Të diplomuarit e Galaadit gjejnë «më shumë lumturi në të dhënë»

TË DIELËN, më 6 mars 1994, familja Bethel në Qendrën Botërore të Dëshmitarëve të Jehovait dhe të ftuar, u mblodhën për një rast festimi: për diplomimin e klasës së 96-të të Shkollës Biblike të Galaadit. Në fjalët e hyrjes, drejtuesi i programit Karl F. Klein, i cili ka shërbyer në Trupin Udhëheqës për rreth dy dekada, u tha 46 studentëve: «Jezui tha se ka më shumë lumturi në të dhënë se në të marrë. Kështu do të jetë në detyrën tuaj si misionarë; sa më shumë të jepni, aq më të lumtur do të jeni.»​—Veprat 20:35.

Këshillat e fundit

Vijuan një seri fjalimesh drejtuar studentëve. Leon Weaver, një anëtar i Komitetit të Repartit të Shërbimit, zhvilloi temën «Durimi lavdëron Jehovain». Të gjithë ne përballojmë prova. (2. Korintasve 6:3-5) «Kur jemi nën presion,—vërejti vëlla Weaver,—është shumë lehtë të besojmë tek vetja jonë.» Por, ai u kujtoi studentëve: «Çfarëdo provash njerëzore që ju duhet të përballoni, Jehovai interesohet për ju. Ai kurrë nuk do të lejojë t’ju tundojnë përtej fuqive tuaja.»​—1. Korintasve 10:13.

«Mbani gjithmonë gjallë detyrën tuaj», ishte titulli i një fjalimi tjetër, i mbajtur nga Lyman Swingle i Trupit Udhëheqës. Izraelitët, jo gjithmonë zgjidhnin vetë se ku do të jetonin dhe çfarë do të bënin. Për çdo fis ishte caktuar një pjesë vendi dhe për levitët ishin caktuar detyra të veçanta për t’u kryer. Ngjashëm, sot, shumë që janë në shërbim të plotë kohor, si misionarët dhe anëtarët e familjes Bethel, nuk e vendosin vetë se ku do të jetojnë dhe çfarë pune do të bëjnë. Çfarë mund të themi nëse dikush ndihet i pasigurt rreth një caktimi të tillë? «Nëse me vendosmëri i drejtoni sytë tek Kryepërfaqësuesi i besimit tonë, Jezui, dhe e shqyrtoni shembullin e tij me vëmendje, ju nuk do të dorëzoheni»,—tha vëlla Swingle.​—Hebrenjve 12:2, 3.

Leonard Pearson, anëtar i Komitetit të Fermës Watch Tower, trajtoi pastaj temën «Qëndroni të vëmendshëm». Ai tha: «Mund të keni aparatin më të mirë fotografik, subjektin më të bukur, një sfond ideal, por rezultatet mund të jenë të këqija nëse aparati juaj nuk është në fokus.» Si një objektiv këndgjerë, pamja jonë duhet të pëfshijë veprën ndërkombëtare të predikimit. Ne kurrë nuk duhet të humbim pamjen e pikturës së madhe. «Ata që përqendrohen në veten e tyre, nuk do të jenë të lumtur në caktimet e tyre,—tha vëlla Pearson.—Ata që përqendrohen tek Jehovai dhe në detyrën që ai u ka dhënë, do t’ia dalin mbanë me sukses.»

«Shumë arsye për të qenë mirënjohës», ishte titulli i fjalimit tjetër, i mbajtur nga John E. Barr, një anëtar tjetër i Trupit Udhëheqës. «Mos pushoni kurrë së qeni mirënjohës Jehovait,—i këshilloi studentët vëlla Barr.—Është një nga burimet më të mëdha të kënaqësisë, pavarësisht se çfarë caktimi keni.» Një qëndrim mirënjohës, e nxiti Davidin të shkruante: «Mua fati më ka rënë në vende të këndshme; po, një trashëgimi e bukur më ka rënë.» (Psalmi 16:6) «Ju keni një trashëgimi kaq të bukur, duke ndier Jehovain afër çdo ditë,—tha vëlla Barr.—Jehovai nuk do t’ua privojë kurrë këtë marrëdhënie, derisa ju të vazhdoni ta konsideroni si diçka shumë të këndshme, për të cilën jeni mirënjohës.»

