MA VERSE A MU BIBLE ABADI BAPATUULE
Maako 1:15—“Bufumu bw’Efile Mukulu tabudi peepi”
“Nguba balombana, Bufumu bw’Efile Mukulu tabudi peepi, aluulaayi mashimba, nukumiine mukandu wibuwa.”—Maako 1:15, Biible Bifundwe Biiselele.
“Kipindji kibalombana, na bufumu bw’Efile Mukulu bubeseesela peepi; elangyeyi, na nukumiine mukandu wi buwa.”—Maako 1:15, Kilombeno kipya 2014.
Kipatulwilo kya Maako 1:15
Yesu Kidishitu bambile’shi Bufumu bw’Efile Mukulua bubaadi “peepi,” sunga’shi “bubeseesela pepi,” mwanda aye nyi akekala Mfumu a bwabwa Bufumu na dingi badi munkatshi mwabo.
Yesu tabadi mwambe’shi Bufumu mbupwe kubanga kumunana nya. Anka, kunyima badi mulungule balongi baye’shi Bufumu abufiki mu mafuku e kumpala. (Bikitshino 1:6, 7) Byabya, mmupwe kufika mu kipungo kilombane, mu kipwa kibaabadi bapwe kutemuka mu Bible akamweneka bu Mfumu mu mafuku e kumpala.b Nyi bwakinyi Yesu badi mukumbene kwamba’shi: “Nguba balombana”—nsaa ibadi mulombene kubanga mudimo waye wa kulongyesha mukandu wibuwa sunga’shi evanjile, pabitale Bufumu.—Luka 4:16-21, 43.
Bwa’shi bantu bapete bukwashi bwa mukandu wibuwa pabitale Bufumu, bibadi abitungu’shi belangye ku mashimba, nyi nkwamba’shi benyongole bwa milwisho yabo ya kala na bekale na nshalelo mwipushene na miiya y’Efile Mukulu. Baaba babadi belangye ku mashimba, babadi baleshe’shi babaadi na lukumino mu mukandu wibuwa pabitale Bufumu abukafiki mu mafuku e kumpala.
Nsaa ibabadi bakule myanda i mu Maako 1:15
Yesu bakwile ano mayi pabadi kumbangilo kwa mudimo waye mu Ngadilea. Mwisambo wi mumune wi mu Mukanda wa wa Mateo 4:17 awamba’shi: “Byatshiile yaawa nguba” Yesu nkubanga kulambukisha pabitale Bufumu bw’Efile Mukulu. Bufumu bubaadi bu mutwe wa mwanda wa malongyesha aaye. Mu ma Evanjilec mbatemune Bufumu misango ikile pa 100, bikishekishe mu mayi a Yesu. Mu myanda yabadi bafunde mu Bible, Yesu badi mwakule ngofu pabitale Bufumu bw’Efile Mukulu kukila bibadi mwisambile ingi myanda.
Badika Maako shapitre 1 pamune na mayi e kushi kw’esaki, kikumbashi na bingi bifundwe bi mumune, na ma karte.
a Bufumu bw’Efile Mukulu nyi mbulamatadi e mwiyilu abadi batuule kwi Efile Mukulu bwa kulombasha mpángo yaaye bwa nsenga. (Ndanyele 2:44; Mateo 6:10) Bwa kuuka ingi myanda tala mwisambo awamba’shi: “Bufumu bw’Efile Mukulu nkinyi?”
b Yesu badi na kya kwikala bu mfumu bwashi amone bya kulombasha ungi mudimo waye wa bu Mesiya abaabadi balee, alesha mpala y’Efile Mukulu. Bwa kuuka myanda ibungi pabitale matemuki a mu Bible aalesha Yesu bu Mesiya, tala mwisambo awamba’shi: “Matemuki a Mesiya aashinkamisha’shi Yesu badi Mesiya su?”
c Ma Evanjile nyi mikanda inanka ya kumpala i mu Bifundwe bya kina Greeke, byabetamina bu Kilombeno kipya, mwabadi besambile myanda itale nshalelo a Yesu na mudimo waye.