Mushindo awaluulaa Yehowa ku nteko yetu

1-2. Nkinyi kiatudi balombene kuiyipusha pabitale nteko yetu?

TOODI muiyipushe namu su Yehowa aluulaa ku nteko yobe? Su mbiabia, tue bupenka’be. Bakuetu be bungi balume na bakashi abeyipushaa pabitale uno muanda, bikishekishe nsaa yabadi mu nkalakashi i bukopo. Su tukuete kukienga, na atue namu tui kumona uno muanda bu wi bukopo bua kutundula mushindo awaluulaa Yehowa ku nteko yetu.

² Bua binobino, tutaluuleyi buakinyi tui balombene kushinkamisha’shi Yehowa aluulaa ku nteko ya balanguidi baye. (1 Yo. 5:15) Atukataluula dingi ino nkonko ayilondo: Buakinyi ingi nsaa bi kumueneka bu’shi Yehowa t’aluulaa ku nteko yetu? Lelo uno Yehowa kuete aluula ku nteko yetu mu mishindo kinyi?

YEHOWA TA MMULOMBENE KUALUULA KU NTEKO YETU MU MUSHINDO W’ATUTENGIELANGA NYA

3. Buakinyi Yehowa akumiinaa’shi tumutekie?

³ Bifundue abitushinkamiisha’shi Yehowa mmuitufule ngofu na tui na muulo kuadi. (Ang. 2:7; 1 Yo. 4:10) Ngi buakinyi akumiina’shi tumutekie bukuashi mu luteko. (1 Mp. 5:6, 7) Akumiina kuitukuasha buatudia kushaala peepi naye na buatudia koobesha kunyingiila nkalakashi y’atufumankana nayo.

4. Tui kuuka’shi Yehowa aluulaa ku nteko ya balanguidi baaye mushindo kinyi? (Tala dingi kifuatulo.)

⁴ Atubadikaa misuusa yooso mu Bible’shi Yehowa baadi mualuule ku nteko ya bafubi baaye. We kunangushena ku kileshesho kampanda su? Tui kuamba naminyi bua Mfumu Davide? Baadi mupete masuku e bungi a beshikuanyi naye mu nshalelo aaye, anka baadi atekie Yehowa bukuashi mu luteko. Ungi musuusa, baadi muisendeele Yehowa’shi: ‘Yehowa teemesha luteko lwande, tee matwi opushe kwiyaaya kwande bwa lulamato na kululama koobe ongaluule.’ (Mis. 143:1) Yehowa baadi mualuule nteko ya Davide ya kumupaasha. (1 Sam. 19:10, 18-20; 2 Sam. 5:17-25) Davide baadi mulombene kuakula na kishinkamiisho kioso’shi: “Yehowa ee peepi na booso abamwididi.” Na atue namu tui balombene kupeta kino kishinkamiisho kimune.​—Mis. 145:18.

5. Mu mafuku a kala Yehowa baadi aluula ku nteko ya bafubi baaye mu mushindo ubaabadi abatengiela su? Tuusha kileshesho. (Tala dingi kifuatulo.)

⁵ Yehowa ta mmulombene kualuula ku nteko yetu nka mu mushindo w’atutengielanga nya. Bino ngi bibaadi bikitshikile Mpoolo mutumibua. Batekiele Efile Mukulu bua’shi amukatushe ‘mulobo mu mbidi.’ Mpoolo mutumibua batekiele misuusa ikile pa isatu, bikishekishe pabitale luno lukalakashi. Baadi mualuule nteko yaye su? Oolo, kadi kushi mu mushindo ubaadi Mpoolo akulupila. Pa mutue pa kukatusha lualua lukalakashi lubaadi nalo, Yehowa bamupeele bukome bubaadi nabo lukalo bua kutungunuka na kumufubila na lulamato.​—2 Kod. 12:7-10, EEM.

