Si ta përdorim broshurën Një lajm i mirë nga Perëndia?
Broshura e re na ndihmon të bëjmë rivizita dhe të fillojmë studime biblike
1. Cila broshurë e re që doli në Kongresin Krahinor «Ruaj zemrën!» është përgatitur enkas për të bërë vizita dhe për të filluar studime biblike?
1 Gjatë Kongresit Krahinor «Ruaj zemrën!» u gëzuam shumë kur morëm broshurën e re që do të na ndihmojë të bëjmë rivizita dhe të fillojmë studime biblike. Broshura Një lajm i mirë nga Perëndia zëvendëson Çfarë kërkon? Edhe broshura e re ka mësime të përmbledhura. Falë kësaj mund ta përdorim me efektshmëri kur drejtojmë studime te dera. Broshura Çfarë kërkon? shpjegon kërkesat për të krishterët, të cilat mund të jenë të vështira për t’u pranuar nga studentët e rinj. Kurse broshura e re përqendrohet te lajmi i mirë që gjendet në Bibël.—Vep. 15:35.
2. Pse u botua broshura Lajm i mirë?
2 Pse u botua? Vëllezërit përreth botës kanë kërkuar diçka të thjeshtë që mund t’i tërheqë njerëzit drejt së vërtetës dhe që mund t’i drejtojë te libri Çfarë mëson vërtet Bibla?, mjeti ynë kryesor për të filluar studime biblike. Personat që stepen nga librat, zakonisht janë më të gatshëm të studiojnë Biblën me një broshurë. Për më tepër, një broshurë është më e lehtë të përkthehet në shumë gjuhë.
3. Si ndryshon kjo broshurë nga botimet e tjera për studim?
3 Si është organizuar: Shumë nga botimet tona për studim, janë shkruar në mënyrë që dikush ta lexojë dhe ta kuptojë të vërtetën pa i ndihmuar kush. Ky botim është ndryshe. Është shkruar si një udhëzues për studimin e Biblës me ndihmën e një mësuesi. Prandaj, kur ia ofrojmë dikujt është mirë të shqyrtojmë me të një ose dy paragrafë. Paragrafët janë të shkurtër, kështu që mund të trajtohen me dikë edhe te dera ose te vendi i tij i punës. Edhe pse mësimi i parë është i përshtatshëm për të filluar, mund ta nisim studimin me cilindo prej mësimeve të tjera të broshurës.
4. Si na ndihmon broshura t’i mësojmë të tjerët drejtpërdrejt nga Bibla?
4 Në mjaft prej botimeve tona, përgjigjet e pyetjeve gjenden në paragrafë. Por, në këtë botim përgjigjet gjenden kryesisht në Bibël. Shumë duan të mësojnë nga Bibla, jo nga botimet tona. Ja pse nuk është cituar thuajse asnjë nga shkrimet e përmendura. Ato duhen lexuar direkt nga Bibla. Kjo i ndihmon studentët të kuptojnë se ajo që po mësojnë vjen nga Perëndia.—Isa. 54:13.
5. Pse duhet të përgatitet mirë drejtuesi i studimit sa herë bën studimin me dikë?
5 Broshura nuk i shpjegon të gjitha shkrimet. Pse? Është bërë posaçërisht që t’i nxitë studentët të bëjnë pyetje dhe t’i japë mundësi drejtuesit të studimit të përdorë aftësitë e mësimdhënies. Kështu që është e rëndësishme të përgatitemi mirë sa herë bëjmë studimin me dikë. Por, të kemi kujdes të mos flasim tepër. Na pëlqen shumë t’i shpjegojmë shkrimet. Por shpesh, ka më shumë dobi kur i ftojmë studentët të shpjegojnë si e kuptojnë shkrimin. Duke bërë pyetje me takt mund t’i ndihmojmë të arsyetojnë e të kapin domethënien e çdo vargu.—Vep. 17:2.
6. Si ta përdorim broshurën: (a) kur njerëzit dyshojnë për Perëndinë dhe Biblën, (b) kur predikojmë shtëpi më shtëpi, (c) kur përdorim metodën e drejtpërdrejtë për të filluar studime biblike, (ç) kur bëjmë rivizita?
6 Si botimet e tjera për studimin e Biblës, edhe kjo broshurë mund të ofrohet në çdo kohë, pavarësisht nga oferta e muajit. Shumë do të kënaqen kur të përdorin metodën e drejtpërdrejtë për të filluar studime te dera me këtë broshurë. Gjithashtu, siç u tha edhe në kongresin krahinor, broshura «mund t’i bëjë vërtet të këndshme rivizitat» me ata që kanë shfaqur interes.—Shihni kutitë në faqet 5-7.
