BIA KUBANGA MUISAMBO
DILONGIESHA 3
Ikala na kalolo
Eyi dia kulonda: “Kifulo ki na . . . kalolo.”—1 Ko. 13:4.
Kibaadi Yesu mukite
1. Tala VIDEO, sunga kubadika Yowano 9:1-7. Akupu waluule ino nkonko:
Nkinyi kibaakitshine Yesu kumpala kua kupaasha mpofu sunga kua kumulungula mukandu wi buwa.—Tala Yowano 9:35-38.
Omono naminyi, buakinyi uno muntu baadi mukumiine kuteemesha Yesu?
Nkinyi ki’atulongiela kui Yesu?
2. Muntu mulombene kuteemesha mukandu wetu su amona’shi atumupasukila.
Ambula Yesu
3. Etuule pa mbalo ya muntu. Tompa kupusha biabia bi’epusha.
Eyipushe’shi: ‘Uno muntu e kuikala ekalakasha bua muanda kinyi? Nkinyi kilombene kumukuasha na kumusankisha?’ Kukita bino akukukuasha bua kulesha muntu kalolo kashi na bu nsesa.
Lesha’shi opasukila muntu pa kumuteemesha. Su muntu bakulungula bi’epusha pabitale muanda kampanda, sunga kuakula muanda aumukalakasha, toshintulanga muisambo.
4. Akula na kalolo na kanemo. Nsaa y’opusha muntu lusa, na okumiina binyibinyi kumukuasha, ebipusha mu mushindo wakula. Sangula bishima biobe kalolo na mushindo wa kuibiakula. Tuakulanga mianda ayimufitshisha munda.
5. Mukuashe. Kimba mishindo i buwa yodi mulombene kumukuasha na kantu. Bikitshino bia kalolo mbilombene kutakula muntu bua kuituteemesha.