‘Ikalayi anutumikila Eyi’

1-2. Nkinyi akipeyaa bafubi b’Efile Mukulu muloo? (Yakobo 1:22-25)

YEHOWA na Muana aaye a kifulo abakumiina’shi tuikale na muloo. Mufundi a Misambo 119:2 amba’shi: ‘Ba-sha muloo mbano abafubila miiya yaaye, na abamukimbi n’eshimba dyaabo dyooso.’ Yesu etupa kishinkamiisho amba’shi: ‘Muloo kui baaba abapusha eyi di’Efile Mukulu, na abeditumikila!’​—Luk. 11:28.

² Bu biatudi bafubi ba Yehowa, tui muilo wi na muloo. Buakinyi? Tui na tubingilo tui bungi, kadi kamune ke na muulo ukata nka’shi atubadikaa Eyi di’Efile Mukulu efuku dioso, na kuikitshisha bua kutumikila bi’atulongo.​—Badika Yakobo 1:22-25.

3. Nsaa y’atutumikila bi’atulongo Muiyi di’Efile Mukulu abitukuashaa naminyi?

³ Nsaa ‘y’atutumikila eyi’ abitukuasha mu mishindo i bungi. Bu kileshesho, p’atutumikila mianda y’atulongo Muiyi di’Efile Mukulu atusankisha Yehowa, na bino abituikasha na muloo. (Mul. 12:13) Na dingi, nsaa y’atulondo malango a Muiyi di’Efile Mukulu, atuikala mu kipuano ki buwa na bena kifuko netu na bena kakongie netu. Anue banabene nui bapue kuimuena’shi bino mbia binyibinyi mu nshalelo eenu. Biabia, bino abitukaluila ku nkalakashi ayipetaa baaba booso bash’abakookielaa miiya ya Yehowa. Bino bi nka bu bibakuile Nfumu Davide. Kunyima kuaye kuteemuna miiya, mayi na biimu bia Yehowa mu loono luaye, bambile’shi: “Yawa ebikôkyelâ akatambula bwedi bukata.”​—Mis. 19:7-11, EEM.

4. Buakinyi misuusa yooso t’abikalaa bibofule bua kutumikila mianda y’atubadika Muiyi di’Efile Mukulu?

⁴ Misuusa yooso, t’abikalaa bibofule bua kubadika Eyi di’Efile Mukulu na kutumikila biinyi bi’atubadika muanka nya. Sunga tuekala na bi bungi bia kukita mu nshalelo eetu, abitungu tuate nsaa ya kuibadikila na kuilongiela Bible bua kuwuka akitutekie Yehowa bua’shi tukite. Biabia, tutaluuleyi ingi mianda i bia kuitukuasha bua kuikadika atuibadikila pa kiubishi. Atukataluula dingi kilombene kuitukuasha buatudia kunangushena ku mianda y’atubadika, na kumona mishindo yatudi balombene kutumikila mianda y’atulongo mu nshalelo eetu.

ATA NSAA BUA KUIBADIKILA EYI DI’EFILE MUKULU

5. Mmashito kinyi atudi nawo aetutekie nsaa i bungi?

⁵ Bafubi be bungi ba Yehowa, be na bi bungi bia kukita mu nshalelo aabo. Atukishaa nsaa i bungi mu kulombasha midimo ilekeenelekeene ya mu kikudi. Bu kileshesho, be bungi ba kuatudi abakitaa midimo ya ku mbidi bua kulombasha nkalo yabo na ya bifuko biabo. (1 Ti. 5:8) Bena Nkidishitu be bungi bakuete kupasukila bakuabo be na maladi sunga babaapu kununupa. Na atue booso tui na lukalo na kuipasukila bua kuikala na mbidi bukome, na bino abitekie nsaa i bungi. Kukatusha ano mashito atudi nawo, tui na angi mu kakongie. Bushito bui na muulo ukata buatudi nabo, mbua kulungula mukandu wi buwa na kisumi. Bu biodi na ino mianda yooso pa bupenka, we kupeta nsaa ya kuibadikila Bible pa kiubishi, na kunangushena ku bi’obadika na kuibitumikila naminyi?

