We mulombene kulombasha bipatshila biobe bia mu kikudi

1. Be bungi bakuatudi bakuete kuikitshisha bua kukita kinyi?

TOOPUILE kuata kepatshila ka mu kikudi na we kitshisha bua kuikalombasha su?b Su mbiabia, tue bupenka’be. Bu kileshesho, Philip baadi akumiina kulumbuula nteko yaye na bungi bua misuusa yadia kuteka, anka baadi ekitshisha buadia kupeta nsaa ya kuikala atekie. Kepatshila ka Erika kabaadi ka kuikala afiki ku bisangilo bia mudimo wa bulungudi pa nsaa, anka baadi mutungunukie na kufikanga nka peepi na ku mfudiilo kua bisangilo. Tomáš baadi muikitshishe nsaa i bungi bua kubadika Bible ooso mushima. Amba’shi: “Ntshi naadi na muloo wa kumubadika nya. Naadi mutompe misuusa isatu, anka nsaa yooso naadi nayimeena nka mu mukanda wa Bena-Levi kumpala kua kuleka kubadika.”

2. Buakinyi ta tui balombene kutshoboloka su tuibeatshile kepatshila ka mu kikudi, kadi ta tui bekalombashe?

² Su kano kabidi we muate kepatshila koshi mulombashe totshobolokanga. Muntu akieba kulombasha kepatshila akamueneka bu kapeela akatakie nka nsaa, na kuikitshisha kui bungi. Bu bi’okumiina nka kulombasha kepatshila koobe abilesha’shi okumiina kuata kipuano kiobe na Yehowa na muulo ukata, na’shi okumiina kumupa muyile ngobesha yoobe. Yehowa ataa kuikitshisha koobe na muulo. Ngi buakinyi te nkuteka bintu bi bungi bikile ngobesha yoobe nya. (Mis. 103:14; Mik. 6:8) Biabia abitungu kepatshila koobe kekale na nkatshinkashi, okite muyile nshalelo oodi naaye. Su we na kepatshila, we kukita nkinyi bua kuikalombasha? Biabia tuisambileyi angi mayele.

NYIISHA KUTAMISHA LUKALO LUA KULOMBASHA KEPATSHILA KOOBE

3. Buakinyi kunyiisha kutamisha lukalo lua kulombasha kepatshila kui na muulo?

³ Bi na muulo ukata bua kuikala na lukalo lua kulombasha kepatshila koobe. Nsaa yodi na lukalo lukata lua kulombasha kepatshila koobe, wekitshisha ngofu bua kuikalombasha. Lukalo luetu lua kulombasha kepatshila lui nka bu lupapi lui bukopo alutakula buato bua budia nkafika ku’abuende. Su lupapi lua nyiisha kupuka, buato bui nkafika pangi mbalo y’abuende. Na dingi lupapi lui bukopo, kui palufikaa na kituumo. Bi mumune, p’atunyiisha kuikala na lukalo atunyiisha kulombasha bipatshila bietu. Mukuetu mulume David a mu le Salvador bambile’shi: “Nsaa yonyiisha kuikala na lukalo lua kulombasha kepatshila, ekitshishe bua kuikalombasha. Totadilanga kintu su nkimune kia kukutshishua kulombasha kepathila koobe.” Biabia, we kukita kinyi bua kunyiisha kuikala na lukalo lua kulombasha kepatshila koobe?

4. Nkinyi kiatudi balombene kuteka? (Bena-Fidipe 2:13) (Tala dingi kifuatulo.)

⁴ Tekayi bua kunyiisha kutamisha bipatshila bienu. Yehowa e nkupa lukalo lua kulombasha kepatshila koobe kukiila ku kikudi kiaye kiselele. (Badika Bena-Fidipe 2:13.) Ingi nsaa tui kuata kepatshila muanda atuuku’shi tui balombene, na’shi mmuanda wi buwa. Anka tui kukutua kuikala na lukalo lua kuikalombasha. Uno ngi muanda umone Norina mukuetu mukashi a mu Uganda. Baadi muate kepatshila ka kulonga na bantu Bible, anka lukalo luaye lua kulombasha kano kepatshila ta lubaadi bukopo nya, muanda ta baadi anangushena’shi kiakia kitshibilo kiadi muante kia kuikala bu mulongieshi kibaadi buwa. Nkinyi kibamukuashiishe? Amba’shi: “Nabangile kuteka Yehowa efuku dioso, buandia kutamisha lukalo luande lua kulonga na bantu Bible. Muyile nteko yande, naadi muikitshishe bua kulumbuula mayele ande a kulongiesha. Kunyima kua mieshi ipeela, naadi musangane’shi lukalo luande lua kulombasha kano kepatshila lubaadi lutame ngofu. Mu kiakia kipua kimune, nabangile kulonga na bantu babidi Bible.”

