Predikimi shtëpi më shtëpi
1. Çfarë pyetjeje lind në lidhje me shërbimin shtëpi më shtëpi dhe pse?
1 «Ata që kanë përvojë në përhapjen e së vërtetës në mënyra të ndryshme, mund të jenë më se dakord që fushata e predikimit shtëpi më shtëpi me anë të AGIMI I MIJËVJEÇARIT, tani për tani është, pa dyshim, mënyra më e efektshme për të predikuar të vërtetën.» Këto fjalë që u botuan në revistën Kulla e Rojës e Sionit e 1 korrikut 1893 (anglisht), theksonin vlerën e shërbimit shtëpi më shtëpi. Njerëzit në të gjithë botën e konsiderojnë këtë si një tipar dallues të Dëshmitarëve të Jehovait. A është akoma e efektshme kjo mënyrë shërbimi, duke pasur parasysh se në disa vende sa vjen e bëhet më e vështirë t’i gjesh njerëzit në shtëpi?
2. Çfarë baze biblike ekziston për dhënien e dëshmisë shtëpi më shtëpi?
2 Biblike dhe e rëndësishme: Dhënia e dëshmisë shtëpi më shtëpi bazohet në Bibël. Jezui i udhëzoi 70 dishepujt e tij të shkonin dy nga dy në shtëpitë e njerëzve. (Luka 10:5-7) Pak pas vdekjes së Jezuit, Bibla thotë për dishepujt e tij: «Çdo ditë, në tempull dhe shtëpi më shtëpi, ata mësonin dhe shpallnin pareshtur lajmin e mirë.» (Vep. 5:42) Edhe apostulli Pavël mësonte me zell shtëpi më shtëpi.—Vep. 20:20.
3. Cilat janë disa përparësi të dëshmisë shtëpi më shtëpi?
3 Edhe sot, dëshmia shtëpi më shtëpi vazhdon të jetë një mënyrë e rëndësishme për të përhapur lajmin e mirë. Na jep mundësinë që në mënyrë sistematike dhe të rregullt ‘të kërkojmë’ ata që e meritojnë. (Mat. 10:11) Në përgjithësi njerëzit janë më rehat në shtëpinë e tyre. Duke folur me ta ballë për ballë, pra duke u dëgjuar zërin, duke parë shprehjet e fytyrës dhe rrethanat e tyre, kemi mundësinë të dallojmë çfarë u intereson dhe çfarë i shqetëson. Zakonisht kjo është mundësia më e mirë për të zgjeruar bisedën me ta.
4. Si mund ta bëjmë më frytdhënës shërbimin shtëpi më shtëpi?
4 Të bëjmë rregullime në jetën tonë: Apostulli Pavël u tregua i gatshëm të bënte rregullime në jetën e tij «për hir të lajmit të mirë». (1 Kor. 9:23) Ndoshta mund të rregullojmë programin tonë dhe të dalim në shërbim atëherë kur mund të gjejmë më shumë njerëz në shtëpi, si për shembull në mbrëmje, në fundjavë ose në ditët pushim. Mbani shënim ato shtëpi ku nuk gjeni njeri dhe përpiquni përsëri një ditë tjetër të javës ose në një orar tjetër.
5. Si mund t’i përfshijmë ata që kanë kufizime shëndetësore në shërbimin shtëpi më shtëpi?
5 Edhe individët që kanë kufizime shëndetësore mund të marrin pjesë në predikimin shtëpi më shtëpi. Ndoshta mund të vëmë si synim që t’i marrim me vete në ato shtëpi ku mund të shkohet lehtë, e kështu u japim mundësi të predikojnë me një ritëm që mund ta përballojnë. Një motër që kishte vështirësi në frymëmarrje mund të predikonte vetëm një shtëpi çdo gjysmë ore. Megjithatë, sa e kënaqur dhe e lumtur ishte që mund të predikonte edhe ajo me grupin!
6. Pse duhet të dëshmojmë rregullisht shtëpi më shtëpi gjatë shërbimit tonë?
6 Në veprën e predikimit shtëpi më shtëpi vazhdojnë të gjenden shumë nga ata që janë ngjashëm deleve. Kur një lajmëtar trokiti në një derë, iu përgjigjën: «Urdhëroni. E di kush jeni. Isha duke iu lutur Perëndisë të më dërgonte dikë që të më ndihmonte, dhe pastaj dëgjova trokitjen tuaj. Ai më dëgjoi dhe ju dërgoi ju.» Rezultatet provojnë se Jehovai po e bekon këtë mënyrë shërbimi. (Mat. 11:19) Jini të vendosur që të dëshmoni rregullisht shtëpi më shtëpi gjatë shërbimit tuaj!