Lama “ndimi ya kaalo ka Yah” ayitembe

1. Bible alesha bi kifulo kia binyibinyi naminyi?

“MDIMI ya kaalo ka [kifulo] nkiengie kia kaalo akitembe, bu ndimi ya kaalo ka Yah. Meema akata ta ngalombene kushima kaalo ka kifulo, sunga miela ta ngilombene kuikiyina.”b (Ll. 8:6, 7, NWT) Bino abilesha bi buwa bua kifulo kia binyibinyi! Bino bishima abishinkamiisha bia binyibinyi kui beyibakishene’shi: Nui balombene kuikala na kifulo kia binyibinyi kui muntu na muinaye.

2. Abitungu beyibakishene bakite kinyi bua kushinkamisha’shi kifulo kiabo ta nkibofule?

² Abitungu beyibakishene bekitshishe ngofu bua kuifulena ku muntu na muinaye mu nshalelo aabo ooso. Bu kileshesho, bua’shi kaalo katungunukie na kutemba, abitungu muntu kampanda ekale eele nteete. Biabia su aleka kuela nteete, kaalo akashimi. Mu mushindo umune, kifulo ki pankatshi pa mulume na mukashi nkilombene kushaala kinyingie, nka su banyingisha kipuano kiabo. Ingi nsaa, bantu beyibakishene mbalombene kupusha’shi kifulo kiabo kibabofula, bikishekishe nsaa yabadi na nkalakashi ya kupeta makuta, mikumbo, na nkalakashi ya kukusha bana. Biabia, su we muibakile, mmushindo kinyi oodi mulombene kulama “ndimi ya kaalo ka Yah” ayitembe muiyibakishi diobe? Mu uno muisambo, atukesambila mishindo isatu ayileesha bianudi balombene kutungunuka na kulama kipuano kienu ki bukopo na kuikala na muloo muiyibakishi.c

TUNGUNUKA NA KUNYINGISHA KIPUANO KIOBE NA YEHOWA

3. Kulama kipuano kinyingie na Yehowa kui kukuasha beyibakishene buabadia kulama kipuano kiabo akitala naminyi? (Mulungudi 4:12) (Tala dingi kifuatulo.)

³ Bua’shi mulume na mukashi balame “ndimi ya kaalo ka Yah” ayitembe, abitungu booso babidi bekitshishe bua kulama kipuano kiabo kinyingie na Yehowa. Kipuano kiabo kinyingie ki kuibakuasha muiyibakishi diabo naminyi? Nsaa i bantu beyibakishene abataluula bi kipuano kiabo na kia Nshabo e muiyilu, abilesha’shi mbelumbuule bua kutaluula dino elango, na kunyima adibakuasha bua kuleka na kukambila nkalakashi ilombene kufuisha kifulo kiabo mu kubofula ku muntu na mukuabo. (Badika Mulungudi 4:12.) Bantu ba mu kikudi, abekitshishaa bua kuambula Yehowa, na kudima ngikashi bu ino: Kalolo, luishinko, na kuifuidishena lusa. (Ef. 4:32–5:1) Su beyibakishene balesha ino ngikashi, abikala bibabofuile buabadia kutamisha kifulo kiabo. Ungi mukuetu mukashi abetanyinaa bu Lena baadi mutuele ku bulunda akita bipua bikile pa 25, amba’shi: “Mbibofule bua kufula na kuneemeka muntu a mu kikudi.”

4. Buakinyi Yehowa baadi musangule Yosefe na Mariya buabadia kuikala baledi ba Mesiya akafiki?

⁴ Tutaleyi kileshesho kia mu Bible. Yehowa baadi musangule mulume na mukashi babaadia kuikala baledi ba Mesiya akafiki, na baadi musangule Mariya na Yosefe batuukile mu beekulu ba Davide. Buakinyi? Booso babidi, babaadi mu kipuano ki buwa na Yehowa, na Yehowa baadi muukie’shi mbalombene kunyingisha eyibakishi diabo bua kifulo kiabadi naaye. Beyibakishene, nkinyi kianudi balombene kulongiela ku kileshesho kia Yosefe na Mariya?

