Arrestimi i Jezuit

Jezui dhe apostujt po ecnin nëpër luginën e Kidronit për të shkuar në Malin e Ullinjve. Kishte kaluar mesnata dhe hëna ishte e plotë. Kur arritën në kopshtin e Getsemanisë, Jezui u tha: «Rrini këtu dhe qëndroni vigjilentë.» Pastaj Jezui shkoi pak më tutje dhe ra në gjunjë. Shumë i tronditur, iu lut Jehovait: ‘Le të bëhet vullneti yt.’ Pas kësaj, Jehovai dërgoi një engjëll për ta inkurajuar Jezuin. Kur Jezui u kthye tek apostujt, tre prej tyre i gjeti në gjumë. Ai u tha: ‘Zgjohuni! Nuk është koha për të fjetur. Ka ardhur ora që të më dorëzojnë në duart e armiqve.’

Pas pak mbërriti Juda që ishte në krye të një turme të armatosur me shpata e hunj. Ai e dinte ku ta gjente Jezuin, sepse kishin shkuar shpesh në këtë kopsht. Juda u kishte thënë ushtarëve se do t’ua tregonte ai kush ishte Jezui. Ai shkoi drejt Jezuit e i tha: ‘Tungjatjeta, Mësues!’ Dhe më pas e puthi. Jezui ia ktheu: ‘Judë, me një puthje po më tradhton?’

Jezui bëri një hap përpara dhe pyeti turmën: «Kë po kërkoni?» Ata iu përgjigjën: «Jezuin, nazareasin.» Kur ai u tha, «unë jam», ata u sprapsën dhe ranë përtokë. Jezui i pyeti prapë: «Kë po kërkoni?» Ata iu përgjigjën përsëri: «Jezuin, nazareasin.» Jezui ua ktheu: ‘Ju thashë se jam unë. Lërini të ikin këta.’

Kur Pjetri kuptoi ç’po ndodhte, nxori një shpatë dhe i preu veshin Malkut, një skllavi të kryepriftit. Por Jezui i preku veshin dhe ia shëroi. Pastaj ai i tha Pjetrit: ‘Lëre mënjanë shpatën. Nëse lufton me shpatë, nga shpata do të vdesësh.’ Ushtarët e kapën Jezuin dhe i lidhën duart, ndërsa apostujt ia mbathën. Më pas turma e çoi Jezuin te Hanai, kreu i priftërinjve. Hanai e mori në pyetje dhe pastaj e dërgoi në shtëpinë e kryepriftit Kajafa. Por çfarë u ndodhi apostujve?