MUISAMBO WA KULONGA 17
LOONO 99 Binunu bya bakwetu
Ta tui bupenka
“Nakenukwasha.”—YESH. 41:10.
KI’ATUISAMBILA
Atulongo mishindo inanka ayitupasukilaa Yehowa.
1-2. (a) Nkinyi akitushinkamisha’shi ta tui bupenka nsaa yatudi na nkalakashi? (b) Nkinyi ki’atumono mu uno muisambo?
NSAA yatudi na nkalakashi, tui kuimona nka bu’tue be bupenka bashimine mu mutamba. Anka, ta tui bupenka nya. Nshetu sha kifulo e muiyilu ta kuete penda kumona nkalakashi yetu nya, kadi mmulee bua kuitukuasha. Na kifulo kioso Yehowa etulungula’shi: “Nakenukuasha.”—Yesh. 41:10.
2 Mu uno muisambo atumono mushindo awitukuashaa Yehowa (1) pa kuitukunkusha, (2) pa kulombasha nkalo yetu, (3) kuitukaluila, na (4) pa kuitusamba. Yehowa etushinkamisha’shi sunga tuapeta nkalakashi i naminyi mu nshalelo eetu, ekala nka netu. Tetusumbushena. Biabia ta tui bupenka.
YEHOWA ETUKUNKUSHAA
3-4. Mmushindo kinyi awitukunkushaa Yehowa? (Misambo 48:14)
3 Badika Misambo 48:14. Yehowa auku’shi ta tui kuikunkusha atue banabene. Mushindo kinyi wakuete akunkusha balanguidi baaye basha lulamato lelo uno? Mushindo umune wakuete kuibikita kukiila ku’Eyi diaye Bible. (Mis. 119:105) Kukiila ku’Eyi diaye diyokielue, Yehowa etukuasha bua kuata bitshibilo bi buwa, kudima ngikashi ayimusankisha kubanga binobino mpa na mu mafuku aafiki.a Bu kileshesho, etulongiesha bua kuleka mushikua, kukita mianda na kululama, na kufula bangi n’eshimba dietu dioso. (Mis. 37:8; Eb. 13:18; 1 Mp. 1:22) P’atulesha ino ngikashi yoso, atuikala baledi be buwa, muina dibaka e buwa, na kuuku e buwa.
4 Mu Bible, Yehowa etulungula pabitale bangi bantu abaadi bafumankane na nkalakashi na abaadi bepushe nka bu’atue. (1 Ko. 10:13; Yak. 5:17) Patubadika miisambo ya bano bantu boso na kutumikila malongiesha atupete, abitukuasha mu mishindo ibidi. Wa kumpala, atuikala bashinkamishe’shi ta tui bupenka, bangi namu abaadi bafumankane na ino nkalakashi i bino, na mbanyingile ku bukuashi bua Yehowa. (1 Mp. 5:9) Na wa kabindi, atulongo mushindo wa kunyingiila nkalakashi yetu.—Lom. 15:4.
5. Yehowa afubishaa ba nanyi bua kuitukunkusha muishinda adituala ku muwa?
5 Yehowa afubishaa dingi bakuetu balume na bakashi bua kukunkusha muilo waye.b Bu kileshesho, bakunkushi ba bifunda abakunkaa tukongie bua kuitunyingisha. Miisambo yabo ayinyingishaa lukumiino luetu na kuitukuasha buashi tulame buumune munkatshi muetu. (Bik. 15:40–16:5) Bakulu namu abafubaa ngofu bua kukuasha oso a kuatudi buashi anyingishe kipuano kiaye na Yehowa. (1 Mp. 5:2, 3) Baledi abalongieshaa bana babo buabadia kufula Yehowa, kuata bitshibilo bi buwa, na kuikala na bikitshino bi buwa. (Nki. 22:6) Na bakuetu bakashi banyingie mu kikudi abakuashaa bansonguakashi pa kuikala kileshesho ki buwa buabo, kuibapa malango e buwa, na kuibanyingisha.—Tt. 2:3-5.
6. Nkinyi akitungu’shi tukite bua kupeta bukunkushi abufiki kui Yehowa?
6 Yehowa mmuitupe kioso kiatudi nakio lukalo. Mushindo kinyi watudi balombene kulesha lutumbu bua bioso biakuete kuitupa? Nkindji 3:5, 6 amba’shi: “Kulupila mwi Yehowa n’eshimba dyobe dyoso, tokulupilanga mu binangu byobe obe nabêne.” Nsaa yokitshi bino, “akalumbûla eshinda dyobe,” kuamba’shi, etukuasha bua kukambila nkalakashi na kuikala na muloo mu nshalelo etu. Tui na lutumbu lukataa bua kifulo kikuete kuitulesha Yehowa na malango a kuete kuitupa!—Mis. 32:8.
