Të nxjerrim dobi të plotë nga kongresi krahinor i vitit 1993 «Mësimi hyjnor»
1 «Mësomë, o Jehova». (Psal. 86:11) Kjo duhet të jetë lutja e zjarrtë e çdo shërbëtori të dedikuar të Perëndisë. Jemi të vendosur që të mos pushojmë kurrë së mësuari dhe së zbatuari atë që mësojmë. Ndonjëherë kemi nevojë për korrigjim dhe ashtu si psalmisti, duhet t’i lutemi Perëndisë të njësojë zemrën tonë, me qëllim që të mos jetë e ndarë. Programi i kongresit krahinor «Mësimi hyjnor» do të na sigurojë mësimin praktik dhe korrigjimin e nevojshëm për t’i shërbyer Jehovait besnikërisht, krahas presioneve të këtij sistemi gjërash.
2 Çfarë është ruajtur për ne? Ushqim i fortë frymor me bollëk i paraqitur në mënyra të ndryshme: fjalime, demonstrime, intervista. Mos humbni asnjë pjesë të këtij mësimi me rëndësi jetësore! Gjithashtu, mezi presim të takojmë përsëri miqtë e vjetër dhe të zëmë të rinj. Ndoshta në kongresin tuaj do të marrin pjesë edhe misionarë që shërbejnë jashtë shtetit. Përfitoni nga rasti për të njohur këta vëllezër dhe motra besnike. Nëse keni fëmijë, përfshijini në bisedë. Fryma e gëzuar dhe vetëmohuese e këtyre misionarëve mund të ngjallë tek bijtë tuaj dëshirën për ta bërë shërbimin e plotë kohor karrierën e jetës së tyre.
3 A do ta sillni tërë të dhjetën në depo? Tek Malakia 3:10 Jehovai u premtoi izraelitëve se, nëse do të ishin të gatshëm ta vinin në provë dhe të sillnin tërë të dhjetën në depo, ai do të derdhte mbi ta një bekim derisa të mos kishin më nevojë.
4 Për disa, të vënë Jehovain në provë do të thotë të flasin sa më shpejt me punëdhënësin për t’i kërkuar lejen e zakonshme ose leje për disa ditë që të marrin pjesë në kongres. Disa vëllezër ngurrojnë ta bëjnë, duke menduar se punëdhënësi nuk do t’u japë kurrë leje për të shkuar në kongres. Megjithatë, për arsye të natyrës jo frymore, ndoshta nuk kanë vështirësi për t’i kërkuar leje punëdhënësit.
5 Le të pyesim veten: Nëse një miku ynë i dashur do të martohej në një qytet tjetër, a nuk do t’i kërkonim punëdhënësit tonë ditët që na duhen për të shkuar në dasmë? Dhe nëse do të ishte kokëfortë për të na lejuar, a nuk do t’i shpjegojmë me respekt se sa dëshirojmë që të shkojmë. Sigurisht, është më e rëndësishme të jemi të mësuar nga Jehovai, sesa të shkojmë në një dasmë! Nëse jemi me të vërtetë të bindur se programi i kongresit është i domosdoshëm për rritjen tonë frymore, do të jetë më e lehtë ta bindim punëdhënësin që të na japë lejen e duhur për të marrë pjesë në kongres.—Jakovi 1:7, 8.
6 Në Izrael e dhjeta kishte të bënte me mbështetjen në mënyrë materiale të vendit ku adhurohej Jehovai. Në ditët tona e dhjeta paraqet kohën, energjitë dhe burimet ekonomike që përdoren direkt për t’i shërbyer Jehovait dhe për të mbështetur veprën e Mbretërisë. E dhjeta përfshin kohën që dedikojmë në mbledhje, në asamble, në kongrese, në mirëmbajtjen dhe pastrimin e vendeve tona të mbledhjes. Kongresi krahinor «Mësimi hyjnor» do të na ofrojë shumë mundësi për të sjellë të gjithë të dhjetën në depon frymore të Jehovait. Cilat janë disa prej tyre?
