Cilësia më e rëndësishme e një mësuesi të mirë
1. Cila është cilësia më e rëndësishme e një mësuesi të mirë?
1 Çfarë është ajo që e bën dikë një mësues të mirë të Biblës? Arsimimi? Përvoja? Dhuntia? Në fakt, është cilësia që përmbush Ligjin, që identifikon dishepujt e Jezuit dhe cilësia më mbizotëruese dhe më tërheqëse e cilësive kryesore të Jehovait. (Gjoni 13:35; Gal. 5:14; 1 Gjon. 4:8) Kjo cilësi është dashuria. Mësuesit e mirë tregojnë dashuri.
2. Pse është shumë e rëndësishme që t’i duam njerëzit?
2 T’i duam njerëzit: Mësuesi i Madh, Jezui, tregoi dashuri për njerëzit dhe kjo i shtynte ta dëgjonin. (Luka 5:12, 13; Gjoni 13:1; 15:13) Nëse i duam njerëzit, do të shfrytëzojmë çdo mundësi për t’u dhënë dëshmi. Pengesat, si përndjekja dhe indiferentizmi, nuk do të na sprapsin. Do të tregojmë interes të sinqertë për ata të cilëve u predikojmë dhe do t’i përshtatim prezantimet duke pasur parasysh se çfarë i shqetëson. Do të jemi të gatshëm të japim nga koha jonë jo vetëm kur bëjmë studimin me çdo student biblik, por edhe kur përgatitemi paraprakisht për studimin me ta.
3. Si do të na ndihmojë në shërbim dashuria për të vërtetat biblike?
3 T’i duam të vërtetat biblike: Jezui kishte dashuri edhe për të vërtetat biblike dhe i konsideronte si thesar. (Mat. 13:52) Nëse e duam të vërtetën, do të flasim me entuziazëm dhe ky entuziazëm do të jetë ngjitës edhe për ata që na dëgjojnë. Një dashuri e tillë do të na ndihmojë të përqendrohemi te njohuritë e çmuara që po përçojmë dhe jo te kufizimet tona, kështu që do të kemi më pak ankth në shërbim.
4. Si mund të zhvillojmë dashuri për njerëzit?
4 Të zhvillojmë dashurinë: Si mund të zhvillojmë dashuri për njerëzit? Duke menduar thellë për dashurinë që kanë treguar Jehovai dhe Biri i tij dhe për gjendjen e mjerë frymore të njerëzve në territor. (Mar. 6:34; 1 Gjon. 4:10, 11) Dashuria për të vërtetat biblike do të thellohet gjatë studimit të rregullt personal dhe meditimit. Dashuria është një aspekt i frytit të frymës. (Gal. 5:22) Prandaj mund t’i lutemi Jehovait për frymë të shenjtë dhe që të na ndihmojë të rritim dashurinë. (Luka 11:13; 1 Gjon. 5:14) Pavarësisht nga arsimimi, përvoja në të vërtetën apo dhuntitë që kemi, mund të jemi mësues biblik të efektshëm nëse tregojmë dashuri.