Të tregojmë çmueshmëri për literaturën
1 «Bërja e shumë librave nuk ka fund.» (Eklis. 12:12) Shumë libra nuk vlejnë as sa letra mbi të cilën janë shtypur. Nuk është kështu për botimet e bëra nga Shoqata. Ato janë të çmueshme, sepse përmbajnë ushqim frymor gjallërues, që ndihmon të interesuarit të njohin Jehovain dhe forcon besimin e atyre që tashmë janë shërbëtorë të dedikuar të Jehovait.
2 Duam t’ia ofrojmë literaturën tonë të tjerëve, sepse e dimë se çfarë dobie mund të marrin. Edhe pse jepet pa paguar, prodhimi dhe shpërndarja sjell shpenzime. Prandaj nuk duam t’i shpërndajmë botimet tona në një mënyrë mbarë e mbrapsht. Nëse nuk jemi të sigurt për interesin e të zotit të shtëpisë, zakonisht i ofrojmë një numër të Kullës së Rojës ose ndoshta vetëm një fletushkë. Duhet të kthehemi të vizitojmë të gjithë ata që kanë pranuar literaturën dhe nëse në vizitë vërejmë një farë interesi, mund t’i ofrojmë ndonjë botim tjetër.
3 Disa ngurrojnë të thonë se vepra mbahet nga kontributet vullnetare, por në shumicën e rasteve është mirë ta bëjmë. Kjo i ndihmon njerëzit të kuptojnë se vepra jonë nuk është për të bërë tregti. Nxjerr në pah faktin se qëllimi është predikimi i lajmit të mirë të Mbretërisë dhe bërja e dishepujve. Na ndihmon që të dallojmë nëse ka interes të vërtetë ose jo. Shpesh njerëzit kanë para për gjëra të tilla si duhan dhe botime botërore. Nëse janë me të vërtetë të interesuar mbi atë çka u keni thënë atyre, do ta shohin të logjikshme që të kontribuojnë për të përkrahur krishterimin e vërtetë. Duke shpjeguar se si mbahet vepra jonë, tregojmë se e çmojmë literaturën. Tregojmë se e kemi kuptuar që prodhimi i saj kushton.
4 Kur argumenti i kontributeve përmendet në mënyrë korrekte, shumë nga të zotët e shtëpisë janë të gëzuar të kontribuojnë për përparimin e veprës sonë të çmuar. Mund të ketë situata ku e shohim të arsyeshme që nuk është rasti për të shpjeguar sistemin e kontributeve vullnetare, por në përgjithësi është mirë ta përmendim në vizitën fillestare nëse vërejmë se i zoti i shtëpisë është i interesuar që të lexojë botimet që ofrojmë.