Shfrytëzoje sa më mirë kohën në shërbim
Dëshmitarët e Jehovait kaluan në shërbim më shumë se 1.945.487.604 orë gjatë vitit të shërbimit 2014—dëshmi e qartë e vendosmërisë sonë për të qenë të zënë në veprën e Jehovait! (Psal. 110:3; 1 Kor. 15:58) Meqë «koha që mbetet është shkurtuar», a mund ta përdorim kohën e çmuar që kalojmë në shërbim për të folur me më shumë njerëz?—1 Kor. 7:29.
Për ta shfrytëzuar në maksimum kohën në shërbim duhet të jemi elastikë. Për shembull, nëse rregullisht kalon një orë a më tepër në një formë shërbimi pa folur me dikë, a mund të bësh rregullime që të gjesh më shumë njerëz për të folur? Është e vërtetë se rrethanat ndryshojnë nga njëri vend në tjetrin. Gjithsesi, sugjerimet e mëposhtme mund të të ndihmojnë ta shfrytëzosh më mirë kohën që ‘të mos godasësh ajrin’.—1 Kor. 9:26.
Dëshmia shtëpi më shtëpi: Për dekada të tëra, lajmëtarët e kanë pasur zakon ta nisin ditën në shërbim duke predikuar shtëpi më shtëpi. Por meqë shumë njerëz punojnë ditën, pse të mos e provosh këtë formë shërbimi pasdite ose në orët e para të mbrëmjes, atëherë kur njerëzit gjenden në shtëpi e janë më të qetë? Në fakt, gjatë ditës dëshmia rrugore dhe ajo në territoret tregtare mund të jetë më frytdhënëse.
Dëshmia publike: Tryezat dhe stendat e lëvizshme duhen vendosur në zona me shumë kalimtarë brenda territorit të kongregacionit. (Shih Shërbimi ynë i Mbretërisë, korrik 2013, f. 5.) Nëse në zonën e caktuar për dëshmi publike numri i kalimtarëve pakësohet, Komiteti i Shërbimit i Kongregacionit mund të vendosë që stenda ose tryeza të zhvendoset në një zonë tjetër ku ka më shumë lëvizje.
Rivizitat dhe studimet biblike: A mund t’i programosh rivizitat dhe studimet biblike në orare kur forma të tjera të shërbimit janë më pak të frytshme? Për shembull, nëse predikimi shtëpi më shtëpi është më i efektshëm të shtunave në mëngjes, a mund t’i bësh studimet pasdite ose në mbrëmje? Nëse lajmëtarët që udhëtojnë me makinë duhet të bëjnë rivizita, a mund të ndahen në grupe më të vogla në mënyrë që të bëjnë më shumë në shërbim?
Edhe pse kohën që jemi në shërbim e llogaritim si shërbim, kënaqemi më tepër kur ne vetë kemi rezultate. Nëse sheh se një formë shërbimi nuk jep rezultat në një orar të caktuar, provo një formë tjetër. Lutju për drejtim Jehovait, «Zotërisë të të korrave», që ta shfrytëzosh sa më mirë kohën në shërbim!—Mat. 9:38.