Të prezantojmë me efektshmëri librin Të jetosh përgjithmonë
1 Jezui ishte mjeshtër në përdorimin e hyrjeve. Ai dinte se çfarë të thoshte për të nxitur interesin. Në një rast, e filloi bisedën me një grua samaritanase thjesht duke i kërkuar asaj që t’i jepte ujë për të pirë. Kjo tërhoqi menjëherë vëmendjen e saj, sepse ‘Judejtë nuk shoqëroheshin me Samaritanët’. Ajo bisedë ka mundësi të ketë ndihmuar atë dhe shumë të tjerë të bëhen besimtarë. (Gjon. 4:7, 41, Dio) Ne mund të mësojmë nga shembulli i tij.
2 Kur përgatitesh për të ofruar librin Të jetosh përgjithmonë, pyet veten: «Cilat janë shqetësimet aktuale të njerëzve në territorin tonë? Çfarë do ta tërhiqte një adoleshent, një të moshuar, një burrë apo një grua?» Ti mund të përgatitësh më shumë se një hyrje dhe të planifikosh për të përdorur atë që është më e përshtatshme për situatën.
3 Meqë prishja e jetës familjare shqetëson shumë njerëz, mund të thuash:
◼ «Presionet e përditshme të jetës kanë pasur një ndikim të madh mbi familjet sot. Ku mund të gjejnë ndihmë ato? [Lëre të përgjigjet.] Bibla mund të jetë një ndihmë e vërtetë për ne. [Lexo 2. Timoteut 3:16, 17.] Shkrimet mund të ofrojnë udhëheqje të dobishme që mund t’i ndihmojnë familjet të mbijetojnë. Vëre se çfarë thuhet në paragrafin 3 në faqen 238 të këtij botimi, Ti mund të jetosh përgjithmonë në parajsë mbi Tokë.» Lexo paragrafin 3 dhe ofroji librin.
4 Nëse po përdor një raport nga lajmet lokale, mund të thuash:
◼ «A i keni dëgjuar lajmet mbi [përmend një lajm shqetësues të zonës lokale]? Çfarë mendoni mbi këtë? [Lëre të përgjigjet.] A nuk ju habit fakti që bota është katandisur në një rrugë pa krye? Bibla i paratha gjëra të tilla si dëshmi që tregojnë se po jetojmë në ditët e fundit.» Pastaj konsidero informacionin në faqet 150-153 të librit Të jetosh përgjithmonë.
5 Shumë veta janë të shqetësuar mbi problemin e rritjes së krimeve. Ti mund të përdorësh këtë hyrje:
◼ «Ne po flasim me njerëzit mbi çështjen e sigurisë personale. Ka shumë krime përreth nesh dhe ato ndikojnë në jetën tonë. Çfarë mendoni ju se duhet bërë në mënyrë që personat si ju dhe unë të ndihen të sigurt kur kalojnë në rrugë natën?» Mund të lexosh Psalmin 37:10, 11 dhe të theksosh bekimet që do të sjellë Mbretëria e Perëndisë, duke përdorur faqet 156-158 të librit Të jetosh përgjithmonë.
6 Nëse preferon një hyrje të thjeshtë, mund të thuash diçka të tillë:
◼ «Ne po inkurajojmë fqinjët tanë të konsiderojnë të ardhmen e madhe që Bibla na ofron. [Lexo Zbulesën 21:3, 4.] A ju tingëllojnë të mira këto fjalë? [Lëre të përgjigjet.] Kapitulli 19 i këtij botimi, nxjerr në pah bekime të tjera që njerëzit e bindur do të provojnë nën Mbretërinë e Perëndisë.» Nëse ka interes, ofroji librin Të jetosh përgjithmonë.
7 Përgatitja e një hyrjeje të efektshme mund të të ndihmojë të prekësh ata që kanë uri për drejtësinë.—Mat. 5:6.