7 Mund ta sjellim të dhjetën, duke dëgjuar me kujdes programin e kongresit si dhe secilën lutje, kështu që mund të themi një amin të ndier nga zemra.
8 Përparimi ynë në të vërtetën varet në një masë të dukshme nga fakti se si dëgjojmë. Në një auditor të madh ose në një stadium është e lehtë të hutohesh nga ajo që bëjnë ata që na rrethojnë, prandaj nuk duhet të lejojmë që mendja jonë të mjegullohet. Mos harroni të merrni me vete në kongres gjithçka që ju duhet: Biblën, stilolapsin, bllokun për shënime si dhe Kullën e Rojës që do të studiohet atë javë. Është e dobishme të marrim shënim shkrime dhe pika të rëndësishme të përdorura nga çdo orator. Shënimet duhet të jenë të shkurtra; nëse shkruhet shumë, humbet përqëndrimi. Edhe të rinjtë duhet të stërviten për të dëgjuar me vëmendje. Fëmijët mund të sjellin të dhjetën me prindërit e tyre duke ndjekur programin me sa më shumë vëmendje që është e mundur.
9 Disa prindër rregullojnë që çdo ditë, në shtëpi, të jetë një periudhë qetësie në të cilën fëmijët duhet të lexojnë ose të shikojnë në një nga botimet e Shoqatës. Kjo stërvitje e efektshme bën që fëmijët ta kenë shumë më të lehtë për të ndenjur ulur në qetësi në mbledhje dhe në kongrese. Disa prindër që kanë rritur fëmijë shembullorë thonë se nuk u lejonin kurrë fëmijëve që të sillnin në mbledhje lojëra ose fletore vizatimi për të pikturuar. Edhe fëmijët shumë të vegjël mund të mësojnë se arsyeja për të cilën shkojmë në mbledhje është që të adhurojmë Jehovain. Prindërit që u mësojnë fëmijëve se çfarë do të thotë për ta të sjellin të gjithë të dhjetën në depo, me të vërtetë meritojnë një lavdërim!
10 Mund ta sjellim të dhjetën edhe duke ofruar vullnetarisht kohën dhe energjinë tonë për mbarëvajtjen në aspektin organizativ të kongresit. Në shumicën e vendeve, një ose dy ditë përpara fillimit të kongresit bëhet një pastrim i përgjithshëm i lokalit. Nëse banoni afër, përse të mos rregulloni që të merrni pjesë me të gjithë familjen? Disa vëllezër kanë marrë me vete studentët e tyre të Biblës që përparojnë, me qëllim që përpara se të pagëzohen, këta të rinj të mësojnë se çfarë nënkupton mbështetja e adhurimit të Jehovait. Ka shumë për të bërë për të siguruar zhvillimin e efektshëm të kongresit. Përse të mos ofrohemi vullnetarisht si familje?
11 Një mënyrë tjetër për të sjellë të dhjetën është mbështetja nga ana financiare e kongresit. Duke treguar rëndësinë e dhuratave materiale për mbështetjen e adhurimit të pastër, Jehovai i dha kombit të Izraelit këtë urdhër: «Asnjë nuk duhet të paraqitet përpara Jehovait me duar bosh. Dhurata e duarve të secilit duhet të jetë në përpjestim me bekimin që të ka dhënë Jehovai, Perëndia yt.» (Ligji i përtërirë 16:16, 17) Sido që shërbëtorët e tij do të mund të jepnin, shumë ose pak, oferta e tyre, e përgatitur që më parë, i pëlqente Jehovait. Në mënyrë të ngjashme, shumë vëllezër e vlerësojnë në lutje madhësinë e kontributit që dëshirojnë të bëjnë. A i ndihmoni ndonjëherë fëmijët tuaj që të venë një kontribut në kuti?
