Familje, lavdërojeni Perëndinë si pjesë e kongregacionit të tij
«Do ta bekoj Jehovain mes turmave të mbledhura.»—PSALMI 26:12, BR.
1. Cila është një pjesë e rëndësishme e adhurimit të vërtetë, përveç lutjes dhe studimit në shtëpi?
ADHURIMI i Jehovait nuk përfshin vetëm lutjen dhe studimin e Biblës në shtëpi, por edhe aktivitetin si pjesë e kongregacionit të Perëndisë. Izraelit të lashtë iu urdhërua të ‘mblidhte popullin, burra, gra, fëmijë’ që të mësonin ligjin e Perëndisë, me qëllim që të ecnin në udhën e Tij. (Ligji i përtërirë 31:12; Jozueu [Josiu] 8:35) Si të moshuarit, ashtu edhe ‘të rinjtë dhe vajzat’ ishin të inkurajuar të merrnin pjesë në lavdërimin e emrit të Jehovait. (Psalmi 148:12, 13) Rregullime të ngjashme zbatohen edhe në kongregacionin e krishterë. Nëpër Sallat e Mbretërisë kudo në tokë, burra, gra dhe fëmijë aktivizohen lirisht në pjesët që përfshijnë pjesëmarrjen e auditorit dhe shumë gjejnë kënaqësi të madhe duke bërë këtë.—Hebrenjve 10:23-25.
2. (a) Pse përgatitja është një faktor i rëndësishëm për të ndihmuar të vegjlit të kënaqen nga mbledhjet? (b) Shembulli i kujt është i rëndësishëm?
2 Është e vërtetë se, t’i ndihmosh të vegjlit që të zhvillojnë një rutinë të shëndetshme aktiviteti në kongregacion, mund të jetë një sfidë. Cili mund të jetë problemi nëse disa fëmijë që marrin pjesë në mbledhje bashkë me prindërit, duket se nuk kënaqen në to? Sigurisht, shumica e fëmijëve kanë një kohë të shkurtër përqendrimi dhe mërziten shpejt. Përgatitja mund të ndihmojë për ta përballuar këtë problem. Pa përgatitje, fëmijët nuk mund të marrin pjesë në mënyrë domethënëse në mbledhje. (Fjalët e urta [Proverbat] 15:23) Pa përgatitje, do të jetë e vështirë që ata të bëjnë përparim frymor, i cili t’u sjellë kënaqësi. (1. Timoteut 4:12, 15) Çfarë mund të bëhet? Së pari, prindërit duhet të pyesin veten nëse ata vetë përgatiten për mbledhjet. Shembulli i tyre përbën një ndikim të fuqishëm. (Luka 6:40) Gjithashtu, një faktor i rëndësishëm mund të jetë planifikimi i kujdesshëm i studimit familjar.
Të ndërtojmë zemrën
3. Gjatë studimit familjar, pse duhet bërë një përpjekje e veçantë për të ndërtuar zemrat dhe çfarë kërkon kjo?
3 Studimi familjar duhet të jetë një kohë, jo thjesht për ta mbushur kokën me njohuri, por edhe për të ndërtuar zemrën. Kjo kërkon që të jemi të vetëdijshëm për problemet që hasin pjesëtarët e familjes, si edhe të interesohemi me dashuri për secilin prej tyre. Jehovai është ‘një shqyrtues zemrash’.—1. Kronikave 29:17, BR.
4. (a) Çfarë do të thotë që një person të ketë ‘mungesë në zemër’? (b) Çfarë përfshin të ‘fitosh zemër’?
4 Çfarë gjen Jehovai kur shqyrton zemrën e fëmijëve tanë? Shumica prej tyre thonë se e duan Perëndinë dhe kjo është për t’u lavdëruar. Por, një person që është i ri ose që sapo ka filluar të mësojë rreth Jehovait, ka një përvojë të kufizuar në udhët e Jehovait. Duke qenë pa përvojë, ai mund të ketë ‘mungesë në zemër’, siç shprehet Bibla. Ndoshta jo të gjitha motivet e tij janë të këqija, por duhet kohë për ta sjellë zemrën në një gjendje që do t’i pëlqejë vërtet Perëndisë. Kjo përfshin të sjellësh mendimet, dëshirat, simpatitë, emocionet dhe synimet e jetës në harmoni me atë që miraton Perëndia, në masën që është e mundur për njerëzit e papërsosur. Kur një person e bën këtë modelim në njeriun e tij të brendshëm në mënyrë hyjnore, ai po ‘fiton zemër’.—Proverbat (Fjalët e urta) 9:4; 19:8, BR.
