Vendos në radhë të parë gjërat më të rëndësishme
1 Cilat janë disa gjëra të rëndësishme që janë jetësore për mirëqenien tonë frymore? Këto do të përfshijnë sigurisht studimin personal, pjesëmarrjen në mbledhje, lutjet këmbëngulëse, shoqëritë e shëndetshme dhe shërbimin e krishterë. Ne nuk mund të ruajmë shëndet të mirë frymor pa mbajtur në radhë të parë gjërat e rëndësishme në jetën tonë.
2 Megjithatë, secili prej nesh bën një betejë kundër dëshirave mishore dhe ka nevojë për disiplinë. (Gal. 5:17) Kurrë nuk duhet të mendojmë se kemi për të përfituar më tepër, duke ndjekur interesat egoiste. (Jer. 17:9) Prandaj, nëse duhet të ruajmë zemrën tonë dhe të shmangim të qenët të çorientuar, vetëshqyrtimi i rregullt është vendimtar.—Prov. 4:23; 2. Kor. 13:5.
3 Shqyrto zemrën tënde: Ti mund ta bësh këtë duke i bërë vetes disa pyetje të hapura: A dëshiroj me zjarr për të lexuar Fjalën e Perëndisë? (1. Pjet. 2:2) A e vlerësoj rëndësinë e pjesëmarrjes në të gjitha mbledhjet e kongregacionit? (Hebr. 10:24, 25) A këmbëngul në lutje? (Rom. 12:12) A kërkoj shoqërinë e njerëzve që e kanë mendjen në gjërat frymore? (Rom. 1:11, 12) A ndiej një detyrim personal për të shpallur lajmin e mirë? (1. Kor. 9:16) Përgjigjet pozitive do të tregojnë se dëshiron të vendosësh në radhë të parë gjërat më të rëndësishme.
4 Shqyrto rutinën tënde të përditshme: Ti duhet të ndërmarrësh veprimet e përshtatshme pas shqyrtimit të dëshirave të zemrës sate, duke vendosur përparësi për përdorimin e kohës. Kjo përfshin programimin e kohës për leximin e rregullt të Biblës dhe çdo artikulli të Kullës së Rojës dhe Zgjohuni!, si dhe përgatitjen për mbledhjet. Duhet lënë mënjanë kohë edhe për familjen, si për të studiuar ashtu edhe për t’u lutur së bashku. Cakto një kufi se sa kohë do të kalosh para televizorit apo kompjuterit. Ji i vendosur për të marrë pjesë në të gjitha mbledhjet e kongregacionit dhe rreth tyre rregullo çdo gjë tjetër. Planifiko me tërë familjen për të marrë pjesë në shërbimin në fushë çdo javë.
5 Pa dyshim, vendosja në radhë të parë e gjërave më të rëndësishme në jetën tonë, do të jetë një shkak për gëzim.