YEHOWA ALOMBASHAA NKALO YETU
7. Yehowa alombashaa nkalo yetu mu ingi mishindo kinyi? (Bena Fidipe 4:19)
7 Badika Bena Fidipe 4:19. Kukatusha bukunkushi, Yehowa etuelelaa miabi nsaa y’atufubu ngofu bua kupeta bidibua, bilamba na mbalo ya kushala. (Mat. 6:33; 2 Te. 3:12) Kuikalakasha bua bino bintu takui bubi nya, anka Yehowa t’akumiina’shi tuikalakashe ngofu nya. (Mat. 6:25.) Buakinyi? Mmuanda Nshetu ta mulombene kusumbushena balanguidi baye basha lulamato nsaa yabadi mu lukalo. (Mat. 6:8; Eb. 13:5) Abitungu tukulupile abiamba Eyi diaye’shi aketulombesha nkalo yetu.
8. Yehowa baadi mukitshine Davide kinyi?
8 Tutaleyi mushindo ubaadi Yehowa mukuashe Davide. Mu kipungo kibaadi Davide mu nkalakashi pabaadi asuuku Nfumu Saule, Yehowa baadi mulombashe nkalo yaaye na ya bantu baye pa kuibapa bintu bibabadi nabio lukalo bua kuikala na muwa. P’anangushena ku bibaadi Yehowa mumupasukile munda mua bipua, Davide baadi mufunde’shi: “Naadi mukinga, binobino ntandi mununu, tshimumone sunga efuku dimune mululame abadi basumbusheene, sunga baana baaye baateka ka-pa-lusa.” (Mis. 37:25) Nka bu Davide, nobe namu we mumone mushindo ubaadi ukupasukile Yehowa na bakuenu balume na bakashi mu kipungo kia nkalakashi.
9. Lelo uno Yehowa alombashaa nkalo ya muilo waye nsaa ayituuku masaku aatukila ku bipangua naminyi? (Tala dingi kifuatulo.)
9 Yehowa alombashaa dingi nkalo ya muilo waye nsaa ayituuku masaku aatukila ku bipangua. Bu kileshesho, pabaadi nsala ituele mu Yelusalema mu siekele a kumpala, bena Nkidishitu ba mu maumbo elekene abaadi batumine bakuabo bena Nkidishitu bintu biabaadi nabio lukalo. (Bik. 11:27-30; Lom. 15:25, 26) Lelo uno, muilo w’Efile Mukulu ukuete kulesha kikudi kia kupaana. Nsaa ayituuku masaku, na kifulo kioso Yehowa afubisha muilo waye bua kupa baaba bapete masaku biabia biabadi nabio lukalo bu bidibua, mema, bilamba na manga. Kisaka kia bakuetu abebakaa akilumbulaa mashibo a bakuetu na Mashibo a Bufumu. Kushi kunyengakana bafubi ba Yehowa abafubisha Bible bua kunyingisha bakuetu bashimishe mashibo aabo sunga bafuishe bakuabo ba kifulo.c
Mushindo kinyi awitusambaa Yehowa nsaa ayituuku masaku aatukila ku bipangua? (Tala kikoso 9)e
10-11. Nkinyi kibolongiela ku kileshesho kia Borys?
10 Yehowa aleshaa dingi kalolo mpa na kui bantu bash’abamulanguila. Mu mushindo umune, abitungu tuambule Yehowa pakukimba mishindo ya kulesha bangi kalolo mpa na bash’abamufubila. (Nga. 6:10) P’atukitshi bino atuibakuasha bua kulonga bi bungi pabitale Yehowa. Tutaleyi muanda ubafumankene nao Borys ungi direktere a ku kalasa mushale mu Ukraine. Sunga bibaadi’shi Borys ta Kamonyi ka Yehowa, baadi akitshina balongi baye abaadi Tumonyi tua Yehowa mianda na kalolo na kunemeka nkumiino yabo. Pa muanda wa ngoshi, Borys baadi musuukie enda mu kingi kibundi bua kupaasha muwa waye, bakuetu abaadi abamukuasha. Kunyima, Borys baadi mutuele mu kitentekiesho kia lufu lua Yesu. P’anangushena ku mianda yoso imukitshine bakuetu, Borys amba’shi: “Tumonyi tua Yehowa tubaadi tundeshe kalolo na kumpasukila. Ne na lutumbu lukata bua Tumonyi tua Yehowa.”
11 Natue namu tui kuambula Nshetu e muiyilu sha lusa, pa kulesha kifulo kui boso be mu lukalo biabekala balanguidi netu sunga bashi balanguidi netu. (Luk. 6:31, 36) Atukulupila’shi kifulo kiatuibalesha akibatakula mu kulonga bi bungi pabitale Yehowa na kubanga kumufubila. (1 Mp. 2:12) Anka, biabata kitshibilo kia kufubila Yehowa sunga kupela kumufubila atuikala nka na muloo, muanda “muloo wa kupaana ngukile wa kupebua”.—Bik. 20:35.