6. Buakinyi ingi nsaa bi kumueneka’shi Yehowa t’aluulaa ku nteko yetu?

⁶ Na atue namu tui kupeta ngaluulo ku nteko yetu mu mishindo yatush’abatengielanga. Tui balombene kushinkamisha’shi Yehowa auku mushindo wi buwa wadi mulombene kuitukuasha. Yehowa mmulombene “kukita ngofu bikile biabia bioso biatutekye sungwa biatupwandjikisha.” (Ef. 3:20, Kilombeeno Kipya 2014) Ngi buakinyi lualuulo luaye ku nteko yetu, ndulombene kufika mu nsaa sunga mu mushindo watush’abatengielanga.

7. Buakinyi tui balombene kushintuula mushindo wa kuteka? Tuusha kileshesho.

⁷ Tui balombene kushintuula mushindo wetu wa kuteka, p’atunangushena bi kikiebe ki’eshimba dia Yehowa ngofu. Tutaluuleyi kileshesho kia mukuetu Martin Poetzinger. Kapindi kapeela abo bakiabakatuka mu kuiyibakishena, mukuetu mulume Poetzinger babaadi bamuele mu lukano mu camp ka ba Nazi. Ku mbangilo, baadi atekie Yehowa bua’shi bamutuushe muamua mu lukano ende akapasukile mukashi aaye na kumukuatshishena ku mudimo wa bulungudi. Anka, kunyima kua mbingo ibidi ta mmumone namu kitunduilo akilesha’shi Yehowa, amufunguila mushindo kampanda wadi mulombene kutuka mu lukano. Ngi aye nkubanga kuteka’shi: “Yehowa, bua lusa ndeshe namu ki’okumiina’shi nkite.” Babangile kunangushena dingi pabitale mushindo ubaadi unyingiile bangi bakuabo babaadi muamua mu camp. Be bungi ba kuabadi babaadi abekalakasha ngofu pabitale bakashi baabo na bana baabo. Mukuetu Poetzinger batekiele dingi’shi: “Bofuambuka Yehowa bua uno mudimo upia unapete. Nkuashe namu buandia kukankamika bakuetu na kuibanyingisha.” Mukuetu Poetzinger, baadi mukishe bingi bipua kitema akitanga nka biabia muamua mu lukano!

8. Mmuanda kinyi wi na muulo autungu’shi tulame mu binangu bietu nsaa y’atutekie?

⁸ Abitungu tutentekieshe’shi, Yehowa mmuate mpango, na akalombasha mianda mu kipungo kiadi mutshibe. Mu ino mpango mui kukatusha kua mianda yooso ayifuishiisha bantu nkalakashi lelo uno, mu ino mianda mui masaku aatukila ku bintu bipangibue, mikumbo, na lufu. Yehowa akalombasha mpango yaye kukiila ku Bufumu buaye. (Nda. 2:44; Kibaf. 21:3, 4) Mpaa na binobino, Yehowa ki mulekiele Satana bua’shi akunkushe nsenga.b (Yo. 12:31; Kibaf. 12:9) Su Yehowa apudisha nkalakashi yooso i na bantu lelo uno, bi kumueneka’shi Satana kuete akunkusha ino nsenga kalolo. Bu biatuki’atutengiela’shi Yehowa alombashe ingi milayilo yaye, bino t’abilesha’shi etulekiela kushi bukuashi nya. Tutaluuleyi ingi mishindo ayitukuashaa Yehowa.

