«Të bëjmë atë që është e mirë ndaj të gjithëve»
1 «Të predikojmë plotësisht fjalën e Perëndisë» dhe «Të jemi të pasur në vepra të shkëlqyera» ishin temat që u përdorën në shtojcat e Shërbimi ynë i Mbretërisë të shkurtit dhe të marsit 2002. (Kolos. 1:25; 1 Tim. 6:18) Në këta numra u nxitëm të bënim më tepër përpjekje për të ndihmuar të interesuarit që të ndiqnin Përkujtimin, të ndihmonim joaktivët që të përfshiheshin sërish në kongregacion dhe të ndihmonim fëmijët tanë e studentët e kualifikuar të Biblës që të fillonin të shpallnin lajmin e mirë. Pa dyshim, kemi pasur njëfarë suksesi nga përpjekjet tona ngulmuese. Tani, «derisa të kemi kohë të volitshme, le të [vazhdojmë të] bëjmë atë që është e mirë ndaj të gjithëve».—Gal. 6:10.
2 T’i ftojmë të jenë përsëri të pranishëm: Vitin e kaluar, në Shqipëri, Përkujtimin e ndoqën rreth 8.000 veta që nuk janë lajmëtarë të lajmit të mirë. Duke qenë se prania e tyre tregon një masë interesi, çfarë duhet të bëjmë për t’i nxitur ata që janë «të prirur drejt jetës së përhershme» të bëhen «besimtarë»? (Vep. 13:48) T’i inkurajojmë të ndjekin mbledhjet e kongregacionit sa më shpejt që është e mundur.
3 Përse të mos e ftojmë një person të interesuar që të ndjekë Studimin e Librit të Kongregacionit për të shijuar një diskutim interesant të profecive të Isaisë? Nëse e kemi të afërm ose të njohur personin e interesuar dhe sipas programit do të mbajmë së shpejti një fjalim në Shkollën e Shërbimit Teokratik, mund ta ftojmë që të vijë e të dëgjojë pjesën tonë. Ta njoftojmë për titujt e fjalimeve publike që do të mbahen në javët e ardhshme. (Në tabelën e informacionit duhet vënë një program i përditësuar.) Të kërkojmë ndonjë mundësi që të zgjojmë te personi dëshirën për të adhuruar Jehovain, dhe sigurisht, nëse nuk është duke studiuar Biblën me ndonjë në kongregacion, me dashamirësi mund t’i ofrojmë një studim.
4 Të vazhdojmë të nxitim joaktivët: Një numër i atyre që kanë ndjekur Përkujtimin, tashmë i janë dedikuar Jehovait. Megjithatë, pas një farë kohe kanë ndaluar së predikuari në mënyrë aktive lajmin e mirë. Por, prapë, Pavli na këshillon «të bëjmë atë që është e mirë . . . sidomos ndaj atyre që janë të lidhur me ne në besim». (Gal. 6:10) Kështu, joaktivëve u duhet kushtuar një vëmendje kryesore.
5 Ndoshta disa i janë përgjigjur tashmë inkurajimit të dhënë nga pleqtë dhe të tjerët për të marrë pjesë përsëri në shërbim. Nëse jemi caktuar nga pleqtë për të punuar me një lajmëtar të riaktivizuar, të mos harrojmë se dashuria jonë për Jehovain dhe për shërbimin do t’i japë atij siguri. Le t’i tregojmë se si marrim pjesë në fusha të ndryshme të shërbimit në mënyrë që ai të gjejë gëzim në të, të ngulmojë në veprën e predikimit dhe të mund të përjetojë bekimet e Jehovait.
6 T’i ndihmojmë lajmëtarët e rinj të kenë një fillim të mbarë: Kur një grua e interesuar nga pak kohë kuptoi se kishte gjetur organizatën e vërtetë të Perëndisë, dëshiroi të fillonte menjëherë shërbimin. Pasi mësoi atë që kërkohej prej saj, tha: «Dua të filloj menjëherë.» Nëse dikush me të cilin kemi qenë duke studiuar Biblën, miratohet tani që të fillojë të marrë pjesë në shërbim, le ta ndihmojmë të kuptojë se është e nevojshme «të fillojë menjëherë». Kështu bëjmë që lajmëtari të ketë një nisje të mbarë. Ta ndihmojmë të zhvillojë zakonin për t’u përgatitur dhe për të marrë pjesë rregullisht në shërbim çdo javë.
7 Nëse është fëmija ynë që është bërë një lajmëtar i ri i papagëzuar, të punojmë me të që të përparojë në përputhje me moshën dhe aftësitë e tij. Pasi i kemi dhënë pak ndihmë ndoshta do të na habisë se sa mirë mund të hyjë në bisedë me dikë, se sa mirë mund të lexojë nga Bibla dhe të ofrojë literaturë. Kur arrin të gjejë në shërbim një person të interesuar, ta stërvitim që të bëjë një rivizitë dhe të ndjekë interesin.
8 Të zgjerojmë shërbimin tonë: A na e lejojnë rrethanat që të rritim pjesëmarrjen në veprën e ungjillëzimit edhe pas periudhës së Përkujtimit? A mund të bëjmë një ose dy orë më shumë çdo javë nga sa bëjmë zakonisht në shërbim? A jemi duke parë që më përpara në kalendar për ndonjë mundësi se kur mund të shërbejmë përsëri si pionier ndihmës? Ose, a mund të bëjmë rregullime në mënyrën tonë të jetesës për të filluar shërbimin e plotkohor? Çdo përpjekje që bëjmë në shërbim, mund ta ndihmojë dikë që të pranojë të vërtetën! (Vep. 8:26-39) Ndërsa shohim përpara në ditët që na presin, le ‘të ndjekim gjithmonë atë që është e mirë ndaj njëri-tjetrit dhe gjithë të tjerëve’!—1 Sel. 5:15.
[Kutia në faqen 3]
Të vazhdojmë të ndihmojmë:
□✔ Të pranishmit në Përkujtim
□✔ Lajmëtarët e riaktivizuar
□✔ Lajmëtarët e rinj të papagëzuar