Burgosen për shkak të besimit—Koreja e Jugut

Më 26 tetor 2020, për herë të parë në histori, atyre që refuzojnë të kryejnë shërbimin ushtarak për shkak të ndërgjegjes në Korenë e Jugut iu dha mundësia të kryejnë shërbimin alternativ civil. Mirëpo, autoritetet që mbrojnë të drejtat e njeriut e cilësuan shërbimin alternativ që ofron Koreja e Jugut si ndëshkimor dhe diskriminues, edhe në aspektin e kohëzgjatjes, edhe në atë të vështirësisë. Shërbimi alternativ zgjat 36 muaj, pra dyfishi i shërbimit ushtarak, dhe kjo bie në kundërshtim me standardet ndërkombëtare. Sipas këtyre standardeve, shërbimi alternativ nuk duhet zgjatur mbi një herë e gjysmë më shumë se shërbimi ushtarak, nëse nuk ka arsye të vlefshme dhe objektive. Disa Dëshmitarë të Koresë së Jugut kanë refuzuar të kryejnë shërbimin alternativ civil. Të tjerë kanë paraqitur ankesa në gjykata. Më 30 maj 2024, Gjykata Kushtetuese e Koresë së Jugut refuzoi të gjitha ankesat për shërbimin alternativ, në një vendim me 5 vota pro dhe 4 kundër. Gjithsesi, në opinionin e saj kundërshtues, gjykata theksoi natyrën ndëshkimore të shërbimit alternativ: «Ky lloj shërbimi alternativ s’është asgjë më shumë sesa një formë tjetër ndëshkimi që dhunon lirinë e ndërgjegjes së individëve që refuzojnë shërbimin ushtarak për shkak të ndërgjegjes.»

U Xhin Bioni, një burrë i martuar 29-vjeçar, është Dëshmitari i parë në Korenë e Jugut që u burgos ngaqë refuzoi shërbimin alternativ. Ai vendosi ta refuzonte me respekt shërbimin alternativ. Ndonëse shprehu edhe gatishmërinë e tij për të kryer shërbim alternativ jondëshkimor, kur ky shërbim të vihej në dispozicion, më 24 korrik 2024, gjykata e dënoi me 1 vit e 6 muaj burg.

Deri më tani, 14 Dëshmitarë kanë refuzuar të kryejnë shërbimin alternativ, përfshirë këtu edhe z. Bion, dhe ndër këta, 11 janë në proces gjyqësor. Në varësi të vendimit që do të merret, edhe ata rrezikojnë ndëshkim penal dhe burgim. Ndërkohë, shumica e atyre që refuzojnë shërbimin ushtarak për shkak të ndërgjegjes kanë vendosur ta kryejnë shërbimin alternativ, pavarësisht natyrës së tij ndëshkuese.

Tabelë kronologjike

1. 24 korrik 2024

   U Xhin Bioni dënohet me 18 muaj burg për shkak të refuzimit të shërbimit alternativ.

2. 10 nëntor 2022

   Pasi i vjen fletëthirrja për ushtar, U Xhin Bioni i dërgon një letër Administratës së Rekrutimit Ushtarak ku refuzon shërbimin ushtarak dhe atë alternativ për shkak të ndërgjegjes.

3. 26 tetor 2020

   Qeveria e Koresë së Jugut lejon shërbimin alternativ për ata që nuk pranojnë të kryejnë ushtrinë për shkak të ndërgjegjes.

4. 1 nëntor 2018

   Gjykata e Lartë e Koresë së Jugut vendos me 9 vota pro e 4 kundër, se refuzimi i shërbimit ushtarak për arsye ndërgjegjeje nuk përbën krim.

5. 28 qershor 2018

   Gjykata Kushtetuese e Koresë së Jugut shpall një pjesë të Ligjit për Shërbimin Ushtarak si antikushtetuese, meqë ai nuk parashikon shërbimin alternativ për këdo që nuk pranon të kryejë shërbimin ushtarak për shkak të ndërgjegjes.

6. 18 tetor 2016

   Për herë të parë, Gjykata e Apelit në Guanxhu shpall të pafajshëm 3 të rinj që refuzojnë shërbimin ushtarak për shkak të ndërgjegjes.

7. 30 gusht 2011

   Gjykata Kushtetuese lë përsëri në fuqi ligjin që dënon ata që refuzojnë shërbimin ushtarak për shkak të ndërgjegjes.

8. 26 gusht 2004

   Gjykata Kushtetuese lë në fuqi ligjin që dënon ata që refuzojnë shërbimin ushtarak për shkak të ndërgjegjes.

9. 1975

   Qeveria nis rekrutimin e detyrueshëm ushtarak, që kërkon pjesëmarrje 100 për qind.

10. 1973

    Qeveria fillon torturat ndaj Dëshmitarëve të burgosur, të cilat vazhdojnë deri në mes të viteve 90.

11. 1953

    Qeveria burgos Dëshmitarin e parë i cili refuzon të kryejë ushtrinë për arsye ndërgjegjeje.