkipindi kia kikuba kia kikudi kiselele, biabia teka Yehowa akukuashe na kikudi kiselele bua’shi odime dino eyikashi di na muulo ukata. (Luk. 11:13; Nga. 5:22, 23) Totengielanga nka’shi mianda ikale ipuidikie mu nshalelo. Mu uno ndumbuluilo, mianda ya mu nshalelo t’ayikala ipuidikie. Su tubatengiela’shi mianda ipuidikie t’atulombasha kepatshila keetu. Tui kukutua lukalo lua kulombasha bipatshila bietu muanda abimueneka’shi bi bukopo. Su bino abikufikilaa namu mu nshalelo oobe, buakinyi tue kutshibuula kepatshila koobe mu tupindi tupeela tupeela? Su kepatshila koobe nka kudima eyikashi kampanda buakinyi tue kuikitshisha bua kubanga kuidilesha ku kapeela kapeela? Na dingi, su kepatshila koobe nka kuibadikila Bible mushima, buakinyi tue bia kuikitshiina programe na kuata nsaa ipeela ya kuibadikila? w23.05 29 ¶11-13

Mu ano mafuku a ku nfudiilo, Yehowa kuete kufubisha ndumbuluilo aaye buadia kutusha bia kudia bia mu kikudi bi bungi na buadia kuitukuasha atue booso tutungunukie na kutambukila “Muishinda diselele.” (Yesh. 48:17; 60:17) Tui balombene kuakula’shi su muntu kampanda akumina kulonga Bible, bapete mushindo wa kukita etabula dia kutuela “Muishinda diselele.” Bangi abatambukilaa mu dino eshinda nka penda bua kapindi kapeela, akupu babemukatuka. Bangi namu abataa kitshibilo kia kutungunuka na kutambukila mu dino Eshinda mpaa na p’abakafiki kuabende. Kuno kuabende, mbalo kinyi? Bua baaba booso bena lukulupilo lua muiyilu, “Eshinda diselele” adibakunkusha mu “mpaladisu a Efile Mukulu” muiyilu. (Kibaf. 2:7, Kilombeeno Kipya 2014) Bano booso be na lukulupilo lua pano pa nsenga, dino eshinda dikata adibakunkusha mu kupuidika ku nfudiilo a bipua 1 000. Su okuete kutambukila mu diadia eshinda lelo uno, tualukanga kunyima na tuemukatukanga mpaa na pokafudiisha luendo lobe mu nsenga ipia. w23.05 17 ¶15; 19 ¶16-18

Nsaa y’onangushena ku bintu bioso biabadi bapue nkukitshina kui Yehowa, wekala na lutumbu na okumiina kulambula muwa oobe kuadi. (Mis. 116:12-14) Bible ayitanyina Yehowa’shi aye ngi etupeyaa “kia buntu kioso kibuwa na kia buntu kioso kipuidikie.” (Yak. 1:17) Kia buntu kikile bioso ku bukata, nyi mmulambu wa nkuulo ya Muana aaye Yesu. Banda kunangushena kapeela! Nkuulo ngikupe mushindo wa kuikala mu kipuano ki buwa na Yehowa. Na nkupa lukulupilo lua kuikala na muwa wa losoo. (1 Yo. 4:9, 10) Kuilambula obe nabene kui Yehowa, nyi mmushindo wibuwa bukile aulesha’shi we na lutumbu bua kia buntu kikata, akilesha kifulo kiabadi bakuleshe kui Yehowa pamune na ingi miabi yooso yadi mupue nkuelela.​—Miy. 16:17; 2 Ko. 5:15. w24.03 5 ¶8

P’atutala mushindo ubaluila muikelo kui bantu lelo uno, atupusha nka bi bapushishe Lota muntu mululame. Lota ‘baadi mukalakashue na buikashi bubaadi nabo baaba bankitshishi a bubi.’ Muanda baadi muukie’shi Nshetu a muiyilu mmushikue wawa muikelo wi bubi. (2 Mp. 2:7, 8) Muanda Lota baadi atshiinyi na kufula Efile Mukulu, ngi buakinyi baadi mushikue muikelo ooso wi butete ubaadi nawo bantu babaadi bamuifunyishe. N’atue namu, tui befunyishue na bantu be na kaneemo kapeela sunga’shi bash’abaneemeka mayi a kulonda a Yehowa. Sunga mbiabia tui kushala na muikelo wibuwa su atutungunuka na kuikala na kifulo na moo wibuwa w’Efile Mukulu. Yehowa etukuashaa bua kukita bino na kunyingishibua kuatupete mu mukanda wa Nkindji. Bena Nkidishitu booso balume na bakashi, ba nsongua na bantu banunu, mbalombene kukuashibua binyibinyi pa kutaluula elango dibuwa diatupete mu uno mukanda. Nsaa y’atutshiinyi Yehowa atukapasuka bua kupela kuikala na ba kuuku abakitshi mianda i bubi. w23.06 20 ¶1-2; 21 ¶5