6. We kutuula kuibadikila Bible pa mbalo ya kumpala naminyi? (Tala dingi kifuatulo.)

⁶ Kubadika Bible nyi ngumune wa ku “mianda ina muulo ukata” kuatudi atue bena Nkidishitu, nyi buakinyi abitungu tuiwutuule pa mbalo ya kumpala. (Fid. 1:10) Bua’shi bantu bekale na muloo, kia kumpala kayimba ka misambo amba’shi: “Kyê kyadi mufule nyi miiya ya Yehowa, na einangushênâ kânya na bufuku.” (Mis. 1:1, 2, EEM) Mu binyibinyi, bino abipushisha’shi abitungu tukishe nsaa mu kuibadikila Bible. Nsaa kinyi i buwa ayitungu kuibadikila Bible? Ooso a kuatudi mmulombene kuisanguila nsaa kuifuku. Bua kuakula kalolo, kintu ki na muulo nkusangula nsaa ayikukuasha bua kubadika Bible pa kiubishi. Mukuetu mulume Victor amba’shi: “Ami nakumiinaa kubadika Bible ku nakashika. Sunga bi bukopo bua kubuuka ku nakashika, nekitshishaa bua kubadika muanda nyi nsaa ya kushi bintu bia kunkumba binangu biande. Mutue wande ngutaale na nantuulu binangu biande ku bia mbadika.” Pangi namu n’obe nyi biokitaa. Eyipushe obe nabene’shi: ‘Buande’mi nsaa kinyi i buwa yandia kuibadikila Bible?’

NANGUSHENA KU BIOBADIKA

7-8. Nkinyi ki bia kuitukutshishua kupeta bukuashi mu kuibadikila kuetu kua Bible? Tuusha kileshesho.

⁷ Mu binyibinyi, t’abitungu tubadikie bintu bi bungi biatushi balombene kupusha kalolo nya. Kashaa tobadikile namu muanda kampanda, na kunyima kua kapindi kapeela bolubu bioso su? Abitukitshikilaa atue booso. Muanda wa kukaanya, abitufikilaa mpaa na p’atuibadikila Bible. Pangi tui kuiaatshila kepathila ka kuibadikila shapitre bungi kampanda ya mu Bible kuifuku. Kukita bino kui buwa bukile. Abitungu tuate bipatshila na kuikitshisha bua kuibilombasha. (1 Ko. 9:26) Biabia, bua kubadika Bible abitungu nka kubanga ku mbangilo, mbangilo ngi e buwa. Anka, abitungu tukite bi bungi kukila penda kubadika Bible, bua’shi bi’atubadika bitukuashe.

⁸ Tubande kuata kino kileshesho: Meema a mpeshi aekalaa na muulo mu nshalelo eetu, su mpeshi anoka mupeela. Anka su anoka mukile bungi nsenga ikukutua kumina aa meema. Su mpeshi anoka mukile bungi, ta ki na bukuashi dingi. Abitungu nsaa i bungi bua’shi nsenga imine aa meema a mpeshi, bua kukuasha mitshi bua’shi ikule kalolo. Mu mushindo umune, abitungu tulekie kubadika Bible lubilolubilo, bua’shi tala tuakutua kumupusha kalolo, na kukutua kutentekiesha bibatubadika na kuibitumikila.​—Yak. 1:24.