5. Nku mianda kinyi kuatudia kunangushena bua kutamisha lukalo luetu lua kulombasha kepatshila keetu?

⁵ Nangushena ku bipue nkukitshina Yehowa. (Mis. 143:5) Mpoolo mutumibua baadi munangushene ku kalolo kashi kamulombene kabaabadi bamuleshe kui Yehowa, na bino mbimutakule bua kunyiisha kutamisha lukalo luaye lua kufubila Yehowa. (1 Kod. 15:9, 10; 1 Tim. 1:12-14) Bi mumune, su tubanyinsha kunangushena ku biabadi bapue kuitukishina kui Yehowa, abinyisha kuitutakula bua kuikala na lukalo lua kulombasha bipatshila bietu. (Mis. 116:12) Tutaleyi kibaadi kikuashe mukuetu mukashi a mu Honduras buadia kulombasha kepatshila kaaye ka kuikala bu mbala-mashinda a mieshi yooso. Amba’shi: “Naadi munangushene ngofu bimfule Yehowa. Mmukuashe buandia kuikala munkatshi mua muilo waye. Kuete ampasukila na kunkaluila. Kuno kunangushena nkunyingishe kifulo kiande muadi, na kunyiisha kutamisha lukalo luande lua kulombasha bipatshila biande.”

6. Nkinyi dingi kia kuitukuasha bua kutamisha lukalo luetu lua kulombasha kepatshila keetu?

⁶ Tuula binangu ku miabi ayituukila mu kulombasha bipatshila biobe. Tala kibaadi kikuashe Erika atudi bateemune kunundu, pabalombeeshe kepatshila kaaye ka kufika pa nsaa mu bisangilo bia bulungudi. Amba’shi: “Ne musangane’shi, naadi ashimisha mianda i bungi pa naadi afiki mu bisangilo bia bulungudi kunyima. Anka panabangile kufika kumpala kua nsaa, naadi apete mushindo wa kuisemeshena na bakuetu balume na bakashi na kukisha nabo nsaa pamune. Naadi dingi mupete mushindo wa kuteemesha malango alombene kunkuasha buandia kusankila na kulumbuula mudimo wande wa bulungudi.” Erika baadi mutuule binangu ku miabi ya kufika pa nsaa ku bisangilo bia bulungudi na kulombasha kepatshila kaaye. Obe namu we kutuula binangu ku miabi kinyi? Su we na kepatshila ka kuibadikila Bible na kuela nteko, nangushena biabidia kunyingisha kipuano kiobe na Yehowa. (Mis. 145:18, 19) Su we na kepatshila ka kudima ngikashi ya buina Kidishitu, nangushena ku biabidia kunyingisha kipuano kiobe na bangi. (Kol. 3:14) Ngi buakinyi, we kufunda tuno tubingilo tooso kuipuupua bua’shi omone bia kulombasha bipatshila biobe. Na wekadikie otala diadia epuupua nsaa yooso. Tomáš atudi bapue kuteemuna kunundu amba’shi: “Su ne na tubingilo tui bungi tua kulombasha kepatshila kande, nekitshishaa ngofu bua’shi nekalombashe.”

7. Nkinyi kibaadi kikuashe Julio na mukashi aaye bua kulombasha kepatshila kaabo?

⁷ Kisha nsaa na bantu abakunyingisha bua kulombasha kepatshila koobe. (Nki. 13:20) Tala kibaadi kikuashe Julio na mukashi aaye buabadia kulombasha kepatshila kaabo ka kutamisha mudimo wa bulungudi. Amba’shi: “Tubaadi basangule ba kuuku babaadi abetunyingisha bua’shi tuikitshishe buatudia kulombasha kepatshila keetu, na kuisamba nabo pabitale kano kepatshila. Ba kuuku beetu be bungi babaadi bapue kulombasha kano kepatshila kamune. Ngi buakinyi babaadi abetupa malango atudia kufubisha. Na kuitunyingisha nsaa yatudi naako lukalo.”