Pangi, kifuko kiobe kikuete kukubingabinga, sunga’shi we mupele kukita ingi mianda ibadia kukupetesha makuta e bungi, bua’shi otuule mianda ya Bufumu pa mbalo ya kumpala. (Mat. 6:33) Su bi biabia, ikala mushinkamishe’shi Yehowa auku bioso biodi mukite pa muanda waye. (Eb. 6:10) Pangi we mupue kuimuena kulombana kua ano mayi a Yesu aamba’shi: “Takui muntu su ngumune mulekie nshibo, sunga bakuabo balume, bakuabo bakashi, nyinaye, nshaye, bana sunga mafuba pa muanda wande na pa muanda wa mukandu wibuwa, sh’akapete misusa 100 kukila, kubanga binobino mu ano mafuku​—mashibo, bakuabo balume, bakuabo bakashi, banyina, bana na mafuba pamune na kukiengieshibua—​na mu ndumbuluilo a mianda afiki, muwa wa loso.” (Mak. 10:29, 30) Miabi yodi mupete ngikile miloo yooso yodi muisumine.​—Mis. 37:4. w24.03 9 ¶5

Pabaadi bena Nkidishitu ba mu Yudeya bapete kikupa kia nsala ki bukopo. Pabapushishe bakuatu bena kakongie ka mu Antiyoshe “babaatshile kitshibilo kia kutuma bukuashi kui bakuabo be mu Yudeya.” (Bik. 11:27-30) Sunga bakuetu balume na bakashi babaadi na nsala babaadi bashaale kuibula, bena Nkidishitu ba mu Antiyoshe babaadi baate nka kitshibilo kia kuibakuasha. (1 Yo. 3:17, 18) N’atue namu tui kulesha lusa lelo uno p’atupusha’shi balanguidi neetu babapete masaku aatukila ku bintu bipangibue. Tui kuikala belumbule bua kukuasha pangi p’atuipusha bakulu su tui balombene kukuasha ku yaya mbalo ibatuuku masaku. Dingi, bakuetu balume na bakashi, be kuikala na lukalo lua bukuashi bua kupudisha nkalo yabo i na muulo. Apakafiki Nfumu eetu Yesu Nkidishitu, bua kutshiba kiimu e kuitupeta atuleesha lusa, etuitanyina’shi, “Fikayi, nupiane Bufumu.”​—Mat. 25:34-40. w23.07 4 ¶9-10; 6 ¶12

Yesu baadi muambule nkatshinkatshi ya Yehowa. Yesu babaadi bamutume pa nsenga bua kulungula mukandu wibuwa kui “mikooko ishimine, ya mu nshibo ya Isaleele.” Biabia, Yesu balesheshe’shi baadi na nkatshinkatshi, pa baadi mulungule mukandu wibuwa, kui bena Isaleele na kui bantu bashi bena Isaleele. Dingi efuku, ungi muana mukashi shibaadi muina Isaleele, bafikile mu kuisendela Yesu bua’shi amupashiishi muana aaye mukashi baadi “mukuatshikie na demo.” Na lusa looso, Yesu bakitshiine nka biabia bibaabadi bamutekie kui yawa muana mukashi, amupashiisha ka nsongakashi kaaye. (Mat. 15:21-28) Tubandeyi kutaluula kingi kileshesho. Ku mbangilo kua mudimo waye wa bulungudi, Yesu bakuile’shi: “Muntu ooso ampele, . . . nakamupele namu.” (Mat. 10:33) Biabia Yesu baadi mupele Mpiele, baadi mumupele misuusa yooso isatu? Nya. Yesu baukile’shi Mpiele baadi muinyongole, bua bibaadi mukite na’shi, Mpiele baadi muntu sha lulamato. Kunyima kua Yesu kusanguka, bamuekiele Mpiele, na aye nkumushinkamisha’shi bamufuila lusa, na’shi mumufule. (Luk. 24:33, 34) Yehowa Efile Mukulu na Yesu Nkidishitu be na nkatshinkatshi. Atue namu tui na nkatshinkatshi su? Yehowa etutekie buatudia kuikala na nkatshinkatshi. w23.07 21 ¶6-7