5. Balume mbalombene kulongiela kinyi ku kileshesho kia Yosefe?

⁵ Yosefe baadi alondo buludiki bua Yehowa, na bino bibaadi bimuikashe bu mulume e buwa. Misuusa isatu ya mfudiilo, baadi mupete buludiki abufiki kui Efile Mukulu pabitale kifuko kiaye. Nsaa yooso, baadi akookiela kushi kunyengakana sunga bibaabidi bukopo bua kuibitumikila. (Mat. 1:20, 24; 2:13-15, 19-21) P’aye kulonda buludiki bu’Efile Mukulu, Yosefe baadi akaluila Mariya na kumupasukila. Banda kunangushena bikitshiino bia Yosefe bibaabidi bitakule Mariya mu kumufula ngofu na kumupa kaneemo! Balume, su nuambula Yosefe pa kukimba malango aatuukila mu Bible, anupasukila bifuko bienu kalolo.d Su nuatumikila dino elango sunga biekala bukopo bua kuiditumikila, anulesha’shi nui bafule bakashi beenu na anunyingisha eyibakishi dienu. Mukuetu mukashi a mu Vanuatu abaabadi bebakile akita bipua bikile pa 20 kuiyibakishi amba’shi: “Nsaa ibaadi mulume ande akimbi na kulonda buludiki bua Yehowa, naadi namuneemeka ngofu. Naadi nepusha mu bulungantu, na naadi nakuatshishena bitshibilo biaye.”

6. Kileshesho kia Mariya nkilombene kulongiesha bakashi kinyi?

⁶ Mariya baadi na kipuano kiaye aye nabene na Yehowa, baadi mulame lukumiino luaye lunyingie mui Yehowa. Mariya baadi muukie Bifundue kalolo. Baadi dingi aata nsaa ya kunangushena. (Luk. 2:19, 51) Kushi mpaka tui balombene kushinkamisha’shi kipuano kia Mariya na Yehowa kibaadi kimuikashe bu mukashi e buwa bukile. Lelo uno, bana bakashi be bungi bakuete kuikitshisha bua kukita mianda bu bibaadi Mariya akitshi. Bu kileshesho, mukuetu mukashi abetanyina bu Emiko amba’shi: “Pa naadi nki bukupi naadi na kiubishi ki buwa kia mianda ya mu kikudi. Anka nsaa inaadi muibakilue naadi musangane’shi mulume ande nyi, etuelela luteko, akunkusha lulanguilo lua mu kifuko, lukumiino luande lubaadi alukulupila nka ku biabia bibaadi akitshi. Naadi mutundule’shi bibaadi abitungu ndame kipuano kiande ami nabene na Yehowa kinyingie. Binobino ne muiatshile nsaa ya kushaala bupenka n’Efile Mukulu ande, bua kuela luteko, kubadika Bifundue, na kunangushena bi binangu biaye.” (Nga. 6:5) Bakashi, su nuatungunuka na kunyingisha kipuano kienu na Yehowa, balume beenu abekala na tubingilo tui bungi tua kuinusamuna na kuinufula.​—Nki. 31:30.

7. Bantu beyibakishene mbalombene kulonga kinyi pabitale kulanguila pamune kui Yosefe na Mariya?

⁷ Yosefe na Mariya babaadi abafubu dingi pamune bua kulama kipuano kiabo ki bukopo na Yehowa. Babaadi bapushe bi muulo wa kulanguila Yehowa pamune mu kifuko. (Luk. 2:22-24, 41; 4:16) Bibaadi bilombene kuibelela bukopo bua kukita lulanguilo pamune, bikishekishe nsaa ibaabadi bapete bana be bungi, anka babaadi bobeshe kuibikita. Kino nyi kileshesho ki buwa bukile kui beyibakishene lelo uno! Su nuekala na bana be bungi, bu bibaadi Yosefe na Mariya bi kuinuelela bukopo buanudia kutuela mu bisangilo, sunga bua kuikala na programe a kukita lulanguilo lua mu kifuko. Bi kuinuelela dingi bukopo bua kupeta nsaa ya kuibadikila sunga kukita luteko pamune mu kifuko. Biabia, ntentekieshayi’shi nsaa y’anulanguila Yehowa pamune, anuifubuila peepi naaye na kuanudi anue banabene. Biabia tuulayi lulanguilo pa mbalo ya kumpala.

