We mukuminyibue na Yehowa su?

1. Bafubi ba Yehowa ba kala ba sha lulamato babaadi abekalakasha bua muanda kinyi?

ABITUSANKISHAA ngofu pa kuuka’shi Yehowa mmukumiine muilo waye mu kisaka! Bible amba’shi: “Yehowa asangalâ na mwilo wê.” (Mis. 149:4, EEM) Ingi nsaa, bangi mbalombene kutshoboloka na kuiyipusha’shi: ‘Ami namu Yehowa munkumiine pa bupenka su?’ Be bungi ba ku bantu babadi bateemune mu Bible, babaadi bafubile Yehowa na lulamato looso, babaadi abatshoboloka ingi nsaa pa muanda wa yaaya mpaka.​—1 Sam. 1:6-10; Yob. 29:2, 4; Mis. 51:11.

2. Yehowa akumiinaa bantu kinyi?

² Bible aleesha patooka’shi bantu bakutue kupuidika, mbalombene kukuminyibua na Yehowa. Mushindo kinyi? Abitungu tuikale na lukumiino mui Yesu Nkidishitu na tubatshishibue. (Yo. 3:16) Bino abilesha’shi tubelanga pa butooka ku miluisho yeetu, na tubalaa Efile Mukulu’shi, atukitshi kikiebe ki’eshimba diaye. (Bik. 2:38; 3:19) Yehowa asankaa neetu p’atukitshi ino mianda yooso bua kuikala naaye mu kipuano ki buwa. Bu bi’atutungunuka na kuikitshisha bua kuikala na nshalelo muipushene na mutshipo wetu wa kuilambula, Yehowa etukumiina na kuitumona bu bakuuku baaye ba p’eshimba.​—Mis. 25:14.

3. Nkonko nkinyi isatu y’atuisambila?

³ Buakinyi ingi nsaa bangi be kuipusha bu’shi Efile Mukulu ta muibakumiine? Yehowa aleshaa’shi mmuitukumiine mushindo kinyi? Na muina Nkidishitu e kushinkamisha naminyi’shi Efile Mukulu mmumukumiine?

BUAKINYI INGI NSAA BANGI BE KUIPUSHA BU’SHI YEHOWA TA MUIBAKUMIINE?

4-5. Sunga tuepusha’shi ta tui na muulo, abitungu tushinkamishe kinyi?

⁴ Kubanga nka atue ba ki bakinga, be bungi bakuatudi babaadi abepusha’shi ta be na muulo. (Mis. 88:15) Mukuetu mulume Adrián amba’shi: “Misuusa yooso naadi nepusha nka bu’mi shi na muulo. Pa naadi nki muana mukinga, nantentekiesha binantekiele’shi kifuko kiande nkilombene kutuela mu Mpaladiiso, sunga mbinaadi mushinkamishe’shi ntshi naadi muntu e buwa mulombene kuimutuela.” Tony shi mukudile mu kifuko kia bena Nkidishitu amba’shi: “Kashaa baledi bande ta bandunguile namu’shi tui bakufule, sunga’shi tui na nfiedi pa muanda oobe. Bino bibaadi bintakule mu kuipusha’shi, ntankitaa kintu su nkimune kilombene kuibasankisha.”

⁵ Su ingi nsaa tukuete kuipusha bu bashi na muulo, abitungu tutentekieshe’shi Yehowa ngi muitukakie kuadi mu kukumiina kuaye aye nabene. (Yo. 6:44) Yehowa amonaa ngikashi i buwa i muatudi yatushi balombene kumona atue banabene, na auku mashimba eetu kalolo. (1 Sam. 16:7; 2 Mya. 6:30) Biabia, abitungu tukulupile muadi nsaa y’etulungula’shi tui na muulo.​—1 Yo. 3:19, 20.