5, 6. Si mund t’i ndihmojnë prindërit fëmijët e tyre, që të ‘fitojnë zemër’?
5 A mund t’i ndihmojnë prindërit fëmijët e tyre, që të ‘fitojnë zemër’? Është e vërtetë se asnjë njeri nuk mund të vërë një gjendje të mirë zemre brenda një personi tjetër. Secili prej nesh është i pajisur me vullnet të lirë dhe shumë gjëra varen nga ajo që ne i lejojmë vetes të mendojmë. Gjithsesi, duke përdorur aftësi shquese, prindërit mund t’i inkurajojnë fëmijët të flasin, duke mësuar se çfarë kanë ata në zemër dhe ku nevojitet ndihmë. Përdorni pyetje të tilla, si: ‘Çfarë mendon për këtë?’ dhe ‘Çfarë do të të pëlqente në të vërtetë të bëje?’ Pastaj, dëgjoni me durim. Mos e teproni në reagimin ndaj tyre. (Fjalët e urta 20:5) Një atmosferë dashamirësie, mirëkuptimi dhe dashurie është e rëndësishme, nëse dëshironi të arrini zemrën e fëmijëve.
6 Për të përforcuar prirjet e shëndetshme, trajtojini shpesh frytet e frymës, duke marrë veç e veç çdo aspekt dhe punoni së bashku si familje për t’i kultivuar ato. (Galatasve 5:22, 23) Ndërtoni dashurinë për Jehovain dhe për Jezu Krishtin, jo thjesht duke thënë se duhet t’i duam ata, por duke trajtuar arsyet se përse i duam dhe si mund ta shprehim këtë dashuri. (2. Korintasve 5:14, 15) Forconi dëshirën për të bërë atë që është e drejtë, duke arsyetuar mbi dobitë që do të vijnë si rezultat. Ndërtoni dëshirën për të shmangur mendimet, të folurin dhe sjelljen e gabuar, duke diskutuar mbi pasojat e këqija të këtyre gjërave. (Amosi 5:15; 3. Gjonit 11) Tregoni se si mendimet, i foluri dhe sjellja, qofshin të mira ose të këqija, mund të ndikojnë në marrëdhënien e një personi me Jehovain.
7. Çfarë mund të bëhet për t’i ndihmuar fëmijët që të përballojnë problemet dhe të marrin vendime në një mënyrë që do t’i mbajë të lidhur ngushtë me Jehovain?
7 Kur një fëmijë ka një problem ose duhet të marrë një vendim të rëndësishëm, mund ta pyesim: ‘Çfarë mendon, si e konsideron Jehovai këtë? Çfarë di për Jehovain që të shtyn të përgjigjesh kështu? A i je lutur atij për këtë gjë?’ Duke filluar sa më shpejt që të jetë e mundur, ndihmojini fëmijët që të ndërtojnë një model jete, duke bërë gjithnjë përpjekje të zellshme që të sigurohen për vullnetin e Perëndisë dhe ta kryejnë atë. Dora-dorës që arrijnë të kenë një marrëdhënie të ngushtë, personale me Jehovain, ata do të gjejnë kënaqësi në ecjen në shtigjet e tij. (Psalmi 119:34, 35) Kjo do të ndërtojë brenda tyre çmueshmërinë për privilegjin e shoqërimit me kongregacionin e Perëndisë së vërtetë.
Përgatitja për mbledhjet e kongregacionit
8. (a) Çfarë mund të na ndihmojë që të përfshijmë në studimin familjar të gjitha gjërat që meritojnë vëmendje? (b) Sa i rëndësishëm është ky studim?
8 Gjatë studimit familjar ka shumë aspekte që kërkojnë vëmendje. Si t’ia bëni për t’i trajtuar që të gjitha? Është e pamundur të bëhet çdo gjë në të njëjtën kohë. Por, mund t’ju duket e dobishme të bëni një listë të këtyre gjërave. (Fjalët e urta 21:5) Kohë pas kohe, rishikojeni listën dhe shqyrtoni se çfarë meriton një vëmendje të veçantë. Interesohuni për përparimin e çdo pjesëtari të familjes. Rregullimi i studimit familjar është një pjesë e rëndësishme e arsimimit të krishterë, duke na pajisur për jetën tani dhe duke na përgatitur për jetën e përjetshme që do të vijë.—1. Timoteut 4:8.