8. Su nui na bilumbu muiyibakishi dienu nui balombene kukita kinyi bua’shi lulanguilo lua mu kifuko luinukuashe?

⁸ Nui kukita naminyi su muiyibakishi dienu mui bilumbu? Kinangu kia kukita lulanguilo lua mu kifulo pamune ki kumueneka bu kishi buwa. Su mbiabia, bangayi na kutaluula mianda mu kikoso na ilombene kusankisha, mianda y’anusangeela anue booso bua kuisambila pamune. Dino etabula ndilombene kunyingisha kipuano kienu na lukolo luenu lua kukita mianda ya mu kikudi pamune.

KISHAAYI NSAA PAMUNE

9. Buakinyi abitungu mulume na mukashi bakishe nsaa pamune?

⁹ Beyibakishene, nui kulama dingi kifulo kienu akitembe pa kukisha nsaa pamune. Nsaa y’anukitshi bino, abinukuasha bua kushaala pamune na kuuka abinangushena muina dibaka noobe na bi’apusha. (Kib. 2:24) Tala mianda ibaadi ifikie mu nkatundula Lilia na Ruslan kunyima kuabo kuiyibakishena babaapu kukita bipua 15. Lilia aakula’shi: “Tui basangane’shi ta tui na nsaa i bungi ya kushaala pamune bu bibaatudi atupuandikisha. Yeetu nsaa yooso ibaadi ayipuila nka ku midimo ya ku mbidi, midimo ya ku nshibo, na kupasukila bana beetu. Bu biatudi mulume na mukashi, tui basangane’shi ta tukuete kufubisha nsaa yeetu kalolo muiyibakishi dietu, biatudi balombene kuikala atushaala pamune.”

10. Mmushindo kinyi ulombene mulume na mukashi kutumikila mayi a kulonda atupete mu Bena-Efeso 5:15, 16?

¹⁰ Beyibakishene be kukita nkinyi bua kushinkamisha’shi bakuete kukisha nsaa pamune? Nui balombene kulama nsaa, sunga kukita programe a kuikala anushaala pamune. (Badika Bena-Efeso 5:15, 16.) Mukuetu mulume a mu Nigeria abetanyinaa bu Uzondub amba’shi: “Nsaa inaadi mukite programe a midimo yande, naadi mui muele programe a kukisha nsaa na mukashi ande pamune, na kutuula ino nsaa pa mbalo ya kumpala.” (Fid. 1:10) Tutaleyi mushindo ubaadi Anastasia mukashi a mukunkushi a kifunda a mu Moldavie mufubishe nsaa yaye kalolo. Amba’shi: “Nekitshishaa bua kufuba midimo yande ami nabene nsaa i mulume ande muipaane mu kulombasha mashito aaye. Kunyima kua kukita midimo yetu atukisheyaa nsaa pamune.” Biabia bikuikala naminyi su programe eenu enufuishiisha lukalakashi lua kupeta nsaa ya kushaala pamune?

11. Akila na Prisile babaadi abafubu midimo kinyi pamune?

¹¹ Beyibakishene mbalombene kulongiela ku kileshesho kia Akila na Prisile, mulume na mukashi babaabadi bafule kui bena Kidishitu ba kala. (Lom. 16:3, 4) Sunga Bible ta muakule mianda i bungi pabitale eyibakishi diabo, anka alesha’shi babaadi abafubu, kulungula mukandu wi buwa, na kuenda mukukuasha bangi pamune. (Bik. 18:2, 3, 24-26) Ngi buakinyi nsaa ayakula Bible bua Akila na Prisile misuusa i bungi ebateemunaa nka pamune.

12. Mulume na mukashi mbalombene kukita kinyi bua kukisha nsaa pamune? (Tala dingi kifuatulo.)

¹² Beyibakishene be kuambula Akila na Prisile naminyi? Nangushenayi pabitale mianda i bungi ayitungu’shi obe sunga muina koobe akite. Nui kukita ingi midimo pamune mu kifuko pa mutue pa kuikala anuiyikitshi bupenka su? Bu kileshesho, Akila na Prisile babaadi abalungula mukandu wi buwa pamune. Nui baate mpango ya kuikala anukitshi bino nsaa yooso su? Akila na Prisile babaadi abafubu pamune. Obe na mukashi oobe, pangi t’anukitaa mudimo umune nya, biabia ta nui balombene namu kukita midimo ya mu nshibo pamune su? (Mul. 4:9) Su nuekuashena bua kukita ingi midimo mu kifuko anunyiisha kuikala bu ba kuuku, na kupeta mushindo wa kuisamba pamune. Robert na Linda babaadi beyibakishene kubaapu kukila bipua 50. Robert amba’shi: “Mu binyibinyi ta tubaadi na nsaa i bungi ya kukisha kapapi pamune nya. Nsaa yantumpu malonga, mukashi ande namu afiki akumuna meema ku malonga, sunga nsaa yandi paasha naadimi mu lupango mukashi ande namu afiki atufubu naaye pamune, napushaa muloo ukile. Kufuba pamune nkuituikashe mu buumune. Kifulo kietu kikuete kutungunuka na kutama.”