P’ATUKUTUA LUKALO LUA KULOMBASHA KEPATSHILA KEETU

8. Nkinyi ki bia kukitshika su tuadila kulombasha kepatshila nka nsaa yatudi naako lukalo? (Tala dingi kifuatulo.)

⁸ Mu binyibinyi, atue booso atuikalaa na angi mafuku atushatuikalaa na lukalo lua kulombasha kepatshila. Bino abilesha’shi ta tui bia kuikitshisha bua kulombasha kepatshila keetu su? Nya. Tutale kileshesho: Lupapi lui kuikala bukopo bukile bualudia kutakula buato buakafika ku mbalo ku’abuende. Biabia, lupapi alupukaa na bukome builekeene, na mu angi mafuku, lui kukutua kupuka. Biabia, bino abilesha’shi buato bui kukutua kutambuka? Nya. Bu kileshesho, angi maato aekalaa na motere angi namu na mankaapi. Yawa atambusha buato e kufubisha bino bintu bioso bibidi buadia kutungunuka na luendo bua’shi akafikie kuende. Lukalo luetu lua kulombasha kepatshila lui nka bu lupapi, mu angi mafuku lui kukutua kuikadika lui bukopo, mu angi mafuku namu luekadika bukopo. Biabia su atukumiina kulombasha kepatshila keetu nka patudi na lukalo lua kuikalombasha, ta tui balombene kuikalombasha nya. Anka bu abikitaa muntu atambusha buato buadia kupeta ingi mishindo na nkafika mbalo yende, n’atue namu abitungu tuikitshishe buatudia kulombasha kepatshila keetu sunga tuakutua lukalo lua kuikalombasha. Sunga biekala’shi kukita bino akutungu kuisumina ingi miloo, anka okekala na muloo nsaa y’olombasha kepatshila koobe. Kumpala kua kuisambila kiatudi balombene kukita, tuisambileyi lukonko luatudi balombene kuela.

9. Bi kuikala bukopo bua kutungunuka na kulombasha kepatshila keetu sunga nsaa yatushabapusha lukalo lua kuikalombasha? Patuula.

⁹ Yehowa akumiina’shi tubadiile kukumiina kumufubila na muloo. (Mis. 100:2; 2 Kod. 9:7) Tui kutungunuka na kuikitshisha bua kuiatshila kepatshila ka mianda ya mu kikudi, aku namu ta tui na lukalo lua kuikalombasha? Tuateyi kileshesho kia Mpoolo mutumibua. Bambile’shi: “Nangipaa mbidi yande na neyikasha bupika.” (1 Kod. 9:25-27, Kilombeeno Kipya 2014) Sunga nsaa ibaadi Mpoolo te na lukalo lua kukita kibaadi akikumiina Yehowa, baadi ekitshisha bua’shi ekikite. Yehowa baadi mukumiine mudimo wa Mpoolo su? Oolo. Ngi buakinyi Yehowa baadi mumufute bua kuikitshisha kuaye.​—2 Tim. 4:7, 8.

10. Miabi kinyi ayituukaa mu kuikitshisha kua kulombasha kepatshila sunga patushi na lukalo lua kuikalombasha?

¹⁰ Mu mushindo umune, Yehowa asankaa p’etumono atuikitshisha bua kulombasha kepatshila keetu, sunga p’atupusha’shi ta tui na lukalo lua kuikalombasha. Abimusankishaa muanda auku’shi, sunga ta tui bakumiine kukita wawa mudimo nsaa yooso, atuibikitaa muanda tui bamufule. Nka bibaadi Yehowa muelele Mpoolo muabi, aketuelela namu n’atue bua kuikitshisha kuetu. (Mis. 126:5) P’atumono miabi ya Yehowa, atubanga kuikala na lukalo lua kulombasha kepatshila keetu. Lucyna, ungi mukuetu mukashi a mu Pologne amba’shi: “Ingi nsaa ntapushaa bia kuenda mu bulungudi, bikishekishe pandi mukookie. Biabia, muloo wampusheya ami balukiila mu bulungudi, nkia buntu kia kukaanya.” Tutaleyi kiatudia kukita p’atukutua lukalo lua kulombasha kepatshila.

