Si të diskutosh për problemet

VËSHTIRËSIA

Kur të dy si çift diskutoni për ndonjë problem, a të duket se në fund të bisedës je më i mërzitur se në fillim? Nëse po, mund t’i përmirësosh gjërat. Sidoqoftë, fillimisht duhet të dish ca gjëra për ndryshimin mes mënyrës si komunikojnë burrat e gratë.a

Ç’DUHET TË DISH

Zakonisht grave u pëlqen të flasin për një problem para se të dëgjojnë zgjidhjen. Ç’është e vërteta, ndonjëherë vetë biseda është zgjidhja për to.

«Ndihem më mirë kur i shpreh ndjenjat dhe kur e di se im shoq më kupton. Pasi flas për problemin, e kaloj, shpesh vetëm pak minuta pas bisedës.»​—Sirpa.b

«S’më shqitet nga mendja problemi derisa t’i shpjegoj me hollësi burrit si ndihem. Pasi flas, i vë kapakun.»​—Ixhini.

«Është si një proces hetimi. Ndërsa flas, analizoj çdo anë të problemit dhe përpiqem t’i shkoj në rrënjë.»​—Lurdesi.

Burrat priren të mendojnë për zgjidhjen e problemit. S’do mend, sepse një burrë ndihet i dobishëm kur ndreq gjëra. Me anë të zgjidhjeve i tregon gruas se mund të mbështetet tek ai. Prandaj, burrat s’arrijnë ta kuptojnë pse zgjidhjet e tyre nuk pranohen menjëherë. Një bashkëshort me emrin Kërk, thotë: «S’e kuptoj dot pse duhet të flasësh për një problem nëse nuk po kërkon zgjidhje.»

Mirëpo, libri The Seven Principles for Making Marriage Work paralajmëron se «të kuptuarit duhet t’i paraprijë këshillës. Duhet ta sigurosh partnerin se e kupton plotësisht dhe se ndihesh po njësoj për problemin para se të sugjerosh ndonjë zgjidhje. Shpesh bashkëshorti s’pret zgjidhje nga ti, thjesht pret të jesh dëgjues i mirë».

Ç’MUND TË BËSH

Për burrat: Dëgjoje me kujdes gruan dhe përpiqu të kuptosh si ndihet. Një burrë me emrin Tomas pohon: «Nganjëherë pasi e kam dëgjuar, i them vetes: ‘Nuk zgjidhe gjë me këtë.’ Ama, shpesh kjo është gjithë sa i duhet gruas sime: një vesh për ta dëgjuar.» Edhe Stefani, një bashkëshort tjetër, mendon njësoj: «Kam vënë re se e mira është ta lë time shoqe të shprehet pa e ndërprerë. Në të shumtën e rasteve, pasi mbaron së foluri, më thotë se ndihet goxha më mirë.»

Sugjerim: herën tjetër kur të diskutosh për ndonjë problem me gruan, rezistoji prirjes për t’i dhënë këshilla që s’t’i kërkon. Kur të jetë duke folur, shihe në sy dhe dëgjoje me kujdes. Poho me kokë se e kupton. Përsërit thelbin e asaj që po të thotë, që ta sigurosh se e ke kapur pikën. Një burrë me emrin Çarls, shprehet: «Ka raste kur ime shoqe thjesht ka nevojë ta dijë se e kuptoj dhe se jam në anën e saj.»​—Parimi biblik: Jakovi 1:19.

Për gratë: Thuaji për çfarë ke nevojë. Një grua që quhet Eleni, thotë: «Mbase presim që burri ta kuptojë vetë çfarë duam, por ndonjëherë duhet t’ia shpjegojmë qartë.» Ndërsa Inesi sugjeron: «Them pak a shumë: ‘Më shqetëson diçka dhe do të më pëlqente të më dëgjoje deri në fund. Nuk pres që ta zgjidhësh, por që të kuptosh si ndihem.’»

Sugjerim: nëse burri nxiton të të japë një zgjidhje, mos nxirr përfundimin se është i pandjeshëm. Ndoshta po përpiqet të të lehtësojë. Një grua me emrin Ester, thotë: «Në vend që të mërzitem, përpiqem të kuptoj se im shoq ka merak për mua dhe do që të më dëgjojë, ama do edhe të më ndihmojë.»​—Parimi biblik: Romakëve 12:10.

Për burrat e gratë: Kemi prirjen t’i trajtojmë të tjerët ashtu si duam të na trajtojnë. Gjithsesi, për t’i diskutuar problemet me sukses, duhet të marrësh parasysh si do të donte të trajtohej bashkëshorti yt. (1 Korintasve 10:24) Një burrë që quhet Migel, shprehet: «Nëse je bashkëshort, ji i gatshëm të dëgjosh. Nëse je bashkëshorte, ji e gatshme t’i dëgjosh zgjidhjet herë pas here. Po të bëjë secili pjesën e vet, të dy do të jeni më të lumtur.»​—Parimi biblik: 1 Pjetrit 3:8.