9. Abitungu tukite kinyi su tuamona’shi tukuete kubadika Bible penda lubilolubilo?

⁹ Kui efuku ditobobadikile Bible penda lubilolubilo su? Nkinyi kiodi mulombene kukita? Badika bipeela bipeela. Ekitshishe bua kunangushena ku mianda y’obadika. Kukita bino ta kui bukopo. Su omona’shi kunangushena mmuanda aukunyingisha, pangi we kumona bu elango dipeelepeele bua kunangushena pabitale mianda y’obadika. We kuata kitshibilo kia kuata nsaa i bungi ya kuilongiela na kunangushena ku mianda y’olongo. Ku lungi lupese, we kusangula bua kubadika ma verse apeela, na kuata nsaa ya kunangushena ku mianda ibobadika. Victor atudi bateemune kunundu amba’shi: “Nabadikaa mianda ipeela, pangi shapitre umune.” Amba dingi’shi: “Muanda pambadika ku namashika, napete mushindo wandia kunangusheena ku mianda inabadika munda mu’efuku dioso dishima.” We kuata kitshibilo kia nsaa yodia kubadika, anka ki na muulo nkubadika bipeela bipeela bua kupeta mushindo wa kunangushena ku biobadika.​—Mis. 119:97; tala kashibo akamba’shi: “Nkonko ayikuasha bua kunangushena.”

10. Tuusha kileshesho kia biodia kutumikila mianda y’olongo. (1 Bena Tesalonike 5:17, 18)

¹⁰ Nsaa y’obadika angi ma verse, nangushena mushindo odia kuiatumikila. Nsaa y’obadika kipindi kampanda ki’Eyi di’Efile Mukulu, eyipushe’shi: ‘Ne kutumikila ino mianda kubanga binobino sunga mu mafuku aafiki naminyi?’ Bu kileshesho, puandikisha’shi bobadika mukanda wa 1 Bena Tesalonike 5:17, 18. (Badika.) Kunyima kua kubadika ino verse ibidi, we kubanda kuimana na onangushena mushindo ubayikukumu kuishimba, na biodi mulombene kuela luteko. Dingi, we kunangushena ku mianda yodi na lutumbu. We kusangula mianda kampanda yodia kutumbula Yehowa. Sunga wata minite ipeela bua kunangushena ku malongiesha aatukila mu Bible, abikakukuasha bua kuikala muntu ateemesha na kutumikila Eyi di’Efile Mukulu. Nangushena ku mushindo wabidi bilombene nkukuasha nsaa y’okitshi bino efuku dioso na bingi bipindi bia Bible biokuete kubadika! Mu binyibinyi, onyiisha kuikala muntu atumikila Eyi di’Efile Mukulu. Biabia, bi kuikala naminyi su we na mianda i bungi ya kukita?

ATA BIPATSHILA NA NKATSHINKATSHI

11. Buakinyi ingi nsaa we kutshoboloka bua kubadika Bible? Tuusha kileshesho.

¹¹ Nsaa y’obadika Bible, ingi nsaa we kupusha kutshoboloka muanda omono’shi kui mianda i bungi ayikutungu’shi olumbuule. Bu kileshesho: Banda kunangushena’shi lelo mu kubadika koobe kua Bible, bopete elango adiamba’shi leka ntondo. (Yak. 2:1-8) Botundula’shi abitungu olumbuule mushindo wa kukitshina bangi mianda, na buata kitshibilo kia kuibikita. Kukita biabia kui buwa bukile! Dingi malooba, bobadika kifundue akishimika kasele pa muulo wa kulama edimi diobe. (Yak. 3:1-12) Bosangana’shi dingi efuku wekeele muakule bi bubi. Biabia, buata kitshibilo kia kuikala wakula bi buwa na mayi aanyingisha. Mu kuibadikila koobe kua Bible ku’efuku adilondo, mui mianda ayidimusha bua kupela kuikala mu bukuuku na ino nsenga. (Yak. 4:4-12) Bomono’shi abitungu wekale mudimukie bua kuata kitshibilo bua mianda y’obadika, y’obandila, na y’oteemesha bua kukisha kapapi. Muifuku dibalondo, we kupusha’shi bi bukopo bukile bua kushintula ino mianda yooso.

12. Buakinyi t’abitungu’shi otshobolokie su kubadika koobe kua Bible akukufumbuila mianda i bungi ayitungu’shi oshintuule? (Tala dingi mayi e kuushi ku’esaki.)