13. Bua kuikala mu buumune bua binyibinyi, abitungu mulume na mukashi bakite kinyi?

¹³ Tentekieshayi’shi, ta nka penda kuikala pamune nyi kulombene kuikala na muulo bua kukuatshishena buumune nya. Ungi muana mukashi a mu Brésil akula’shi: “Lelo uno, tui na mianda i bungi ayikumbu binangu bietu, tui basangane’shi tui balombene kupona mu muteo wa kunangushena’shi, bu biatudi bashaale mu nshibo imune, tukuete kukisha nsaa pamune.” Ne mufikie mu kusangana’shi abitungu kukita mianda i bungi kushi penda kukisha nsaa pamune. Ku lungi lupese, abitungu mpasukile nkalo ya mulume ande. Lamiina bi Bruno na mukashi aaye Tays, biabadi bashinkamishe’shi ooso akuabadi apasukilaa nkalo ya mukuabo. Akula’shi: “Nsaa yatudi bulungantu, atukatushaa ma telefone tue atuula kula, bua kumona bia kusangeela nsaa yatukisha pamune.”

14. Su mulume na mukashi t’abasangeelaa kukisha nsaa pamune, abitungu bakite kinyi?

¹⁴ Biabia, nkinyi kianudi balombene kukita su obe na mulume oobe t’anusangeelaa kukisha nsaa pamune? Pangi namu nui bafule mianda ilekeene, sunga’shi nui befitshishene munda. Nkinyi kianudi balombene kukita? Tubande kutala muanda wa kaalo watudi bapue kuteemuna kunundu. Kaalo t’akabangaa kutemba bi bukopo nka musuusa umune nya. Abitungu kubanga kuela nteete kapeela kapeela na biakafiki kaalo kakata. Mu mushindo umune, buakinyi ta nui balombene kubanga kukisha nsaa bua minite ipeela kuifuku dioso? Ikalaayi bashinkamishe’shi nukuete kukita muanda kampanda w’anusangeela anue booso babidi, nakuleka kukita muanda kampanda ulombene kuibuesha nsungu. (Shak. 3:18) Nsaa yobanga kumunga munga we mulombene kumona kifulo kienu kibabanga kutama.

EKITSHISHENEYI MIANDA NA KANEEMO

15. Buakinyi abitungu’shi muiyibakishi muikale kaneemo bua’shi nulame kifulo kienu akitembe?

¹⁵ Kaneemo ke na muulo muiyibakishi. Lupapi alukuashaa bua’shi kaalo katembe ngofu. Su lupapi ta lui kuanka, kaalo akashimaa bukidi. Mu mushindo umune, pakushi kaneemo muiyibakishi bantu beyibakishene mbalombene kusangana’shi kifulo kiabo t’akitama bukidi. Ku lungi lupese, mulume na mukashi abekitshishaa bua kuileshena kaneemo ku muntu na mukuabo, abafubaa pamune bua’shi kifulo kiabo kishaale akitembe. Biabia, abitungu oukie mu binangu biobe’shi bino mbiabikalaa, kunangushena penda’shi okuete kumulesha kaneemo ta muanda, kadi abitungu mulume sunga mukashi oobe apushe’shi okuete kumuneemeka. Penny na Aret bapue kuiyibakishena kubaapu kukila bipua 25. Penny amba’shi: “Ku muanda wa’shi atuineemekieshenaa ku muntu na muntu, mu nshibo muetu mui muloo nka nsaa yooso. Atuipushaa mu bulungantu bua kuilungushena mianda, muanda atuuku’shi mueneno a muntu ooso yawa e na muulo ukata.” We kukita naminyi bua kukuasha mukashi sunga mulume oobe bua’shi apushe’shi omuneemekaa binyibinyi? Tutaleyi kileshesho kia Abrahame na Sara.