6. Mpoolo mutumibua bapushiishe naminyi pabitale miluisho yaaye ya kala?

⁶ Kumpala ku’atue kulonga bia binyibinyi, be bungi bakuatudi babaadi bakite mianda iki’ayibenyongosha mpaa na binobino. (1 Mp. 4:3) Sunga bena Nkidishitu ba sha lulamato, bakuete kulua bua kukambila bukitshishi bua miluisho. Eshimba diobe adikutopekaa su? Su adikutopekaa, ikala munyingishibue pa kuuka’shi bafubi ba Yehowa ba sha lulamato, bakuete kulua bua kukambila biabia binangu bimune. Bu kileshesho, Mpoolo mutumibua bepushiishe bu muntu sha dikienga pa baadi anangushena ku kukutua kuaye kua kupuidika. (Lom. 7:24) Mu binyibinyi, Mpoolo mutumibua baadi muilangie kuishimba ku miluisho yaye, n’aye nkubatshishibua. Ngi buakinyi baadi muileshe aye nabene bu muntu, “mukile bupeela a ku batumibua boso” na a “kumpala” a ku baaba ba sha miluisho.​—1 Ko. 15:9; 1 Ti. 1:15.

7. Abitungu tutentekieshe kinyi pabitale miluisho yeetu ya kala?

⁷ Nshetu e muiyilu mmuitule’shi etufuila lusa su tubelanga ku miluisho yeetu. (Mis. 86:5) Biabia, su tuenyongola binyibinyi ku miluisho yeetu, atukulupila kiabadi bakule kui Yehowa’shi nkia binyibinyi, na etufuilaa lusa.​—Kol. 2:13.

8-9. Mmushindo kinyi watudia kukambila binangu bia’shi, ta tui bia kukita bi bungi bua kusankisha Yehowa?

⁸ Atue booso atukumiinaa kukita kioso akitungu bua kufubila Yehowa. Biabia, bangi mbalombene kuipusha’shi ta be bia kukita bi bungi bua kukuminyibua n’Efile Mukulu. Mukuetu mukashi Amanda aakula’shi: “Ke bungi nanangushena’shi kupa Yehowa muyile ngobesha yande, nkuikala na lukalo lua kumufubila efuku dioso. Biabia, nekitshishaa bua kukita bi bungi kukila ngobesha yande. Su nakutua kukita kintu kampanda, namonaa’shi Yehowa benyongola kunkila mpaa n’ami nabene.”

⁹ Mmushindo kinyi watudia kukambila binangu bia’shi, ta tui bia kukita bi bungi bua kusankisha Yehowa? Tentekiesha’shi Yehowa e na nkatshinkatshi. Ta mulombene kuituteka buatudia kukita bi bungi bikile ngobesha yeetu. Asangeelaa bi’atuikitshisha bua kumufubila. Dingi, nangushena ku bileshesho bia bantu babaadi bafubile Yehowa na mashimba aabo ooso. Banda kunangushena kileshesho kia Mpoolo. Baadi mufube ngofu munda mua bipua bi bungi, aye nkukita nyendo ya bilometre bi bungi, na kutuula tukongie tui bungi. Anka, nsaa ibaadi mianda ishintulukie mu nshalelo aaye, ta baadi bia kukita dingi mudimo wa bulungudi ngofu bu bibaadi akitshi kumpala nya, bino abipushisha’shi ta baadi mukuminyibue dingi na Yehowa su? Nya. Batungunukile na kukita muyile ngobesha yaaye, na Yehowa namu bamueleele miabi. (Bik. 28:30, 31) Mu mushindo umune, bintu biatudi balombene kupa Yehowa bi kushintuluka ingi nsaa. Biabia, kintu ki na muulo ukata kuadi nkiakia akitutakula bua kumufubila. Bua binobino, tutaleyi ingi mishindo ayileshaa Yehowa’shi mmuitukumiine.

YEHOWA ALESHAA’SHI MMUITUKUMIINE MUSHINDO KINYI?

