Tulongieleyi ku mayi a nfudiilo a bana balume babaadi na lulamato

1. Buakinyi tui kulongiela kui bantu bakulu?

ATUE booso, atuikalaa na lukalo na bukuashi bua kuata bitshibilo bi buwa mu nshalelo. Tui kupeta buabua bukuashi kukiila kui bakulu mu tukongie, sunga kui bangi bena Nkidishitu banyingie mu kikudi. Sunga bekala bakulu betu, ta tui balombene kubepuula malango aabo nya. Yehowa akumiina’shi tulongiele kui bantu bakulu. Mbapue kukita mafuku e bungi na kumona mianda i bungi kuitukila, be na binangu, na kapatupatu.​—Yob. 12:12.

2. Nkinyi ki’atulongo mu uno muisambo?

² Mu mafuku a kala, Yehowa baadi mufubishe bantu bakulu babaadi na lulamato bua kunyingisha na kukunkusha muilo waye. Tutaluuleyi kileshesho kia bano bantu: Moyise, Davide, na Yowano mutumibua. Babaadi bashaale mu bipungo bilekeene, na nshalelo aabo baadi muilekeene ngofu. Pa baabadi peepi na kufua, babaadi bape bansongualume elango di buwa. Elango dioso dia bano bakulu babaadi na lulamato, dibaadi adishimika kasele nka pa muulo wa kukookiela Efile Mukulu. Yehowa baadi mufundishe ano mayi aabo a binangu mu Bible, buatudia kulongiela kuabadi lelo uno. Biatuikala bansongua sunga bantu bakulu, abitukuasha p’atutaluula malango aabo. (Lom. 15:4; 2 Ti. 3:16) Mu uno muisambo, atulongo mayi a binangu a bano bakulu booso basatu babaadi na lulamato, na malongiesha atudi balombene kupetela ku kibaabadi baakule.

“ANUKASHÂLA MAFUKU E BUNGI”

3. Mu mishindo kinyi mubaadi Moyise mufubile Efile Mukulu na muilo waye?

³ Moyise baadi mufubile Yehowa ngofu mu muwa waye ooso. Moyise bafubile bu mutemuki, bu nsushi, bu mukata a basalayi, na bu mufundi a mikanda. Moyise baadi mumone mianda i bungi bukile mu nshalelo aaye! Moyise baadi mukunkushe muilo wa Isalele eutuusha mu bupika mu Ejipitu, na baadi muimuene aye nabene bilengieleeshi bi bungi bia Yehowa. Yehowa baadi mufubishe Moyise buadia kufunda mikanda itaano ya kumpala ya mu Bible, na kufunda mukanda wa Misambo 90, pangi mpaa na Misambo 91. Baadi dingi pangi mufunde mpaa na mukanda wa Yoobo.

4. Moyise baadi munyingishe bantu kinyi, na buakinyi?

⁴ Mafuku apeela kumpala kua’shi afue, aye taadi na bipua 120, Moyise baadi mubungie bena Isalele booso buadia kuibatentekiesha mianda ibaabadi bamone Yehowa ebakitshiina. Bipua bi bungi kumpala, bangi bena Isalele babaadi bamone bilengieleeshi bibaabadi bakite kui Yehowa, na mushindo ubaadi munyokie bena Ejipitu. (Efi. 7:3, 4) Babaadi batambukie munkatshi mua meema eyabuule a kalunga kamonga, na babamuene kubutudibua kua kiluilo kia Faraone. (Efi. 14:29-31) Pa baabadi mu kabaaka, babamuene Yehowa bi’ebakaluila na kuibapasukila. (Miy. 8:3, 4) Pa baadi bena Isalele tabadi peepi na kutuela mu Nsenga ya Mulayilo, Moyise baadi muibanyingishe kumpala kua’shi afue.a

