Nga shtëpia në shtëpi pa pushim
1 Në Izraelin e lashtë ofroheshin flijime çdo ditë. (Të Dal. 29:38-42) Zjarri në altar mbahej ndezur; tymi që ngrihej ishte «një aromë qetësuese» që i pëlqente Jehovait. (Të Dal. 29:18) Sot, ne jemi të nxitur për t’i «ofruar vazhdimisht Perëndisë një flijim lavdie, domethënë frytin e buzëve që rrëfejnë emrin e tij». (Hebr. 13:15, Dio) Në vend se të përdorim flijimet e përshkruara nga Ligji, ne e adhurojmë Jehovain duke treguar lavditë e tij pa pushim.—Isa. 43:21; Vep. 5:42.
2 Jezu Krishti, dëshmitari më i madh që ka jetuar në tokë, na mësoi se si duhet ta mbajmë adhurimin e pastër duke ofruar flijime lavdie. Ai i mësoi dishepujt e tij se mesazhi që ata predikonin ishte diçka urgjente. Ai e dinte se mënyra më e efektshme për të njohur njerëzit me lajmin e mirë, ishte të folurit personalisht me ta në shtëpitë e tyre. (Mat. 10:7, 12) Kështu ne shohim se dishepujt ndoqën drejtimin e tij të frymëzuar hyjnor për të predikuar nga shtëpia në shtëpi.—Vep. 20:20.
3 Kjo është e njëjtë me sot. Si dishepuj të Jezuit, të krishterët e vërtetë ndjekin shembullin e tij, duke predikuar lajmin e mirë nga shtëpia në shtëpi. Megjithëse mund të na kritikojnë dhe persekutojnë për këtë, miliona njerëz e kanë mësuar të vërtetën dhe qindra e mijëra dishepuj të rinj po i bashkohen radhëve të shumicës së madhe çdo vit, duke bërë të dukshëm faktin se kjo është mënyra që Jehovai përdor për të kryer vullnetin e tij. Kjo është arsyeja përse ne jemi të qëndrueshëm në shërbimin tonë.
4 Dobitë e predikimit nga shtëpia në shtëpi: «Perëndia nuk tregohet i anshëm; . . . ai që ka frikë prej tij dhe që vepron drejtësisht, është i pranuar nga ai.» (Vep. 10:34, 35, Dio) Duke shkuar drejtpërdrejt në çdo shtëpi në territorin tënd, tregon në mënyrë të qartë paanësi, duke i dhënë secilit të njëjtën mundësi për të dëgjuar rregullisht mesazhin e Mbretërisë. Me radhë ata marrin ndihmë personalisht sipas nevojave të tyre individuale.
5 Pothuajse të gjithë lajmëtarët, të rinjtë, të moshuarit si edhe ata që janë të rinj si lajmëtarë, mund të marrin pjesë në veprën nga shtëpia në shtëpi. Në këtë mënyrë, çdo njeri mund të bëjë «deklaratë publike për shpëtim». (Rom. 10:10, BR) Pjesëmarrja me të tjerët në shërbimin nga shtëpia në shtëpi na bashkon në dashuri dhe unitet. Në të njëjtën kohë, na jepet mundësia për të treguar qëndrueshmërinë tonë kur hasim indiferencë dhe kundërshtime. Kjo shpallje publike e besimit na bën «një spektakël teatral», i cili ndihmon personat e sinqertë të kuptojnë se ne kemi një rregullim të organizuar për mësimin e Biblës dhe se ata mund të përfitojnë nga ai. (1. Kor. 4:9, BR) Çdo gjë tregon qartë se Jehovai po e bekon veprën nga shtëpia në shtëpi dhe po e përdor atë për të mbledhur shumicën e madhe në «shtëpinë» e tij të adhurimit të pastër.—Isa. 2:2-4.
6 Tani më shumë se në çdo kohë tjetër të historisë, njerëzit kanë nevojë për të dëgjuar mesazhin e Mbretërisë. Le të vazhdojmë në predikimin nga shtëpia në shtëpi pa pushim, derisa Jehovai të thotë mjaft. (Isa. 6:11) Duke bërë kështu, ne do të shpërblehemi me gëzimin që vjen nga pjesëmarrja në shërbimin më të rëndësishëm dhe më të dobishëm, atë nga shtëpia në shtëpi, në këtë kohë të fundit.—1. Kor. 15:58.