MISHINDO AYILESHA’SHI YEHOWA ALUULAA KU NTEKO LELO UNO

9. Yehowa etukuashaa naminyi nsaa y’atukiebe kuata bitshibilo? Tuusha kileshesho.

⁹ Etupeyaa binangu. Yehowa mmuitulee kuitupa binangu biatudi nabio lukalo bua kuata bitshibilo bi buwa. Tui na lukalo bikishekishe na binangu bi’Efile Mukulu, bua kuata bitshibilo bi na bukitshishi mu nshalelo eetu ooso mushima, kia kushaala bukupi sunga kia kuibakila. (Shak. 1:5) Tutaleyi muanda wabadi bamone kui mukuetu mukashi e bukupi abetanyinaa bu Maria.c Baadi na muloo wa kufuba bu mbala-mashinda a mieshi yooso nsaa ibaadi mufumankane na mukuetu mulume. Akula’shi: “Bu bibaadi abinyisha kutama kipuano kietu, na kifulo kietu namu kibaadi akinyisha kutama ku muntu na mukuabo. Nawukile’shi bibaadi abitungu ngate kitshibilo. Naadi mutekie munda a bipua bi bungi buandia kupeta muntu andia kuiyibakishena naye. Naadi na lukalo na bukunkushi bua Yehowa, anka naadi muukie dingi’shi Yehowa ta mmulombene kungatshila kitshibilo.” Baadi mupushe’shi Yehowa, baadi mualuule ku nteko yaye mu mushindo wi buwa. Mmushindo kinyi? Bu bibaadi akimbuula mu mikanda yetu, baadi na mushindo wa kupeta miisambo ilombene kumukuasha bua kualuula ku nkonko yaye. Baadi muate elango dia nyinaye baadi na lulamato na muulo ukata. Diadia elango dibaadi dikuashe Maria buadia kutaluula biepusha. Na ku mfudiilo, baadi mupete mushindo wa kuata kitshibilo ki buwa.

10. Muyile mukanda wa Bena-Fidipe 4:13, Yehowa akumiina kukita kinyi bua kukuasha bafubi baaye? Tuusha kileshesho. (Tala dingi kifuatulo.)

¹⁰ Etupeyaa bukome bua kunyingiila. Nka bibaadi mukitshiine Mpoolo mutumibua, Yehowa etupa bukome buatudi nabo lukalo buatudia kunyingiila bitompuanga. (Badika Bena-Fidipe 4:13.) Tutaleyi mushindo ubaadi Yehowa mukuashe mukuetu mulume abetanyinaa bu Benjamin bua kunyingiila nkalakashi ya mu nshalelo. Bipua bi bungi bia bukinga buaye, Benjamin na kifuko kiaye babaadi bashaale mu camp ka bantu bafilukie mu Afrique. Benjamin amba’shi: “Naadi natekie Yehowa nsaa yooso bua’shi ampe bukome buandia kukita mianda ayimusankisha. Yehowa baadi mualuule ku nteko yande p’aye kumpa butaale bua mu binangu, n’eshimba dinyingie bua kutungunuka na kulungula mukandu wi buwa, na mikanda yetu ayipatuula Bible buandia kushaala munyingie mu kikudi.” Atungunuka na kupatuula’shi: “Kubadikanga mianda yabadi bamone kui ba Tumonyi nami, na kulonga mushindo wibakuashe Yehowa buabadia akunyingiila, ngunyingishe kitshibilo kiande kia kushaala na lulamato.”

11-12. Yehowa e kufubisha kifuko kietu kia mu kikudi buakidia kualuula ku nteko yetu naminyi? (Tala dingi kifuatulo.)

¹¹ Yehowa afubishaa kifuko kietu kia mu kikudi bua kuitukuasha. Bufuku kumpala kua kulambula muwa waye, Yesu batekiele ngofu. Baadi muisendeele Yehowa bua’shi bangi t’abanangushenanga’shi baadi muntu sha kasaabu sunga kumutshibila kiimu mu wawa mushindo wa muntu sha kasaabu. Pa mutue pa kukita biabia bibamutekiele Yesu, Yehowa bakuashiishe Yesu na umune a ku bamikeyilu bakuabo buadia kumunyingisha. (Luk. 22:42, 43) Yehowa e kuitukuasha pa kuitunyingisha kukiila ku umune a ku bakuetu balume na bakashi p’abetuitanyina ku telefone sunga kuitutembela. Atue booso tui balombene kukimba mishindo ya kunyingisha balanguidi netu ‘n’eyi dya kalolo.’​—Nki. 12:25.

