Fushatë speciale për të shpërndarë broshurën e re
1 Shumë njerëz janë të shqetësuar për kushtet e sotme, por të paktë janë ata që e kuptojnë se përse po jetojmë në kushte të tilla, si do të jetë e ardhmja, dhe se çfarë duhet të bëjmë për të mbijetuar në gjykimin e ardhshëm. (Ezek. 9:4) Për t’i ndihmuar që të kuptojnë domethënien e kohëve në të cilat jetojmë, nga e hëna më 18 tetor deri të dielën më 14 nëntor, do të organizohet një fushatë speciale për të shpërndarë broshurën e re Qëndroni vigjilentë!
2 Broshura mund të ofrohet gjatë shërbimit nga shtëpia në shtëpi, kur bëjmë rivizita, gjatë shërbimit joformal ose në vende publike, si në rrugë ose në treg. Por, broshura Qëndroni vigjilentë! nuk i duhet ofruar kujtdo. Broshura do t’u jepet vetëm atyre që tregojnë interes për atë që thotë Bibla në lidhje me domethënien e ngjarjeve botërore. Atyre që tregojnë pak interes për mesazhin mund t’u ofrohet një fletushkë.
3 Mund të ngjallësh interesin e dikujt duke thënë:
◼ «Shumë njerëz vuajnë nga probleme serioze dhe nga ngjarje tronditëse, që sot janë bërë të zakonshme. [Të përmendim një rast që njihet në atë territor.] A e dini se gjëra të tilla janë parashikuar në Bibël? [Ta lëmë të përgjigjet. Pastaj të lexojmë një shkrim që i përshtatet rastit që përmendëm, si për shembull Mateu 24:3, 7, 8; Luka 21:7, 10, 11; ose 2 Timoteu 3:1-5.] Bibla tregon për domethënien e kohëve në të cilat jetojmë dhe për të ardhmen e njerëzimit. A do të donit të dinit më shumë? [Ta lëmë të përgjigjet. Nëse tregon vërtet interes, t’i ofrojmë broshurën.] Broshura është falas. Nëse keni dëshirë të kontribuoni sadopak për veprën tonë mbarëbotërore, do ta pranonim me kënaqësi.»
4 Ose mund të të duket i efektshëm ky prezantim:
◼ «Sot, shumë njerëz janë të brengosur nga ngjarjet tronditëse ose janë të hidhëruar nga humbjet personale. Disa pyesin se përse nuk i ndalon Perëndia këto gjëra. Bibla na siguron se shumë shpejt Ai do të ndërhyjë për ta lehtësuar njerëzimin nga këto vuajtje. Shikoni se çfarë do të bëjë Perëndia për njerëzit. [Të lexojmë Psalmin 37:10, 11.] A dëshironi të dini më shumë?» Ta përfundojmë prezantimin ashtu si edhe në rastin e mësipërm.
5 Përpiqu t’i marrësh emrin dhe adresën çdo personi që pranon një kopje të broshurës dhe merru vesh me të që të kthehesh për të kultivuar interesin e tij. Për këtë do të të ndihmojë Shërbimi ynë i Mbretërisë, nëntor 2004. Nëse personi tregon shumë interes gjatë vizitës së parë, mund të fillosh menjëherë një studim biblik, duke përdorur ose broshurën Qëndroni vigjilentë! ose botime të tjera si broshura Çfarë kërkon?
6 Kopjet e broshurës së re mund t’i merrni pas Mbledhjes së Shërbimit gjatë së cilës do të trajtohet kjo pjesë. Sugjerohet që lajmëtarët dhe pionierët si fillim të marrin vetëm aq kopje sa do t’u nevojiten gjatë ditëve të para të fushatës. Jehovai e bekoftë këtë veprimtari speciale në lavdi të tij dhe në dobi të atyre me zemër të ndershme kudo ndodhen!—Psal. 90:17.