11. Yehowa e kuitukuasha buatudia kunyingisha butontshi buetu bua mbidi naminyi?

¹¹ Teka butontshi bua mbidi. Butontshi bua mbidi nyi ngobesha ayitukuashaa bua kutaluula bi’atunangushena na bikitshino bietu. Kino kishima akituusha kinangu kia kuilama atue banabene, bua kupela kukita bubi. Butontshi bua mbidi, abuitutakulaa dingi mu kukita mianda i buwa bikishekishe patudi na mudimo wi bukopo, sunga p’atupusha’shi ta tui na lukalo lua kuiulombasha. Uuka’shi butontshi bua mbidi nkipindi kia kikuba kia kikudi kiselele, biabia teka Yehowa akukuashe na kikudi kiselele bua’shi odime dino eyikashi di na muulo ukata. (Luk. 11:13; Nga. 5:22, 23) David atudi bapue kuteemuna kunundu, mmupatuule mushindo umukuashe luteko. Baadi akumiina kukita bi bungi mu kuilongiela kuaye kuefuku dioso. Akula’shi: “Naadi natekie Yehowa bua’shi ankuashe bua kudima eyikashi dia butontshi bua mbidi. Ku bukuashi buaye, napetele mushindo wa kubanga programe e buwa a kuilongiela na kuikala nebikitshi nsaa yooso.”

12. Mayi a kulonda e mu Mulungudi 11:4, e kuitukuasha bua kulombasha bipatshila bia mu kikudi naminyi?

¹² Totengielanga nka’shi mianda ikale ipuidikie mu nshalelo. Mu uno ndumbuluilo, mianda ya mu nshalelo t’ayikala ipuidikie. Su tubatengiela’shi mianda ipuidikie t’atulombasha kepatshila keetu. (Badika Mulungudi 11:4.) Dayniel mukuetu mulume amba’shi: “Ta kui nshalelo mupuidikie nya. Biabia ta tui balombene kutengiela’shi mianda ipuidikie, tukiteeyi muyile nshalelo atudi naaye.” Paul, ungi mukuetu mulume a mu Uganda, ateemuna kangi kabingilo ka buakinyi ta tui kunyengakana bua kukita mianda. Amba’shi: “Nsaa yatubanga kulombasha kepatshila keetu, sunga nshalelo ekala bukopo atupa Yehowa mushindo wa’shi etuelele muabi.”​—Mal. 3:10.

13. Buakinyi bi buwa kubanga na bipatshila bipeela?

¹³ Banga na bipatshila bipeela. Tui kukutua lukalo lua kulombasha bipatshila bietu muanda atumueneka’shi tui bukopo. Su bino abikufikilaa namu mu nshalelo oobe, buakinyi tue kutshibuula kepatshila koobe mu tupindi tupeela tupeela? Su kepatshila koobe nka kudima eyikashi kampanda buakinyi tue kuikitshisha bua kubanga kuidilesha ku kapeela kapeela? Na dingi, su kepatshila koobe nka kuibadikila Bible mushima, buakinyi tue bia kuikitshiina programe na kuata nsaa ipeela ya kuibadikila? Tomáš atudi bapue kuteemuna ku mbangilo baadi muikitshishe bua kulombasha kepatshila ka kuibadikila Bible mu kipua kimune. Amba’shi: “Naadi musangane’shi programe anaadi muate akuibadikila, naadi nende lubilo lukile. Biabia natshile kitshibilo kia kubanguula dingi, anka bua uno musango naadi muate mpango ya kubadika bikoso bipeela kuifuku na kunangushena ku bianka. Bu kipeta, nabangile kupeta muloo mu kuibadikila kuande.” Ku muanda Tomáš babangile kusangeela kubadika kua Bible, baadi mukumiine kumubadika munda mua nsaa i bungi. Ku mfudiilo, baadi mubadikie Bible ooso mushima.c

TOTSHOBOLOKANGA SU TUE MULOMBASHE KEPATSHILA KOOBE

14. Nkinyi kilombene nkukutshishua kulombasha kepatshila koobe?

¹⁴ Bi malua muanda sunga tuekala na lukalo lua kulombasha kepatshila sunga kuipaana, tui kukutua kulombasha kepatshila keetu. Bu kileshesho, “mianda ya kimpulunkamba,” i kudia nsaa yeetu yatudi naayo lukalo bua kuikitshisha bua’shi tulombashe kepatshila keetu. (Mul. 9:11, NWT) Tui kupeta lukalakashi aluitutshobolosha na kuituleka na bukome bupeela. (Nki. 24:10) Mbidi yeetu ishi ipuidikie i kuitutakula mu kukita muanda mu mushindo ushi ulombene kuitukuasha bua kulombasha kepatshila keetu. (Lom. 7:23) Sunga’shi tui kupusha nka penda kukooka. (Mat. 26:43) Nkinyi kia kuitukuasha bua kukambila kintu kilombene kuitukutshishua kulombasha kepatshila keetu?