¹² Tutaleyi muanda ubaabadi bamone kui mukuetu mukashi abetanyinaa bu Miriam. Mbingo i peela kunyima kua mulume aaye kufua, Miriam baadi mu nshibo bupenka, baadi mukutue lukulupilo, na baadi mukalakashue mu binangu. Baadi adidi nka nsaa yooso, na baadi na lukalo na muntu a kuisamba naye. Amba’shi: “Ntshi naadi na ngobesha ya kuitanyina muntu su ngumune, anka naadi mutekie Yehowa. Bu binaadi natungunuka na kudila na kuteka, nampushiishe telefone badidi. Baadi mukulu a mu kakongie kuuku ande a p’eshimba.” Yawa mukulu na mukashi aaye, babaadi basambe Miriam ngofu. Miriam baadi mushinkamishe’shi Yehowa ngi baadi mutakule bano bakuabo buabadia kumuitanyina.

13. Tuusha kileshesho kia mushindo ulombene Yehowa kufubisha bangi bantu bash’abamulanguilaa bua kualuula ku nteko yetu.

¹³ E kufubisha bantu bash’abamulanguilaa. (Nki. 21:1) Ingi nsaa, Yehowa aluulaa ku nteko ya bafubi baaye pa kutakula bantu bashi balanguidi baaye buabadia kuibakuasha. Bu kileshesho, baadi mutakule Mfumu Artakesese buadia kulekiela Neemiya alukiile ku Yelusaleme, na kumukuasha na bintu biadi mulombene nkebakuula kibundi. (Ne. 2:3-6) Lelo uno namu, Yehowa mmulombene kutakula baaba bash’abamulanguila buabadia kufika mu kuitukuasha nsaa yatudi mu lukalo.

14. Muanda wabadi bamone kui mukuetu mukashi abetanyinaa bu Soo Hing aukunyingisha naminyi? (Tala dingi kifuatulo.)

¹⁴ Mukuetu mukashi abetanyinaa bu Soo Hing, bapushiishe’shi Yehowa bamukuashile kukiila kui munganga aaye. Muana aaye mulume baadi mupete nkalakashi i bungi ibaadi imukumbishe maladi a mu binangu. Nsaa ibapetele muana aabo masaku akata, aye na mulume aaye babalekiele mudimo benda bua nkapasukila muana aabo. Ngi buakinyi babaadi bapete lukalakashi lua kukutua kua makuta. Soo Hing bakuile’shi, naadi mupushe’shi namfudiila. Baadi mufunguile Yehowa eshimba diaye dioso, na kumuteka bukuashi. Pa baadi muimoneene na Doktere aaye, Doktere batshile kitshibilo kiadia kukimba mushindo wadia kukuasha Soo Hing na kifuko kiaye ku muanda wabo. Pa muanda wa bino, babapetele bukuashi abutukila kui bakata ba mbulamatadi, na mbalo ya kushaala. Kunyima kua paapa, Soo Hing bakuile’shi: “Tui bamone bi mboko ya Yehowa mu uno muanda. Mu binyibinyi, Yehowa ‘apushâ nteko yetu’”.​—Mis. 65:3, EEM.