12 Të zbukurojmë mësimin e Shpëtimtarit tonë, Perëndisë: Me anë të mënyrave tona të mira dhe sjelljes së shkëlqyer, mund «ta zbukurojmë në çdo gjë mësimin e Shpëtimtarit tonë, Jehovait». (Titi 2:10) Me fjalë të tjera, pikërisht atje në kongres, mund të tregojmë se e zbatojmë mësimin hyjnor në jetën tonë.
13 Çfarë mund të themi për mënyrat tona? Sot në botë është e rrallë që dikush të ketë konsideratë për të tjerët. Por shërbëtorët e Jehovait, të udhëhequr nga parimet biblike, nuk mendojnë për përparësinë e tyre, por për atë të të tjerëve. (Filip. 2:4) Jemi të ndërgjegjshëm për ata që na rrethojnë. Nuk shtyjmë dhe nuk i hapim rrugë vetes kur mbajmë radhën për ushqimin ose për botimet. Kemi konsideratë për personat e moshuar dhe për fëmijët që mund të jenë në radhë me prindërit dhe që lehtësisht mund të përplasen me të rriturit që nuk i vënë re.
14 Sjellja jonë e shenjtë lë përshtypje të madhe tek ata që na shohin. Vitin e kaluar në një qytet ku mbahej një kongres, një agjent i policisë me 21 vjet shërbim mbi supe ka thënë: «Më ka bërë shumë përshtypje disiplina e njerëzve tuaj. [Ata janë] të jashtëzakonshëm.» Dhe ka shtuar: «Kur na shohin përkrahësit tuaj, na buzëqeshin. Është një shenjë e mirë. Na bëhet qejfi. Është shprehje e miqësisë dhe tregon se nuk kanë asgjë për të fshehur. Gjithashtu, vërejmë se fëmijët rrinë me prindërit dhe janë të disiplinuar. Besomëni, më ka bërë përshtypje. Është një kënaqësi të caktohesh këtu.»
15 Disa administrues kanë shkuar me qëllim në Bethel për të kërkuar që të mbahej një kongres në qytetin e tyre. Shoqata e ka pranuar këtë ftesë të njerëzishme dhe autoritetet e qytetit nuk kanë mbetur të zhgënjyer. Një zyrtar i qeverisë ka thënë: «Jemi entuziastë që një grup me prestigj si i juaji të ketë vendosur të mbajë një kuvend në qytetin tonë. Kemi bërë një përpjekje të dukshme që ju të vinit këtu . . . dhe kemi mbetur mjaft të kënaqur.» Çdo vëlla dhe çdo motër, me sjelljen e tyre të shkëlqyer, kanë kontribuar në dëshminë e madhe që është dhënë lokalisht.
16 A do ta zbukuroni personalisht mësimin e Shpëtimtarit tonë, Perëndisë, me sjelljen tuaj shembullore? Ja disa mënyra se si mund ta bëni:
Veshja dhe krehja: Ndërsa jemi në kongres, nuk duhet ta konsiderojmë veten sikur jemi në pushime. Po i paraqitemi Jehovait për t’u mësuar prej tij. Meqenëse gjërat janë kështu, a nuk duhet të vishemi siç bëjmë kur shkojmë për të marrë pjesë në mbledhjet në Sallën e Mbretërisë? (1. Tim. 2:9, 10) Përveç kësaj duhet të kemi kujdes për atë që veshim pas përfundimit të seancave. Kur kthehemi në banesën tonë, a do të ishte koherente që, pavarësisht nga mosha, të hiqnim rrobat modeste dhe dinjitoze që kishim në kongres për të veshur rroba që do të na jepnin një aspekt të shkujdesur dhe të çrregullt si të shumë njerëzve të botës? A nuk do të linte kjo përshtypjen se rrobat që veshim në mbledhje janë më tepër një kostum, sesa një pasqyrim i mënyrës sonë të të jetuarit? Mos harroni se mbajmë emrin e Jehovait dhe secili prej nesh duhet të përpiqet që asnjë akuzë e ligjshme të mos shkojë në rrugën e së vërtetës.