Nkishinkamiisho kinyi kiatudi nakio na kiatudia kulungula baaba booso be na mpaka ya’shi, mulayilo wa Yehowa wa Mpaladiiso t’aukalombana? Kia kumpala, Yehowa aye nabene ngi mutuushe uno mulayilo. Mukanda wa Kibafumbuilue awamba’shi: “Na yawa baadi mushale ku nkuasa a bufumu bambile’shi: ‘Talayi, nkuete kukita bintu bioso bipia.’” Yehowa e na binangu, bukome, na lukalo lua kulombasha mulayilo waye. Kia kabidi, muyile mueneno a Yehowa mushindo wadi mushinkamishe’shi milayilo yaaye ayikalombana, i nka bu ipue kulombana. Ngi buakinyi amba’shi: “Ano mayi nga lulamato na nga binyibinyi. . . . ‘Aakalombana!’” Kia kasatu, su Yehowa babanga kukita kintu kampanda, ekitshishaa na muaye mooso bua’shi ekilombashe, ngi buakinyi bakuile’shi: “Nnami Alfa na Omega.” (Kbf. 21:6) Na Yehowa akaleesha Satana’shi nsha madimi na te kapu. Su ungi muntu aakula’shi: “Uno mulayilo wi buwa bukile” anka t’aukalombana nya, we kukita kinyi? Buakinyi tue mulombene badika na kumupatuluila Kibafumbuilue 21:5, 6. Muleshe mushindo witushinkamiishe Yehowa pabitale uno mulayilo na biadi muele kiala pa wanka, kuamba’shi kuela kiala kiaye aye nabene.​—Yesh. 65:16. w23.11 7 ¶18-19

Yehowa baadi mulee Abrahame uno mulayilo pabaadi na bipua 75 aye shekeele na muana. Abrahame bamuene kulombana kua uno mulayilo su? Bamuene penda kipindi kiawo. Kunyima kua kuabuka muela wa Efrate na kutengiela bipua 25, Abrahame baadi mumone kilengieleshi kia kutandikua kua muana aaye umune Isaake, na kunyima kua bipua 60 baadi mumone apatandikua bekulu baaye Esau na Yakobo. (Eb. 6:15) Anka Abrahame ta mumone bekulu baaye p’abafiki muilo ukata, na kupiana Nsenga ya Mulayilo. Anka, uno muntu sha lulamato baadi na muloo wa kipuano ki buwa kibaadi nakio na Mupangi aaye. (Yak. 2:23) Apakasanguka Abrahame akekala na muloo wi bungi wa kuuka’shi, ku lukumiino na luishinko luaye, nkufuishiishe miilo yooso miabi i bungi! (Kib. 22:18) Ndilongiesha kinyi di’atupetela pano? Tatui balombene kumona milayilo yooso ya Yehowa ku’ayilombana binobino nya. Anka su tui na luishinko bu Abrahame tui kushinkamisha’shi Yehowa etufutu kubanga binobino, mpaa na p’akalombasha milayilo yaye mu nsenga ipia.​—Mak. 10:29, 30. w23.08 24 ¶14

Nfumu Oziase pa baadi ki nsongua, baadi muiyishe. Balongiele bia “kutshiina Efile Mukulu a biinyibiinyi.” Yehowa namu baadi mumuelele miabi i bungi munda a bipua biaye 68. (2 Mya. 26:1-4) Oziase baadi mubutule beshikuanyi be bungi ba ingi miilo babaadi abalu na Yelusalema, na aye nkushinkamisha’shi Yelusalema kuete alamibua kalolo. (2 Mya. 26:6-15) Oziase baadi mushinkamishe’shi baadi na uno muloo ooso muanda Efile Mukulu ngi baadi amukuasha bua kuibikita. (Mul. 3:12, 13) Nfumu Oziase babaadi bamutuule buadia kulungula bangi akitungu kukita. Bino bibaadi bilombene kumutakula buadia kunangushena’shi e na bulungantu bua kukita kioso ki’akumiina su? Nya, dingi efuku Oziase batshile kitshibilo kia kuenda mu kutuela mu ntempelo a Yehowa, na kuitatula kooso aye nkutompa kushiika musengo wa kabanda ku kilambuilo, aku namu ba nfumu ta babaadi na matalua a kukita biabia. (2 Mya. 26:16-18) Pabatompele tshite-muakuidi mukata Azaria kumutopeka, Oziase bafiitshile munda ngofu. Bi malua, muanda Oziase ta mmufubile dingi Yehowa na lulamato nya, ngi buakinyi Yehowa namu baadi mumunyokie aye nkukumba maladi a nsudi. (2 Mya. 26:19-21) Su badia kutungunuka na kuikala muiyishe, badia kuikala na nshalelo e buwa! w23.09 10 ¶9-10