Instruktori i Galaadit, Jack Redford, trajtoi më pas temën «Si do ta përdorni gjuhën»? Çfarë shkatërrimi mund të shkaktojë të folurit e pamenduar! (Proverbat 18:21) Si mund të vihet gjuha nën kontroll? «Duhet së pari të stërvitni mendjen tuaj,—përgjigjet vëlla Redford,—sepse gjuha pasqyron mendjen dhe zemrën.» (Mateu 12:34-37, BR) Jezui siguroi një shembull të plotë; ai e përdori gjuhën e tij për të lartësuar emrin e Jehovait. «Sot ka një uri për të dëgjuar fjalët e Jehovait,—i tha klasës vëlla Redford.—Ju i njihni këto fjalë: ‘Ju keni gjuhën e dishepujve.’ Pra, le të udhëhiqet gjuha juaj gjithmonë nga një mendje dhe zemër e dedikuar plotësisht ndaj Jehovait.»​—Isaia 50:4.

Rëndësia e lutjes, u theksua në fjalimin «A po ecni si në praninë e Jehovait»? Ulysses Glas, regjistruesi i shkollës, vërejti: «Nëse një baba punon shumë për të mbajtur familjen, por nuk u flet kurrë atyre dhe nuk ua shpreh dashamirësinë, kjo mund ta çojë familjen e tij në përfundimin se ai nxitet nga detyrimi dhe jo nga dashuria. Kështu është edhe me ne. Ne mund të jemi të zënë në shërbimin e Perëndisë. Por nëse nuk lutemi, ne i jemi dedikuar një vepre dhe jo Atit tonë të dashur qiellor.»

Theodore Jaracz, anëtar i Trupit Udhëheqës, foli mbi temën «Pse grumbuj njerëzish po shoqërohen me popullin e Perëndisë». Çdo vit, qindra mijëra persona grumbullohen në organizatën e Jehovait. (Zaharia 8:23) Çfarë i identifikon Dëshmitarët e Jehovait si popull i Perëndisë? Së pari, ata e pranojnë të tërë Biblën si Fjalën e Perëndisë. (2. Timoteut 3:16) Së dyti, janë politikisht asnjanës. (Gjoni 17:16) Së treti, japin dëshmi për emrin e Perëndisë. (Gjoni 17:26) Së katërti, manifestojnë dashuri altruiste. (Gjoni 13:35; 15:13) Me këto cilësi, ne mund ‘të shpallim me guxim mrekullitë e atij që na thirri nga terri në dritën e tij të mrekullueshme.’​—1. Pjetrit 2:9.

Pas këtyre fjalimeve prekëse, të 46 studentët morën diplomat. Ata janë caktuar në 16 vende të botës.

Një program i ndryshëm pasdite

Pasdite, një studim i shkurtuar i Kullës së Rojës, u drejtua nga Donald Krebs i Komitetit të Bethelit. Pastaj, të diplomuarit paraqitën një program të titulluar «Dituria bërtet nëpër rrugë». (Proverbat 1:20) Ata luajtën skena të ndryshme, duke paraqitur përvoja të këndshme që i kishin pasur në dëshmitë e tyre në rrugë dhe në territore tregtare. Jehovai me të vërtetë i bekon ata që kanë kurajë për të dhënë dëshmi joformale. «Më pëlqen të mendoj se jemi si drapërinjtë në duart e engjëjve korrës,—tha një i diplomuar.—Sa më shumë t’i mprehim aftësitë tona, aq më tepër punë bëjnë engjëjt nëpërmjet nesh.» (Krahaso Zbulesa 14:6.) Programi i studentëve përfshinte gjithashtu një prezantim me diapozitiv, i cili e çoi auditorin në një udhëtim mësimor në Bolivi, Maltë dhe Tajvan, tri vendet në të cilat u dërguan të diplomuarit e kësaj klase.

