Bibla: Udhëheqja e Perëndisë për të gjithë njerëzit
1 Një sasi e llogaritur prej katër miliardë Biblash janë shtypur në më shumë se 2100 gjuhë dhe dialekte, duke e vënë Fjalën e Perëndisë në dispozicion të mbi 90 përqind të popullsisë së tokës. E megjithatë, në botë ekziston një uri «për të dëgjuar fjalët e Jehovait». (Amo. 8:11, BR) Shumë njerëz që kanë një kopje të Biblës ose nuk e lexojnë atë, ose nuk kuptojnë përmbajtjen e saj. Si mund t’i nxitim ata që ta përdorin Biblën si një udhëheqje praktike në jetën e tyre?
2 Në dhjetor ne do të ofrojmë librin me titull Libri im i tregimeve biblike. Aty ku gjejmë interes, mund ta përdorim këtë libër, me qëllim që të nxitim interesin e personave ndaj Fjalës së Perëndisë. Ne do të tregojmë çmueshmërinë tonë të thellë për këtë dhuratë nga Jehovai, duke ndihmuar të tjerët në mënyrë entuziaste që të pranojnë Biblën si udhëheqjen e Perëndisë për të gjithë njerëzit.
3 Mund të hysh me një prezantim, duke përdorur fletushkën «Përse mund të kesh besim në Bibël?». Mund të thuash:
◼ «Edhe pse Bibla është në dispozicion të mbi 90 përqind të popullsisë botërore, pak njerëz e lexojnë atë rregullisht. Cila mendoni ju se është arsyeja?» Lexo dy paragrafët e parë të fletushkës bashkë me 2. Timoteut 3:16. Ofro librin Libri im i tregimeve biblike. Nëse libri pranohet, përmend rregullimin e kontributeve. Nëse libri refuzohet, kërkoji të zotit të shtëpisë të lexojë pjesën tjetër të fletushkës. Thekso nëntitullin e fundit «Parathotë të ardhmen».
4 Kur rikthehesh te njerëzit, të cilëve u ke lënë fletushkën «Përse mund të kesh besim në Bibël?», mund të provosh këtë:
◼ Pasi të prezantohesh përsëri, lexo dy paragrafët e fundit të fletushkës. Pyet të zotin e shtëpisë nëse ai e kishte konsideruar ndonjëherë mundësinë për të jetuar përgjithmonë në tokë. Pasi të përgjigjet, thuaj: «Dëshmitarët e Jehovait janë të sigurt se të gjitha profecitë që gjenden në Bibël do të përmbushen, duke përfshirë ato që parathonë një të ardhme të mrekullueshme për të gjithë njerëzit që plotësojnë kërkesat e Perëndisë.» Trego ilustrimin në faqen 13 të broshurës Çfarë kërkon?, kthehu në mësimin 5 dhe ofro një bisedë mbi përgjigjet e pyetjeve të renditura, duke filluar kështu një studim.
5 Në territorin ku njerëzit janë fetarë, mund të provosh këtë hyrje fillestare:
◼ «Po inkurajojmë një respekt më të madh për Biblën. Shumë familje e kanë një Bibël, por ato rrallë e përdorin atë kur janë duke kaluar probleme të rënda. A e keni vënë re këtë? [Lëre të përgjigjet.] Ndoshta ata besojnë se Bibla është jashtë kohës. Ky libër, Libri im i tregimeve biblike tregon në mënyrë të thjeshtë se si Perëndia do të zgjidhë problemet e njerëzimit në një të ardhme të afërt.» Thekso disa pika nga tregimi 114 ose 115 i librit dhe pastaj ofroje atë.
6 Kur të kthehesh te një person, të cilit i ke lënë librin «Libri im i tregimeve biblike», mund të thuash:
◼ «Kur ju vizitova së fundi, biseduam se si Bibla tregon zgjidhjen e problemeve të njerëzimit. Ata që e kanë pranuar atë si Fjalën e Perëndisë kanë qenë, gjithashtu, të ndihmuar për të bërë një jetë më të lumtur, më të kënaqshme. Do të doja t’ju tregoja se çfarë mësoi Jezui në lidhje me këtë shpresë, siç tregohet në librin që ju lashë.» Trajto tregimin 91. Nëse tregohet interes, ofro një studim ose me librin Njohuria, ose me broshurën Çfarë kërkon?.
7 Prezantimi që vijon mund t’u interesojë personave të moshuar:
◼ «Kishte një kohë kur Bibla lexohej në shumicën e shtëpive dhe kur familjet jetonin sipas parimeve të saj. A ishte kështu në familjen ku ju jeni rritur? [Lëre të përgjigjet.] Sot, duket se shumë veta janë tepër të shpërqendruar për t’i kushtuar kohë leximit të Biblës. Ky libër me titull Libri im i tregimeve biblike, me një gjuhë të thjeshtë dhe me shumë ilustrime të bukura, ndihmon për të njohur përmbajtjen e Biblës dhe shpresën që na jep për të ardhmen. Vëreni tregimin 71. (Komento disa aspekte të këtij tregimi.) Nëse do t’ju pëlqente ta lexonit këtë libër, do të jem i lumtur t’jua lë.»
8 Në rivizitë mund të thuash:
◼ «Kur folëm herën e fundit, ramë dakord se parimet morale të Biblës po injorohen në shoqërinë e sotme. A duhet të na shqetësojë ne kjo mospërfillje? [Lëre të përgjigjet.] Jezu Krishti i dha një vlerë të madhe marrjes së njohurisë biblike.» Lexo Gjonin 17:3. Pastaj trajto paragrafin 5 të kapitullit 1 në librin Njohuria. Shpjego programin tonë të studimit biblik pa pagesë në shtëpi dhe ofro t’ia demonstrosh këtë.
9 Lutu që Jehovai të të bekojë në të gjitha përpjekjet për t’ua kthyer vëmendjen të tjerëve drejt Biblës: Udhëheqjes së Perëndisë për të gjithë njerëzit.