Në vëmendje të publikut​—Mjedisi

Australi

Është llogaritur se nën shtratin e oqeaneve gjenden afro 500.000 kilometra kub ujë me përqindje të ulët kripe. Sipas profesorit Vinsent Post në Universitetin Flinders të Adelajdes «niveli i detit [një herë e një kohë] ka qenë më i ulët se sot», prandaj vija bregdetare ishte më larg. Në atë kohë shiu «mbushte burimet ujore nëntokësore në zona që sot gjenden nën shtratin e detit». Shkencëtarët shpresojnë se në të ardhmen këto rezerva do t’i përdorin rreth 700 milionë njerëzit që nuk kanë mjaft ujë të pastër.

Shkretëtira e Saharasë

Gjysma e llojeve të kafshëve të mëdha që gjendeshin dikur në Sahara ose janë zhdukur, ose janë pakësuar në 1 për qind. Pjesërisht kjo vjen për shkak të ndryshimeve të rajonit dhe të gjuetisë në masë. Megjithëse numri i specieve në shkretëtirë është po aq i madh sa në pyje, studiuesit thonë se «shkencëtarët nuk i kushtojnë shumë vëmendje shumëllojshmërisë së specieve në shkretëtira për shkak të mungesës së fondeve». Si rrjedhojë, mbrojtësit e natyrës e kanë të vështirë t’i mbikëqyrin ekosistemet e rrezikuara në shkretëtira.

Nga bota

Në vitin 2012 një në tetë vdekje ndodhi për shkak të ndotjes së mjedisit. Sipas Organizatës Botërore të Shëndetësisë «ndotja e ajrit tani përbën rrezik më të madh për shëndetin se ndotjet e tjera të mjedisit».