5. Mayi a Moyise a nfudiilo e mu mukanda wa Miiya Ikituulwe 30:19, 20, abaadi ape bena Isalele kishinkamiisho kinyi?

⁵ Moyise bakuile kinyi? (Badika Miiya Ikituulwe 30:19, 20.) Moyise baadi mutentekiese muilo wa Isalele’shi abakapete kipungo ki buwa bukile mu mafuku aafiki, kipungo kibaabadi abatengiela na kinsukunsuku kioso. Ku bukuashi bua miabi ya Yehowa, bena Isalele babaadi balombene kushaala munda mua mafuku e bungi mu nsenga ya mulayilo ibaadi muibalee. Yaya nsenga ibaadi buwa bukile na ibaadi ayituusha biakudia bi bungi! Moyise baadi muibapatuluile bibaadi yaya nsenga mu uno mushindo: “Eumbo dya mpata ikata iibuuwa, yooshii mwibakye, dii mashibo awuule na bintu biibuuwa bya bipaso byooso byooshii mwimutuule, dii bitonko bya meema alumbuulwe byooso byooshii mubundule, dii nfinyo na bipafupafu byooshii mukune.”​—Miy. 6:10, 11.

6. Buakinyi Efile Mukulu baadi mutadiile’shi ingi miilo itshokole bena Isalele?

⁶ Moyise baadi dingi mudimushe bena Isalele. Bua’shi bena Isalele batungunukie na kushaala mu yaya nsenga ibaadi buwa, bibaadi abitungu’shi bakookiele miiya ya Yehowa. Moyise baadi mulangie bena Isalele buabadia “kusangula muwa” pa kuteemesha Yehowa na pa “kumulamata.” Anka bena Isalele babaadi bapele Yehowa. Ngi buakinyi mu kingi kipungo, Efile Mukulu baadi mutadiile bena Asiri na bena Babilone buabadia kutshokola bena Isalele na kuibatuala mu bupika.​—2 Bf. 17:6-8, 13, 14; 2 Mya. 36:15-17, 20.

7. Nkinyi ki’atulongiela ku mayi a Moyise? (Tala dingi kifuatulo.)

⁷ Bino abitulongiesha kinyi? Su tubakookiela Yehowa, atukekala na muwa wa ikalayika. Nka bu bibaadi bena Isalele peepi na kutuela mu Nsenga ya Mulayilo, n’atue namu tatudi peepi na kutuela mu nsenga ipia ibaabadi betulee kui Efile Mukulu, mu mafuku apeela’mu abakaluula nsenga mpaladiiso dingi. (Yesh. 35:1; Luk. 23:43) Diabulu na ba demo baye ababutudibua binobino. (Kbf. 20:2, 3) T’akukekalanyi bakata ba bipuilo abalongiesha bantu mianda ya madimi pabitale Yehowa. (Kbf. 17:16) T’akukekala dingi ma guvernema a bana ba bantu abakiengiesha bantu babakuete kukunkusha. (Kbf. 19:19, 20) Bantomboshi t’abakekala na mbalo mu mpaladiiso nya. (Mis. 37:10, 11) Bantu be mu mambalo elekeenelekeene abakakookiela miiya ilulame ya Yehowa, ayifuisha buumune na butaale. Muntu ooso akafulu mukuabo na kuikulupishena. (Yesh. 11:9) Tukuete kutengiela na kinsukunsuku kioso kino kipungo ki buwa bukile! Kikile buwa nkia’shi, su tubakookiela Yehowa, atukatungunuka na kushaala mu mpaladiiso pa nsenga kushi penda bua bipua nkama, anka, bua ikalayika.​—Mis. 37:29; Yo. 3:16.

8. Mulayilo wa muwa wa ikalayika ubaadi ukuashe ungi mukuetu mulume baadi mufube bu misionere munda mua mafuku e bungi naminyi? (Yuda 20, 21)

⁸ Su tubekala atunangushena ngofu pabitale mulayilo w’Efile Mukulu wa muwa wa ikalayika, abitukuasha buatudia kumukookiela sunga tuafumankana na nkalakashi i naminyi. (Badika Yuda 20, 21.) Uno mulayilo wi kuitupa dingi bukome buatudia kulua na kubofula kuetu’tue banabene. Ungi mukuetu mulume bafubile mafuku e bungi bu misionere mu Afrike, baadi alu bua kukambila kubofula kua ku mbidi bambile’shi: “Lukulupilo luande lua muwa wa ikalayika lubaadi mu masaku, ngi ami nkukita muande mooso buandia kulua na uno muanda na naadi muisendeele Yehowa n’eshimba diande dioso. Ku bukuashi bua Yehowa, naadi mupete ngobesha yandia kukambila kuno kubofula.”