Sunga kunyima kuaye kufika bu muina Nkidishitu muedibue muimu, Mpiele mutumibua batungunukile nka na kuikitshisha bua kukambila kubofula kuaye. Mu kipua kia 36 bino bipungo bietu (B.B.), Mpiele baadi mupetekielue pa baadi Korneye muntu a ingi Miilo shii musadibue muedibue muimu wa kikudi kiselele. Na Mpiele nkuakula pa butooka’shi: “Efile Mukulu te na ntondo” na bantu ba ingi Miilo mbalombene kutuela mu kakongie ka bena Nkidishitu. (Bik. 10:34, 44, 45) Kunyima kua paapa, Mpiele babangile kudia pamune na bantu ba ingi Miilo kintu kiashibaadi mukite dingi kumpala. Anka bangi bena Nkishitu ba bena Yuda babakuile’shi, bena Yuda na bantu ba ingi Miilo ta mbalombene kudia pamune nya. Nsaa ibafikile bangi babaadi na uno mmueneno ku Antioshe, Mpiele bemikile kudia pamune na bakuabo ba ingi Miilo. Abimueka’shi baadi atshiinyi tala bakuabo bena Nkidishitu ba mu Yuda bafiita munda. Mpoolo mutumibua pa bamuene buno bu nsesa, baadi musaashile Mpiele munkatshi a bantu. (Nga. 2:13, 14) Sunga bibaadi Mpiele mukite kino kilubilo, baadi mutungunukie nka na kufubila Yehowa. w23.09 22 ¶8

Biabia, etaluule obe nabene na kalolo kooso, otale su we na mbalo ayitungu kulumbuula, anka totshobolokanga. “Muanana ebuwa,” na akakukuasha bodia kulumbuula mbalo ayitungu. (1 Mp. 2:3) Mpiele mutumibua etushinkamisha’shi: “Efile Mukulu . . . akapudisha aye nabene kulongieshibua kuenu. Akenukankamika.” Bua musuusa wa kumpala, Mpiele b’epushishe’shi ta mulombene kufuba na Nkidishitu. (Luk. 5:8) Anka ku bukuashi bua kifulo kia Yehowa na Yesu, Mpiele baadi mulonde Yesu na lulamato looso. Yehowa baadi mukumiine’shi: Mpiele “atuele mu Bufumu bua loso bua Nfumuetu na Mupaashi Yesu Nkidishitu.” (2 Mp. 1:11) Dibaadi efuto di buwa bukile! Su botungunuka na kufubila Yehowa na lulamato looso bu bibakitshine Mpiele, na kukumiina’shi Yehowa akulongieshe, noobe namu okapete efuto dia muwa wa ikalaika. Su nubakitshi biabia, anukalombasha “kepatshila ka lukumiino luenu, kupashibua kuenu.”​—1 Mp. 1:9. w23.09 31 ¶16-17

Lupango lua tabernakele lubaadi lukata, lubaadi luifunyishue na midimba mubaadi amutuele ba tshite muakuidi bakata bua kukita midimo yabo. Mu lualua lupango mubaadi kilambuilo kikata kibaabadi abalambuila milambu ya kushiika kaalo na mubaadi elonga dikata di na meema dibaabadi abafubisha kui ba tshite muakuidi bua kuitumpa meema bua’shi bekale batookie kumpala kua kukita mudimo wa kishila. (Efi. 30:17-20; 40:6-8) Lelo uno ba tshite bakuidi, bena Nkidishitu bedibue muimu bakuete kufuba na lulamato pano pa nsenga mu lupango lua ntempelo a mu kikudi. Diadia elonga dikata dia meema adibatentekiesha muanda wi na muulo ukata, nka bu biabadi batekie bena Nkidishitu booso bua kushaala batookane mu binangu na mu kikudi. Muamua dingi, mui “kibumbu kikata,” akilanguila Yehowa su? Oolo, Yowano mutumibua bebamuene mbemane “kumpala kua nkuasa a Bufumu,” bino mbipushene na pa nsenga paasha pa lupango lua kilambuilo na “abamukitshiina [Efile Mukulu] mufubo wa kishila bufuku na kaanya mu ntempelo aaye.” (Kbf. 7:9, 13-15) Tui na lutumbu lukata kui Yehowa muanda mmuitupe mushindo wi buwa bukile wa kumulanguila mu ntempelo aaye mukata a mu kikudi! w23.10 28 ¶15-16

Mushindo umune awitunyingishaa Yehowa nku bukuashi bua bakulu. (Yesh. 32:1, 2) Biabia, poodi na tuinyongoshi lungula bakulu. Nsaa y’abakupa bukuashi ebukumiine na muloo ooso. Kukiila kuabadi, Yehowa mmulombene nkupa bukome. Lukulupilo luetu luimeene mu Bible. Bu biatudi bena Nkidishitu, lukulupilo lua kuikala na muwa wa losoo muiyilu, sunga lua kushaala losoo pa nsenga mu mpaladiiso e buwa bukile, lui kuitunyingisha dingi ngofu. (Lom. 4:3, 18, 19) Lukulupilo luetu aluitupa bukome bua kunyingiila nkalakashi, kulungula mukandu wibuwa, na kukita ingi midimo mu kakongie. (1 Te. 1:3) Lualua lukulupilo lumune ngi lubaadi lunyingishe Mpoolo mutumibua. Baadi “mufinakashue,” “mukalakashue kuishimba,” “mukiengieshibue,” na “kuponeshua mu nsenga.” Muwa waye ooso ubaadi nka mu masaku. (2 Ko. 4:8-10) Mpoolo baadi mupete bukome bua kunyingiila p’aye kutuula binangu biaye ku lukulupilo luaye. (2 Ko. 4:16-18) Mpoolo baadi mutuule binangu nka ku mafuku aaye e kumpala. Lukulupilo luaye lua muwa wa losoo muiyilu lubaadi nalo. Mpoolo baadi anangushena pabitale luno lukulupilo, na p’aye kukita bino, baadi epusha’shi “bumuntu buaye bua munda abulumbulua kuifuku n’efuku.” w23.10 15-16 ¶14-17