10. Mmushindo kinyi watudia “kupusha” Yehowa etulungula’shi mmuitukumiine? (Yowano 16:27)

¹⁰ Mmuitupe Bible. Yehowa akimbaa mishindo ya kuleesha muilo waye’shi muiwufule na’shi eusangeelaa. Bifundue abilesha misuusa ibidi ibaadi Yehowa mulungule Yesu’shi we Muana ande andi mufule, na andi mukumiine. (Mat. 3:17; 17:5) Obe namu okumiina kupusha Yehowa p’akushinkamiisha’shi mmukukumiine su? Yehowa ta ki’akulaa neetu kukatukila muiyilu nya, kadi akulaa neetu kukiila Kuiyi diaye Bible. Tui “kupusha” eyi dia Yehowa diamba’shi mmuitukumiine, p’atubadika mayi a Yesu e mu ma Evanjile. (Badika Yowano 16:27.) Yesu baadi muambule bumuntu bua Nshaye mu mushindo upuidikie. P’atubadika mushindo ubaadi Yesu mulungule balongi baaye ba sha lulamato, kadi bashi bapuidikie’shi muibakumiine, tui kupuandikisha’shi Yehowa etulungula namu ano mayi.​—Yo. 15:9, 15.

11. Buakinyi kupeta bitompuanga t’akuleesha’shi tubakutua kukuminyibua na Yehowa? (Yakobo 1:12)

¹¹ Mmuitupe biatudi nabio lukalo. Yehowa akumiina kuitukuasha pa kuitulombeesha nkalo yeetu ya ku mbidi. Anka ingi nsaa, Yehowa atadiilaa’shi mianda i bubi itukitshikile, nka bu bibaadi mui bikite kui muntu mululame Yobo. (Yob. 1:8-11) Bitompuanga t’abileesha’shi tubakutua kukuminyibua n’Efile Mukulu nya. Kadi, abitupa mushindo wa kuleesha Yehowa’shi tui bamufule ngofu, na’shi tui bamukulupile. (Badika Yakobo 1:12.) Dingi su tui mu bitompuanga, atumono Yehowa biadi muitufule ngofu, na bi’etukuasha bua kunyingiila.

12. Muanda ubaadi ukitshikile Dmitrii wi kuitulongiesha kinyi?

¹² Tubandeyi kutala kibaadi kikitshikile mukuetu mulume Dmitrii a mu Asie. Baadi mushimishe mudimo waye, na ta baadi bia kupeta ungi mund’a mieshi i bungi. Baadi muate kitshibilo kia kuleesha’shi mmukulupile mui Yehowa, p’aye kuipaana mu mudimo wa bulungudi. Mieshi i bungi ibaadi ikile, kushi’ye kupeta mudimo. Dingi baadi mupete maladi e bukopo, ta baadi amono su mbia kutuuka paasha. Ngi aye nkubanga kuialashena’shi, nalombasha mashito ande a bu nshe bana na bu mulume naminyi, na kubanga kuiyipusha’shi nakutua kukuminyibua na Yehowa su? Dingi efuku bufuku muana aaye mukashi baadi muende n’esaki di na bishima abisanganyibua mu mukanda wa Yeeshaya 30:15 awamba’shi: “Bukome buenu, bui mukushaala baumiine na mu kuleesha lukulupilo.” Baadi muimane mbuipi muaye amulungula’shi: “Papa, nsaa yu’epusha bi bubi, otentekieshe uno verse.” Dmitrii baadi mutumbule Yehowa, bua bikuete kifuko kiaye kupeta biakudia, bilamba, na mbalo ya kushaala. Amba’shi: “Ngi kibaadi akitungu’shi nkite, naadi mushaale muumiine na natungunuka na kukulupila mui Efile Mukulu ande.” Su opeta n’obe namu kitompuanga kia uno mushindo, ikala mukulupile’shi Yehowa akupasukila na akukuasha bodia kunyingiila.