“WOBESHA KYOOSO KYOOKITSHI”

9. Nkalakashi kinyi ibaadi Davide mupete mu nshalelo aaye?

⁹ Davide baadi nfumu mukata. Davide baadi dingi kayimba, bu kilobo kia ngoshi, na bu mutemuki. Anka baadi mufumankane na bitompuanga bi bungi. Munda mua bipua bi bungi Davide baadi mufuame, muanda Nfumu Saule baadi akiebe kumuipaa. Davide baadi mufuame dingi muanda wa muana aaye Absalome baadi adidi kumuipaa bua’shi ekale bu nfumu. Sunga mbibaadi Davide na ino yooso nkalakashi i bukopo, na kubofula kuaye kua pa bupenka, balesheeshe lulamato kui Efile Mukulu mpaa na pa bafuile. Yehowa balesheeshe Davide bu “muntu baadi akitshi by’abamonâ kwi Yehowa’shi bi buwa.” Abitungu tuteemeshe elango dia binangu dia Davide!​—Bik. 13:22; 1 Bf. 15:5.

10. Buakinyi Davide baadi mupe muana aaye Salomone baadi muikale mpianyi aaye elango?

¹⁰ Tubandeyi kutala bu kileshesho, elango dibaadi Davide mupe muana aaye Salomone baadi muikale mpianyi aaye. Uno nsongualume, babaadi bamusangule kui Yehowa buadia kutungunuka na kulama lulanguilo lui selele, na kuibaka ntempelo bua ntumbo y’Efile Mukulu. (1 Mya. 22:5) Salomone baadi mulombene kupeta nkalakashi i bukopo mpaa na kutuula muwa waye mu masaku. Davide bamulunguile kinyi? Tubandeyi kuibimona.

11. Muyile mukanda wa 1 Banfumu 2:2, 3, Davide baadi mupe Salomone elango kinyi, na nkinyi kibaadi kikitshikie pa baadi Salomone mukookiele diadia elango? (Tala dingi kifuatulo.)

¹¹ Davide bakuile kinyi? (Badika 1 Banfumu 2:2, 3.) Davide baadi mulungule muana aaye’shi, su akookiela Yehowa mmulombene koobesha kioso ki’akitshi mu nshalelo aaye. Na munda mua bipua bi bungi, Yehowa baadi mupe Salomone bintu bi bungi bi buwa, na bamukuashiishe mu mishindo i bungi. (1 Mya. 29:23-25) Salomone baadi muibakie ntempelo e buwa bukile, na bafundile ingi mikanda ya mu Bible, na angi mayi aaye aasanganyibua mu angi ma mbalo mu Bible. Salomone baadi muende nkumo muanda wa binangu biaye na bupeta. (1 Bf. 4:34) Nka bu bibaadi Davide mupatuule, Salomone baadi mulombene koobesha mianda kalolo nka penda su bakookiela Yehowa Efile Mukulu. Bi malua muanda pa baadi Salomone baapu kununupa, babangile kulanguila bangi befile ba madimi. Yehowa ta baadi mukumiine bino bibaadi Salomone mukite nya, ngi buakinyi baadi mulekie kupa Salomone binangu buadia kukunkusha muilo na kalolo na kululama.​—1 Bf. 11:9, 10; 12:4.

12. Tui kulongiela kinyi ku mayi a Davide?

¹² Abitulongiesha kinyi? Nsaa y’atukookiela Yehowa, etuelela miabi na kuitukuasha. (Mis. 1:1-3) Mu binyibinyi, Yehowa ta mmuitulee bua kuitupa bupeta na nkumo bibaadi nabio Salomone nya. Anka su tubakookiela Efile Mukulu eetu, aketupa binangu abiketukuasha buatudia kuata bitshibilo bi buwa. (Nki. 2:6, 7; Yak. 1:5) Elango dia Yehowa aditukuasha nsaa y’atuata bitshibilo pabitale mudimo, kulonga tulaasa, makuta, na ki’atukitshi bua kupeta makuta. Su tubatumikila elango dia Yehowa, adikaluila kipuano kietu naye, na atukapete muwa wa ikalayika. (Nki. 2:10, 11) Dingi atuikala na bakuuku be buwa. Na kifuko kietu akikala na muloo.

