Si mund të përgjigjemi?

Njerëz të të gjitha moshave në Shqipëri kërkojnë të shuajnë urinë frymore. Disa kërkojnë tek traditat fetare që ka mbajtur familja e tyre për shumë vite. Në mes tyre ka edhe shumë myslimanë të sinqertë. Kur takojmë ndonjë që thotë: «Unë jam mysliman»,—çfarë mund t’i themi?

Informacionet që vijojnë, të marra nga libri Të arsyetojmë, në faqet 23, 24 mund të na ndihmojnë për të arsyetuar me myslimanët e sinqertë.

Ja disa pika që duhet të kemi parasysh: (1) Kryesisht për ta «libër i shenjtë» është Kurani. Disa do të pranojnë se Bibla është Fjala e Perëndisë, por do të thonë se Kurani ia ka kaluar. (2) Besojnë që ekziston vetëm një Perëndi i vërtetë. (3) Thonë se Jezui ka qenë një nga profetët, si Muhameti, dhe që Muhameti (570-632 e.s.) ishte Ngushëlluesi i parathënë nga Jezui. Besojnë se Muhameti ka qenë i fundit dhe më i rëndësishmi nga profetët. (4) Besojnë me forcë se Perëndia nuk ka asnjë bir.

Ndonjëherë është e mundur vendosja e një baze të përbashkët duke proceduar si vijon: (1) Mund të thoni: «Kam ardhur të flas mbi Fjalën e Perëndisë. Ajo trajton problemet e jetës që njerëz si ju dhe si unë duhet të përballojmë dhe na tregon se cila është zgjidhja e vërtetë.» Flisni, pra, mbi Mbretërinë. (2) Gjithashtu mund të thoni: «Unë nuk besoj në Trinitetin e krishterimit. Adhuroj Perëndinë e vetëm dhe të vërtetë, Krijuesin e qiellit e të tokës.» (3) E kam gabim apo ju besoni se Jezui (apo Moisiu) ishte një profet? . . . Ishte një profet i vërtetë? . . . Atëherë ato që ka thënë vinin prej Perëndisë dhe nëse mësime të tjera nuk janë dakord me to, do të thotë se vijnë nga ndonjë burim tjetër, a nuk është kështu?» Pastaj përdorni deklarata të Jezuit (apo Moisiut) si bazë për të vazhduar bisedën.

Nëse përsëritin me forcë besimet e tyre, mund të jetë me dobi që t’i pyesni me takt për të treguar se në cilën surë (kapitull) dhe varg të Kuranit është shkruar ajo që thonë. (Prisni që të kërkojnë). Kur nuk mund ta gjejnë, disa tregohen më të gatshëm për të dëgjuar atë që u tregoni nga Bibla.

Argumente të mundshme për bisedim: (1) Pasi keni vënë një themel siç tregohet sipër, mund t’u tregoni atyre se çfarë i tha Perëndia Moisiut rreth emrit të tij personal. (Të Dalët 3:15; Ligji i përtërirë 6:5, 4) (2) Mund të përdoren informacionet e librit Të arsyetojmë (anglisht) në zërat «Fati» dhe «Vuajtjet» për të ndihmuar disa që të kuptojnë se nuk është Perëndia përgjegjës për padrejtësitë dhe vuajtjet e tyre dhe se Mbretëria e Perëndisë do t’i heqë dhimbjet përgjithmonë. (3) Nëse ju pyesin çfarë mendoni për Ngushëlluesin, mund t’u tregoni se si foli Jezui mbi të, duke treguar se nuk bëhej fjalë për një person i cili do t’u kujtonte dishepujve gjërat që u kishte mësuar Jezui dhe se nuk do të udhëhiqte drejt një feje të re. (Gjoni 14:26, NW; Veprat 1:8) (4) Nëse kundërshtojnë se Perëndia nuk mund të ketë një Bir, mund të provoni të arsyetoni kështu: Fakti që Perëndia ka një Bir nuk do të thotë se ka pasur marrëdhënie seksuale me një grua. Por, Perëndia është Krijuesi. Nga çasti që u jep jetë krijesave të tij, a nuk mund të quhet Ati i tyre? Ai flet për krijesën e tij të parë si për Birin e tij. Thërret engjëjt bij të Perëndisë dhe e quan Adamin birin e tij. Përse? Sepse u dha jetën atyre. Në ç’mënyrë Maria e ngjizi Jezuin? Jo me anë të marrëdhënieve seksuale me Perëndinë, por, siç thotë Bibla, me anë të frymës së shenjtë, të së njëjtës forcë vepruese që Perëndia përdori për të krijuar.—Mat. 3:17; 16:16, 17; Luka 1:35.

Broshura Koha për të nënshtruarit e vërtetë Perëndisë mund t’u japë një ndihmë të vërtetë myslimanëve të sinqertë për të kuptuar qëllimin e Perëndisë.