16. Balume mbalombene kulongiela kinyi ku kileshesho kia Abrahame? (1 Mpyeele 3:7) (Tala dingi kifuatulo.)

¹⁶ Abrahame baadi akitshiina Sara mianda na kaneemo. Baadi aata mueneno a Sara na muulo na kuneemeka biapusha. Ungi musuusa Sara baadi muinyongole na aye nkulungula Abrahame biepusha, sunga mbibaadi akula bu amusashila. Abrahame bafiitshile munda, sunga kuakula ungi muanda wi bubi su? Nya. Baadi muukie’shi Sara baadi mukashi mukookiele na amukuatshishenaa ku bitshibilo biaye. Abrahame bamuteemeshe na kalolo kooso na kuikitshisha bua’shi apue wawa muanda. (Kib. 16:5, 6) Ndilongiesha kinyi di’atupete pano? Balume nui na matalua a kuata bitshibilo mu bifuko bienu. (1 Kod. 11:3) Biabia, kintu ki buwa kiodi mulombene kukita kumpala kua kuata kitshibilo, nkuipusha mukashi oobe bi mueneno aaye, bikishekishe su kitshibilo ki na bukitshishi kuadi. (1 Kod. 13:4, 5) Ingi nsaa mukashi oobe mmulombene kuikala na kenyongoshi, na kuikala na lukalo lua’shi akulungule namu bi’apusha. Oneemekaa namu bi’apusha pa kumuteemesha na kalolo kooso su? (Badika 1 Mpyeele 3:7.) Angela na Dmitry mbapue kuiyibakishena baakita bipua 30. Apatuula mushindo auneemekaa mulume aaye bi’apusha. Amba’shi: “Dmitry ekalaa kuanka nsaa yooso bua kunteemesha, nsaa yandi na nsungu, sunga pankiebe kuakula naaye nka bisumanga. Ekalaa na luishinko kuandi sunga nsaa yandi mukalakashue mu binangu.”

17. Bakashi be kulongiela kinyi ku kileshesho kia Sara? (1 Mpyeele 3:5, 6)

¹⁷ Sara baadi aneemeka Abrahame pa kumukuatshishena ku bitshibilo biaye. (Kib. 12:5) Ungi musuusa Abrahame baatshile kitshibilo kia kuteekiesha beenyi babaafikile mu kabasamushi. Balunguile Sara bua’shi ayimikie kiakia kibaadi akitshi bua kumona bia kuibateekiela bidibua bi bungi. (Kib. 18:6) Sara bayimikile mudimo waye nka musuusa umune, aye kukuatshishena kitshibilo kia Abrahame. Bakashi, nui balombene kuambula Sara pa kukuatshishena bitshibilo bia balume beenu. Nsaa y’anukitshi biabia anunyingisha eyibakishi dienu. (Badika 1 Mpyeele 3:5, 6.) Dmitry, atudi bateemune mu kikoso ki kunundu apatuula mushindo aumukuashaa mukashi aaye buadia kuipusha’shi, kuete kumuneemeka. Aakula’shi: “Sunga nsaa ayimueka’shi mueneno eetu muilekeene, sunga kuatuuka bipeta bishi buwa, ta ngakulaa bi bubi nya.” Abikalaa bibofule bua kufula muntu akuneemeka mu uno mushindo!

18. Beyibakishene be kukuashibua naminyi p’abekitshisha bua kulama kifulo kiabo akitembe?

¹⁸ Lelo uno, Satana kuete akumiina kuluisha kifulo ki munkatshi mua eyibakishi dia be na Kidishitu. Auku’shi su beyibakishene bakutua kuifulena ku muntu na muntu ababanga kuenda kula na Yehowa. Biabia, kifulo kia binyibinyi t’akishiminaa! Ngi buakinyi, abitungu kifulo ki’anue beyibakishene kikale bu kifulo kiabadi baleshe mu Loono-Luuwa. Ikalaayi na kitshibilo kia kutuula Yehowa pa mbalo ya kumpala muiyibakishi dienu. Ikalaayi na nsaa ku muntu na muntu ya kushaala pamune na kuineemekieshena ku bi’anupusha na ku nkalo yeenu. Su nubakitshi biabia, eyibakishi dienu adituadila Nsulo ya kifulo kia binyibinyi Yehowa kineemo, nka bu kaalo akatembe, kifulo kienu akishaala akitembe mu nshalelo eenu ooso.