T’u mësojmë të tjerëve gjuhën e kulluar
1 Ndonëse vijnë nga shumë ‘kombe, fise, popuj dhe gjuhë’, Dëshmitarët e Jehovait janë një popull i bashkuar, një vëllazëri e vërtetë ndërkombëtare. (Zbul. 7:9) Në botën e sotme të përçarë, kjo është e jashtëzakonshme. Si është i mundur një unitet i tillë? Është i mundur, sepse na është ‘ndryshuar gjuha në një gjuhë të kulluar’.—Sof. 3:9, BR.
2 Rezultate të mrekullueshme: Çfarë është kjo gjuhë e kulluar? Është kuptueshmëria e saktë e së vërtetës që gjendet në Fjalën e Perëndisë për sa i përket Jehovait dhe qëllimeve të tij, e në veçanti e vërteta për Mbretërinë e Perëndisë. Siç e paratha Jezui, kjo e vërtetë po shpërndahet nëpërmjet një kanali të dukshëm tokësor, ‘skllavit të besueshëm e të matur’. Si rrjedhim, njerëz «nga të gjitha gjuhët e kombeve» po e përqafojnë adhurimin e vërtetë.—Mat. 24:45; Zak. 8:23.
3 Kur mësojnë gjuhën e kulluar, njerëzit nxiten që ta vënë jetën e tyre në harmoni me normat e Jehovait. Mësojnë të jenë «të bashkuar siç duhet në të njëjtën mendje dhe në të njëjtën linjë mendimi». (1 Kor. 1:10) Mësimi hyjnor sjell tek ata si rrjedhim edhe një sjellje të ndershme, si edhe të folur të shëndoshë e të vërtetë, sidomos kur bëhet fjalë për t’u thënë të tjerëve lajmin e mirë. (Titit 2:7, 8; Hebr. 13:15) Këto ndryshime të mrekullueshme i sjellin nder Jehovait.
4 Për shembull, një burrë të cilit iu dha lajmi i mirë kishte shumë pyetje dhe për të gjitha mori përgjigje nga Bibla. I prekur nga ajo që dëgjoi, ai filloi të studionte dy herë në javë dhe të ndiqte mbledhjet. Mirëseardhja e ngrohtë që iu bë në Sallën e Mbretërisë e habiti, duke qenë se shumë të pranishëm ishin të një race tjetër. Brenda pak kohe, ai dhe gruaja e tij bënë ndryshime në jetën e tyre dhe u pagëzuan. Që atëherë, ai ka ndihmuar rreth 40 të tjerë që t’i shërbejnë Jehovait, duke përfshirë këtu edhe shumë familjarë të tij. Ndonëse vuan nga një paaftësi fizike, kohët e fundit ai filloi shërbimin si pionier.
5 Të mësojmë të tjerët: Ngjarjet botërore po i shtyjnë shumë njerëz të ndershëm që të rishqyrtojnë mendimet dhe jetën e tyre. Ashtu si Jezui, dëshira jonë duhet të jetë që t’i ndihmojmë ata. Rivizitat dhe studimet biblike të efektshme janë një çelës për t’i ndihmuar njerëzit e sinqertë që të mësojnë gjuhën e kulluar.
6 Një mënyrë që ka dalë e efektshme te njerëzit që janë të zënë me punë është të drejtojmë shkurtimisht një studim biblik te dera e shtëpisë së tyre. (km 5/02 f. 1) A e ke provuar këtë? Kur përgatitesh për të bërë një rivizitë, zgjidh nga shtojca e Shërbimi ynë i Mbretërisë të janarit 2002 një prezantim që i përshtatet të zotit të shtëpisë. Shumë prezantime në këtë shtojcë janë përgatitur që të çojnë drejtpërdrejt në një trajtim të broshurës Çfarë kërkon? ose të librit Njohuria. Praktikoje prezantimin, në mënyrë që të kalosh pa problem nga hyrja te trajtimi i një paragrafi. Zgjidh nga paragrafi një ose dy shkrime që t’i lexosh e që t’i trajtosh dhe formulo një pyetje për të mbyllur bisedën. Kjo do të të çojë në paragrafin që planifikon të trajtosh në vizitën e ardhshme.
7 Populli i Jehovait po provon shumë bekime ngaqë ka mësuar gjuhën e kulluar. Le t’i ndihmojmë me zell të tjerët që të bashkohen me ne ‘për të thirrur emrin e Jehovait’ dhe ‘për t’i shërbyer atij sup më sup’.—Sof. 3:9, BR.