13. Nkinyi kibaadi kikuashe mukuetu Carmen buadia kulumbuula nshalelo aaye?

¹³ Carmen mushaale mu Mozambique, baadi mumone’shi kulonga tulaasa tukata ngi nsulo ya koobesha nshalelo. Uno mukuetu mukashi, baadi mutuele ku universite bua kulonga bia kuibaka mashibo. Amba’shi: “Naadi mufule ino mianda inaadi nalongo ngofu.” Alombasha’shi: “Anka bibaadi abingata nsaa yande yooso na bukome bui bungi. Naadi nende ku kalaasa mu nsaa ya 7:30 bua kualukiila ku nshibo mu 18:00. Bibaadi bukopo bua kutuela mu bisangilo, na kipuano kiande na Yehowa kibaadi kibofule. Munda muande naadi nawuku’shi naadi nekitshisha bua kufubila banfumu babidi.” (Mat. 6:24) Carmen baadi muele luteko pabitale uno muanda waye, na akimbuula mu mikanda yetu. Amba dingi’shi: “Kunyima kua’mi kupeta elango di buwa adituukila kui bakulu, naadi muate kitshibilo kia kukatuka ku Universite bua kufubila Yehowa mumudimo wa nsaa yooso. Napusha’shi ne muate kitshibilo ki buwa na ne na muloo wi bungi bua bino bia nkuete kukita.”

14. Mayi a Moyise na Davide abaadi emeene pa kinyi?

¹⁴ Moyise na Davide babaadi bafule Yehowa na babaadi bamone bi bukata bua muulo wa kumukookiela. Mu mayi aabo a nfudiilo, babaadi banyingishe bantu babaadi abebateemesha buabadia kulonda kileshesho kiabo pa kulamata kui Yehowa Efile Mukulu aabo. Abo booso babidi Moyise na Davide babaadi dingi badimushe bantu’shi, su bakutua kushaala na lulamato kui Yehowa ta mbalombene kuikala naye mu kipuano ki buwa nya, na ta mbalombene kupeta efuto adituukila kuadi. Elango diabo di ki na muulo mpaa na kuatudi lelo uno. Kunyima kua siekele i bungi, ungi mufubi a Yehowa baadi naye mupatuule buakinyi bi na muulo buatudia kushaala na lulamato kui Efile Mukulu.

‘NYI MMULOO UKATA’

15. Yowano mutumibua baadi mumone mianda kinyi mu nshalelo aaye?

¹⁵ Yowano baadi kuuku na mutumibua a Yesu Nkidishitu. (Mat. 10:2; Yo. 19:26) Yowano baadi ashindikila Yesu mu mudimo wa bulungudi, baadi mumone Yesu ku’akitshi bilengieleeshi, na baadi mumulamate mpaa na mu bipungo bi bukopo. Yowano baadi munone Yesu ku’ayipayibua na bamumuenenyi pa basanguka. Yowano baadi dingi mumone abitama kakongie ka bena Nkidishitu, baadi mushaale mafuku apeela bua kumona “mukandu wibuwa kuawulungulua kui bipangua bioso bi muushi mu’eyilu.”​—Kol. 1:23.

16. Mikanda ya Yowano ngikuashe bantu kinyi?

¹⁶ Pa bafikile Yowano mutumibua mununu ngofu, bapetele kineemo kiadia kufunda mukanda wi buwa bukile wa Kibafumbuilue. (Kbf. 1:1) Baadi dingi mufunde Evanjile umune e na eshina diaye. Yowano baadi mufunde mikanda isatu iyokielue. Yowano baadi mufunde mukanda waye wa kasatu eutumina muina Nkidishitu baadi na lulamato abaabadi abetanyina bu Gayuse, abaabadi bafule kui Yowano nka bu muana aaye. (3 Yo. 1) Dingi kubaadi bangi bantu be bungi babaadi Yowano ebamono nka bu bana baye ba kifulo. Ino mianda ibaabadi bafunde kui uno muntu mununu baadi na lulamato, ibaadi inyingishe balongi booso ba Yesu mpaa na atue be lelo uno.

