Dashuria e Josisë për Ligjin e Perëndisë

Josia u bë mbret i Judës kur ishte tetë vjeç. Në atë kohë, njerëzit merreshin me magji dhe adhuronin idhuj. Kur Josia ishte 16 vjeç, bëri përpjekje të mësonte si ta adhuronte Jehovain në mënyrën e duhur. Në moshën 20-vjeçare, filloi të shkatërronte idhujt dhe altarët në mbarë vendin. Dhe, kur ishte 26 vjeç, mori masa që të meremetohej tempulli i Jehovait.

Kryeprifti Hilkiah gjeti në tempull rrotullën e Ligjit të Jehovait, ndoshta atë që kishte shkruar vetë Moisiu. Sekretari i mbretit, Shafani, ia solli rrotullën Josisë dhe filloi t’ia lexonte Ligjin me zë të lartë. Ndërsa dëgjonte, Josia kuptoi se populli kishte vite që nuk i bindej Jehovait. Ai i tha Hilkiahut: ‘Jehovai është shumë i zemëruar me ne. Shko të flasësh me të. Jehovai do të na thotë se çfarë duhet të bëjmë.’ Jehovai u përgjigj me anë të profeteshës Hulda: ‘Populli i Judës më ka braktisur. Ata do të ndëshkohen, por jo gjatë mbretërimit të Josisë, sepse ai u përul.’

Kur Josia dëgjoi këtë mesazh, shkoi në tempull dhe mblodhi popullin e Judës. Pastaj i lexoi gjithë kombit Ligjin e Jehovait me zë të lartë. Josia dhe populli premtuan se do t’i bindeshin Jehovait me gjithë zemër.

Kombi i Judës nuk e kishte kremtuar Festën e Kalimit për shumë vjet. Por, kur Josia lexoi në Ligj që Festa e Kalimit duhej të mbahej çdo vit, u tha: ‘Do të mbajmë një Festë Kalimi për Jehovain.’ Më pas, Josia përgatiti shumë flijime dhe mori masa që tempulli të kishte një kor këngëtarësh. Pastaj populli mbajti Festën e Kalimit dhe ditën tjetër filluan Festën e Bukëve Pa Maja që zgjati shtatë ditë. Nuk ishte mbajtur kurrë një Festë Kalimi e tillë, që nga ditët e Samuelit. Josia e donte vërtet Ligjin e Perëndisë. Po ti, a kënaqesh kur mëson për Jehovain?