YEHOWA ETUKALUILAA
12. Kukaluila kinyi kulee Yehowa bua muilo waye mu ki bungi? (Misambo 91:1, 2, 14)
12 Badika Misambo 91:1, 2, 14. Lelo uno, Yehowa mmulee bua kuitukaluila mu kikudi. Takumiina’shi Satana apambushe muilo waye ku lulanguilo lua binyibinyi. (Yo. 17:15) Na nsaa ayikabanga “mpombo ikata,” tushinkamishe’shiYehowa akalombasha mulayilo wa kukaluila muilo waye kushi penda mu kikudi kadi mpa na ku mbidi.—Kbf. 7:9, 14.
13. Mu ingi mishindo kinyi amuitukaluila Yehowa pa bupenka?
13 Mushindo kinyi awitukaluila Yehowa pa bupenka? Ku bukuashi bua Bifundue, Yehowa etukuashaa bua kuuka ki buwa na ki bubi. (Eb. 5:14) P’atutumikila mayi a kulonda a mu Bible, atukaluila kipuano kietu naye, na atuikala atuata bitshibilo abitukuasha bua kuikala na muloo na nshalelo e buwa. (Mis. 91:4) Na dingi, Yehowa etukaluilaa ku bukuashi bua kakongie. (Yesh. 32:1, 2) Kukatusha biabia, tui na bakuetu bafule Yehowa na be na nshalelo muipushene na mayi aaye a kulonda, abetunyingisha buatudia kukambila bukitshishi bui bubi.—Nki. 13:20.
14. (a) Buakinyi Yehowa ta mukatushe makienga eetu? (b) Misambo 9:10 ayitushinkamiisha kinyi?
14 Mu mafuku a kala, Yehowa baadi mukaluile muilo waye ingi misuusa ku mbidi. Biabia, ta baadi ebikitshi misuusa yoso nya. Ingi misuusa atupetaa ‘mianda ya mu kimpulunkamba.’ (Mul. 9:11) Dingi, Yehowa baadi mutadiile bua’shi bafubi baye bapete kubinguabingua mpa na kuipayibua bua kulesha madimi a Satana patoka. (Yob. 2:4-6; Mat. 23:34) Bi mumune mpa na lelo. Sunga biekala’shi Yehowata mukatushe makienga eetu, tuibashinkamishe’shi t’asumbushenaa bamufule.d—Mis. 9:10.
YEHOWA ETUSAMBAA
15. Mushindo kinyi watukuete kusambibua ku bukuasha bua: luteko, Eyi di’Efile Mukulu, na bakuetu bena Nkidishitu? (2 Bena Kodinda 1:3, 4)
15 Badika 2 Bena Kodinda 1:3, 4. Ingi nsaa, atupetaa malua, tuinyongoshi sunga nkalakashi. Pangi binobino we na muanda aukukalakasha na wemono bu’be e bupenka. Kui muntu kuete kupusha biopusha su? Yehowa kuete kuibipusha. Temeenaa penda pa kupusha kenyongoshi ketu, anka dingi “etusambaa mu mpombo yetu yoso.” Mushindo kinyi? Nsaa yatuiyayila Yehowa mu luteko, etupa “butaale bu’Efile Mukulu bukile binangu bioso.” (Fid. 4:6, 7) Dingi atupete kunyingishibua p’atubadika Eyi dia Yehowa di mu Bible. Muanka Yehowa etulungula mushindo wadi muitufule, etulongiesha biatudia kuikala na binangu, na etupa lukulupilo. Dingi atupetaa kusambibua mu bisangilo bietu, muatulongaa mianda ayinyingishaya mu Bible, na muatudi na bakuetu balume na bakashi betufule.
16. Nkinyi kibolongiela ku kileshesho kia Nathan na Priscilla?
16 Kileshesho kia Nathan na Priscilla bashale mu États-Unis akilesha abitusambaa Yehowa na kuitunyingisha ku bukuashe bu’Eyi diaye. Takudi bipua, abatshile kitshibilo kia kuenda mbalo i lukalo lua balungudi ba Bufumu. Nathan amba’shi: “Tubaadi bakulupile’shi Yehowa elela kitshibilo kietu muabi.” Biabia, kunyima ku’abo kufika yaya mbalo, abaadi bakumbe n’abo nkupeta lukalakashi lua makuta. Uno mukashi na mulume abaadi balukie ku nshibo yabo na abatungunukile na kukienga bua kupeta makuta. Nathan atentekiesha’shi: “Naadi neyipusha buakinyi Efile Mukule t’abaadi muituelele miabi mu mushindo watubaadi atupuandikisha. Nabangile kuiyipusha su nemukite muluisho.” Kunyima kua biabia, Nathan na Priscilla abatunduile’shi Efile Mukulu ta baadi muibasumbushene mu nsaa ya makienga. Nathan akumbasha’shi: “Mu kiakia kipungo kia nkalakashi, Bible bafikile bu kuuku eetu sha binangu etunyingisha na kuitukunkusha. Kutuula binangu ku mushindo ubaadi witukuashe Yehowa kushi ku nkalakashi yetu, kubaadi kuitulumbule bua kunyingiila nkalakashi ayifiki kumpala na lukumiino loso.”