Duhet t’u kujtohet kandidatëve për pagëzim që në një rast kaq të shenjtë nuk është e përshtatshme të vishen bluza me slogane botërore, sigla ose reklama të prodhimeve të ndryshme. Pleqtë duhet të rregullojnë që pyetjet e pagëzimit të bëhen mjaft kohë më parë dhe që secilit person që do të pagëzohet t’i komunikohet me kohë nëse është i aprovuar për pagëzim apo jo. (Gjatë kohës që konsiderohen pyetjet mund të jetë rasti i duhur për të dhënë sugjerime mbi veshjen e përshtatshme dhe modeste që do të përdoret për pagëzim.) Nuk është e nevojshme që kandidatët për pagëzim të aprovuar nga pleqtë të japin emrin e tyre në ndonjë repart të kongresit.
Mjete regjistrimi: Videokamerat lejohen, por, sigurisht që keni konsideratë për të tjerët. Nuk do të ishte dashamirëse që për të filmuar programin t’u pengonim pamjen kongresistëve të tjerë. Nëse mund të filmoni me mençuri nga vendi juaj, nuk ka kundërshtime. Por mos harroni se videokamerat ose magnetofonat nuk duhet të lidhen në impiantin elektrik ose akustik të kongresit, as të vendosen këto aparate në rrugën e kalimit mes rreshtave apo në pika të tjera të kalimit.
Vende për t’u ulur: Mos harroni se MUND TË REZERVOHEN VENDE VETËM PËR PJESËTARËT E RRETHIT TË NGUSHTË FAMILJAR DHE PËR ATA QË NDOSHTA UDHËTOJNË ME NE. Në të gjitha kongreset do të ketë sektorë të veçantë për të moshuarit dhe për të paaftët. Kini konsideratë për të moshuarit. Në të kaluarën disa vëllezër me moshë të thyer kanë qenë të detyruar të kërkojnë vende në pika më pak të arritshme, sepse vendet në sektorin e tyre të rezervuar kanë qenë të zëna nga më të rinjtë.
Sende personale: Sugjerojmë që të pakësoni në minimum gjërat personale për të marrë në kongres. Nëse diçka nuk rri nën kolltuk, është më mirë ta lëmë në shtëpi.
Literatura dhe shërbimi i ushqimit: Të gjithë ne duhet të tregojmë mirënjohje për dhuratat e mira të Perëndisë, duke u kujdesuar që asgjë të mos shpërdorohet. (Gjoni 6:12) Ashtu si në të kaluarën, sugjerojmë që vetëm një pjesëtar i familjes të shkojë të marrë ushqim për familjen. Që të mos marrim më shumë se sa kemi nevojë, përse të mos bëjmë një listë për çka dëshiron secili familjar dhe pastaj t’i përmbahemi listës kur kërkojmë ushqim? Kini parasysh se ushqimi nuk duhet të çohet jashtë vendit të kongresit për ta konsumuar më vonë në ndonjë vend tjetër. Prindërit duhet t’u shpjegojnë fëmijëve rëndësinë e mos shpërdorimit. Duam të tregojmë konsideratë të dashur për të tjerët edhe kur shpërndahet literatura.
17 Të nxitur nga konsiderata e dashur për të tjerët, rregulloni që të arrini përpara çdo ditë.
18 Sa privilegj i madh është që të jemi të mësuar prej Jehovait! Koha, energjitë dhe burimet materiale që do të përdorim këtë verë për të mbështetur kongresin krahinor «Mësimi hyjnor» do të na sjellin dobi të qëndrueshme frymore si ne ashtu edhe familjes sonë.