‘Nsaa yotekie, taluula su ngi nsaa i buwa ilombene Yehowa kualuula ku luteko loobe.’ Tui kunangushena’shi abitungu aluule ku nteko yetu nka paapa. Mu binyibinyi, Yehowa ngi auku nsaa i buwa yaadi mulombene kuitukuasha. (Eb. 4:16) Su ta tui bapete lualuulo ku mianda yatuikeele batekie musuusa umune, ingi nsaa tui kunangushena’shi Yehowa bapele kuitualuula.’ Anka bi kuikala’shi nsaa tayalombene yadia kualuula. Bu kileshesho, nsongualume baadi mutekie Yehowa bua’shi amupaashe ku mukumbo waye. Anka mukumbo waye ta ngupue nya. Su Yehowa badia kumupaasha mu kilengieleshi, Satana badia kuamba’shi yawa mukuetu kuete kutumikila Yehowa nka pa muanda wa’shi Yehowa mumupaashe. (Yob. 1:9-11; 2:4) Kukatusha biabia, Yehowa mmupue kulumbuula kipungo ki’akapaasha mikumbo yooso. (Yesh. 33:24; Kbf. 21:3, 4) Bua binobino, tatui balombene kutengiela’shi Yehowa etupaasha mu kilengieshi nya. Ngi buakinyi, abitungu mukuetu mulume atekie Yehowa amupe bukome na butaale bua mu binangu buadia kunyingiila mukumbo waye, na kutungunuka na kufubila Efile Mukulu na lulamato. w23.11 24 ¶13

Samesone baadi mukite bilubilo bi bungi, anka baadi mutungunukie na kufubila Yehowa. Baadi mukimbe mushindo wa kulombasha mudimo ubaabadi bamupe kui Efile Mukulu wa kulua na bena Filistine. (Bans. 16:28-30) Samesone batekiele Yehowa’shi: “Mpe namu’nka uno musûsa bukome bwandja kobola ngo musûsa umune kwi bena Filistine.” Efile Mukulu a binyibinyi baadi mualuule ku luteko lua Samesone, na aye nkumualuisha bukome buaye bua kilengieleshi. Bu bibaapetele buno bukome Samesone baadi muipee bena Filistine be bungi uno musuusa kukila bibaadi muibepee kumpala. Sunga mbibaadi Samesone mukiengie ngofu bua bilubilo biaye bi bubi, tabaadi mulekie kuikitshisha bua kukita kikiebe ki’eshimba dia Yehowa. Sunga tuakita bilubilo, betutopeka, kushimisha mashito eetu, t’abitungu tulekie kufubila Yehowa nya. Tentekiesha’shi Yehowa e kudi bua kuitufuila lusa. (Mis. 103:8-10) Sunga tuekala na bilubilo, Yehowa mmulombene kuitupa bukome bua kukita kikiebe ki’eshimba diaye, nka bu bibaadi mupe namu Samesone. w23.09 6 ¶15-16

Kunyingiila koobe akukukuminyisha na Yehowa. Bino t’abipushisha’shi Yehowa asankaa nsaa y’opete bitompuanga sunga mianda ayikukalakasha nya. Obe ngi abadi bakumiine kui Efile Mukulu. Kunyingiila koobe akukuasha bua’shi bakukumiine. Uno nyi muabi ukata! (Mis. 5:12) Tentekiesha’shi Abalahama baadi mupete bitompuanga, na nsaa ibaadi muibinyingiile na lulamato looso, Yehowa baadi musankie naye. Yehowa baadi amumono bu kuuku aaye na baadi mumuitanyine bu muntu mululame. (Kib. 15:6; Lom. 4:13, 22) Mu mushindo umune, n’atue namu e kuitufula nka biabia. Efile Mukulu ta muitufule pa muanda wa’shi tukuete kukita bi bungi mu mudimo waye sunga pa muanda wa’shi tui na mashito nya. Etukumiina nsaa y’atushaala na lulamato sunga tuapeta bitompuanga. Boso buetu tui kunyingiila sunga tuekala na bipua bungi kinyi, nshalelo e naminyi, na ngobesha ya mushindo kinyi. Okuete kunyingiila bitompuanga na lulamato kubanga lelo uno su? Su mbiabia, ikala mukankamane owukie’shi we mukuminyibue n’Efile Mukulu. Kuuka’shi tui bakuminyibue n’Efile Mukulu kui kuikala na bukitshishi bukata kuatudi. Nkulombene kunyingisha mpaa na lukulupilo luetu. w23.12 11 ¶13-14

