Nsaa yopusha bu bakabilwa

Adriana a mu Brésil ashinkamisha’shi: “Binadi nampusha tabibadi abipu nya, namwene’shi napu kufudiila bibuwa nfwe.”

KASHA tobopushishe bubi mu kipaso kyoshokumina dingi kwikala na muwa su? Yaya nsaa we mukumbene kupusha bibapushishe Adriana. Badi na kinyongwa kikilekile na badi emono bu shi na muulo. Adriana babadi bamukwate na mukumbo ubadi aumwinyongosha nsaa yooso.

Banda kutala dingi kileshesho kya mungi mwana mulume a mu Japon abetamina bu Kaoru badi alama baledi baye bapwe kukula abakumbu. Amba’shi: “Nsaa inadi mukalakashwe na myanda ya ku mudimo, ingi nsaa nadi nakutwa nsala, nakutwa mpa na tulo. Nadi napwandikisha’shi myanda yande tayipu su ntshi mufwe.”

Mungi mwana mulume a mu Nigeria abetamina bu Ojebode amba’shi: “Nadi mwinyongole mu mushindo unadi nanosha mpolo, byabya ami nkukimba mushindo wa kwiyipaa.” Mwanda wa muloo, Ojebode, Kaoru, na Adriana tababadi beyipee nya. Anka ku kipwa kyooso binunu bya bantu bakwete kwiyipaa.

KODI MULOMBENE KUPETELA BUKWASHI

Bantu bebungi beyipee mbana balume bebungi babadi abapusha bufu bwa kuteka bukwashi. Yesu bambile’shi, basha maladi nyi abendaa kwa munganga. (Luka 5:31) Su okwete kupusha byabya na opusha bu mukumbene kwiyipaa, topushanga buufu bwa kuteka bukwashi. Bantu bebungi be na nkalakashi ya mu binangu, bakwete kukimba bukwashi bwa kwa munganga abwibakwasha bwa kunyingiila. Ojebode, Kaoru, na Adriana mbebakwashe kwi munganga na binobino be bibuwa.

Ba doktere mbalombene kutusha bwanga sunga malango bwa kupasha muntu e na lukalakashi lwa mu binangu. Baba abakumbu namu be na lukalo lwa’shi bena kifuko na ba kuuku bekale abebatemesha, na kwibakwasha. Kuuku mukata mukile boso nyi Yehowa Efile Mukulu, atushaa bukwashi bukile buwa bwi mu Eyi dyaye, Bible.

KWI BUKWASHI BWA LOSO SU?

Baba abakumbu mukumbo wa mu binangu mbalombene kwibabuka kwa munganga munda mwa mafuku ebungi na mbalombene kushintuula biubishi byabo. Anka su we mukumbe uno mukumbo, we mukumbene kukulupila myanda ibuwa ayifiki kumpala, bu bikwete kukita Ojebode. Amba’shi: “Nkwete kutengyela na lukulupilo looso kulombana kwa mayi e mu Yeeshaya 33:24, aandungula nsaa ishayikala muntu sunga umune amba’shi, ‘ne na mukumbo.’” Anka bu Ojebode, nyingishibwa ku bukwashi bwa mulayilo w’Efile Mukulu wa “nsenga ipya,” mushamwikala dingi “mitanyo.” (Kibafumbwilwe 21:1, 4) Uno mulayilo ngutale kupudisha kwa maladi a mu binangu. Mikumbo yodi nayo ayipu bwa looso. Nkalakashi yoobe yooso ‘tweyitentekyesha dimo, . . . tayikufwila dimo kwishimba nya.’—Yeeshaya 65:17.

Verse ya mu Bible ilombene nkukwasha

Efile Mukulu auku byopusha.

“Ami Yehowa n’Efile oobe, nee mukukwate kw’eyaasa dyoobe dilume, nankulungula’shi: ‘Totshinanga, nnaami akukwasha.’”—Yeeshaya 41:13.

Yehowa auku byatupushaa kukila bilombene kupusha mungi muntu ooso, na akumina kwitukwasha.

Nangushena ku Eyi dy’Efile Mukulu.

“[Eliya] batekyele lufu. Amba’shi: ‘. . . Yehowa, ata muuwa wande.’”—1 Banfumu 19:4.

Ojebode amba’shi: “Ne mupete bukwashi mu kunangushena ku Eyi dy’Efile Mukulu. Namona’shi mutemuki Eliya bapushishe nka binadi napusha.”

Longyela ku bileshesho bya mu Bible.

“Anka, ami [Yesu] ne mutekye boobe, bwa’shi tala lukumiino lwobe lwesheta”—Luka 22:32.

Kunyima kwa Mpyeele mutumibwa kupela Yesu misusa isatu, badi mwinyongole ngofu aye nkudila bikata. Kauro amba’shi: “Kunangushena ku bibadi bipushe Mpyeele, nkunkwashe bwa kumona Yehowa na Yesu bibabadi bakwashe Mpyeele. Bino abimpa bukome.”

Nkalakashi yoobe yooso ‘tweyitentekyesha dimo, . . . tayikufwila dimo kwishimba nya.’—Yeeshaya 65:17