9. Mbi cilat synime që kanë të bëjnë me përgatitjen në mbledhje mund të punojmë gradualisht në studimin familjar?
9 A përfshin studimi juaj familjar përgatitjen për mbledhjet e kongregacionit? Ndërsa studioni së bashku, mund të punoni progresivisht mbi një numër projektesh. Disa prej këtyre projekteve mund të duan javë, muaj ose edhe vite për t’u arritur. Shqyrtoni këto synime: (1) secili në familje të jetë gati për të komentuar në mbledhjet e kongregacionit; (2) secili të bëjë përpjekje për të dhënë komente me fjalët e veta; (3) në komente të përfshihen edhe shkrimet dhe (4) të analizohet materiali, duke i bërë një zbatim personal. Që të gjitha këto mund ta ndihmojnë një individ që ta bëjë të tijën të vërtetën.—Psalmi 25:4, 5.
10. (a) Si mund t’i kushtojmë vëmendje secilës nga mbledhjet e kongregacionit? (b) Pse ia vlen të kushtohet vëmendje në mbledhje?
10 Edhe nëse studimi familjar bazohet zakonisht në artikullin e javës, marrë nga Kulla e Rojës, mos e nënvlerësoni rëndësinë e përgatitjes individualisht ose familjarisht për Studimin e Librit të Kongregacionit, për Shkollën e Shërbimit Teokratik dhe për Mbledhjen e Shërbimit. Edhe këto janë pjesë të rëndësishme të programit që na mëson të ecim në udhën e Jehovait. Herë pas here mund të jeni në gjendje të përgatiteni për mbledhjet si familje. Duke punuar së bashku, do të përmirësoni aftësitë e studimit. Si rezultat, do të përfitoni më shumë nga vetë mbledhjet. Ndër të tjera, trajtoni dobitë e përgatitjes së rregullt për këto mbledhje dhe rëndësinë për të pasur një kohë të përcaktuar, të lënë mënjanë për të studiuar.—Efesianëve 5:15-17.
11, 12. Çfarë dobie do të kemi nga përgatitja për këngët që këndohen në kongregacion dhe si mund të bëhet kjo përgatitje?
11 Në Kongreset «Udha hyjnore e jetës», u inkurajuam edhe për t’u përgatitur në një aspekt tjetër të mbledhjeve tona: për këngët. A i keni ndjekur ato sugjerime? Bërja e kësaj mund të ndihmojë për t’i ngulitur të vërtetat biblike në mendje e në zemër dhe në të njëjtën kohë për të rritur gëzimin tonë prej mbledhjeve të kongregacionit.
12 Përgatitja që përfshin leximin dhe trajtimin e domethënies së fjalëve në disa nga këngët e programuara, mund të na ndihmojë që të këndojmë me gjithë zemër. Në Izraelin e lashtë, instrumentet muzikore përdoreshin shumë në adhurim. (1. Kronikave 25:1; Psalmi 28:7) A ka ndonjë në familje që i bie një instrumenti muzikor? Pse të mos e përdorni atë instrument, që të praktikoni një nga këngët e Mbretërisë për javën dhe pastaj ta këndoni atë familjarisht? Një mundësi tjetër është përdorimi i kasetave me muzikën e regjistruar të këngëve. Në disa vende, vëllezërit këndojnë bukur edhe pa u shoqëruar nga muzika. Duke ecur në rrugë ose duke u marrë me punë nëpër fusha, atyre shpesh u pëlqen të këndojnë këngët që janë programuar për mbledhjet e kongregacionit atë javë.—Efesianëve 5:19.
Përgatitje si familje për shërbimin në fushë
13, 14. Pse janë të vlefshme diskutimet familjare që e përgatitin zemrën tonë për shërbimin në fushë?