Abitungu mulume muina Nkidishitu ekale ateemesha na kuakula na kalolo kooso. Muntu ateemeshaa na kuakula na kalolo kooso, aukaa bi binangu bia bangi na bi’abapusha. (Nki. 20:5) E kulonga bia kubadika eyi diakule nadio muntu, bi’amueneka ku mpala, sunga bi ludimi luakula. Tue bia kuuka kukita bino su tue mukishe nsaa pamune na bangi bantu. Su wekala wesamba nka na bantu nsaa yooso ku kaamo sunga kuibafundila mesaje, bi nkuelela bukopo bua kuisamba na bantu pu’emoneena nabo mpala kua mpala. Biabia, ekitshishe bua kupeta mishindo yooso ayimueneka ya kuisamba na bangi mpala kua mpala. (2 Yo. 12) Abitungu dingi mulume muina Nkidishitu munyingie mu kikudi, alongie bia kuikala na mudimo ulombene kumukuasha aye nabene na kukuasha kifuko kiaye. (1 Ti. 5:8) Sunga mbiabia, kintu ki na muulo ukata, nkulonga kalaasa ka mianda yabadi balombene nkuata ku mudimo. (Bik. 18:2, 3; 20:34; Ef. 4:28) Peta nkumo ya muntu afubu ngofu na w’ekitshishe bua kufudiisha wawa mudimo okitshi. Su bokitshi biabia, onyiisha kuikala na muabi wa kupeta mudimo na kuiulama. w23.12 27 ¶12-13

Nsaa ayakula Bible bua “efuku dia Yehowa,” alesha kipungo ki’abakatshibila beshikuanyi kiimu kui Yehowa, na kufuisha kipandilo kui muilo waye. Kala, Yehowa baadi mutshibile ingi miilo kiimu. (Yesh. 13:1, 6; Es. 13:5; Sef. 1:8) Mu kino kipungo kietu, “efuku dia Yehowa” adikabanga na kubutula kua Babilone Mukata na ku ngoshi ikata ya Armagedone. Bua kupanda ku diadia “efuku,” abitungu tuilumbuule kubanga binobino. Yesu balongieshe’shi t’abitungu tuilumbuule nka penda bua “mpombo ikata” nya, kadi “tushaale belumbuule” bua diadia efuku. (Mat. 24:21; Luk. 12:40) Mu mukanda waye wa kumpala uyokielue kui Bena Tesalonike, Mpoolo mutumibua baadi mufubishe bileshesho bi bungi bua kukuasha bena Nkidishitu bua’shi bashaale belumbuule bu’efuku dikata dia kiimu kia Yehowa. Mpoolo baadi muukie’shi efuku dia Yehowa adikafiki nka pa nsaa ilombane. (2 Te. 2:1-3) Baadi mutungunukie na kulungula bakuabo bua’shi beluumbule bua diadia efuku nka bu’shi adifiki malooba, n’atue namu abitungu tutumikile elango diaye. w23.06 8 ¶1-2

Mu kipua kia 1978, babaadi bebakie nshibo ikile mashibo ooso a mu Tokyo mu Japon bula. Ibaadi na ma etaje 60, bantu babaadi ababandila babaadi abeyipusha’shi ino nshibo i kushaala imane apakitshika kutshinkatshinka kua nsenga akukitshikaa mu kino kibundi misuusa i bungi su? Bantu bebakie ino nshibo mbakite naminyi bua’shi ikadikie ayishaala imane apakitshika kutshinkatshinka kua nsenga? Baaba beyibakie, mbeyipue mu mushindo wa’shi ikadikie i bukopo na i na ngobesha ya kukambila kutshinkatshinka kua nsenga. Bena Nkidishitu be nka bu ino nshibo. Mu mushinso kinyi? Abitungu muina Nkidishitu ekadikie na nkatshinkatshi, pankatshi pa kushaala munyingie na bukidi bua kupusha. Abitungu ekadikie munyingie na kushaala sh’asanyishua nsaa ayitungu kukookiela miiya ya Yehowa na mayi aaye a kulonda. Abitungu muina Nkidishitu ekadikie na “bukidi bua kukookiela” kushi kuladikiisha mianda. Mu ungi mpushisho, abitungu muina Nkidishitu ekadikie na “nkatshinkatshi” sunga kuikala na bukidi bua kupusha mu ingi mianda su bi na muulo. (Yak. 3:17) Muina Nkidishitu baapu kulonga bia kuikala na uno mmueneno a mianda e na nkatshinkatshi, t’akekadika na mianda i bukopo sunga kilekiela nya. w23.07 14 ¶1-2

