Të imitojmë paanshmërinë e Jehovait
1 Jehovai interesohet për njerëzit. Ai pranon me paanësi këdo që bën vullnetin e tij. (Vep. 10:34, 35) Jezui, ngjashëm Perëndisë, ishte i paanshëm kur u predikonte njerëzve. (Luka 20:21) Ne duhet të imitojmë shembullin e tyre, siç bëri Pavli, i cili shkroi: «Është i njëjti Zotëri mbi të gjithë, i cili është i pasur kundrejt të gjithë atyre që e thërrasin.»—Rom. 10:12, BR.
2 Duke i shpallur lajmin e mirë çdo personi që takojmë, ne i sjellim lavdi Perëndisë. Ne duhet të vazhdojmë ta ndajmë këtë mesazh të mrekullueshëm me të tjerët, pavarësisht nga raca, pozita shoqërore, arsimimi, ose gjendja financiare që ata kanë. (Rom. 10:11-13) Kjo do të thotë t’u predikosh atyre që do të dëgjojnë: burra, gra, të rinj e të moshuar. Ne duhet të trokasim në çdo derë, për t’i dhënë çdo pronari shtëpie mundësinë për të dëgjuar të vërtetën.
3 Të tregojmë interes për çdo person: Synimi ynë është që të kontaktojmë këdo që mundim. Me këtë në mendje, disa lajmëtarë kanë pasur sukses duke u dhënë dëshmi personave në zyrat e mjekëve, në spitale, në azile, në zyrat e qendrës së ndihmës sociale dhe në qendrat e riaftësimit. Veç kësaj, lajmëtarët u kanë dhënë dëshmi sipërmarrësve të varrimeve, mbikëqyrësve dhe këshilltarëve të shkollave, si edhe gjykatësve. Kur u afrohemi nëpunësve, është e përshtatshme që të shprehim çmueshmërinë për shërbimet e dobishme që bëjnë në zonë. Të jemi të respektueshëm dhe të zgjedhim artikuj të kohës që kanë të bëjnë veçanërisht me llojin e punës së tyre dhe me problemet që lidhen me të.
4 Në një rast, një motër arriti të fliste me një gjykatës në zyrën e tij. Pas një bisede të gjallë, ai bëri vetë këtë koment: «A e di se çfarë më pëlqen te Dëshmitarët e Jehovait? Ata kanë parime të bazuara mirë prej të cilave nuk devijojnë.» Këtij personi me influencë iu dha një dëshmi e shkëlqyer.
5 Ne nuk mund të lexojmë zemrat e njerëzve. Por, duke folur me këdo që takojmë, ne tregojmë besimin që kemi në aftësinë e Perëndisë për të drejtuar veprën tonë. Veç kësaj, kjo gjë u jep njerëzve privilegjin për të dëgjuar dhe për t’iu përgjigjur këtij mesazhi shpresëdhënës. (1. Tim. 2:3, 4) Le ta përdorim me mençuri kohën dhe të përpiqemi të imitojmë paanshmërinë e Jehovait, duke arritur të gjithë njerëzit që mundim me lajmin e mirë!—Rom. 2:11; Efes. 5:1, 2.