13 Një pjesë e rëndësishme e jetës sonë është që t’u dëshmojmë të tjerëve për Jehovain dhe për qëllimin e tij. (Isaia 43:10-12; Mateu 24:14) Të rinj a të moshuar, ne kënaqemi më shumë në këtë aktivitet dhe kemi më shumë rezultat, nëse jemi të përgatitur. Si mund ta bëjmë këtë brenda familjes?
14 Ashtu si në të gjitha gjërat që përfshihen në adhurimin tonë, është e rëndësishme të përgatitim zemrën. Duhet të diskutojmë, jo vetëm se çfarë do të bëjmë, por edhe pse do ta bëjmë. Në ditët e mbretit Jehozafat, njerëzve iu mësua ligji hyjnor, por Bibla na thotë se ata «nuk e kishin përgatitur ende zemrën e tyre». Kjo gjë i la të pambrojtur ndaj ngacmimeve që mund t’i largonin nga adhurimi i vërtetë. (2. Kronikave 20:33; 21:11, BR) Synimi ynë nuk është që thjesht të jemi në gjendje të raportojmë orët që kemi kaluar në shërbimin në fushë, as nuk është thjesht lënia e literaturës. Shërbimi ynë duhet të jetë një shprehje e dashurisë që kemi për Jehovain dhe për njerëzit, të cilët kanë nevojë t’u jepet rasti për të zgjedhur jetën. (Hebrenjve 13:15) Është një aktivitet në të cilin jemi «bashkëpunëtorë të Perëndisë». (1. Korintasve 3:9) Çfarë privilegji! Ndërsa marrim pjesë në shërbim, ne bashkëpunojmë me engjëjt e shenjtë. (Zbulesa 14:6, 7) Nuk mund të ketë një kohë më të mirë për të ndërtuar çmueshmërinë për këtë shërbim sesa në diskutimet familjare, qoftë në studimin javor, qoftë kur trajtojmë një shkrim nga broshura Të shqyrtojmë Shkrimet çdo ditë.
15. Kur mund të përgatitemi për shërbimin në fushë si familje?
15 A përdor kohë herë pas here në studimin familjar, për të ndihmuar pjesëtarët e familjes që të përgatiten për shërbimin në fushë, për javën? Kjo mund të jetë një gjë shumë e dobishme. (2. Timoteut 2:15) Mund të ndihmojë për ta bërë shërbimin e tyre domethënës dhe frytdhënës. Me raste, mund të lësh mënjanë një studim të tërë, për të bërë këtë përgatitje. Më shpesh, mund t’i trajtoni aspektet e shërbimit në fushë gjatë diskutimeve më të shkurtra në përfundim të studimit familjar ose në ndonjë kohë tjetër gjatë javës.
16. Diskutoni për vlerën e secilit prej hapave të radhitur në paragraf.
16 Diskutimet familjare mund të përqendrohen mbi një seri hapash, si këto që vijojnë: (1) Përgatitni një prezantim të menduar me kujdes që përfshin një shkrim nga Bibla për ta lexuar nëse e lejojnë mundësitë. (2) Sigurohuni që secili të ketë, nëse është e mundur, çantën e tij të shërbimit, një Bibël, një bllok shënimesh, një laps ose stilolaps, fletushka dhe literaturë tjetër që është në gjendje të mirë. Çanta e shërbimit nuk duhet të jetë medoemos e kushtueshme, por duhet të jetë e pastër dhe e rregullt. (3) Diskutoni se ku dhe si mund të bëni dëshmi joformale. Ndiqeni secilën fazë të këtij diskutimi me periudha, gjatë të cilave punoni së bashku në shërbimin në fushë. Ofroni sugjerime të dobishme, por mos jepni këshilla mbi shumë pika.
17, 18. (a) Çfarë lloj përgatitjeje si familje mund të ndihmojë për ta bërë shërbimin në fushë më frytdhënës? (b) Cilat aspekte të kësaj përgatitjeje mund të bëhen çdo javë?
17 Një pjesë kryesore e veprës që Jezu Krishti u caktoi ithtarëve të tij është bërja e dishepujve. (Mateu 28:19, 20) Bërja e dishepujve përfshin më shumë sesa predikimin. Ajo kërkon që t’i mësojmë ata. Si mund t’ju ndihmojë studimi familjar që të jeni të efektshëm në këtë vepër?