Yesu pabakudile bibaadi abitungu’shi akambile bitompuanga bibaadi abitukila kui Satana Diabulu, mu biabia bitompuanga mubaadi mpaa na buluishi bua pa butooka bua lulamato luaye kui Efile Mukulu. (Mat. 4:1-11) Satana baadi na kitshibilo kia’shi Yesu akite muluisho, bua’shi t’apetanga mushindo wa kutusha nkuulo. Pabaadi akitshi mudimo waye wa bulungudi pano pa nsenga, Yesu baadi munyingiile bitompuanga bi bukopo. Beshikuanyi baye babaadi abamubingabinga na kukimba bia’shi bamuipee. (Luk. 4:28, 29; 13:31) Baadi dingi munyingiile kukutua kua kupuidika kua balongi baye. (Mak. 9:33, 34) Baadi ekalakasha bua muwa waye, bi’akakiengieshibua na kumonyibua ku bisumanga. Dingi, baadi muipayibue nka bu ntomboshi na kukiengieshibua ngofu. (Eb. 12:1-3) Baadi munyingiile mpaa na ku kipindi kia nfudiilo kia lukalakashi mu aye nabene, kushi ku bulami bua Yehowa. (Mat. 27:46) Mu binyibinyi, Yesu bakiengiele ngofu bua kutusha nkuulo. T’atupushaa namu kifulo kikata bua Yesu nsaa y’atunangushena ku mushindo wadi muilambule buetu su? w24.01 10-11 ¶7-9

Luishinko aluitukuasha mu kipuano kietu na bangi. Aluitukuasha dingi buatudia kuteemesha kalolo nsaa ayakula bangi. (Yak. 1:19) Na dingi, luishinko aluitukuashaa buatudia kuikala mu kipuano na bangi. Aluitukaluilaa dingi bua kupela kukita mianda bukidibukidi, sunga kuakula mianda i bubi, nsaa yatudi na nsungu sunga na tuinyongoshi. Na dingi su tubekala na luishinko, t’atuikala na bukidi bua kukuata nsungu p’abetuluishiisha kui bakuetu. Pamutue pa kualusha bubi ku bubi, ‘atukatungunuka na kuileeshena luishinko ku muntu na muntu na kuifuilena lusa n’eshimba dimune.’ (Kol. 3:12, 13) Luishinko lui kuitukuasha dingi bua kuata bitshibilo bi buwa. Pamutue pa kuikala na lubilo lua kukita mianda sunga kuiyikita na bukielo, abitungu tuate nsaa ya kukimbuula, na kutaluula bi mueneno eetu bua muanda watukiebe kukita. Bu kileshesho, nsaa y’atukimbi mudimo, tui kukumiina mudimo wa kumpala w’atupete. Biabia su tui na luishinko atukaata nsaa ya kutaluula bukitshishi bui na wawa mudimo ku kifuko kietu, na ku kipuano kietu na Yehowa. Biabia patudi na luishinko, aluitukuasha buatudia kupela kuata bitshibilo bibubi. w23.08 22 ¶8-9

We mulombene kubofula pa muanda okuete kuitatshisha bua kukambila binangu bi bubi. Kunangushena ku mulayilo ubodi mukite kui Yehowa nsaa ibodi muilambule kuadi, akunyingisha kitshibilo kiobe kia kukambila bitompuanga. Mu mushindo kinyi? Nsaa yuelambula kui Yehowa, wepele obe nabene. Bino abipushisha’shi, osangula bua kupela kukita mianda sunga bipatshila bish’abisankisha Yehowa. (Mat. 16:24) Biabia p’ofumankana na kitompuanga, t’oyikala na lukalo lua kuata nsaa bua kuuka kiodia kukita nya. Kadi oyikala mupue kuata kitshibilo kia kukita, kuamba’shi kushaala na lulamato kui Yehowa. Oyikala na kitshibilo kia kusankisha nka Yehowa. Paapa, wekala nka bu Yoobo. Sunga mbibaadi mufumankane na nkalakashi i bukopo, bambile n’eshimba dimune’shi: “Mpaa na pa nkafuila, ntaa na ndekie kululama kuande!”​—Yob. 27:5. w24.03 9 ¶6-7

