Programi i asamblesë së re qarkore
Sipas një përcaktimi fjala frikë do të thotë «respekt dhe nderim i thellë, veçanërisht ndaj Perëndisë». Ky përcaktim përshkruan frikën e shëndetshme, së cilës Shkrimet i referohen si «fillimi i mençurisë». (Psal. 111:10, BR) Në dallim me këtë, në botën e Satanait, e cila na rrethon, sundon një tjetër lloj frike. Si mund ta shmangim këtë ndjenjë të pashëndetshme ndërsa zhvillojmë një frikë plot nderim ndaj Jehovait? Programi i asamblesë së re qarkore për vitin e shërbimit 2002 trajton pikërisht këtë pyetje. Tema është: «Kini frikë Perëndinë dhe jepini lavdi.» (Zbul. 14:7) Do të kuptojmë shumë mënyra në të cilat frika e Jehovait na sjell dobi si individë dhe si organizatë.
Megjithëse frika mund të nënkuptojë ankth ose mungesë guximi, si edhe ngurrim për të përballuar situata të vështira, Bibla thotë: «Lum kushdo që ka frikë nga Zoti.» (Psal. 128:1) Programi i asamblesë do të na tregojë se si mund të përballojmë me sukses sfidat e adhurimit të vërtetë. Do të shohim se si të ndihmojmë të rinjtë në të vërtetën për të kultivuar një frikë të tillë të shëndetshme për Perëndinë, e cila në të vërtetë do t’i motivojë që të duan t’i shërbejnë atij me gjithë zemrën, shpirtin, mendjen dhe forcën e tyre. (Mar. 12:30) Dita e parë përfundon me fjalimin e mbikëqyrësit krahinor që ka temën: «Qëndroni edhe më afër atyre që doni.» Ai do të shpjegojë se si mund të qëndrojmë vigjilentë ndaj përpjekjeve djallëzore për të na larguar nga Jehovai, nga familja jonë dhe nga vëllezërit tanë të krishterë.
«Frikësojuni Jehovait, jo njerëzve» është tema e një simpoziumi prej katër pjesësh në ditën e dytë. Në të do të shpjegohet përse dhe si duhet të kapërcejmë çdo frikë që na pengon të kryejmë plotësisht shërbimin tonë ose që të mbajmë integritetin dhe një ndërgjegje të mirë në shkollë e në vendin e punës. Fjalimi publik «Kini frikë Perëndinë dhe respektoni urdhërimet e tij» bazohet në serinë e ngjarjeve të përshkruara në kapitullin 14 të Zbulesës. Asambleja qarkore do të përfundojë me temën që përmban udhëzimin nxitës «Vazhdoni të ecni në frikën e Jehovait».
Shkolla e Shërbimit Teokratik, Mbledhja model e Shërbimit, fjalimi i pagëzimit dhe përmbledhja e Studimit të Kullës së Rojës, janë momente të tjera kyçe të programit, të cilin ju nuk duhet ta humbitni. Ftojini studentët e Biblës që të marrin pjesë bashkë me ju. Çdokush që dëshiron të pagëzohet duhet të flasë sa më parë me mbikëqyrësin drejtues. Të gjithë do të dëshirojmë të tregojmë frikën tonë të shëndetshme ndaj Jehovait dhe t’i japim atij lavdi duke mos munguar në asnjë pjesë të këtij programi të jashtëzakonshëm!