17. Muyile mukanda wa 3 Yowano 4, nkinyi akifuishaa muloo wi bungi?

¹⁷ Yowano baadi mufunde kinyi? (Badika 3 Yowano 4.) Mu mukanda waye wa kasatu Yowano bakuile’shi, bibaadi abimuikasha na muloo pa kumona bakuabo balume na bakashi abakookiela Efile Mukulu. Mu kipungo kibaadi Yowano mufunde mukanda waye wa kasatu, bangi bantu babaadi abapalakasha malongiesha a madimi na kufuishanga kuitshibuula. Sunga mbiabia, bangi babaadi batungunukie na “kutambuka muyile bia binyibinyi.” Babaadi abakookiela Yehowa na babaadi na “nshalelo muipushene na miiya.” (2 Yo. 4, 6) Bano booso bena Nkidishitu babaadi na lulamato, babaadi basankishe Yowano mpaa na Yehowa nabene.​—Nki. 27:11.

18. Tui kulongiela kinyi ku mayi a Yowano?

¹⁸ Bino abitulongiesha kinyi? Nsaa y’atushaala na lulamato kui Yehowa, atue banabene atuikala na muloo na atusankisha mpaa na bangi. (1 Yo. 5:3) Bu kileshesho, Tui na muloo muanda atusankisha Yehowa. Yehowa ekalaa na muloo nsaa y’etumono atukambila bitompuanga bia mu uno ndumbuluilo e bubi, na atukumiina bia binyibinyi. (Nki. 23:15) Na bamuikeyilu namu abekalaa na muloo muiyilu. (Luk. 15:10) N’atue namu atuikalaa na muloo p’atumono’shi mukuetu kampanda bashaala na lulamato, bikishekishe nsaa y’apete nkalakashi i bukopo na bitompuanga. (2 Te. 1:4) P’abakabutula uno ndumbuluilo a Satana, Atukekala na muloo wa’shi tubashaala na lulamato kui Yehowa.

19. Mukuetu mukashi Rachel mmuakule naminyi pabitale kulongiesha bangi bia binyibinyi? (Tala dingi kifuatulo.)

¹⁹ Atupushaa muloo bikishekishe nsaa y’atulungula bangi bia binyibinyi pabitale Yehowa. Ungi mukuetu mukashi Rachel mushalele mu République Dominicaine, apushaa’shi kulongiesha bangi bantu pabitale Efile Mukulu eetu Yehowa, nyi nkineemo kikata. Amba’shi: “P’anangushenaa pabitale bana baye ba mu kikudi, abikalaa bukopo bua kupatuula muloo wampusha nsaa yammono baaba booso bandongiesha abatamisha kifulo kiabo bua Yehowa, na abamukulupila, abashintula nshalelo aabo bua kumuikasha na muloo. Wawa muloo wampushaa ngukile kuikitshisha kooso kuanekitshishaa, sunga kuipaana kuande buandia kuibalongiesha.”

MIABI AYITUUKILA KU MAYI A NFUDIILO A BANA BALUME BABAADI NA LULAMATO

20. Mu mishindo kinyi muatudi bu Moyise, Davide, na Yowano?

²⁰ Moyise, Davide, na Yowano babaadi bashaale mu bipungo na nshalelo muilekeene na eetu. Anka tui nka biabadi mu mishindo i bungi. Babaadi bafubile Efile Mukulu a binyibinyi, ngi bia tukuete kukita n’atue namu. Nka bu abo, atutekaa Yehowa, tui bamukulupile na atukimbaa bukunkushi buaye. Nka bu bibaadi bano bantu banunu, tui bakulupile’shi Yehowa elela baaba booso abamukookiela miabi.

21. Baaba booso abakookiela elango dia bano bantu bakulu babaadi na lulamato bu Moyise, Davide, na Yowano abakapete miabi kinyi?

²¹ Biabia tulondeyi elango dia bano booso bana balume banunu, tukookiele miiya ya Yehowa. Nsaa y’atukookiela Yehowa, etuelela miabi na kuitukuasha. Atukekala na muwa na “kushaala mafuku e bungi,” kuamba’shi losoo. (Miy. 30:20, EEM) Na atukekala na muloo wa kusankisha Nshetu sha kifulo e muiyilu, alombashaa milayilo yaye yooso mu mishindo ya kukaanya.​—Ef. 3:20.