Yehowa, “Efile Mukulu a kifulo e netu.” (2 Ko. 13:11) Etupasukilaa pa bupenka. Tui bashinkamishe’shi tui ‘befunyishue na kifulo Kiaye ki na lulamato.’ (Mis. 32:10) Su tubanyiisha kunangushena ku mushindo w’etuleshaa kifulo kiaye, atunyiisha kuipusha mu kipuano ki bukopo naye. Atuipusha mu bulungantu bua kuifubuila kuadi mu luteko na kumulungula biatudi na lukalo lukata lua kifulo kiaye, atumulungula nkalakashi yetu yooso bashinkamishe’shi eyiuku kalolo na akumiina kuitukuasha. (Mis. 145:19) Nka bi’atuifubuilaa peepi na kaalo efuku di mashika, ngi biatudia kuifubuila namu ku kifulo kia Yehowa. Bu bikale’shi kifulo kia Yehowa ngi akimutakulaa bua kukita mianda, nakio kimuikashe dingi na lusa lukata. Biabia kumiina kifulo kia Yehowa mu nshalelo oobe. Atue booso atualuula ku kifulo kiaye p’atualuula’shi: “Ne mufule Yehowa”!​—Mis. 116:1. w24.01 31 ¶19-20

Yesu baadi mukite ingi mianda i bungi kukatusha penda kulungula bantu’shi eshina di’Efile Mukulu nyi Yehowa. Bena Yuda babaadi Yesu mulongieshe babaadi bapue kuuka eshina di’Efile Mukulu. Anka Yesu nyi batshile mpango ya kuikala “yawa . . . mupatuule Kiadi.” (Yo. 1:17, 18) Bu kileshesho, Bifundue bia ki na Ebelu abilesha’shi Yehowa, nyi Efile Mukulu sha kalolo na lusa. (Efi. 34:5-7) Yesu baadi mupatuule bino bia binyibinyi kalolo nsaa ibaadi akula muanda wa lukindi pabitale muana ntomboshi na nshaye. Nsaa yatubadika mu Bible pabitale yawa nshe muana amono muana aye belanga kuishimba, “pabaadi ki ku bula’biaa,” aye nkusuuka lubilo nkumuanya kiipa nkumufifia kuitama na kalolo koso na aaye nkumufuila lusa n’eshimba diaye dioso, atumono kileshesho kia mushindo awikalaa Yehowa na lusa na kalolo. (Luk. 15:11-32) Yesu baadi mukuashe bangi bantu buabadia kuuka bi bumuntu bua Yehowa binyibinyi. w24.02 10 ¶8-9

Yehowa namu anyingishaa booso benyongole. Tui kuambula Yehowa mu kupusha kua bangi lusa na kuibanyingisha naminyi? Mushindo umune watudia kuibikita, mpa kudima ngikashi mu mashimba eetu ilombene kuitukuasha buatudia kuikala na lusa na kunyingisha bangi. Bu ngikashi kinyi? Nkinyi akiketukuasha bua kulama kifulo kiatudi nakio lukalo bua kutungunuka na kuinyingishena kuifuku n’efuku? (1 Tes. 4:18) Abitungu tudime ino ngikashi ayilondo, buatudia kuikala na kifulo kia bu bana na bana na kalolo. (Kol. 3:12; 1 Mp. 3:8) Ino ngikashi i kuitukuasha naminyi? Su tui na lusa bua bakuetu balume na bakashi na kuibapasukila, atukekala na lukalo lui bukopo lua kuibanyingisha nsaa y’abakiengie. Nka bu bibakuile Yesu’shi: “Kukanua akuakulaa biule muishimba. Muntu ebuwa, akulaa mianda ibuwa.” (Mat. 12:34, 35) Kunyingisha bakuetu balume na bakashi be mu lukalo kui na muulo ukata, muanda ngi mushindo aulesha’shi tui bebafule. w23.11 10 ¶10-11

Abitungu tutekie bukuashi su atukumiina kupusha matemuki a mu Bible. Tubande kutaluula kino kileshesho. Puandikisha’shi buende mu kutemba mu ingi mbalo yosh’owuku kalolo, kadi okuete kuenda na kuuku oobe awuku yaya mbalo kalolo, awuku mbalo yanudi na eshinda dianudia kuyila. Kushi mpaka, wekala na lutumbu bua kuuku oobe bakumiina kuenda n’obe pamune. Mu mushindo umune, Yehowa e nka bu uno kuuku eetu a p’eshimba, awuku mafuku eetu e kumpala kalolo. Biabia, bua kupusha matemuki a mu Bible kalolo, abitungu tuiyishe, tutekie Yehowa bukuashi. (Nda. 2:28; 2 Mp. 1:19, 20) Nka bu muledi e buwa, Yehowa akumiina’shi bana baye bekale na muloo mu mafuku aafiki. (Yel. 29:11) Biabia, mu kuilekeena na baledi ba bana ba bantu, Yehowa mmulombene kuitulungula mianda i buwa ya mu mafuku e kumpala kalolo. Yehowa baadi musangule bantu bua’shi bafunde matemuki Muiyi diaye, buatudia kuuka mianda ikata kumpala kua’shi ikitshikie.​—Yesh. 46:10. w23.08 8 ¶3-4