T’u japim shpresë të varfërve
1 Jezui u tregoi vëmendje të veçantë atyre që ishin të varfër. Kishte raste kur, me anë të mrekullive, u dha ndihmë materiale dhe shëroi të sëmurët, por interesimi i tij kryesor ishte t’u shpallte ‘lajmin e mirë’ të varfërve. (Mat. 11:5) Edhe sot, të varfrit janë ndër ata që po nxjerrin dobi nga shërbimi i krishterë.—Mat. 24:14; 28:19, 20.
2 Shpresë e vërtetë: Krerët e «krishterimit» shpesh u premtojnë të varfërve se do të begatohen nëse tregohen bujarë me kishën. Megjithatë, Bibla tregon që vetëm Mbretëria e Perëndisë do t’i japë fund varfërisë dhe do të zgjidhë të gjitha problemet e njerëzimit. (Psal. 9:18; 145:16; Isa. 65:21-23) Duke u treguar të varfërve se çfarë mëson vërtet Bibla, u japim shpresë dhe i ndihmojmë që të plotësojnë nevojën e tyre për ta njohur dhe për ta adhuruar Perëndinë.—Mat. 5:3.
3 Farisenjtë në ditët e Jezuit i përçmonin të varfrit duke i quajtur me përbuzje am-harets, ose «njerëz të tokës». Megjithatë, Jezui e konsideronte ‘gjakun e tyre’, ose jetën e tyre, si ‘të çmuar’. (Psal. 72:13, 14) Mund të imitojmë Jezuin dhe ‘t’u japim hir’ të varfërve duke qenë mirëdashës dhe të dhembshur me ta. (Prov. 14:31) Nuk duhet të flasim kurrë me përçmim për ata që jetojnë në lagje të varfra ose të ngurrojmë t’u predikojmë. Shumë nga ata që po e pranojnë mesazhin e Mbretërisë, janë njerëz me të ardhura të pakta.
4 T’i ndihmojmë tani: Parimet që mësojnë nga studimi biblik i ndihmojnë të varfrit të lehtësohen nga pasojat e varfërisë që tani. Për shembull, Bibla e dënon dehjen, bixhozin, dembelizmin, pirjen e duhanit dhe të tjera vese si këto që çojnë në varfëri. (Prov. 6:10, 11; 23:21; 2 Kor. 7:1; Efes. 5:5) Shkrimet nxitin ndershmërinë dhe punën «me gjithë shpirt», cilësi të kërkuara nga punëdhënësit. (Kolos. 3:22, 23; Hebr. 13:18) Në të vërtetë, në një anketë, shumica e punëdhënësve e klasifikuan ndershmërinë dhe besnikërinë si cilësitë që u bëjnë më shumë përshtypje te kandidatët për punë.
5 Jehovai nuk është i pandjeshëm ndaj vuajtjeve të të varfërve. Së shpejti, Jezu Krishti do ta çlirojë «të varfrin që thërret për ndihmë». (Psal. 72:12) Deri atëherë kemi privilegjin t’i ngushëllojmë njerëzit, përfshirë edhe të varfrit, me anë të mesazhit shpresëdhënës të Biblës.