Stili bisedor

ZAKONISHT njerëzit ndihen rehat kur bisedojnë me miqtë. Shprehjet e tyre janë të natyrshme. Disa individë janë tipa të gjallë; disa të tjerë janë më të rezervuar. Megjithatë, natyrshmëria me të cilin shprehen njerëzit është tërheqëse.

Mirëpo, kur i afrohesh një të panjohuri, nuk është e përshtatshme të flasësh në një mënyrë që është tepër familjare ose tepër e shkujdesur. Në të vërtetë, në disa kultura të gjitha bisedat me njerëz të panjohur fillojnë në mënyrë shumë formale. Pasi t’u kesh treguar respektin e duhur, është më mirë që me aftësi dalluese të kalosh në një gjuhë më pak formale dhe stil bisedor.

Edhe kur flet nga podiumi duhet të tregohesh i kujdesshëm. Një stil që është shumë i shkujdesur mund t’ia ulë dinjitetin një mbledhjeje të krishterë dhe seriozitetin asaj që thuhet. Në disa gjuhë, kërkohen shprehje specifike kur i drejtohesh një personi të moshuar, një mësuesi, një nëpunësi ose një prindi. (Vër re termat e përdorur në Veprat 7:2 dhe 13:16) Kur i drejtohesh bashkëshortit ose një miku të ngushtë përdor shprehje të tjera. Ndonëse mënyra jonë e të folurit në podium nuk duhet të jetë tepër formale, ajo duhet të tregojë respekt.

Megjithatë, ka disa faktorë që mund ta bëjnë të folurit e dikujt të duket tepër i ngurtë ose formal. Një nga këta faktorë është ndërtimi ose formulimi i fjalisë. Problemi lind kur një orator përpiqet t’i përsëritë shprehjet pikërisht ashtu siç shfaqen në fletën e shtypur. Gjuha e shkruar është shumë e ndryshme nga gjuha e folur. Vërtet, kërkimet gjatë përgatitjes së një fjalimi bëhen zakonisht në botime. Gjithashtu ka mundësi që baza e fjalimit të jetë një skemë e shtypur. Por nëse ti i shpreh mendimet tamam siç shfaqen në fletën e shtypur ose i lexon drejtpërdrejt nga një skemë gjatë fjalimit, vështirë se të folurit e tu do të tingëllojë si një bisedë. Për të ruajtur stilin bisedor, shprehi mendimet me fjalët e tua dhe shmangi fjalitë me strukturë të ndërlikuar.

Një faktor tjetër është ndryshimi në ritëm. Në një të folur që është tepër i ngurtë dhe formal zakonisht fjalët kanë një largësi tepër të rregullt nga njëra-tjetra dhe ritmi është tepër konstant. Në bisedat normale, ritmi ndryshon dhe bëhen pauza të shpeshta me gjatësi të ndryshme.

Natyrisht, kur flet para një auditori të madh duhet ta ndërthurësh stilin bisedor të të folurit me një volum, intensitet dhe entuziazëm më të lartë, me qëllim që të të dëgjojnë me vëmendje.

Për të përdorur një stil bisedor që është i përshtatshëm për shërbimin, duhet ta bësh zakon që të flasësh mirë çdo ditë. Kjo nuk do të thotë se duhet të jesh tepër i arsimuar. Por është mirë të kultivosh zakone të foluri që do t’i bëjnë të tjerët ta dëgjojnë me respekt atë që thua. Me këtë në mendje, shqyrto nëse ke nevojë të punosh në aspektet e mëposhtme të të folurit tënd të përditshëm.

1. Shmang shprehjet që bien ndesh me rregullat e gramatikës ose që kanë prirjen të të identifikojnë me njerëzit, mënyra e jetesës së të cilëve i shpërfill normat hyjnore. Në harmoni me këshillën e Kolosianëve 3:8, shmang të folurit e ashpër ose të ndyrë. Nga ana tjetër, të folurit e natyrshëm të përditshëm nuk është i padëshirueshëm. Shprehjet e jetës së përditshme janë joformale, por përputhen me normat e pranuara të të folurit.

2. Shmang përsëritjen e vazhdueshme të të njëjtave fjalë ose të njëjtave shprehje për të shprehur çdo mendim që mund të kesh. Mëso të përdorësh fjalë që shprehin qartë atë që dëshiron të thuash.

3. Shmang përsëritjet e panevojshme, duke qartësuar në mendje atë që dëshiron të thuash; pastaj fillo të flasësh.

4. Shmang shprehinë që t’i mbytësh mendimet e mira me fjalë të shumta. Bëje zakon ta shprehësh me një fjali të thjeshtë idenë që duhet mbajtur mend.

5. Fol në një mënyrë që tregon respekt për të tjerët.