A po punojmë me një qëllim?
1 Jehovai është Perëndi i qëllimit. (Isa 55:10, 11) Ne nxitemi që ta imitojmë atë. (Ef 5:1) Kjo sigurisht duhet demonstruar me mënyrën se si e kryejmë shërbimin tonë. Prandaj, pyetja me vend që bëhet është: «A po punojmë me një qëllim?»
2 Predikimi që bëjmë shtëpi më shtëpi, dëshmia joformale dhe shpërndarja e literaturës, janë të gjitha pjesë të një shërbimi të qëllimshëm. Por të mos harrojmë se detyra jonë përfshin jo vetëm predikimin, por edhe bërjen e dishepujve. (Mt 28:19, 20) Pas mbjelljes së farave të së vërtetës në lidhje me Mbretërinë, duhet të kthehemi që t’i ujitim ato dhe t’u kushtojmë një kujdes të vazhdueshëm, duke pritur që Jehovai t’i bëjë të rriten. (1 Kor 3:6) Ne duhet të jemi të ndërgjegjshëm në lidhje me bërjen e rivizitave dhe fillimin e studimeve biblike.
3 Të zgjerojmë shërbimin tonë: Provon gjithmonë një ndjenjë të mirë kur kthen kokën pas për të parë atë që ke bërë në shërbim e i thua vetes: «E arrita synimin që i kisha vënë vetes.» Siç shkruhet në 2 Timoteut 4:5, Pavli nxit: «Përmbushe plotësisht shërbesën tënde.» Kjo përfshin edhe shtimin e përpjekjeve tona për të ndjekur të gjithë interesin e gjetur. Në programin tonë javor të shërbimit, të planifikojmë një kohë të përcaktuar qartë për të bërë rivizita. Le të punojmë drejt synimit për t’u përpjekur që të fillojmë studime biblike me ata që janë të prirur për nga drejtësia. Ky duhet të jetë qëllimi ynë kur dalim në shërbim.
4 Le t’i pyesim lajmëtarët se si janë ndier kur kanë parë studentët e tyre të Biblës duke u pagëzuar në ndonjërën prej asambleve. Ishin të gëzuar, ka mundësi po aq sa edhe vetë ata studentë që pagëzoheshin. Kishin arritur një qëllim të madh! Një bërës dishepujsh në lidhje me këtë u shpreh: «Të bësh dishepuj do të thotë të bësh më shumë lavdërues të Jehovait. Do të thotë jetë për ata që e pranojnë të vërtetën. Ajo që dua është pikërisht t’u mësoj të vërtetën të tjerëve, është diçka jashtëzakonisht e bukur! . . . Shumë prej atyre që kanë filluar ta duan Jehovain, janë bërë miq mjaft të dashur për mua.»
5 Le të përfytyrojmë çdo të thotë të arrish të ndihmosh një person që të bëhet një shërbëtor i dedikuar i Jehovait! Çfarë shkaku për gëzim! Fryte të tilla janë rezultat i një pune me një qëllim në shërbim.—Kol 4:17.