T’i mësojmë me broshurën Lajm i mirë
1. Si është organizuar broshura Lajm i mirë?
1 Siç folëm te Shërbimi ynë i Mbretërisë i korrikut, një mjet i rëndësishëm te çanta e mjeteve mësimore është broshura Një lajm i mirë nga Perëndia. Shkrimet e përmendura nuk citohen që i zoti i shtëpisë të kënaqet duke mësuar drejtpërdrejt nga Bibla. Ndonëse shumë nga botimet tona për studim janë shkruar në mënyrë që dikush ta lexojë dhe ta kuptojë të vërtetën vetë, ky botim është organizuar që të studiohet me ndihmën e një mësuesi. Prandaj, kur e ofrojmë broshurën, duhet të përpiqemi t’i tregojmë si bëhet studimi, që i zoti i shtëpisë të shohë sa emocionuese është të mësojë lajmin e mirë nga Bibla.—Mat. 13:44.
2. Si mund ta përdorim broshurën Lajm i mirë në vizitën e parë?
2 Në vizitën e parë: Mund të thuash: «Njerëzit janë të shqetësuar se bota po katandiset keq e më keq. Si thua, a do të përmirësohen ndonjëherë kushtet? [Lëre të përgjigjet.] Bibla ka një lajm të mirë që na jep shpresë. Këtu renditen disa pyetje që Bibla u jep përgjigje.» Jepi një broshurë të zotit të shtëpisë dhe ftoje të zgjedhë një pyetje në faqen e fundit. Pastaj tregoji si bëhet studimi duke përdorur paragrafin e parë të atij mësimi. Një mundësi tjetër është t’i bësh një pyetje që ngjall interes nga një mësim që zgjedh ti, dhe pastaj tregoji si mund ta ndihmojë broshura të gjejë përgjigjen që jep Bibla. Nëse për mësimin ka një video në jw.org, disa lajmëtarë e përdorin kur bëjnë prezantimin.
3. Shpjego si drejtohet studimi me broshurën Lajm i mirë.
3 Si ta drejtojmë studimin: (1) Lexo pyetjen me numër e me shkronja të zeza që ta ndihmosh të zotin e shtëpisë të përqendrohet në pikën kryesore. (2) Lexo paragrafin që vijon. (3) Lexo shkrimet me shkronja të pjerrëta dhe me takt pyete të zotin e shtëpisë që ta ndihmosh të kuptojë si i përgjigjen shkrimet pyetjes me numër. (4) Nëse ka më shumë se një paragraf për të njëjtën pyetje, përsërit hapat 2 dhe 3. Nëse për pyetjen ka një video dhe akoma nuk ia ke treguar të zotit të shtëpisë, mund t’ia tregosh gjatë bisedës. (5) Në fund bëji përsëri pyetjen me numër që të sigurohesh që ka kuptuar.
4. Çfarë do të na ndihmojë të aftësohemi për ta përdorur këtë mjet të dobishëm?
4 Familjarizohu me këtë mjet të dobishëm. Përdore në çdo rast të përshtatshëm. Para se të bësh studimin, mendo për studentin dhe si do të ishte më mirë të arsyetoje me të duke përdorur shkrimet e mësimit. (Prov. 15:28; Vep. 17:2, 3) Ndërkohë që aftësohesh, ka shumë të ngjarë ta konsiderosh broshurën si një nga mjetet e tua të preferuara për t’u mësuar njerëzve të vërtetën.