LEVI

[lidhje; bashkim].

1. Djali i tretë i Jakobit i lindur në Padan-Aram nga gruaja e tij, Lea. (Zn 35:23, 26) Kur lindi ai, Lea tha: «Këtë herë im shoq do të bashkohet me mua, sepse i kam lindur tre djem.» Kështu, ia vunë emrin Levi, pasi domethënia e këtij emri ka shumë të ngjarë të lidhet me shpresën e Leas që mes saj dhe Jakobit të lindte një lidhje e re përzemërsie. (Zn 29:34) Levit i lindën Gershoni (Gershomi), Kehathi dhe Merari, nga të cilët erdhën tri ndarjet kryesore të levitëve.​—Zn 46:11; 1Kr 6:1, 16.

Bashkë me vëllanë e tij, Simeonin, Levi veproi në mënyrë ekstreme me ata që përdhosën motrën e tyre, Dinën. (Zn 34:25, 26, 31) Jakobi e mallkoi këtë shfaqje të zemërimit të tyre të dhunshëm dhe paratha se pasardhësit e Levit do të shpërndaheshin nëpër Izrael. Kjo profeci u përmbush kur levitët u shpërndanë vërtet nëpër 48 qytete levite në territoret e fiseve të ndryshme të Izraelit në vendin e Kanaanit. (Zn 49:7; Js 21:41) Levi shkoi me Jakobin në Egjipt dhe vdiq atje në moshën 137-vjeçare.​—Da 1:1, 2; 6:16; shih LEVITËT.

2. Paraardhës i Jezu Krishtit, i cili quhet «bir i Simionit» në gjenealogjinë e Jezuit të dokumentuar nga Luka. Ai renditet mes Davidit dhe Zorobabelit.​—Lu 3:27-31.

3. ‘Biri i Melkit’; në gjenealogjinë e Jezuit të dokumentuar nga Luka ai renditet në brezin e dytë para Helit (babait të Marisë).​—Lu 3:23, 24.

4. Një taksambledhës (Mr 2:14; Lu 5:27, 29) që u bë apostull i Jezu Krishtit; njihej më shumë me emrin Mate.​—Mt 9:9; 10:2-4; shih MATEU.