15. Buakinyi ta tui balombene kukooka, su kuakitshika muanda kampanda ulombene kuikasha kepatshila keetu bukopo bua kuikalombasha? Patuula. (Misambo 145:14)

¹⁵ Tentekiesha’shi kukutua kulombasha kepatshila koobe t’akupushisha’shi we mubofule nya. Bible amba’shi tui kufumankana na nkalakashi misuusa i bungi. Anka apatuula dingi kalolo’shi tui kulombasha dingi kepatshila keetu bikishekishe ku bukuashi bua Yehowa. (Badika Misambo 145:14.) Ungi mukuetu mulume abetanyinaa bu Philip atudi bapue kuteemuna kunundu, aleesha mushindo ubaadi moobeshe bino’shi: “Ngobesha yande tayibaadi imeene ku bungi bua misuusa inaadi mukutue kulombasha kepatshila kande nya. Anka ngimeene ku bungi bua nsaa yandi mubangie kuikitshisha bua kulombasha kepatshila kande dingi.” David atudi bapue kuteemuna kunundu amba dingi’shi: “Nekitshishaa bua kupela kumona aa mafuku anshi mulombashe kepatshila kande bu kikokoshi, kadi ne amonaa bu mushindo wa kulesha Yehowa biandi mumufule.” P’otungunuka na kuikitshisha bua kulombasha kepatshila koobe sunga opeta nkalakashi i bukopo, oleesha Yehowa’shi okumiina kumusankisha. Yehowa ekalaa na muloo wi bungi nsaa y’akumono otungunuka na kuikitshisha bua’shi olombashe kepatshila koobe!

16. Kukutua kulombasha kepatshila akuitulongiesha kinyi?

¹⁶ Longiela ku mianda i nkukutshishua kulombasha kepatshila koobe. Nangushena akifuisha uno muanda, na w’eyipushe obe banebene’shi: ‘Ne kushintula muanda kampanda bua kupela dingi kukutua kulombasha kepatshila kande?’ (Nki. 27:12) Anka ingi nsaa kepatshila ke kuituelela bukopo bua kuikalombasha, na bino bi kulesha’shi, kepatshila t’akekalanga kabofule bu biatuibipuandikishanga. Su onangushena’shi bino ngi biabidi koodi, taluula dingi kepatshila koobe, su omono’shi we kutungunuka dingi na kuikitshisha bua kuikalombasha.d Yehowa ta mulombene nkumona bu muntu shi kapu muanda tue mulombashe kepatshila koobe.​—2 Kod. 8:12.

17. Buakinyi tui balombene kulamiina mu binangu bietu bipatshila biatudi bapue kulombasha?

¹⁷ Lamiina mu binangu biobe bipatshila biodi mupue kulombasha. Bible aakula’shi: “Mwanda Efile Mukulu tamukutwe kululama bwadia kwiilwa mufubo wenu.” (Eb. 6:10, Kilombeeno Kipya 2014) N’atue namu t’abitungu’shi tuiluankane bipatshila biatudi bapue kulombasha. Nangushena ku bipatshila biodi mupue kulombasha, tamisha kipuano kiobe na Yehowa, lungula bangi pabitale biabia biodi mulombashe na obatshishibue. Nka bu biodi mupue kuenda kumpala na kulombasha bipatshila bia mu kikudi mu mafuku ashaale, we mulombene kutungunuka na kuenda kumpala bua kulombasha kepatshila koobe kapia koodi naako binobino.​—Fid. 3:16.

18. Abitungu tutentekieshe bua kukita kinyi p’atuikitshisha bua kulombasha kepatshila keetu? (Tala dingi kifuatulo.)

¹⁸ Ku bukuashi bua Yehowa, tui balombene kulombasha kepatshila keetu. Nka abikalaa muntu atambusha buato na muloo wa kulombasha kepatshila ka nkafika mbalo yende. Anka tentekiesha’shi bantu be bungi abatambushaa maato abasankilaa dingi luendo luabo. Mu mushindo umune ikala nsaa yooso wekitshisha bua kumona mushindo aukukuasha Yehowa, na akakukuasha bodia kuikala na muloo nsaa yu’ekitshisha bua kulombasha bipatshila toobe. (2 Kod. 4:7) Biabia, su tue mukookie okapete miabi i bungi.​—Nga. 6:9.