13. Yehowa e kufubisha bantu kinyi bua kuleesha’shi mmuitukumiine, na ebikitaa mu mushindo kinyi?

¹³ Mmuitupe bakuetu balume na bakashi. Yehowa afubishaa bakuetu balume na bakashi bua kuituleesha’shi mmuitukumiine. Bu kileshesho, e kutakula bangi buabadia kuitulungula bishima abinyingisha pa nsaa ilombane. Bino ngi bibaadi bikitshikile ungi mukuetu mukashi a mu Asie, mu kipungo kibaadi muinyongole ngofu. Baadi mushimishe mudimo waye na aye nkukumba ngofu. Dingi, mulume aaye baadi mukite muluisho ukata na abo nkumukaasha bu mukulu. Amba’shi: “Ntshi naadi napusha buakinyi ino mianda yooso ibankitshikila. Naadi nampuadikisha’shi, pangi ne mukite muanda kampanda wi bubi, na’shi Yehowa ta ki munkumiine.” Uno mukuetu mukashi babangile kuisendeela Yehowa bua’shi amushinkamiishe’shi mumukumiine. Bakitshine biabia mushindo kinyi? Apatuula’shi: “Bakulu babaadi abesamba n’ami na ku nshinkamiisha’shi Yehowa mmunfule.” Kunyima baadi mutekie Yehowa bukuashi. Amba dingi’shi: “Mu diadia efuku dimune, naadi mupete mukanda aufiki kui kisaka kia bakuetu balume na bakashi ba mu kakongie. Pa naadi nambadika mayi aabo aakankamika, naadi mushinkamishe’shi Yehowa anteemeshaa.” Eyendo, Yehowa mmundeshe’shi munkumiine kukiila ku bishima bia kalolo bia bangi.​—Mis. 10:17.

14. Ungi mushindo kinyi awituleeshaa Yehowa’shi muitukumiine?

¹⁴ Yehowa aleeshaa dingi’shi muitukumiine, pa kufubisha bena Nkidishitu neetu buabadia kuitupa malango atudi nao lukalo. Bu kileshesho, mu siekele a kumpala Yehowa bafubiishe Mpoolo mutumibua buadia kufunda mikanda 14 iyokielue bua bena Nkidishitu naaye. Mu ino mikanda yooso, Mpoolo baadi mutopekie bakuabo pa butooka kadi na kifulo. Buakinyi Yehowa baadi muyokile Mpoolo buadia kufunda ano malango? Yehowa, Nshetu e buwa, na anyokaa bana baaye ‘baadi mufule.’ (Nki. 3:11, 12) Biabia, nsaa y’atupete malango aatukila mu Bible, abitungu tui amone bu kishinkamiisho kia’shi Efile Mukulu mmuitukumiine, kushi kumona bushi ta muitukumiine. (Eb. 12:6) Nkintu kinyi dingi akituleesha’shi tui bakuminyibue na Yehowa?

KINGI KISHINKAMIISHO AKITULEESHA’SHI YEHOWA MMUITUKUMIINE

15. Mbantu kinyi babapeeyaa kikudi kiselele kui Yehowa, na bino abitupa kishinkamiisho kinyi?

¹⁵ Yehowa apeeyaa baaba booso baadi mukumiine kikudi kiaye kiselele. (Mat. 12:18) Nangushena ku luno lukonko: ‘Naleshaa ingi ngikashi ya kikudi kiselele mu nshalelo ande su?’ Botundula’shi toodi na luishinko lui bungi kui bangi, kukila biboodi kumpala kua’shi oukie Yehowa su? P’onyiisha kuikala na ngikashi i buwa ya kikudi ki’Efile Mukulu, onyiisha kuikala na kishinkamiisho kia’shi Yehowa mmukukumiine!​—Tala kashibo akamba’shi: “Kikuba kia kikudi nyi . . .”