Përkujtesë për kongresin krahinor
Dinjiteti i duhur: Është e rëndësishme që të gjithë të pranishmit të mbajnë dinjitetin e duhur, duke e konsideruar me nderim të thellë vendin e asamblesë si «shtëpinë e Perëndisë». (Psl. 55:14) Gjatë fjalimeve, këngëve dhe veçanërisht lutjeve, shmangni çdo gjë që mund të shpërqëndrojë vëmendjen e të tjerëve që ndjekin programin. Të vish vërdallë pa qenë e nevojshme, të llomotitësh ose të përdorësh fleshin e aparateve fotografike ose videokamerat, duke tërhequr vëmendjen e atyre që përpiqen të përqëndrohen mbi programin, nuk do të ishte shenjë respekti. Me kujdesin tonë dhe me sjelljen e shkëlqyer do të tregojmë se e çmojmë sinqerisht mësimin hyjnor dhe se e kuptojmë që kemi shkuar në kongres për t’u mësuar prej Jehovait.
Karrocat e fëmijëve: Në shumë zona nuk mund të sillen karrocat në vendet ku mbahen asambletë publike. Meqë mund të ketë vërshime nga turmat e njerëzve të shumtë, karrocat e fëmijëve përbëjnë një rrezik të mundshëm jo vetëm për fëmijët, por edhe për të rriturit të cilët mund të pengohen. Ju lutemi, pra, që të mos i sillni në vendin ku mbahet kongresi. Bashkëpunimi juaj në lidhje me këtë do të jetë i çmuar.
Pagëzimi: Kandidatët për pagëzim duhet të zënë vende në sektorin që është rezervuar për ta, para se të fillojë programi të shtunën në mëngjes. Secili prej atyre që do të pagëzohen duhet të marrë me vete një kostum banjoje modest dhe një peshqir. Pas fjalimit të pagëzimit dhe lutjes nga ana e oratorit, drejtuesi i seancës do t’u japë atyre që do të pagëzohen udhëzime të shkurtra dhe do të ftojë për të kënduar një këngë. Pas strofës së fundit, përcjellësit do t’i udhëheqin kandidatët për pagëzim në vendin e zhytjes ose në mjetet e transportit që do t’i çojë. Meqë pagëzimi, si simbol i dedikimit personal, është një çështje intime e individuale në mes të individit dhe Jehovait, nuk janë parashikuar të ashtuquajturat «pagëzime partneri», ku dy ose më shumë prej atyre që do të pagëzohen përqafohen ose mbahen për dore gjatë pagëzimit.
Shërbimi vullnetar: Shërbimi vullnetar është i nevojshëm për mbarëvajtjen e një kongresi krahinor. Edhe nëse mund të punoni vetëm për një pjesë në kongres, puna juaj do të vlerësohet. Nëse mund të jepni një dorë, paraqituni në repartin e Shërbimit Vullnetar, sapo të arrini në vendin e kongresit. Edhe fëmijët nën 16 vjeç mund të kontribuojnë në mbarëvajtjen e kongresit, por duhet të punojnë së bashku me një nga prindërit ose me një të rritur të besuar.
Distinktivët: Ju porosisim që distinktivët t’i vendosni në veshje në një mënyrë që të dallohen mirë qoftë në kongres ashtu edhe gjatë udhëtimit vajtje-ardhje. Shpesh kjo na lejon që të japim një dëshmi të madhe ndërsa udhëtojmë. Identifikimi si pjesëmarrës në kongres nga një distinktiv i plotësuar do të lehtësojë veprimet e shërbimit të ushqimit të thjeshtësuar. Pajisja me distinktivë duhet të bëhet nëpërmjet kongregacionit; nuk do të jenë në dispozicion në kongres.
Identifikimi personal: Përveç distinktivit të kongresit krahinor «Mësimi hyjnor», jeni të ftuar që të merrni me vete Deklaratën Mjekësore. Pjesëtarët e familjes Bethel dhe pionierët duhet të marrin me vete edhe kartën e identifikimit.
Paralajmërime: Kini kujdes nga vjedhësit dhe nga hajdutët e çantave, të cilët tërhiqen nga grumbullimet me shumë njerëz. Mos lini asnjë send me vlerë të paruajtur mbi kolltukët e lokalit të kongresit. Është marrë vesh, gjithashtu, se individë pa skrupuj janë përpjekur që të bindin disa fëmijë që të largohen nga vendi i kongresit. Ju lutemi të kini kujdes.