Pastaj, u intervistuan Wallace dhe Jane Liverance, misionarë për 17 vjet. Në tetor 1993, ata u ftuan nga Ferma Watch Tower, ku vëlla Liverance shërben tani si një nga mësuesit e Galaadit.

Pastaj pasoi një prezantim me katër skena, i titulluar «Të nderojmë ata që e meritojnë, në vitet e tyre të pleqërisë». Kur plakesh, besimi në veten tënde mund të jetë pakësuar nga frika se mos bëhesh i padobishëm apo ndihesh i braktisur. (Psalmi 71:9) Ky prezantim prekës tregoi se si të të gjithë anëtarët e kongregacionit mund të përkrahin persona të moshuar besnikë.

Pas këngës dhe lutjes përmbyllëse, të 6.220 të pranishmit në Sallën e Asambleve në Jersey City, u ndien të ripërtërirë. Lutjet tona janë me të diplomuarit në caktimet e tyre të reja. Le të vazhdojnë të provojnë lumturinë më të madhe që vjen nga dhënia.

[Kutia në faqen 26]

Statistika e klasës

Numri i vendeve të paraqitura: 9

Numri i vendeve në të cilat ishin caktuar: 16

Numri i studentëve: 46

Mosha mesatare: 33.85

Vitet mesatare në të vërtetën: 16.6

Vitet mesatare në shërbimin e plotë kohor: 12.2

[Kutia në faqen 27]

Malta në qendër të vëmendjes

I ashtuquajturi krishterim, e detyroi të heshtë të vërtetën biblike në Maltë për shumë vjet. Misionarët e fundit të Galaadit që u dërguan atje, Frederick Smedly dhe Peter Bridle, që kishin frekuentuar klasën e tetë të Galaadit u diplomuan në vitin 1947. Megjithatë, ata u arrestuan dhe u dëbuan nga Malta, vetëm pak kohë pasi kishin arritur. Libri vjetor i Dëshmitarëve të Jehovait (angl.) i vitit 1948 raporton: «Këta dy misionarë kanë harxhuar aq kohë nëpër gjyqje dhe me funksionarët e vendit sa kanë harxhuar edhe në detyrën e tyre të shërbimit, thjesht për shkak të kundërshtimit të hierarkisë së katolicizmit romak. Priftërinjtë thonë se Malta u përket katolikëve dhe të gjithë të tjerët duhet të ikin.» Tani, rreth 45 vjet më vonë, katër misionarë nga klasa e 96-të e Galaadit janë caktuar në Maltë.

[Kutia në faqen 26]

Klasa e 96-të e Diplomimit të Shkollës Biblike të Galaadit

Në listën vijuese, rreshtat janë numëruar nga para prapa dhe emrat janë shënuar nga e majta në të djathtë për çdo rresht.

(1) P. Ehlers; M. Giese; S. Sellman; J. Zussperregui; S. Rowe; K. Jackson; T. Scott (2) T. Liehr; I. Garcia; J. Garcia; A. Fernandez; L. Davidson; P. Liideman; L. Gibson; C. Juarez (3) C. Fouts; G. Pastrana; D. Claeson; L. Fernandez; M. Walls; M. Dressen; F. Pastrana; J. Burks (4) D. Burks; S. Scott; M. Jackson; H. Mauray; L. Juarez; A. Zusperregui; C. Brorsson; C. Rowe (5) K. Sellman; P. Liideman; C. Davidson; S. Mauray; D. Walls; D. Dressen; G. Schaafsma; S. Liehr (6) T. Claeson; T. Gibson; C. Giese; D. Ehlers; R. Fouts; S. Schaafsma; L. Brorsson.