Të ndërtojmë njëri-tjetrin duke komentuar në mbledhje
1 Në Hebrenjve 10:24 këshillohemi të ‘nxitim njëri-tjetrin në dashuri dhe në vepra të shkëlqyera’. (BR) Kjo përfshin ndërtimin e njëri-tjetrit duke bërë komente domethënëse në mbledhjet e kongregacionit. Përse duhet të komentojmë? Si mund ta bëjmë këtë? Kush përfiton nga kjo gjë?
2 Mendo se sa herë ti përfiton duke dëgjuar të tjerët tek ofrojnë shprehje të thjeshta, të qarta, të cilat rritin kuptueshmërinë tënde dhe të forcojnë frymësisht. Ke privilegjin të bësh po këtë gjë për ta. Kur merr pjesë, tregon dëshirën tënde për të «dhënë ndonjë dhuratë frymore» për inkurajimin e të gjithëve që janë të pranishëm.—Rom. 1:11, 12, BR.
3 Si të bëjmë komente të mira: Mos bëj komente të gjata duke përfshirë çdo mendim në paragraf. Komentet e zgjatura zakonisht nuk arrijnë të japin tamam përgjigjen specifike dhe mund t’i shkurajojnë të tjerët që duan të përgjigjen. Komenti i parë mbi paragrafin duhet të jetë i shkurtër, një përgjigje drejtpërdrejt e pyetjes së shtypur. Ata që ofrojnë komente shtesë, mund të bëjnë pastaj një aplikim praktik të materialit ose të tregojnë se si aplikohen shkrimet. (Shiko Manuali i Shkollës, faqet 90-92, anglisht.)
4 Nëse mendimi që do të komentosh të shkakton njëfarë ankthi, përgatit më përpara një koment të shkurtër dhe kërkoi drejtuesit që të të ftojë ty për të komentuar në atë paragraf. Pasi e bën këtë në disa mbledhje, marrja pjesë do të bëhet më e lehtë. Kujto se Moisiu dhe Jeremia shprehën një mungesë besimi në aftësinë e tyre për të folur në publik. (Dal. 4:10; Jer. 1:6, shënimi.) Por Jehovai i ndihmoi ata që të flitnin në emër të tij dhe do t’ju ndihmojë edhe juve.
5 Kush do të përfitojë nga komentet e tua? Përfiton ti vetë sepse komentet e tua bëjnë që e vërteta të të ngulitet edhe më fort në mendje dhe në zemër, duke e bërë më të lehtë për ty kujtimin e informacionit më vonë. Gjithashtu, edhe të tjerët përfitojnë duke dëgjuar shprehjet e tua ndërtuese. Ne inkurajohemi kur të gjithë, qofshin me përvojë, të rinj, të druajtur ose persona të rinj në të vërtetën, bëjnë përpjekje për të shprehur besimin e tyre në mbledhjet e kongregacionit.
6 Jemi të sigurt që do të vërejmë se ‘oh sa të mira janë fjalët në kohën e duhur’, kur ato përdoren për të ndërtuar njëri-tjetrin në mbledhje!—Prov. 15:23.