Tulongamishe mudimo wetu wa bulungudi—Kubanga mwisambo na muntu mu bulungudi bwa mu mpuuka-puuka

Bwakinyi bi na muulo: Nsaa yatulambukisha mukandu wibuwa wa ku nshibo na nshibo, twi basangane shi bantu bebungi ta be kwabo ku mashibo nya. Byabya, twi balombeene kwimoneena nabo nsaa yatulambukisha bantu batudi nabo mu motoka, nsaa y’atutengyela doktere, patudi mu nsaa ya kwikisha ku kalasa, na angi ma mbalo e byabya. Yehowa akumiina shi muntu ooso apete mushindo wa kupusha mukandu wibuwa wa Bufumu. (1 Tim. 2:3, 4) Byabya, bwa kulambukisha mukandu wibuwa, abitungu tubande kwata kitshibilo kya kubanga mwisambo.

Mushindo wa kwibikita:

Yawa muntu akumuno bu kuuku aaye na akumiina kwisamba noobe su? Nsaa sunga mbalo yanudi ayikwasha bwanudya kwisamba kalolo su? Bangi balungudi ba mukandu wibuwa ababanda kushindika muntu meeso na ababanga kusepa. Su muntu basepe, ababanga kwisamba naye.
Akula myanda mu kikuso, kita luteko lwa mwishimba bwa kumona byashi onyingy’eshimba bwa kwakula.—Ne. 2:4; Bik. 4:29.
Banga na bishima biipi, bu kwimuna muntu. Yesu ta baadi mubangye mwisambo na mwana mukashi a mu Samariya pabitale Bufumu nka musango umune nya. (Yo. 4:7) Ingi nsaa nwi balombeene kubanga mwisambo na kusamuna muntu bu kwamba shi: “We mukushe bana boobe kalolo kakile!” Kwipusha kwa muntu nkonko nyi ngumo mushindo wa kubanga mwisambo na muntu; we kumwipusha shi: “Opushiishe myanda y’abekalanga besambe ku kisashi bufuku bushaale?”
Su boopu kubanga mwisambo, kimba mushindo wa kutwesha mukandu wibuwa, kadi tokumanga kulwila bukidi bukidi. Tadiila mwisambo unambeene utambukye kalolo. Pangi we mulombeene kubuusha mwanda autakula bantu bwashi bakwele nkonko. Bu kileshesho, su mwisambo ngwimeene pa myanda itale bifuko, we mulombeene kwamba shi: “Napete elango di buwa bwikashaa pabitale mushindo wa kukusha bana.” Su anwisambila myanda y’abekalanga besambe ku bisaashi we mulombeene kwamba shi: “Nasangala ngofu p’aami kupusha ungi mukandu wibuwa utale kwaluluka kwa myanda.” Tokumanga kutshiba mwisambo kumpala kwa kulungula mukandu wibuwa.
Twala ma trakte sunga ingi mikanda yanudi balombeene kupa muntu baleesha lukalo.

Ebitompeyi munda mwa wawa mweshi:

Lubingo looso tompa bwa kubanga mwisambo na muntu ku bukwashi bwa ano mayele ababaleesha pano na kipatshila kya kulungula mukandu wibuwa mu mpuuka-puuka.