¹² Su abikutungu’shi oshintulukie mu mianda i bungi sunga kulumbuula, totshobolokanga. Bino abileesha’shi we na kondo k’eshimba ke buwa. P’atuikala beyishe, atubadika Bifundue na kukimba mishindo yatudia kulumbuula ingi mianda.a Tentekiesha’shi, abitungu tutungunukie na “kufuala bumuntu bupia.” (Kol. 3:10) Nkinyi ki bia nkukuasha bua kutungunuka na kutumikila Eyi di’Efile Mukulu?

13. We kuata bipatshila biodia kulombasha naminyi? (Tala dingi kifuatulo.)

¹³ Pa mutue pa kuikitshisha bua kutumikila mianda yooso y’obadika, ata bipatshila biodia kulombasha. (Nki. 11:2) Ekitshishe bua kukita bino: Funda mianda y’okumiina kutumikila kuisaki, osangule muanda umune sunga ibidi yodia kutumikila kumpala, ino ingi ibashaala, we kuiyitumikila kunyima. We kubangila mbalo kinyi?

14. Mbipatshila kinyi biodi mulombene kubanga nabio?

¹⁴ We kuata kitshibilo kia kubanga na kepatshila kabofule kodia kulombasha. Sunga’shi we kusangula muanda wi na muulo ukata aukutungu’shi olumbuule. Su buata kitshibilo kia kulumbuula muanda kampanda, eukimbuule mu mikanda yetu, pangi we kufubisha mukanda wa Index des publications des Témoins de Jéhovah, sunga wa Mukanda aukwasha ba Temwe ba Yehowa bwa kukimbuula myanda. Teka pabitale kepatshila koobe, otekie Yehowa akukuashe buadia nkupa bioso bibidi “lukalo na bukome bua kukita mianda.” (Fid. 2:13) Dingi, ekitshishe bua kutumikila yaya mianda ibolongo. Su bolombasha kepatshila ka kumpala, abikakupa lukalo lua kulombasha bingi bipatshila. Biabia, nsaa y’olumbuula muanda kampanda wa mu nshalelo a buina Nkidishitu sunga eyikashi dimune dia bu muina Nkidishitu, abikakuikeela bibofule bua kulumbuula ingi mianda.

TADIILAYI “EYI DI’EFILE MUKULU DIFUBE MUANUDI”

15. Muilo wa Yehowa nguilekeene na bantu be bungi ababadikaa Bible naminyi? (1 Bena Tesalonike 2:13)

¹⁵ Bangi bantu abakulaa biabadi bapue kubadika Bible misuusa i bungi. Mu binyibinyi, abakumiinaa abilongiesha Bible su? Abatumikilaa abiamba Bible sunga kuibitadiila bua’shi bikale na bukitshishi mu nshalelo aabo su? Bi malua, muanda lualuulo lui’shi nya. Anka muilo wa Yehowa nguilekeene na bano bantu! Nka bu bena Nkidishitu ba mu siekele a kumpala, tui bakumiine Bible “bu biadidi binyibinyi bu eyi di’Efile Mukulu.” Biabia, tukiteyi muetu mooso bua kutumikila elango dia Bible mu nshalelo eetu.​—Badika 1 Bena Tesalonike 2:13.

16. Nkinyi kilombene kuitukuasha buatudia kuikala bantu abatumikila Eyi?

¹⁶ T’abikalaa bibofule misuusa yooso bua kubadika na kutumikila Eyi di’Efile Mukulu nya. Abitungu tuikitshishe bua kupeta nsaa ya kubadika. Sunga’shi tui kubadika lubilolubilo tuakutua kunangushena ku biatubadika na kuibilamiina. Sunga’shi tui kutshoboloka bua mianda yooso ayitungu’shi tushintule. Sunga kukita bino kuakuikeela bukopo, we kobesha. Ku bukuashi bua Yehowa we kuikukambila. Tuateyi kitshibilo kia kukumiina bukuashi buaye, na su tubakitshi bino, t’atuikala bantu abapusha Eyi bisumanga nya, anka atuikala bantu abeditumikila. Kushi mpaka, p’atunyiisha kubadika Eyi di’Efile Mukulu na kuiditumikila mu nshalelo eetu, atuikala na muloo wi bungi.​—Yak. 1:25.