18 Si familje, diskutoni se kujt do të jetë mirë t’i bëhet rivizitë. Disa prej tyre mund të kenë pranuar literaturë, kurse disa të tjerë ndoshta thjesht kanë dëgjuar. Mund t’i keni takuar ata në veprën nga shtëpia në shtëpi ose në dëshminë joformale në treg a në shkollë. Lini që Fjala e Perëndisë t’ju udhëheqë. (Psalmi 25:9; Ezekieli 9:4) Vendosni se kë dëshiron të vizitojë secili prej jush atë javë. Për çfarë do të flitni? Diskutimi familjar mund ta ndihmojë secilin pjesëtar që të përgatitet. Mbani shënim shkrimet specifike për t’ua lexuar të interesuarve, si edhe pika të përshtatshme nga broshura Çfarë kërkon Perëndia prej nesh? ose nga libri Njohuria që të çon në jetën e përhershme. Mos u përpiqni të trajtoni shumë gjëra në një rivizitë. Lërini të zotit të shtëpisë një pyetje, së cilës do t’i jepni përgjigje në rivizitën tjetër. Përse të mos e bëni pjesë të rutinës javore familjare planifikimin se çfarë rivizitash do të bëjë secili, kur do t’i bëjë dhe çfarë shpreson të arrijë? Kjo mund të ndihmojë për ta bërë shërbimin në fushë të të gjithë familjes më frytdhënës.
Vazhdoni t’u mësoni udhën e Jehovait!
19. Nëse duam që pjesëtarët e familjes të vazhdojnë të ecin në udhën e Jehovait, çfarë duhet të provojnë ata dhe çfarë kontribuon në këtë?
19 Të jesh kryefamiljar në këtë botë të ligë është një sfidë. Satanai dhe demonët e tij përpiqen të shkatërrojnë gjendjen frymore të shërbëtorëve të Jehovait. (1. Pjetrit 5:8) Për më tepër, sot ka shumë presione mbi ju, prindër, e sidomos mbi ju, prindër të vetëm. Është e vështirë të gjendet koha për të bërë të gjitha gjërat që do të dëshironi të bëni. Por ia vlen barra qiranë, edhe sikur të keni mundësi të zbatoni një sugjerim për çdo herë dhe gradualisht të përmirësoni programin e studimit familjar. Të shohësh njerëzit e tu më të afërt tek ecin me besnikëri në udhën e Jehovait është një shpërblim që të ngroh zemrën. Për të ecur me sukses në udhën e Jehovait, pjesëtarët e familjes duhet të gjejnë gëzim në mbledhjet e kongregacionit dhe në pjesëmarrjen në shërbimin në fushë. Që të ndodhë kjo, kërkohet përgatitje, përgatitje që ndërton zemrën dhe që e pajis secilin për të pasur një pjesëmarrje domethënëse.
20. Çfarë mund t’i ndihmojë më shumë prindërit që të përjetojnë llojin e gëzimit të shprehur në 3 Gjonit 4?
20 Duke folur për ata që kishte ndihmuar nga ana frymore, apostulli Gjon tha: «Nuk ka gëzim më të madh nga ky, të dëgjoj se bijtë e mi ecin në të vërtetën.» (3. Gjonit 4) Studimet familjare që drejtohen me objektiva të qarta në mendje dhe kryefamiljarët, të cilët i trajtojnë nevojat individuale të pjesëtarëve të familjes me butësi e në një mënyrë që sjell dobi, mund të bëjnë shumë që familja të marrë pjesë në këtë gëzim. Duke kultivuar çmueshmëri për udhën hyjnore të jetës, prindërit po e ndihmojnë familjen e tyre që të gëzojë udhën më të mirë të jetës.—Psalmi 19:7-11.
A mund të shpjegosh?
◻ Pse përgatitja për mbledhje është kaq e rëndësishme për fëmijët tanë?
◻ Si mund t’i ndihmojnë prindërit fëmijët e tyre, që të ‘fitojnë zemër’?
◻ Si mund të ndihmojë studimi familjar në përgatitjen për të gjitha mbledhjet?
◻ Si mund të na ndihmojë përgatitja si familje për shërbimin në fushë, për të qenë më të efektshëm?
[Figura në faqen 20]
Studimi juaj familjar mund të përfshijë përgatitjen për mbledhjet e kongregacionit
[Figura në faqen 21]
Praktikimi për këngët në mbledhje është i dobishëm