7. Si mund të drejtojmë një studim biblik me këtë broshurë?
7 Si ta drejtojmë studimin: Mund ta fillojmë duke lexuar pyetjen me numër e me shkronja të zeza. Pastaj, lexojmë paragrafin dhe shkrimin a shkrimet me të pjerrëta. Me takt, bëjmë pyetje që e ndihmojnë të zotin e shtëpisë të kuptojë shkrimin. Dhe para se të kalojmë te pyetja tjetër, i kërkojmë atij t’i përgjigjet pyetjes me shkronja të zeza për t’u siguruar që e ka kuptuar. Në vizitat e para është më mirë të shqyrtojmë vetëm një nga pyetjet me shkronja të zeza. Me kalimin e kohës, mund të arrijmë ta trajtojmë njëherësh të gjithë mësimin.
8. Çfarë është mirë të themi para se të lexojmë një shkrim dhe pse?
8 Shkrimet e përmendura që i përgjigjen më drejtpërdrejt pyetjes me shkronja të zeza, janë shkrimet e cilësuara «lexo». Para se të lexojmë një varg, të shmangim shprehjet: «Apostulli Pavël shkroi» ose «Shiko çfarë ka parathënë Jeremia». I zoti i shtëpisë mund të mendojë se po i lexojmë thjesht fjalë njerëzish. Do të ishte më e përshtatshme të thoshim: «Fjala e Perëndisë thotë» ose «Shiko çfarë ka parathënë Bibla».
9. A duhen lexuar të gjitha shkrimet e përmendura gjatë studimit?
9 A duhet t’i lexojmë të gjitha shkrimet apo vetëm ato me fjalën «lexo» përpara? Varet nga rrethanat. Asnjë nga shkrimet nuk është vënë në tekst pa arsye. Secili prej tyre ka informacione që ia vlen të diskutohen. Por në disa raste, kur studenti nuk ka shumë kohë, interes ose aftësi të mira leximi, mund të jetë e përshtatshme të lexohen vetëm shkrimet e cilësuara «lexo».
10. Kur mund ta kalojmë studimin te libri Çfarë mëson vërtet Bibla?
10 Kur të kalojmë te libri Çfarë mëson vërtet Bibla?: Pasi të kemi bërë disa biseda dhe të kemi filluar një studim të rregullt me dikë, mund të kalojmë te libri Çfarë mëson vërtet Bibla? ose të vazhdojmë me broshurën Lajm i mirë derisa ta përfundojmë. Lajmëtarët duhet të përdorin gjykim për të vendosur kur të kalojnë te libri. A duhet ta nisim nga e para Çfarë mëson vërtet Bibla? nëse e kalojmë studimin te ky libër? Nuk ka një rregull për këtë. Çdo njeri është ndryshe. Gjithsesi, shumica e studentëve do të nxjerrin dobi duke i shqyrtuar përsëri disa tema të trajtuara më me hollësi te libri Çfarë mëson vërtet Bibla?
11. Pse duhet ta përdorim mirë këtë broshurë të re?
11 Në një botë ku lajmet e mira janë kaq të rralla, kemi privilegjin e madh të shpallim lajmin më të mirë që ekziston: Mbretëria e Perëndisë po sundon dhe së shpejti do të na çojë drejt botës së re ku do të banojë drejtësia! (Mat. 24:14; 2 Pjet. 3:13) Jemi të sigurt se ata që e dëgjojnë këtë mesazh do të bashkohen me fjalët e frymëzuara: «Sa të bukura janë mbi male këmbët e atij që sjell lajmin e mirë, që shpall paqen, që sjell lajmin e mirë për diçka më të mirë, që shpall shpëtimin, që i thotë Sionit: ‘Perëndia yt është bërë mbret’.» (Isa. 52:7) Le ta përdorim këtë broshurë të re që t’u çojmë lajmin e mirë nga Perëndia atyre që janë të etur për të vërtetën!
[Kutia në faqen 5]
Kur njerëzit dyshojnë për Perëndinë dhe Biblën:
● Në disa vende, lajmëtarët kanë kuptuar se kur njerëzit dëgjojnë fjalët «Perëndia» dhe «Bibla», e ndërpresin bisedën. Në këto raste, mund të jetë më mirë që në vizitën e parë të flasim për tema që i shqetësojnë, të tilla si nevoja për një qeveri të mirë, ku të gjejnë ndihmë praktike për familjen dhe çfarë do të ndodhë në të ardhmen. Ndoshta broshurën Lajm i mirë mund ta prezantojmë pasi të kemi bërë disa biseda ku kemi shqyrtuar si e dimë që Perëndia ekziston dhe pse Bibla është një libër i besueshëm.