16. Yehowa afubishaa bantu kinyi bua kulungula mukandu wi buwa, bino abikutakula bua kuipusha naminyi? (1 Bena Tesalonike 2:4)

¹⁶ Yehowa e na muloo wa kupa baaba baadi mukumiine bushito bua kulungula mukandu wi buwa. (Badika 1 Bena Tesalonike 2:4.) Mukuetu mukashi Jocelyn, mmufikie mu nkashinkamisha uno muanda pa kulungula bangi mukandu wi buwa. Dingi efuku, Jocelyn baadi mubuukie na lukalakashi lua mu binangu. Amba’shi: “Naadi mukutue bukome na n’epusha bu shi na muulo. Anka naadi mbala-mashinda a mieshi yooso, na diadia dibaadi efuku diande diantukaa mu bulungudi. Biabia, nelele luteko na ami kuenda mu mudimo wa bulungudi.” Kuakua ku nakashika Jocelyn bafumankeene na Mary, nsonguakashi baadi mukumiine kulonga Bible. Mieshi i bungi kumpala, Mary baadi muakule’shi baadi mutekie Efile Mukulu bua’shi amukuashe pa bafikile Jocelyn kukookola ku kibelo kiaye. Jocelyn p’anangushena ku uno muanda wadi mumone amba’shi: “Napushiishe nka bu Yehowa andungula’shi, ‘Ne mukukumiine.’” Mu binyibinyi, ta mbantu booso abakumiina’shi tui balungule mukandu wi buwa nya. Anka abitungu tushinkamishe’shi Yehowa asankaa nsaa y’atuikitshisha bua kulungula bangi mukandu wi buwa.

17. Muanda umone Vicky ubakulongiesha kinyi pabitale nkuulo? (Misambo 5:12)

¹⁷ Yehowa afubishaa kineemo kia nkuulo kui baaba booso baadi mukumiine. (1 Ti. 2:5, 6) Kadi bi kuikala naminyi su muishimba dietu tui na mpaka ya’shi Yehowa ta mmuitukumiine, sunga tuekala babatshishibue na tui na lukumiino mu mulambu wa nkuulo? Tentekiesha’shi, t’abitungu tukulupile mu binangu bietu atue banabene, anka abitungu tukulupile mui Yehowa. Na dingi amonaa baaba booso be na lukumiino mu mulambu wa nkuulo bu bantu balulame ku meso kuaye, na ebalaa’shi akebelela miabi. (Badika Misambo 5:12; Lom. 3:26) Kunangushena ku nkuulo nkukuashe Vicky. Dingi efuku, kunyima kuaye kunangushena ngofu pabitale nkuulo, batunduile’shi: “Yehowa mmuleeshe luishinko kuandi munda a mafuku e bungi. . . . Anka naadi nka bu alungula Yehowa’shi: ‘Tue mulombene kufula muntu bu ami.’ Mulambu wa nkuulo ya Muana oobe, ta ngilombene kubuikiila miluisho yande.” Pa babangile kunangushena ku kino kia buntu kia nkuulo, babangile kupusha’shi Yehowa mumufule. N’atue namu atupusha’shi Yehowa mmuitufule na mmuitukumiine, nka p’atunangushena ku muulo wa nkuulo.

18. Tui kuikala bashinkamishe kinyi su tua tungunuka na kufula Nshetu e muiyilu?

¹⁸ Biabia abitungu tuikitshishe bua kutumikila mianda ibatulongo mu uno muisambo, muanda ingi nsaa tui kutshoboloka na kubanga kuiyipusha su Yehowa mmuitukumiine. Su bino biakufikila, tentekiesha’shi mmukumiine “baaba abatungunuka na Kumufula.” (Yak. 1:12) Biabia, tungunuka na kuikala mu kipuano ki buwa na Yehowa na omone biadi mukukumiine. Ikala efuku dioso otentekiesha’shi Yehowa “te kula na muntu oso a kuatudi.”​—Bik. 17:27.