Së shpejti krime ‘nuk do të ketë më’

«Edhe pak dhe i ligu nuk do të jetë më.»​—PSALMI 37:10.

KRIJUESI ynë, Perëndia Jehova, interesohet me gjithë zemër për njerëzit, krijesat e tij; ai nuk është i largët, siç mendojnë disa. (Psalmi 11:4, 5) Për më tepër, ai sheh çdo krim dhe padrejtësi, edhe ato që i shpëtojnë syrit të njeriut. «Sytë e Jehovait janë në çdo vend, duke vrojtuar të këqijtë dhe të mirët.» (Proverbat 15:3) Pra, të jesh i sigurt se të ligjtë janë vërtet «në vende të rrëshqitshme».​—Psalmi 73:12, 18.

Kurse të paqortueshmit dhe të drejtët, ndonëse mund të jenë të varfër a të nëpërkëmbur, i pret një e ardhme e mrekullueshme. Psalmisti David shkroi: «Vështroje të paqortueshmin dhe mbaji sytë mbi të drejtin, sepse e ardhmja e atij njeriu do të jetë paqësore.» (Psalmi 37:37) Këto fjalë na e ngrohin zemrën sot, sepse kemi shpresën se në një të ardhme të afërt do t’i shohim të plotësohen anembanë botës.

Jetojmë në ditët e fundit

Rreth 2.000 vjet më parë, dishepujt i bënë Jezu Krishtit këtë pyetje me shumë vlerë për të ardhmen: «Na thuaj, . . . cila do të jetë shenja e pranisë sate dhe e përfundimit të sistemit?» (Mateu 24:3) Përgjigjen e Jezuit e jep me hollësi Bibla, në kapitullin 24 të Mateut, në kapitullin 13 të Markut dhe në kapitullin 21 të Lukës. Këto tregime të ungjijve, që plotësojnë njëri-tjetrin, thonë se ditët e fundit të botës së sotme do të karakterizoheshin nga luftëra, zi buke, sëmundje, tërmete të mëdha dhe një rritje dramatike e paligjshmërisë.

Kushtet kritike që paratha Jezui filluan më 1914. Siç thotë edhe historiani Erik Hobsbaum në librin e tij Epoka e ekstremeve, shekulli i 20-të «ishte pa diskutim më gjakatari në histori».

Lidhur me përhapjen e ligësisë sot, Bibla thotë: «Të ligjtë mbijnë si bari dhe të gjithë ata që merren me të këqija, lulëzojnë, vetëm që të shfarosen përgjithmonë.» (Psalmi 92:7) Po, është e qartë se paligjshmëria sot është me bollëk, si bari që mbin e harliset, dhe kjo tregon se shfarosja e të ligjve është te pragu! A nuk është një sihariq ky?!​—2 Pjetrit 3:7.

«Të drejtët do të trashëgojnë tokën»

«Të drejtët do të trashëgojnë tokën dhe do të banojnë përgjithmonë në të»,​—thotë Psalmi 37:29. Atëherë çdo lloj krimi e padrejtësie do t’i përkasë së kaluarës. Kështu nuk do të ketë më asgjë që lidhet me krimin: sisteme alarmi, dryna, gjykata, avokatë, polici dhe burgje. Bibla premton: «Gjërat e mëparshme nuk do të vijnë më në mendje dhe as do të zgjohen më në zemër.»​—Isaia 65:17.

Po, toka dhe shoqëria njerëzore do të pësojnë një transformim si kurrë më parë. (Isaia 11:9; 2 Pjetrit 3:13) Kjo është shpresa e sigurt që kanë Dëshmitarët e Jehovait dhe ata të ftojnë të shqyrtosh vetë se ajo do të bëhet së shpejti realitet. Mos harro se Ai që frymëzoi Shkrimet e Shenjta «nuk mund të gënjejë».​—Titit 1:2.

[Kutia dhe figura në faqen 9]

NDIHMOJNË TË BURGOSURIT TË NJOHIN PERËNDINË

Gjatë viteve Dëshmitarët e Jehovait në Shtetet e Bashkuara kanë marrë letra nga të burgosurit në 4.169 burgje, spitale burgu dhe qendra rehabilitimi për të droguarit. Disa prej tyre kërkojnë literaturë biblike; të tjerë kërkojnë një studim biblik pa pagesë. Këtyre kërkesave u përgjigjen Dëshmitarë të kualifikuar. Në mbarë botën Dëshmitarët shkojnë rregullisht në burgje për të drejtuar studime biblike me të burgosurit, burra e gra, që kanë kërkuar ndihmë të mësojnë për Perëndinë. Shumë prej tyre kanë bërë ndryshime rrënjësore në personalitet, janë pagëzuar si të krishterë dhe tani i respektojnë ligjet.