[Kutia në faqen 6]
Kur predikojmë shtëpi më shtëpi:
● «Doja t’ju tregoja sa e lehtë është të kuptojmë qëllimin që ka Perëndia për të ardhmen tonë. A e keni pyetur ndonjëherë veten nëse Perëndia do të na i heqë vuajtjet? [Presim përgjigjen.] Kjo broshurë tregon se ku mund të gjejmë në Bibël përgjigjen e kësaj pyetjeje. [I japim broshurën të zotit të shtëpisë dhe lexojmë paragrafin e parë të mësimit 1, si edhe Jereminë 29:11.] Nga kjo që lexuam, a nuk mendoni se Perëndia dëshiron një të ardhme më të mirë për ne? [Presim përgjigjen.] Kjo kopje është për ju. Herën tjetër mund të shohim bashkë paragrafin e dytë për të kuptuar përgjigjen që jep Bibla për këtë pyetje: ‘Si do t’i shkulë me rrënjë Perëndia shkaqet e vuajtjeve?’» Nëse herën e parë që e vizitojmë, duket se i zoti i shtëpisë ka kohë, mund të lexojmë e të shqyrtojmë edhe paragrafin e dytë me vargjet biblike që janë në të. Lëmë takim që të kthehemi për të shqyrtuar pyetjen e dytë të mësimit.
● «Shumë njerëzve u pëlqen t’i luten Perëndisë, sidomos kur hasin probleme. A jeni lutur ndonjëherë? [Presim përgjigjen.] Si mendoni, a i dëgjon Perëndia të gjitha lutjet apo ka disa lutje që nuk i pëlqejnë? [Presim përgjigjen.] Me vete kam një broshurë që tregon si mund të gjejmë në Bibël përgjigjet e këtyre pyetjeve. [I japim një kopje të broshurës, shqyrtojmë bashkë paragrafin e parë të mësimit 12 dhe shkrimet e cilësuara «lexo».] Sa bukur që Perëndia dëshiron të na dëgjojë! Por, që të nxjerrim plotësisht dobi nga lutja, duhet ta njohim mirë Perëndinë. [Shkojmë te mësimi 2 dhe i tregojmë nëntitujt.] Nëse dëshironi, mund t’jua lë këtë broshurë, dhe herën tjetër mund të shohim bashkë përgjigjet nga Bibla për këto pyetje interesante.»
● «Njerëzit janë të shqetësuar se ku po shkon kjo botë. Si mendoni, a do të përmirësohen ndonjëherë kushtet? [Presim përgjigjen.] Shumë njerëz mrekullohen kur mësojnë se Bibla ka një lajm të mirë që na jep shpresë. Ja disa pyetje për të cilat Bibla ka përgjigje.» I japim broshurën dhe e ftojmë të zgjedhë një nga pyetjet që i intereson më shumë në faqen e fundit. Pastaj, shkojmë tek ai mësim dhe i demonstrojmë si bëhet një studim. Lëmë takim që të kthehemi për të shqyrtuar pyetjen vijuese të mësimit.
[Kutia në faqen 7]
Të provojmë metodën e drejtpërdrejtë:
● «Përshëndetje! Kam ardhur t’ju tregoj se si në pak minuta mund të gjejmë në Bibël përgjigjet e disa pyetjeve jetësore. Kjo broshurë ka 15 mësime. [I tregojmë faqen e parë dhe të fundit.] A jeni përpjekur ndonjëherë ta kuptoni Biblën? [Presim përgjigjen.] Më lejoni t’ju tregoj sa të lehta janë mësimet. [Shqyrtojmë paragrafin e parë të pyetjes 3 në mësimin 3, dhe lexojmë Zbulesën 21:4, 5. Nëse është e përshtatshme, shqyrtojmë edhe paragrafin tjetër e shkrimet e cilësuara «lexo».] Nëse doni, mund t’jua lë këtë broshurë. Ju rekomandoj të shqyrtoni të paktën një mësim të kësaj broshure. Nëse ju pëlqen, mund ta vazhdoni. Herën tjetër mund të shqyrtojmë mësimin e parë. Siç e shikoni, nuk është shumë i gjatë, vetëm një faqe.»
[Kutia në faqen 7]
T’ia prezantojmë rivizitave:
● «Gëzohem që ju takoj përsëri. Ju kam sjellë këtë broshurë që tregon përgjigjet nga Bibla të shumë pyetjeve interesante. [I japim broshurën dhe e ftojmë të shohë faqen e fundit.] Cila nga këto pyetje ju intereson më shumë? [Presim përgjigjen. Pastaj, shkojmë te mësimi që ka zgjedhur.] Më lini t’ju tregoj si mund të na ndihmojë kjo broshurë për të gjetur përgjigjet në Bibël.» T’i demonstrojmë si bëhet studimi duke trajtuar një ose dy paragrafë dhe shkrimet e cilësuara «lexo». Sapo kemi filluar një studim biblik! I lëmë broshurën të zotit të shtëpisë dhe lëmë takim që të kthehemi. Pasi të mbrojmë mësimin, mund të kalojmë te një mësim tjetër që zgjedh i zoti i shtëpisë ose të nisim broshurën nga fillimi.