ABITUNGU TUIKALE NA LUKUMIINO BUA’SHI TUIKITSHISHE BUA KUMONA NA KUKUMIINA NGALUULO YA YEHOWA

15. Nkinyi kibaadi kikuashe mukuetu mukashi buadia kumona’shi Yehowa baluula nteko yaye?

¹⁵ Nteko yetu t’ayipetaa ngaluulo mu kipaso kia bu kilengieleshi nya. Anka ngaluulo yetu atuiyipetaa nka penda bua kiakia kiatudi nakio lukalo bua kushaala na lulamato kui Nshetu e muiyilu. Biabia ikala mupasukie bua kumona mushindo awaluulaa Yehowa ku nteko yobe. Mukuetu mukashi abetanyinaa bu Yoko, baadi mupushe’shi Yehowa ta mmualuule ku nteko yaye, anka babangile kufunda nsaa yooso kiakia ki’atekie Yehowa mu cahier kaaye. Kunyima kua kapindi kapeela, batadile mu cahier kaaye ngi aye nkusangana’shi mu cahier kaaye Yehowa mmupue kualuula ku nteko i bungi sunga mbibaadi mupue kuiluankana pabitale ingi ngaluulo. Abitungu ku nsaa na nsaa, tuikale atuimana bua kunangushena ku mushindo witualuule Yehowa ku nteko yetu.​—Mis. 66:19, 20.

16. Mmushindo kinyi watudi balombene kulesha lukumiino pabitale nteko yetu? (Bena-Ebelu 11:6)

¹⁶ Atulesha lukumiino kushi penda pa kuela nteko yetu kui Yehowa, kadi atulesha dingi pa kukumiina ngaluulo ya ku nteko yetu mu mushindo ooso w’aluula ku yaya nteko. (Badika Bena-Ebelu 11:6.) Tutaluuleyi kileshesho kia Mike na mukashi aaye Chrissy. Babaadi na kepatshila ka kuenda mu kufuba ku Betele. Mike amba’shi: “Tubaadi babangie kukita mianda ilombene kuitukuasha bua nkafuba ku Betele munda a bipua bi bungi, na kuela nteko kui Yehowa misuusa na misuusa pabitale kano kepatshila kakuenda mu kufuba ku Betele,” kadi “kashaa ta betuitanyiine kuanka.” Mike na mukashi aaye Chrissy mbashaale bashinkamishe’shi Yehowa auku mushindo wi buwa wadi mulombene kuibafubisha mu mudimo waye. Bakuete kutungunuka na kukita muyile ngobesha yabo na kutungunuka bu ba mbala-mashinda ba mieshi yooso mbalo i lukalo lukata, na kukuatshishena midimo ya kuibaka ya teokrasi. Lelo uno bakuete kufuba bu mukunkushi a kifunda. Mike amba dingi’shi: “Yehowa t’aluulaa nteko yetu mu mushindo w’atutengielaa nya,” anka “mmuibaluule mu mushindo wi buwa wa bashi baadi abapuandikisha.”

17-18. Muyile mukanda wa Misambo 86:6, 7, nkinyi kiatudi balombene kushinkamisha?

¹⁷ Badika Misambo 86:6, 7. Kayimba ka misambo Davide baadi mushinkamishe’shi Yehowa baadi ateemesha na kualuula ku nteko yaye. Nnobe namu abitungu wekale na kino kishinkamiisho kimune. Bileshesho bibatutaluula mu uno muisambo, bibetupa kishinkamiisho kia’shi Yehowa mmulombene kuitupa binangu na bukome biatudi nabio lukalo bua kunyingiila. Mmulombene kufubisha kifuko kietu kia mu kikudi, sunga baaba bash’abamulanguila, buabadia kuitukuasha mu uno mushindo umune.

¹⁸ Sunga Yehowa akutua kualuula ku nteko yetu mu mushindo w’atutengielanga, anka tui bashinkamishe’shi aluula nka kualuula ku yanka. Etupa nka kiakia kiatudi nakio lukalo na mu yaya nsaa yatudi nakio lukalo. Biabia, tungunuka na kuteka na lukumiino mushinkamishe’shi Yehowa akakupasukila kubanga binobino, na’shi akumiina ‘nkekutshisha byooso bii na muuwa’ mu nsenga ipia ikuete kufika.​—Mis. 145:16.