Të përballojmë sfidën e shërbimit shtëpi më shtëpi
1 Ideja për të shkuar shtëpi më shtëpi dhe për t’u bërë rivizita personave të panjohur, paraqet një sfidë të vërtetë për shumicën e atyre që ndërmarrin adhurimin e pastër. Por, dashuria e sinqertë ndaj Jehovait, ndihmon për ta mundur këtë sfidë, gjithashtu edhe personat që si natyrë janë shumë të turpshëm kanë përparuar deri në atë pikë, saqë janë bërë predikues të lajmit të mirë në shërbim të plotë kohor.
2 Nga Bibla kuptohet qartë se të krishterët e parë e njoftonin lamin e mirë nga shtëpia në shtëpi. (Veprat 5:42; 20:20, 21) Ne të krishterët e shekullit të 20-të zhvillojmë të njëjtën vepër. Dashuria që ndiejmë ndaj Perëndisë dhe ndaj të afërmve na nxit të kryejmë këtë vepër krahas indiferencës, armiqësisë, përçmimit ose kundërshtimit të hapur që mund të hasim.
3 Avantazhet e përballimit të sfidës: Sa herë që trokasim në një portë, kërkojmë të mbjellim disa fara të së vërtetës, duke ditur se e gjithë kjo mund t’i sjellë fryte Mbretërisë. (Eklis. 11:6) Rrethanat individuale ndryshojnë. Ndonjëherë të zotit të shtëpisë mund t’i ndodhë diçka që e bën të mendojë mbi atë që njëri prej jush i ka thënë kur ka trokitur në portën e tij dhe herën tjetër ai mund të tregohet më i ndjeshëm ndaj mesazhit.
4 Shërbimi ynë nga shtëpia në shtëpi, u jep atyre që kanë prirje ndaj së vërtetës dhe drejtësisë, mundësinë për të mësuar mbi Jehovain dhe qëllimet e tij, duke i ndihmuar kështu që të ecin përgjatë rrugës së jetës së përhershme. Ndërsa, atyre që janë të dhënë pas kënaqësive të botës u njoftohet dashamirësisht se duhet të ndryshojnë nëse duan aprovimin e Jehovait. Ky shërbim gjithashtu bën të njohur dhe i jep nder emrit të Jehovait, pavarësisht nëse dëgjojnë ose jo të zotët e shtëpisë.—Ezek. 3:11.
5 Shërbimi na ndihmon të kultivojmë frytet e frymës, si dashurinë vetëmohuese, gëzimin, paqen dhe shpirtmadhësinë. (Gal. 5:22) Na ndihmon që të jemi të përulur e të dhembshur, sepse nënkupton se duhet t’u bëjmë mirë të tjerëve. Të qenët të zënë në veprën e Jehovait kontribuon në të mbrojturit nga bota.—1. Kor. 15:58.
6 Ndihmë për të mundur sfidën: Të rinjtë duhet të mësojnë të kryejnë këtë vepër emocionuese. Shpesh s’ndihen të sigurt dhe ndërkaq mund të shkurajohen vetëm nga mendimi se do shkojnë nga shtëpia në shtëpi. Ne mund të shqyrtojmë me ta kundërshtimet më të zakonshme dhe se si mund t’u përgjigjemi. Mund të praktikohemi, duke përdorur disa nga sugjerimet e paraqitura tek Shërbimi ynë i Mbretërisë. Përse të mos ofroheni për të ndihmuar të rinjtë që të përgatiten për shërbimin në fushë? Pjesëmarrja e rregullt në mbledhjet e shërbimit në fushë mund t’i ndihmojë shumë, gjithashtu edhe dalja me lajmëtarë me më shumë përvojë. Duke punuar me grupin mund të forcohen shumë.
7 Ndërsa shkojmë nga shtëpia në shtëpi, kemi privilegjin të përfaqësojmë Perëndinë tonë, Jehovain. Në fakt, çfarë nderi më të madh mund të kemi, sesa të jemi bashkëpunëtorë të Perëndisë? (1. Kor. 3:9) Nëse besojmë në të, fryma e tij do të na ndihmojë që të përballojmë dhe të mundim sfidën e shërbimit nga shtëpia në shtëpi.—2. Kor. 3:5.