Prindër: Stërvitini fëmijët tuaj për të predikuar
1 Kongregacionet tona janë të bekuara me shumë fëmijë, që kanë një dëshirë të sinqertë për t’i shërbyer Perëndisë. (Ekl. 12:1) Ata përfshihen mes atyre personave të ftuar nga Jehovai, për të marrë pjesë në lavdërimin e tij. (Psal. 148:12-14) Prandaj, stërvitja e përditshme që prindërit u japin fëmijëve të tyre, duhet të përfshijë mësimin mbi mënyrën se si duhet të marrin pjesë në ndarjen e besimit të tyre me të tjerët, në veprën e predikimit të Mbretërisë.—Ligj. 6:6, 7.
2 Stërvitini fëmijët me hapa progresivë: Fëmijët e meritojnë të stërviten që në një moshë shumë të njomë, për të shoqëruar prindërit e tyre në shërbim. Përpara se të shkoni në shërbim, përgatitini fëmijët tuaj për të marrë pjesë në një mënyrë domethënëse. Përcaktoni që më parë se çfarë prisni prej tyre që të bëjnë, kur ndodhen në derën e një shtëpie. Fëmijët shumë të vegjël mund të japin fletushka dhe ftesa, si dhe t’i ftojnë njerëzit në Sallën e Mbretërisë. Fëmijët më të rritur, që lexojnë mirë, mund të ftohen për të lexuar shkrimet, kur ndodhen në derë. Ata mund të ofrojnë revista, duke përdorur një prezantim të shkurtër. Ndërsa fitojnë përvojë, stërvitini që në prezantimet e tyre të përdorin Biblën. Shumë lajmëtarë të rinj në moshë, kanë filluar itinerarin e tyre të revistave dhe bëjnë rregullisht rivizita. Për një fëmijë, më e mira është që të punojë me një të rritur sesa me një bashkëmoshatar tjetër. Personi i rritur mund t’i shpjegojë pronarit të shtëpisë se i riu po stërvitet në shërbim.
3 Një vogëlushe u kërkoi ndihmë pleqve që të mund të kualifikohej si një lajmëtare e Mbretërisë. Ndonëse në atë kohë ajo s’ishte veçse pesë vjeçe dhe nuk dinte si lexohej, mund ta prezantonte me efektshmëri mesazhin e Mbretërisë nëpër shtëpi. Ajo mbante mend vendin ku ndodheshin shkrimet, e hapte botimin aty, i kërkonte pronarit të shtëpisë që t’i lexonte dhe më pas i jepte shpjegimin.
4 Gjithashtu, fëmijëve duhet t’u mësohet me anë të shembullit të prindërve vlera e pasjes së një programi të mirë, për të marrë pjesë rregullisht në shërbim. Prindërit duhet të vendosin një rutinë të përjavshme e të qëndrueshme për shërbimin dhe t’i përmbahen asaj, kështu që fëmijët e dinë se cila pjesë e javës lihet gjithmonë mënjanë për veprën e predikimit.
5 Kur fëmijët stërviten që në moshë të njomë për ta dashur dhe për të ndjerë kënaqësi në shërbim, ata do të jenë të nxitur për të synuar privilegje më të mëdha në të ardhmen, duke përfshirë ndoshta edhe shërbimin si pionier. (1. Kor. 15:58) Të gjithë ne, duhet t’i inkurajojmë fëmijët që ndodhen mes nesh, për të bërë një progres të mirë si lavdërues të Jehovait.