Të përdorim kohën me efektshmëri
1 Secili prej nesh, ka çdo javë të njëjtën sasi kohe në dispozicion. Ajo pjesë që i kushtojmë përhapjes së lajmit të mirë, është veçanërisht e vlefshme, pasi është kohë e harxhuar në një vepër jetëshpëtuese. (Rom. 1:16) Çmueshmërinë tonë për këtë e tregojmë duke u përgatitur mirë për shërbimin që kemi planifikuar të bëjmë, duke ardhur në kohë në mbledhjet për shërbim dhe duke u nisur pa vonesë për në territor. Do të ishte më mirë të fillonim predikimin se sa të vonoheshim. Pasi Jehovai na ka mësuar se «për çdo gjë ka një kohë të caktuar», duhet ta përdorim me të vërtetë në mënyrë të efektshme kohën që kemi rezervuar për shërbim.—Ekl. 3:1, BR.
2 Ta përdorim kohën me mençuri: Kur i përmbahemi vendosmërisht një programi që na lejon të kemi një pjesëmarrje të rregullt në shërbim, vijnë si rezultat shumë bekime. Natyrisht, rezultatet e mira që arrijmë në shërbim, duhet të jenë në përpjestim me kohën që harxhojmë në këtë vepër. Me disa rregullime të vogla të rutinës sonë, a mund të lëmë më shumë kohë për veprën e shërbimit? Për shembull, pas aktivitetit me revista të shtunën, a mund të harxhojmë pak kohë më shumë për të bërë disa rivizita? Nëse dalim në shërbim të dielën, a mund të harxhojmë edhe njëfarë kohe për të bërë rivizita ose ndonjë studim biblik? A do të ishte e mundur që krahas aktivitetit shtëpi më shtëpi të jepnim edhe pak dëshmi në rrugë? Me këto ose me mënyra të tjera, ne mund të arrijmë të përmirësohemi në shërbim.
3 Ndërsa jemi në shërbim, mund edhe ta çojmë dëm kohën e vlefshme, nëse nuk jemi të kujdesshëm. Natyrisht, kur kushtet e motit janë të ashpra, një pushim i shkurtër do të na bënte mirë dhe do të na ndihmonte që të vazhdonim më tej. Por, le të jemi të ekuilibruar, pasi ndërprerje të tilla mund të mos jenë gjithmonë të nevojshme.
4 Vitet e fundit, gjetja e njerëzve në shtëpi është bërë gjithnjë e më e vështirë. Për të përballuar këtë situatë, shumë lajmëtarë dëshmojnë nga shtëpia në shtëpi në orare të ndryshme të ditës. Përse të mos provojmë të dëshmojmë pasdite vonë ose herët në mbrëmje?
5 Është më mirë që të mos jemi të zënë me biseda me njëri-tjetrin, ndërsa japim dëshmi në rrugë. Në vend të kësaj, le të qëndrojmë të ndarë nga njëri-tjetri dhe t’u afrohemi njerëzve që të mund të fillojmë biseda me ta. Kështu koha do të përdoret më me efektshmëri dhe vepra do të na sjellë edhe më shumë gëzim.
6 Të kërkojmë mundësi për të dëshmuar: Kur një pronare shtëpie tha se nuk ishte e interesuar, një Dëshmitare e pyeti nëse kishte ndonjë person tjetër në shtëpi me të cilin mund të fliste. Kjo çoi në një bisedë me burrin e shtëpisë, i cili kishte qenë i sëmurë prej shumë vitesh dhe pjesën më të madhe të kohës e kalonte në shtrat. Shpresa e paraqitur në Fjalën e Perëndisë, i përtëriu interesin për jetën. Shpejt braktisi shtratin dhe filloi të ndiqte mbledhjet në Sallën e Mbretërisë si edhe të ndante besimin e tij të sapogjetur me të tjerët.
7 Një motër adoleshente zbatoi sugjerimin për të dalë në shërbim përpara se të shkonte në Studimin e Librit të Kongregacionit. Në derën e parë ku trokiti, takoi një vajzë 13-vjeçare, e cila e dëgjoi me vëmendje dhe e pranoi literaturën që iu ofrua. Të nesërmen në shkollë, kjo motër pa po këtë vajzë. Pa e bërë të gjatë, i ofroi që të studionin Biblën së bashku dhe vajza pranoi.
8 Të shfrytëzojmë kohën për një kualifikim të mëtejshëm: Pjesëmarrja e rregullt në shërbim, na ndihmon që të kualifikohemi më tej si prezantues të lajmit të mirë. A mund të përmirësojmë aftësinë tonë për të filluar një bisedë në derë, duke përdorur një hyrje më të efektshme? A mund të bëhemi mësues më të aftë, ndërsa drejtojmë një studim biblik në shtëpi? Duke e bërë këtë, mund ta përdorim me të vërtetë me efektshmëri kohën në shërbim dhe mund ta bëjmë më të frytshëm shërbimin tonë.—1. Tim. 4:16.
9 Pasi «koha tanimë është shkurtuar», jeta jonë duhet të mbushet me vepra të krishtere. (1. Kor. 7:29). Kohës së caktuar për aktivitetin e predikimit, duhet t’i jepet përparësi kryesore. Le të kemi një pjesëmarrje të plotë e të zellshme në shërbim! Koha është një pasuri e mrekullueshme dhënë nga Jehovai. Le ta përdorim gjithmonë me mençuri dhe në mënyrë të efektshme.
[Kutia në faqen 4]
Të shqyrtojmë këto sugjerime:
◼ Të mbërrijmë në kohë në mbledhjet për shërbim.
◼ Duke pasur parasysh rrethanat, të predikojmë në grupe të vogla.
◼ Të shmangim vonesat për të shkuar në territor.
◼ Të punojmë territorin në një orar kur shumica e njerëzve ndodhen në shtëpi.
◼ Nëse nuk ka rrezik, të punojmë ndonjëherë dhe vetëm.
◼ Të bëjmë rivizita sa më afër territorit që jemi duke punuar.
◼ Të vazhdojmë shërbimin kur të tjerët vonohen në ndonjë derë.
◼ Kurdo që të jetë e mundur, në varësi të rrethanave, të vazhdojmë në shërbim më shumë se një orë.