17. Mushindo kinyi ubaadi mukuetu abetamina bu Helga mupete kusambibua? (Tala dingi kifuatulo.)
17 Bakuetu balume na bakashi mbalombene kuitusamba. Be kuibikita naminyi? Tutaleyi kileshesho kia mukuetu Helga, mushale mu Hongrie. Munda mua bipua bi bungi, baadi mupete nkalakashi ibaadi ayimuinyongosha na kumutakula mu kuipusha bu’shi na muulo. Anka, p’anangushena ku bipua bishale, ashinkamisha’shi Yehowa mufubishe bakuetu bua kumusamba. Amba’shi: “Yehowa baadi ankuasha misuusa yoso pabaadi amono’shi bukome buande bubapeele muanda wa mudimo wa ku mbidi, na kupasukila muana ande ena maladi na ingi nkalakashi. Takui efuku su ndimune munda mua bipua 30 bibashala, wanshi mulombashe mulayilo waye wa nkusamba. Misango i bungi baadi anyingisha, pa kundesha kalolo, na mayi aanyingisha a bangi. Ke bungi naadi napete mesaje, abantumina mikanda, sunga mayi e buwa nsaa inaadi mu lukalo lukata.”
Yehowa mmulombene nkufubisha mushindo kinyi bua kusamba bangi? (Tala kikoso 17)
18. Mushindo kinyi watudi balombne kusamba bangi?
18 Tui na kinemo kia kuambula Efile Mukulu pa kusamba bangi. Tui kuibikita naminyi? Pa kuibatemeesha na kalolo koso, kuisamba nabo bishima abinyingisha, na kuibakuasha na kantu. (Nki. 3:27) Atuikitshisha bua kusamba bano boso abakienge, mpa na bano bash’abafubila Efile Mukulu. Nsaa i nkungishanyi netu mu nkalakashi, na maladi sunga na tuinyongoshi, tuende mu nkamutala, tumutemeshe na kumunyingisha na bifundue bia mu Bible. Nsaa yatuambula Yehowa, “Efile Mukulu a busambi boso,” t’atukuasha penda balanguidi netu buabadia kunyingiila nkalakashi, kadi atukuasha’nyi bashi bena kulanguila netu buashi batuele mu lulanguilo lui selele.—Mat. 5:16.
YEHOWA E KUANKA BUA KUITUKUASHA NSAA YOSO
19. Kinyi akitukitshinaa Yehowa, na tui kumuambula naminyi?
19 Yehowa apasukilaa boso bamufule. Tebasumbushenaa pabadi mu nkalakashi. Nka bi muledi sha kifulo apasukilaa muana aaye, Yehowa apasukilaa balanguidi baye basha lulamato. Etukunkushaa, alombashaa nkalo yetu, etukaluilaa na kuitusamba. Atuambula Nshetu sha kifulo e muiyilu, patukuatshishena na kunyingisha bangi nsaa yabadi mu nkalakashi. Sunga tuafumankana na nkalakashi na tuinyongoshi, tui balombene kushinkamisha’shi Yehowa e netu. Kukatusha biabia mmuitulee’shi: “Lekai kutshîna muanda nyi nenu.” (Yesh. 41:10) Uno mulayilo awitushinkamisha’shi tatui bupenka nya, Yehowa e netu.
LOONO 100 Ebakukileeyi na kalolo kooso
a Tala muisambo awamba’shi: “Prenons des décisions qui honorent Dieu” wi mu Kitenta kia Mulami kia 15/4/2011 mu fualanse.
b Tala kikoso 11-14 bi mu muisambo awamba’shi: “Tungunuka na kulonda bukunkushi bua Yehowa” wi mu Kitenta kia Mulami kia mueshi wa 2/2024.
c We mulombene kupeta bileshesho bipia pa kufunda mu jw.org pa mbalo a kukimbula mianda’shi: “Kukuasha bantu bapete masaku.”
d Tala “Nkonko ya bantu ababadikaa” i mu Kitenta kia mulami kia mueshi wa 2/2017.
e Bi mu kifuatulo: Bakuetu balume na bakashi ba mu Malawi, abapete bukuashi bua ku mbidi na bua mu kikudi kunyima kua kupeta masaku aatukila ku bipangua.